बाँकेया थीथी अस्पतालय् उपचार यानाच्वपि ११ म्ह कोरोना संक्रमितपि मन्त ।

मंगलवाः ९ बजे चान्ह्य बुधवाः सुथय् १० बजे तक संक्रमितपि सीगु दु धका धागु दु । जिल्लास्तरीय कोरोना संकट व्यवस्थापन केन्द्रया फोकल पर्सन तेज ओलीया  कथं सीपि मध्ये खुम्ह बाँके, स्वम्ह बर्दिया व छम्ह छम्ह सल्यान व कैलालीइ च्वपि खः।

भेरी अस्पताल नेपालगञ्जय् उपचार याना च्वपि नेपालगन्ज उपमहानगर–१६ या ४९ दँ दुम्ह मिसाम्ह बुधवाः सुथय् ८ः३० बजे, बाँकेया नेपालगन्ज उपमहानगर–५ या ४४ दँ दुम्ह मिजंम्ह बुधवाः सुथय् ६ः३० बजे मदुगु खः । अथेहे बाँकेया नेपालगञ्ज मेडिकल कलेजय् उपचार याना च्वपि कोहलपुर नपरपालिका–२ या ३० दुम्ह मिसाम्ह मंगलवाः चान्ह्य ९ः३० बजे, बाँकेया हे कोहलपुर–१० या ४५ दँ दुम्ह मिसाम्ह बुधवाः सुथय् १ः३० बजे, कोहलपुर–११ या ४१ दँ दुम्ह मिजंम्ह बुधवाः सुथय् ४ बजे व कोहलपुर–१४ बाँकेया हे ६४ दँ दुम्ह बुधवाः सुथय् ५ः३० बजे मदुगु खः धका धागु दु ।

अथेहे भेरी अस्पतालय् उपचार याना च्वम्ह गुलरिया–९ बर्दियाया ४७ दँ दुम्ह मिसाम्ह बुधवाः सुथय् ८ बजे, बर्दियाया हे मधुबन नगरपालिका–६ या ५५ दँ दुम्ह मिजंम्ह बुधवाः सुथय् ८ः३० बजे व बर्दिया हे बढैयाताल गाउँपालिका ६५ दँ दुम्ह मिजंम्ह बुधवाः सुथय् १० बजे मदुगु दु ।

थेहे बनगाड कुभिन्डे–६, सल्यानया ५० दँ दुम्ह मिजंम्ह भेरी अस्पतालय् बुधवाः सुथय् ८ः३० बजे मदुगु खः। घोडाघोडी–१ कैलालीया ६० दँ दुम्ह मिजंम्ह नेपालगञ्ज मेडिकल कलेजय् उपचारया झ्वलय् बुधवाः सुथय् ४ः४५ बजे मदुगु धका कोरोना फोकल पर्सनं जानकारी बिगु दु।

 गण्डकी प्रदेशय् विपक्षी गठबन्धनया सरकार गठन जुइगु सम्भावना कमजोर जूगु दु।

राष्ट्रिय जनमोर्चाया गण्डकी प्रदेश संसदीय दलया नेता तक जुयादीम्ह प्रदेशसभा सदस्य कृष्ण थापा पार्टीया निर्णय विपरित वंगुलि बहुमतया सरकार गठन जुगुलि विपक्षी दलपिन्त सकस जूगु दु। जनमोर्चाया सांसद थापाया समर्थन मन्तकि विपक्षी गठबन्धनय् ३० म्ह जक सांसद दइ।

मुख्यमन्त्री गुरुङं राजीनामा बिगुलि प्रदेश प्रमुख सिताकुमारी पौडेलं बहुमतया आधारय् न्हुगु सरकार गठनया लागि स्वन्हुया ई बिगु खः। स्वन्हु बिगु ई थौं क्वचाइ। बहुमतया आधारय् न्हुगु सरकार गठन मजूसा अल्पमतया सरकार गठनया प्रक्रिया न्ह्याइ।

न्हुम्ह मुख्यमन्त्रीइ विपक्षी गठबन्धनपाखे नेपाली कांग्रेसया सांसद कृष्णचन्द्र केसीयात न्ह्यने हगु खः। गण्डकी प्रदेशय् ६० म्ह प्रदेशसभा सदस्यमध्ये नेकपा एमालेया स्वतन्त्र सांसद दिपक मनांगे नाप २८ म्ह सांसद दु।

अल्पमतया सरकार गठन प्रक्रिया सुरु जूसा हाकनं मुख्यमन्त्रीइ पृथ्वीसुब्बा गुरुङ हे दोहरे जुइगु सम्भावना दु। 

बाग्मती प्रदेशया प्रदेशसभा सदस्य पशुपति चौलागाई कोरोना संक्रमणं मन्त ।

नेकपा एमालया नेता चौलागाई मनमोहन मेमोरियल अस्पतालय् उपचारया झ्वलय् मदुगु खः ।

येँ जिल्लाया कोभिड डेडिकेटेड अस्पतालया प्रमुखपिन्सं महामारीया अवस्थाय् अग्रपंक्तिइ दनाः सेवा बियाच्वंपि स्वास्थ्यकःमिपिनिगु मनोबल थकायेत छेँय् स्वयां क्वारेन्टीनय् च्वनेगु प्रबन्ध यानाबीमाःगु धाःगु दु ।

येँ महानगरपालिकाया मेयर विद्यासुन्दर शाक्यलिसे सहलह यासें अस्पतालया प्रमुखपिन्सं ज्या यायेबलय् फीमाःगु पिपिईलिसेंया सुरक्षा सामग्रीया बांलाःगु व्यवस्था यानाबीमाःगु अपेक्षा नं न्ह्यःने तःगु खः । येँ महानगरपालिकाया मेयर शाक्यं येँ जिल्लाया कोभिड डेडिकेटेड अस्पतालया प्रमुखतलिसे खँ ल्हासें महानगरं माःगु ग्वाहालि बीगु धासें छुं कथंया ग्वाहालि माः धकाः न्यनादीगु खः ।

उगु झ्वलय् अस्पताल प्रमुखपिन्सं आः अस्पतालय् अक्सिजनया अभाव जुयाच्वंगुलिइ बः ब्युसें महानगरं आःया लागिं अक्सिजन कन्सन्ट्रेटर न्यानाबीमाःगु व लिपा अक्सिजन प्लान्टत तयावनेजीगु धाःगु खः । उकिया नापं कोभिड व नन कोभिड विरामीया वासः यायेत अस्पतालय् प्राथमिकताया लिधंसाय् आकस्मिक व होल्डिङ् यानाः निगू कथंया संरचना दयेकेमाःगु खँ नं तःगु खः । नापं अस्पतालय् पोर्टेवल एक्स रे मेसिन, अल्ट्रा साउण्ड मेसिन मदुबलय् विरामीयात मेथाय् छ्वयेमाःगु जक मखसें गाक्क उपकरण मदुबलय् कोभिड व ननकोभिड विरामीया नितिं छगः हे मेसिन निसंक्रमण यानाः छ्यलेमालाच्वंगु अवस्थाया बारे जानकारी याकूगु खः ।

अथेहे उगु ज्याझ्वलय् महागनर मेयर शाक्यं मानविय क्षति पनेत दक्वं  छधी जुयाः ज्या यानाः कोभिड संक्रमण नियन्त्रणय् जायेत आह्वान यानादिल ।  ‘झीगु प्राथमिकता संक्रमण व थुकिं जुइगु मानवीय क्षति पनेगु खः । थुकिया लागिं छिकपिन्त माःगु थप स्रोतय् जिमिसं ग्वाहालि याये, छु गुकथंया ग्वाहालि माः धयादिसँ’ शाक्यं धयादिल ।

मेगु थप संयन्त्र दयेकाः स्वयां अस्पतालया क्षमता थकयाः महामारी नियन्त्रण याये अःपुइगु वयकःया धापू खः । अस्पताल वनेम्वाःपिं विरामीत नं आत्ते चायाः अस्पतालय् च्वंवनाब्यूबलय् अस्पतालय् चाप अप्वःगु चर्चा शाक्यं यानादिल ।

उगु सहलहय् त्रि. वि. शिक्षण अस्पतालया कार्यकारी निर्देशक डा. दिनेश काफ्ले, सहिद गंगालाल राष्ट्रिय हृदय केन्द्रया कार्यकारी निर्देशक डा. चन्द्रमणि अधिकारी, शुक्रराज ट्रपिकल सरुवा रोग अस्पतालया निर्देशक डा. सागरकुमार राजभण्डारी, निजामति कर्मचारी अस्पतालया निर्देशक डा. विधाननिधि पौडेल व डा. विमलकुमार थापालिसेंया चिकित्सकं थःथःगु बिचाः तयादीगु खः ।

मंगलबार अधिकांश कम्पनी यागु सेयर भाः थहावंगु दु ।

नेप्से परिसूचक २७ दशमलव ४७ अंकं थहावना २ हजार ६ सय ७३ दशमलव ३१ अंकय् थ्यंगु दु ।

‘क’ वगया कम्पनीपिनिगु भाः कारोबार मापन याइगु सेन्सेटिभ इन्डेक्स न ३ दशमलव १२ अंकं थहा वंगु दु । कारोबार रकम न करिब ६ अर्ब रुपैयाँ थ्यंगु दु ।

थौं ६२ हजार ६५९ कारोबारपाखे २२० कम्पनीया १ करोड ८ लाख कित्ता स्वया अप्वो सेयर किनबेच जूगु दु ।

उगु कारोबार रकम ५ अर्ब ८१ करोड ६ लाख ७३ हजार रुपैयाँ थ्यंगु दु । नेप्सेय् कारोबार जूगु दक्को समूहया सबइन्डेक्सय् थहा वंगु दु ।

दकलय् अप्वो व्यापार समूहया इन्डेक्स ५ दशमलव ७९ प्रतिशतं थहावंगु दु।