Display Style:
Column Style
भारतं नेपाली राजदुतपिनिगु जासुसी यात
दिल्लाथ्व द्धादशी ११४१,साउन ६ बुधवाः
भारतं नेपाःया राजदूतलिसे सार्वजनिक जीवनय् सक्रिय व्यक्तित्वपिनिगु फोनय् जासुसी याःगु खँ सार्वजनिक जूगु दु ।
दिल्ली मिसनय् दुपिं नेपाःलिसे चीन, इरान, पाकिस्तान व साउदी अरबियाया राजदूतपिनिगु फोनय् गैरकानुनी तरिकां ह्याक यानाः नियमित जासुसी यानाच्वंगु खबर सार्वजनिक जूगु दु । इजरायली कम्पनी एनएसओं दयेकूगु जासुसी सफ्टवेयर पेगाससमार्फत हलिंन्यंकं थ्यंमथ्यं ५०द्व फोनया जासुसी याःगु रिपोर्ट सार्वजनिक जूगु दु ।
निगरानीइ राजनीतिकःमि, संवैधानिक आयोगया पदाधिकारी, कूटनीतिज्ञ, पत्रकार व मानवअधिकारकःमित लाःगु दु । एनएसओं आतंकवादी ज्यापहःया सूचं मुंकेगु ताः तयाः पेगासस दयेकूगु रिपोर्टय् उल्लेख यानातःगु दु । तर, भारतय् धाःसा सार्वजनिक जीवनय् सक्रिय व्यक्तित्वया फोनय् पेगाससं हःताः याःगु धागु दु ।
सुं न नागरिकया फोन जासुसी यायेगु गम्भीर प्रकृतिया अपराध खः । नेपामि राजदूतया फोन ट्यापिङया विषयलय् नेपाल सरकारं आःतक छुं न कथंया औपचारिक प्रतिक्रिया मब्यूनि ।
परराष्ट्र मन्त्रालयं फोन जासुसी याःगु बारे भारत सरकारयापाखें जानकारी फ्वनेत दिल्लीस्थित राजदूत नीलाम्बर आचार्ययात निर्देशन ब्यूगु दु ।
थौं वीपीया ३९क्वःगु लुमन्ति दिवस
लहानान्युज | दिल्लाथ्व द्धादशी ११४१,साउन ६ बुधवाः
न्हापांम्ह जननिर्वाचित प्रधानमन्त्री विश्वेश्वरप्रसाद कोइरालाया ३९क्वःगु लुमन्ति दिवस थौं थीथी ज्याझ्वः यानाः हनाच्वंगु दु ।
२०१५ सालया संसदीय निर्वाचनलिपा २०१६ जेठय् वय्क न्हापांखुसि प्रधानमन्त्री जुयादीगु खः । कोइरालां नेपालय् राष्ट्रियता, प्रजातन्त्र व समाजवाद नीस्वनेगु नितिं नेतृत्व यानादीगु खः । वय्कलं बिर्ता उन्मूलन यानाः जग्गायात जोताहाया नामय् वनीगु कथंया भूमिसुधार ज्याझ्वः लागू याकादीगु खः ।
२०१७ साल पुस १ गते जननिर्वाचित सरकार अपदस्थ यायेवं कोइरालालिसेया नेतातय्त सिंहदरबारय् बन्दी दयेकूगु खः । कोइराला, कृष्णप्रसाद भट्टराई, नेता गणेशमान सिंहलिसेंया नेतातय्त सुन्दरीजल बन्दीगृहलय् कुनेयंकूगु खः ।
२०२५ सालय् स्वास्थ्य परीक्षणया नितिं जेलमुक्त जुयादीम्ह कोइरालां च्यादँतक भारतय् निर्वासित जीवन व्यतित यायेमाःगु खः । भारतय् निर्वासित जुयाः प्रजातन्त्र पुनस्र्थापनाया पक्षय् संघर्ष याःबलय् राष्ट्रियता कमजोर जूगु भाःपियाः २०३३ साल पुस १६ गते राष्ट्रिय एकता अले मेलमिलापया नीति ज्वनाः वय्क स्वदेश लिहाँझाःगु इतिहास दु ।
वय्कलं अवलम्बन यानादीगु मेलमिलापया नीति थौं न देशय्या राजनीतिइ उत्तिकं सान्दर्भिक तिनि । नेपाली साहित्यय् मनोवैज्ञानिक यथार्थवादी धाराया प्रवर्तक कोइरालाया छगूत्या दर्जन कृति प्रकाशनय् वःगु दु ।
वय्कया ‘तीन घुम्ती’, ‘मोदी आइन’, ‘हिटलर र यहुदी’, ‘सुम्निमा’, ‘नरेन्द्र दाइ’, अले ‘बाबु, आमा र छोरा’ यानाः छगू उपन्यासलिसे यक्व हे मेमेगु कृति प्रकाशित जूगु दु । १९७१ साल भदौ २४ गते बूम्ह कोइराला २०३९ साउन ६ गते मदुगु खः ।
लुँ तोलां ७०० रुपैयाँ कुहावल
लहानान्युज | दिल्लाथ्व द्धादशी ११४१,साउन ६ बुधवाः
थौं लुँ वहःया भाः कुहावंगु दु।
लुँ तोलां ७०० रुपैयाँ कुहावंगु दु सा वहः तोलां नीतका कुहावंगु दु।
नेपाल सुनचाँदी व्यवसायी महासंघया कथं थौं बुधबाः छापावाला लुँ तोलां ९२ हजार ५०० व तेजाबी लुँ तोलाया ९२ हजार रुपैयाँ तोके यागु दु।
अथेहे वहः तोलां २० रुपैयाँ घटे जुया तोलां १ हजार २६० रुपैयाँ कारोबार जुगु दु धका महासंघ धागु दु।
राष्ट्रपति विद्यादेवी भण्डारीपाखे ईदया लसताय् भिंतुना देछानादील
लहानान्युज | दिल्लाथ्व द्धादशी ११४१,साउन ६ बुधवाः
राष्ट्रपति विद्यादेवी भण्डारी सामाजिक विविधता दुने सुदृढ एकता हें राष्ट्रिय भावनायात अझ बलाके फइगु धका भलसा यागु दु।
मुस्लिम समुदायपिनिगु महान् नखः इद उल अज्हा (बकर इद) या लसताय् भिंतुना बियादीगु दु।
वयकलं भौगोलिक, जातीय व सांस्कृतिक विविधता दुगु नेपाली समाजया मौलिक पहिचान दुगु नखः धका धयादीसे वयकलं विश्वव्यापी महामारी कोभिड–१९ या सङ्क्रमण अझ न कायम दुगुलि थुकिइ बचे जुया जनस्वास्थ्यया मापदण्ड नाप निषेधाज्ञाया नियम पालना यासे सावधानी कथं थुगु नखः हनेत इनाप यागु दु ।
राष्ट्रपति भण्डारीं थुगु नखः सकल नेपाःमि दथुइ थःथम्ह सद्भाव व सहिष्णुता अभिवृद्धि यासे सभ्य, सुसंस्कृत व प्रगतिशील समाज निर्माण याना प्रेरणा प्रदान यायेमाः धका धयादीसे भिंतुना देछानादीगु खः।
स्वास्थ्यया मापदण्ड अपने याना इद पर्व हनेत इनाप प्रम देउवायात
लहानान्युज | दिल्लाथ्व द्धादशी ११४१,साउन ६ बुधवाः
प्रधानमन्त्री नाप नेपाली कांग्रेसया सभापति शेरबहादुर देउवां इस्लाम धर्मावलम्बीपिनिगु नखः इद उल अज्हाया लसताय् सकल नेपाली मुसलमान समुदायपिन्त भिंतुना देछानादीगु दु।
प्रम देउवां बिगु भिंतुना सन्देशय् संयमता, धैर्यता, विश्वशान्ति भाइचाराया सन्देश बिया थुगु नखःपाखे स्वदेश व विदेशय् च्वनाच्वपि सकल नेपाली मुस्लिम समुदायपिनिगु उन्नति, प्रगति व समृद्धिया कामना यानादीगु दु।
कोभिड–१९ या महामारीया कारण झीगु सामाजिक व सांस्कृतिक धरोहरय नखः दक्को छथाय् च्वना हनेत थाकुगुलि देउवां कोभिड–१९ या प्रभाव मजुइमा धासे स्वास्थ्यया मापदण्ड अपने याना इद पर्व हनेत इनाप यागु दु।
