येँ महानगरपालिकाया करदातापिन्स आः दक्व प्रकारया कर व सेवा शुल्क छेँ च्वना हे पुलेफइगु जूगु दु ।

येँ महानगरपालिका स्मार्ट सिटी अवधारण अनुरुप डिजिटल प्रविधि न्ह्याकूगुलिं उगु सेवापाखें महाननगरवासीपिं लाभान्विज जुइत ताः लाःगु खः । उगु सेवाया नितिं दकले न्हापां छक्वः उगु सप्mटवेयरय् थःगु विवरण दर्ता यायेमाः । वयाँ लिपाः कनेक्ट आइपीएस, इसेवा, खल्टी पे व फोन पे थेँ जाःगु डिजिटल सेवापाखें मोबाइलं हे थःगु कर व शुल्क पुलेफइगु महानगरं धाःगु दु ।

सम्पत्ति कर, बहाल कर, व्यवसायिक कर, सेवा शुल्क दस्तुर आदि अनलाइनपाखें हे पुलेगु व अनलाइनपाखें हे रसिद नं चुलाइगु धाःगु दु । तर थ्व अनलाइन सेवा नितिं छक्वः वडाय् वना थःम्हेसिन दर्ता यानागु पाय्छि जु कि मजु फोन नं., इमेल वा मेमेगु विवरण पायछि जुल कि मजू धैगु यकिन यायेत वडा वनेमाःगु व थुकिया नितिं बाघौया दुने दक्व ज्या क्वचाइगु राजस्व विभागया प्रमुख डा. शिवराजा अधिकारीं धयादिल ।

प्रविधियुक्त थ्व सेवा ०७७ असोज १ गतेनिसें हे परीक्षण कथं १, २, ३, ४, १०, ११, १५, २६, ३० व ३१ वडा याना १०गू वडाये सेवा न्ह्यानाच्वंगु दु । उगु वडाय् सुथांलाक्क न्ह्यागु हे हुनिं असोज ५ गतेनिसें ५, ६, ७, ८, ९, १२, १४, १६, २८, २९ व ३२ वडा व असोज १३ गतेनिसें ल्यं दनिगु दक्व वडाय् थ्व सेवा न्ह्याःगु दु । थुगु अनलाइनपाखें आःतक्क १गू क्वःति ६०गू लखः राजस्व पुलेधुंकूगु दु ।

राजस्व विभागया प्रमुख डा. अधिकारया कथं महानगर करदाताप्रति उत्तरदायी दु धैगु भलसा कथं थ्व प्रयास यानागु धयादिल । थुकिया प्रयोगं सुशासनय् हःपाः जुइगु करदातापिनिगु डाटाबेस तयार जुइगु व वइगु दँया नितिं राजस्व अनुमान याये फइगु धाल । करदातापिन्सं थ्व सेवा दर्ता याय्बलय् आन्तरिक संकेत व करदाता कोड चुलाइ ।

थ्वहे कोडया लिधंसाय् मोबाइलपाखें राजस्व पुलेफइगु जुइ । उगु कोड सुरक्षित तयातयेत नं वय्कलं इनाप यानादिल ।

स्वनिगलय् हाकन १० दिं निषेधाज्ञा थप यागु दु।

स्वंगु जिल्लाया प्रमुख जिल्ला अधिकारीपिनिगु बैठकं अथे निर्णय यागु खः। बैठकं साउन १० गते तक जारी निषेधायात हे निरन्तरता बिइगु निर्णय यागु दु ।

तर थ्व स्वया न्ह्यः जारी जुगु प्रावधानय् ह्यूपा हःगु मदुनि। स्वास्थ्य मापदण्ड अपने याना चिहाकःगु दुरीया सार्वजनिक सवारीसाधन चले यायेगु व मेमेगु क्रियाकलाप न सञ्चालन याये दइ।

न्यागु विद्यार्थी संगठनं ओली सरकारं यातायातया भाः थकागु तत्काल फिर्ता यायेत सरकार नाप माग यागु दु।

बिहीबाः न्यागु विद्यार्थी संगठनं विज्ञप्ति पिथना यातायातया भाः थकागु लित कायेत सरकारयात माग यागु दु। तत्काल लित मकासा आन्दोलनय् कुहावयेगु धका न्यागु विद्यार्थी संगठनं चेतावनी बिगु खः।

विज्ञप्तिइ धागु दु, ‘सरकारं सार्वजनिक यातायातय् २८ प्रतिशत तक थकागु खः। न्यागु विद्यार्थी संगठनं साउन १ गते कन्ह्यः यातायात व्यवस्था विभागय् वना ज्ञापनपत्र पेश याये धुका आन्दोलनया थप ज्याझ्वःया घोषणा यायेगु धका नेविसंघया महामन्त्री बल्देव तिमिल्सिनां जानकारी बिगु दु।

वाःया लिपागु दिं थौं सेयर बजाःया परिसूचक नेप्से ६.९ अंक थहावंगु दु।

म्हिगः बुधबाः स्थिर जुगु बजाः थौं बिहीबाः धासा कारोबार रकमय् न सुधार खनेदुगु दु। बिहिबाः २२३ कम्पनीया ५ करोड ८५ लाख २ हजार १०९ कित्ता सेयर ७३ हजार २७२ पटक खरिद बिक्री जुगु कारोबार रकम ८ अर्ब १४ करोड ३६ लाख स्वया अप्वो जुगु दु।

बुधबाः ५ अर्ब ६५ करोडया जक सेयर खरिद–बिक्री जुगु खः। बिहीबाः ९ गु कम्पनीया सेयर भाः ५ प्रतिशत स्वया अप्वो थहावंगुलि बैंकिङ, फाइनान्स, जलविद्युत्, माइक्रो फाइनान्स, म्यूचल फण्ड, निर्जीवन बिमा व व्यापार उपसमूह थहावंगु दु। ङादी पावर ग्रुपया सेयर भाः दकलय् अप्वो ९.४० प्रतिशतं थहावंगु दु सा १०.३५ प्रतिशतं कृषि विकास बैंकया डिबेन्चरया भाः ३.९० प्रतिशतं क्वहावंगु दु।

बिहिबाः ङादी नाप रैराङ हाइड्रोपावर, गणपति माईक्रो फाइनान्सया लगानीकर्ता बजारय् तधःगु फाइदा यागु दु। बिहीबाः गोर्खा फाइनान्स कम्पनी दकलय् अप्वो ३६ करोड ६१ लाख रुपैयाँ स्वया अप्वो सेयर किनबेच जुगु दु।

सरकारं साउन ३ गतेया लागि संसद बैठक सःत्येगु सिफारिस यागु दु।

बिहीबाः च्वंगु मन्त्रिपरिषदया बैठकं साउन ३ गते प्रतिनिधिसभाया बैठक सःत्येगु लागि राष्ट्रपति समक्ष सिफारिस यायेगु निर्णय यागु दु धका गृहमन्त्री बालकृष्ण खाँणं जानकारी बिगु दु।

जेठ ७ गते तत्कालीन मन्त्रिपरिषदया सिफारिय् राष्ट्रपति विद्यादेवी भण्डारीं प्रतिनिधिसभा विघटन याना मध्यावधि निर्वाचन घोषणा यागु दु।

तर सर्वोच्च अदालतं संसद पुनःस्र्थापना यायेगु फैसला न्यकूगुलि साउन ३ गते दुने प्रतिनिधिसभाया बैठक सःत्येगु आदेश बिगु खः।