Display Style:
Column Style
येँ महानगरपालिकां निःशुल्क एम्बुलेन्स सेवा न्ह्याकल
लहनान्यूज | चौलागा तृतिया ११४१,बैसाख १६ बिहीवाः
येँ महानगरपालिकां निषेधाज्ञाया ईलय् महानगरवासीपिन्त निःशुल्क एम्बुलेन्स सेवा उपलब्ध याइगु जूगु दु ।
महानगरपालिकां थौंनिसें महानगरय् झिगः निःशुल्क एम्बुलेन्स न्ह्याकूगु दु । महानगरपालिकां संयुक्त एम्बुलेन्स चालक संघलिसें थौंनिसें झिगः एम्बुलेन्स निःशुल्क सञ्चालन यायेत सम्झौता याःगु खः ।
निषेधाज्ञाया ईलय् नगरबासीपिन्त स्वास्थ्य समस्या समाधानया नितिं छेँय् अस्पताल, अस्पतालं छेँय् व अस्पतालपाखें अस्पतालतक्क निःशुल्क एम्बुलेन्स सेवा न्ह्याकाःगु महानगरपालिकाया प्रमुख बिद्यासुन्दर शाक्यं धयादिल ।
एम्बुलेन्सं महानगरपालिका दुने २४घौ सेवा बिइगु न्ह्यथंगु दु । मेयर शाक्यं छुंनं कथंया गुनासो मवइगु कथं सेवा बिइत एम्बुलेन्स चालकपिन्त इनाप यानादिगु दु ।
थ्वहे दथुई मेयर बिद्यासुन्दर शाक्यं धार्मिक व सांस्कृतिक थासय् भिडभाड मयायेत इनाप यानादिगु दु ।
मेयर शाक्यं कोरोना संक्रमणया निगूगु झ्वः येँ तच्वंक न्ह्यनाच्वंगुलिं स्वास्थ्य सम्बन्धी मापदण्डया विषयस् सरकारं बियाच्वंगु सूचं त नालाकायेत इनाप यानादिल ।
वय्कलं येँ महानरपालिकाय् यक्वः हे सांस्कृतिक धरोहर द्यः, द्यःग दूगु व उपिन्त पूजापाठ यायेगु चलन दूगुलिं थुजागु थासय् भिडभाड जुइबलय् कोरोना संक्रमण अझ अप्वः न्यनावनिगु व ग्यानापुगु अवस्था वइगुलिं भिडभाड मयायेत इनाप यानादिल ।
मेयर शाक्यं गुगुनं कथंया स्वास्थ्य जटिलता वःसा हटलाइन नम्बर ११८०, मोवाईल नम्बर ९८४९८५६६७२, ९८४९८५६६७१ व कोरोनाया विरामीपिन्त निशुल्क एम्बुलेन्स सेवा माःसा १०२ लय् स्वापू तयेत नं इनाप यानादिल ।
निषेधाज्ञा उल्लङ्घन यापि १९०० गः सवारी साधन प्रहरीया कजय्
लहानान्युज | चौलागा तृतिया ११४१,बैसाख १६ बिहीवाः
कोरोना महामारी नियन्त्रणया लागि यागु निषेधाज्ञा उल्लङ्घन यापि करिब १९ सय सवारीयात प्ररहीं नियन्त्रणय् कागु दु ।
महानगरीय ट्राफिक प्रहरी महाशाखाया कथं न्हिच्छि यक १९२० गः सवारीयात होल्डय् तगु दु ।
महाशाखाया प्रवक्ता श्यामकृष्ण अधिकारीया कथं बिहीवाः सवारी पासविना हे चलेयापि १ हजार ३५५ गः मोटरसाइकलयात नियन्त्रणय् कागु दु।
अथेहे ३८१ गः चिग्वःगु जिप÷कारयात होल्डय् तगु दु । निषेधाज्ञाया थीथी बाहना दयका चलेय यागु १८४ गः तग्वगु सवारीसाधनयात प्रहरी ज्वंगु दु।
कोरोनाविरुद्धया खोप अभियान दित
चौलागा तृतिया ११४१,बैसाख १६ बिहीवाः
कोरोनाविरुद्धया भेरोसेल खोप अभियान स्थगित जूगु दु । स्वास्थ्य सेवा विभागं भेरोसेल खोप बीगु ज्या वैसाख १६ गतेनिसें स्थगित यायेगु निर्णय याःगु खः ।
वैशाख १६ गते नं खोप येँय् निरन्तर न्ह्याकेगु धाःसां छुं ईया लागिं अभियान स्थगित जूगु खः । खोप केन्द्रय् मनूतय् अब्यवस्थित भिडभाडया हुनिं संक्रमणया जोखिम दुगुलिं अभियान स्थगित जूगु खः ।
भेरोसेल खोपया ८ लख डोज चीनं नेपाल सरकारयात अनुदानय् उपलब्ध याकूगु खः । निगूगु चरणया खोप अभियानअन्तर्गत वंगु चैत २५ गतेनिसें भेरोसेल खोप बीगु न्ह्याकूगु खः ।
थुगु खोप १८ दँनिसें ५९ दँ पुचःया मनूतय्त ब्यूगु खः । नेपालय् कोरोनाविरुद्धया कोभिसिल्ड खोप नं छ्यलावःगु दु । कोभिसिल्ड खोपया १० लख डोज भारतं अनुदानय् बीधुंकाः वंगु माघ १४ गतेनिसें खोप अभियान न्ह्याःगु खः ।
बाँकेय् कोरोना थप निम्ह मन्त
लहानान्युज | चौलागा तृतिया ११४१,बैसाख १६ बिहीवाः
वंगु १४ घण्टाय् जक बाँकेय् कोरोना संक्रमणं झीम्ह सी धुकुगु दु।
बुधवाः चान्ह्यया ८ः५५ बजे निसे बिहीवाः सुथय् ८ बजे तक च्याम्ह सी धुकुगु दु
बिहीवाः सुथय् आधा घण्टाया फरकय् निम्हेसिगु ज्यान वंगु दु । थ्व नाप निम्ह थप जुया आः १४ घण्टाय् कोरोना संक्रमणं बाँकेय् झीम्ह सी धकुगु दु ।
बाँकेया कोरोना फोकल पर्सन तेज ओलीया कथं भेरी अस्पतालय् कैलालीया टिकापुर नगरपालिका–१ या ५२ दँ दुम्ह मिसा व नेपालगञ्ज मेडिकल कलेज शिक्षण अस्पताल कोहलपुरय् बाँकेया नेपालगञ्ज–८ या ३३ दँ दुम्ह मिजंम्ह आधा घण्टाय् मदुगु खः ।
कैलालीया ५१ दँ दुम्ह मिसाम्ह बिहीवाः सुथया १० बजे भेरी अस्पतालय् मदुगु खः अथेहे नेपालगञ्ज–८ या ३३ दँ दुम्ह नेपालगञ्ज मेडिकल कलेजय् बिहीवाः सुथया १०ः३० बजे मदुगु धका ओलीं धाःगु खः ।
लुँ तोलां ३०० रुपैयाँ थहावन
शोभा श्रेष्ठ | चौलागा तृतिया ११४१,बैसाख १६ बिहीवाः
थौं बिहीवाः लुँया भाः तोलां ३०० रुपैयाँ थहा वंगु दु ।
नेपाल सुनचाँदी व्यवसायी महासंघया कथं थौं छापावाला लुँ तोलाया ९० हजार ८०० रुपैयाँ व तेजाबी लुँ तोलाया ९० हजार ३०० रुपैयाँ कारोबार जुगु दु धका धाःगु दु।
म्हिगः लुँ तोलाया ७०० रुपैयाँ क्वहा वया तोलाया ९० हजार ५०० रुपैयाँ खरिदबिक्री जुगु खः।
अथेहे वहःया भाः न थौं थहावंगु दु। थौं वहः तोलां झीतका थहावना १३१५ रुपैयाँ कारोबार जुगु दु।
म्हिगः बुधवाः वहः तोलां झीतका क्वहा वयातोलाया १३०५ रुपैयाँ जुगु खः ।
