स्वास्थ्य मन्त्रालयया कथं थौं दकलय् अप्वो येँ ५३१ म्हेसित कोरोना सक्रमित जुगु दु धका धागु दु।

अथेहे मोरङय् २५२, झापाय् १७८, सुनसरीइ १६५, यलय् १४७, कास्कीइ १२६ व चितवनय् १२५ म्हेसित कोरोना संक्रमण जुगु दु धका धागु दु। अथेतु, मकवानपुरय् ६८, नवलपरासी पूर्वय् ६१, कैलालीइ ४५, धादिङइ ४४, ख्वपय् ४१, रुपन्देहीइ ३७, पाल्पाय् ३२, बागलुङय् २७, दोलखाय् २३, काभ्रे व सुर्खेतय् २२÷२२ म्हेसित कोरोना संक्रमित जुगु दु।

सप्तरीइ १७, बाराय् १६, तनहुँ व स्याङजाय् १४÷१४ म्ह, रामेछाप, पर्वत व दाङय् १२÷१२ म्ह, नुवाकोटय् ११ व तेह्रथुमय् १० म्हेसित कोरोना संक्रमण पुष्टि जुगु दु धका मन्त्रालयं धागु खः।

वंगु २४ घण्टाया दुने थप ३,१०८ म्हेसित कोरोना भाइरस (कोभिड–१९) या संक्रमण पुष्टि जुगु दु।

देयन्यक १३ हजार १३५ म्हेसिगु नमुना परीक्षण यागुलि उलि संक्रमण पुष्टि जुगु खः। अथेहे २५ म्ह कोरोना सक्रमण सीगु दु धका स्वास्थ्य तथा जनासंख्या मन्त्रालयं धागु दु सा १ हजार ५९५ म्ह कोरोनामुक्त जुगु दु।

मंगलबाः थपे जुगु नाप आःतक नेपालय् कोरोना संक्रमितपि ६ लाख ७० हजार ९९३ म्ह थ्यंगु दु। उकि मध्ये ९ हजार ६०७ म्ह सी धुकुगु दु सा ६ लाख ३४ हजार ९२७ म्ह संक्रमणमुक्त जुइ धुकुगु दु।

प्रधानमन्त्री शेरबहादुर देउवा व सत्ता गठबन्धनया प्रमुख दल नेकपा (माओवादी केन्द्र)या अध्यक्ष पुस्पकमल दाहाल (प्रचण्ड) दथुइ भेटवार्ता जुगु दु।

मंगलबाः सुथय् नेकपा (एमाले)या वरिष्ठ नेता माधवकुमार नेपालयात नापलाये धुका प्रचण्ड बालुवाटार वना प्रधानमन्त्री देउवानाप भेटवार्ता यागु खः।

उगु भेटय् सरकार सञ्चालन व गठबन्धनया साझा नीति व कार्यक्रम क्वछिइगु विषय छलफल जुगु धका धागु दु। माधव नेपाल नाप न थुगु हे विषय छलफल जुगु धका प्रचण्डया सचिवालयं धागु दु।

मेयर मानबहादुर जिसीयागु उपचार खर्चया लागि पोखरा महानगरं १० लाख रुपैयाँ उपलब्ध याइगु जुगु दु।

मस्तिष्कघात जुया येँया बाँसबारी च्वंगु न्युरो अस्पतालय् उपचार जुयाच्वंगु खः। पोखरा महानगरया थौं मंगलबाः च्वंगु ५१ क्वंगु कार्यपालिका बैठकं मेयर जिसीयागु उपचारया लागि रकम उपलब्ध यायेगु निर्णय यागु खः।

थुगु रकम प्रकोप व्यवस्थापन कोषपाखे खर्च यायेगु निर्णय यागु दु धका महनगरया प्रवक्ता धनबहादुर नेपालीं प्रेस विज्ञप्तिपाखे जानकारी बिगु दु। शुक्रबाः सुथय् स्वास्थ्यय् समस्या खनेदुगुलि मेयर जिसीयात उपचारया लागि मणिपाल अस्पताल यकूगु खm।

शुरुइ मेयर सचिवालयं हृदयघात धका सूचना प्रवाह यागु खःसा मणिपालं मस्तिष्कघात जुगु पुष्टि यागु खः। उच्च रक्तचापया कारण नसाय् असर खनेदुगु खः। नसाया हे कारण वयागु म्हया देपाःया भागय् समस्या खनेदुगु खः।

चिकित्सा शिक्षा सुधारया अभियन्ता डा. गोविन्द केसीं न्हुम्ह सरकारया न्ह्यने न्यागु बुँदे माग तःगु दु।

न्हुगु सरकार गठन जुइवं स्वास्थ्य व मेडिकल शिक्षा क्षेत्रय् थीथी समस्या नाप उकिया समाधानया लागि याये माःगु धासे केसीं न्यागु बुँदा सार्वजनिक यागु दु।

केसीं धरानया विपी कोइराला स्वास्थ्य विज्ञान प्रतिष्ठानया पदाधिकारी पदमुक्त यायेमाःगु, चिकित्सा शिक्षा आयोगया पदाधिकारीपिन्त ख्याच्वं बिइपिन्त व नाजायज फाइदा कायेगु स्वइपिन्त कारबाही यायेमाःगु माग तःगु दु।

अथेहे केसीं इलाम वा पाँचथर, उदयपुर व डडेल्धुरा वा डोटी न सरकारी मेडिकल कलेज चायकेमाःगु, चिकित्सा शिक्षा ऐनया प्रावधान सार्वजनिक शिक्षण संस्थाय् ७५ प्रतिशत छात्रवृत्ति बिइमाःगु माग न्ह्यने हःगु खः।