स्वास्थ्य तथा जनसंख्या मन्त्रालयं निषेधाज्ञा छ्वासू वगुलि हाकनं कोरोना संक्रमण अप्वोया वंगु दु धका धागु दु।

मन्त्रालयं छगु विज्ञप्ति जारी यनसे आः हाकनं चुनौतीपूर्ण स्वंगूगु लहर शुरु जुइफु धासे स्वास्थ्य संस्थायात तयारी अवस्थाय् च्वनेत धागु दु। निषेधाज्ञा छ्वासूया वनेवं जनस्वास्थ्यया मापदण्ड उल्लंघन जुयावंगु दु धासे मन्त्रालयं थुगु इलय् कोरोना संक्रमण गुलि घटे जुइमागु खः उलि घटे मजुगु धका उल्लेख यागु दु।

आः झीगु जिल्लाय् ५०० स्वया अप्वो व २६ गु जिल्लाय् २०० स्वया अप्वो सक्रिय संक्रमित दु धासे स्वास्थ्य मन्त्रालयं संक्रमणया जोखिम अझ न दु धका धागु दु। मन्त्रालयया सहायक प्रवक्ता डा. समीरकुमार अधिकारीया कथं खोप केन्द्रय् जुगु हुलं संक्रमणया जोखिम थहावंगु दु। उकिइ मन्त्रालयं खोप कायेत वनेगु इलय् थःगु पालय् कायेगु व जनस्वास्थ्यया मापदण्ड अपने यायेत इनाप यागु दु।

वाःया लिपागु दिं जुगु कारोबारय् नेप्से परिसूचक दोहोरो अंक थहावंगु दु।

थौं बिहीबाः १८.६७ अंक थहावना ३ हजार ०४.३३ अंक थ्यंगु दु। बजारय् जुगु कारोबार रकम धासा झण्डै ११ अर्ब ११ करोड ४१ लाख थ्यंगु दु।

बिहिवाः कुल २२२ कम्पनीया ५ करोड ५९ लाख ६४ हजार कित्ता सेयर कारोबार जुग खः। थौं कुल १ लाख १४ हजार ७७२ गु कारोबार जुगु खः। बिहिवाः कुल १३ उपसमुहया कारोबार जुगुलि ५ उपसमुहया जक भाः थहावंगु खः। बिहीवाः म्युचल फन्ड उपसमुह दकलय् अप्वो ५.२७ प्रतिशत थहावंगु दु।

थौं दकलय् अप्वो लक्ष्मि उन्नति कोषया भाः दकलय् अप्वो १०.०४ प्रतिशत थहावंगु खः। सीइडीबी हाइड्रोपावर बिकास कम्पनी, ङादी ग्रुप पावरया तक सर्किट लेवलय् कारोबार जुगु दु। थौं दकलय् अप्वो हिमालयन पावर पार्टनर, बरुण हाइड्रोपावर, विशाल बजार कम्पनीयो सेयर भाः दकलय् अप्वो कुहावुं दु।

मोरङया उर्लाबारीइ नेकपा एमालेया ओली समूह न ग्वसाः ग्वंगु कार्यक्रम स्थलय् तोडफोड यागु दु।

बिहीबाः नगरस्तरीय विस्तारित बैठकया लागि तयार यागु हलय् तोडफोड जुगु खः। उर्लाबारी–८ या एभरेष्ट फनपार्कय् नगरस्तरीय विस्तारित बैठक सःतूगु खः।

बैठक जुइ न्ह्यः हे अन च्वंगु मेच तोडफोड जुगु दु धका ओली समूहया नगर संयोजक उमाकान्त गौतमं जानकारी बिगु दु। वयकःया कथं तोडफोड सूना यागु धासा सिइमदुनि।

थौं बिहीबाः १२ बजे कार्यक्रम सुरु यायेगु तयारी दुगु खः। तर अज्ञात समूह न ११ बजे हे कार्यक्रम स्थल तोडफोड यागु खः।

नेपालया लागि भारतीय राजदूत विनयमोहन क्वात्रा न नेकपा माओवादी केन्द्रया अध्यक्ष पुष्पकमल दाहाल प्रचण्ड नाप भेटवार्ता यागु दु।

भारतीय प्रधानमन्त्री नरेन्द्र मोदीं प्रधानमन्त्री शेरबहादुर देउवायात फोन याना भिंतुना बिगु कन्ह्य कुन्हु हे राजदूत क्वात्रा प्रचण्ड निवास खुमलटार वंगु खः।

प्रचण्डं बुधबाः स्थायी कमिटी सदस्यपिन्त कंगु राजदूत क्वात्रां न्ह्याम्ह सरकारय् वंसा बालागु सम्बन्ध कायम याना न्ह्यावनेगु धका धागु दु।