Display Style:
Column Style
निन्हुयंकया बङ्गलादेश भ्रमण क्वचाय्का राष्ट्रपति भण्डारी स्वदेश लिहाँझाल
लहनान्यूज | चिल्लाथ्व दशमी ११४१, चैत्र १० मंगलबाः
राष्ट्रपति विद्यादेवी भण्डारी बंगलादेशया निन्हूयंकया राजकीय भ्रमण क्वचाय्का थौं लिहाँझाःगु दु ।
राष्ट्रपति भण्डारीयात लसकुस यायेत त्रिभुवन अन्तर्राष्ट्रिय विमानस्थलय् उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख अग्नि प्रसाद सापकोटा, राष्ट्रिय सभाया नायः गणेशप्रसाद तिमिल्सिना लगायत पिनिगु उपस्थित दूगु खः ।
भ्रमणया झ्वलय् निगु देयदथुइ पर्यटन ग्वहालि, सरसफाई, सांस्कृतिक आदानप्रदान व रोहनपुर–सिंहबाद रेलमार्ग विषयस समझदारी जूगु खः । परराष्ट्र मन्त्री प्रदीपकुमार ज्ञवालीं भ्रमणया झ्वलय् निगु देय् दथुया राजनीतिक स्वापूयात अझ बाँलाका आर्थिक स्वापूयात फलदायी दयेका यंकेगु सहमति जूगु धयादिल ।
अथेहे उर्जा व्यापारया लागि द्धिपक्षीय सहकार्ययात न्ह्याकेगु, व्यापार प्रबद्र्धन यायेगु व व्यापारयात सन्तुलित दयेकेगु, बंगलादेशं नेपाःयात अपूक व याउँक पारवहन सेवा उपलब्ध यायेगु, कृषि, संस्कृति, पर्यटन लगायतया क्षेत्रय थपूया नितिं निगू देय्या सम्भावत्यतायात निगूलीं देय्या सहकार्यया माध्यमं फयाँफक्व यक्वः उपयोग यायेगु विषयस सहलह जूगु नं धयादिल ।
नेपाःया जलविद्युत बंगलादेशय् निर्यात यायेगु, निगू देय्दथुइ व्यापार वृद्धि व सन्तुलन कायम यायेगु, हवाई सेवाया विस्तार, रेलसेवा लिसें सतक मार्ग सुधार व अन्तरदेशीय जलमार्ग न्ह्याकेगु थेंजाःगु सम्पर्क सञ्जालया विकास यायेगु विषयस तकं सहलह जूगु मन्त्री ज्ञवालीले न्ह्यथनादिल । राष्ट्रपति भण्डारी बंगलादेशया राष्ट्रपति मोहम्मद अब्दुल हमिदया मैत्रीपूर्ण ब्वनाय् सोमबाः ढाका झाःगु खः ।
छगू जक न्यकू दुम्ह गैंडाया ल्याखाय् ज्याः थौंनिसें न्ह्यात
चिल्लाथ्व नवमी ११४१, चैत्र ९ सोमबाः
हलिमय् हे दुर्लभ नालातःगु छगू जक न्यकू दुम्ह गैंडाया ल्याखाय् ज्याः थौंनिसें न्ह्याःगु दु । गणनाया दक्व तयारी पूवनेधुंकूगु चितवन राष्ट्रिय निकुञ्जं न्ह्यथंगु दु ।
क्वछिनातःगु ईसिबें निदँ लिबाक्क न्ह्याःगु गणना चितवन व पर्सा राष्ट्रिय निकुञ्जय् छक्वलं जुइत्यंगु खः । वनमन्त्री प्रेम आले मगरं पर्सा राष्ट्रिय निकुञ्जया प्रतापपुरय् वनदेवीयात पुज्याना गैँडा गणना न्ह्याकेगु ज्याझ्व दूगु चितवन राष्ट्रिय निकुञ्जं न्ह्यथंगु दु ।
गैँडा गणना राष्ट्रिय निकुञ्ज तथा वन्यजन्तु संरक्षण विभागया नेतृत्वय् जुइत्यंगु खः । चितवन व पर्सायात छगू ब्लक दयेकूगु दु । उगु निगू निकुञ्जय् थौंनिसें व बर्दिया राष्ट्रिय निकुञ्जय् चैत १७ गतेनिसें अथेहे शुक्लाफाँटाय् चैत १९ गतेदेखि गणना न्ह्याइ ।
थ्यंमथ्यं २० दिं दुने गणना पूवंकेगु सरकारी आज्जु दु । न्यादँ÷न्यादँय् गैँडा गणना यायेगु धाःसां वंगु दँय् कोरोना व वयाँ न्ह्यः बजेट म्हो जूगु हुनिं गैँडा गणनाया ज्याः दिउगु खः । सन् २०१५ या गणनाय् नेपालय् मुक्कं ६४५ गैँडा दूगु खः । चितवन राष्ट्रिय निकुञ्जय् दक्वले अप्वः ६०५म्ह गैँडा दु ।
थ्वः आर्थिक दँय् जक चितवन निकुञ्जय् प्यम्ह गैँडा चोरी सिकारपाखें व २२म्ह प्राकृतिक कारणं गैँडा सिइधुंकूगु दु । वंगु दँय् २६ गैँडा सीगु खः ।
भारतीय जेलं ४० दँ धुंकाः पिहांवःम्ह दुर्गाप्रसादं थः मांलिसे नापलात
चिल्लाथ्व नवमी ११४१, चैत्र ९ सोमबाः
४० दँ धुंकाः भारतीय जेलं मुक्त जूम्ह इलामया दुर्गाप्रसाद तिम्सिनां थःगु छेँय् वयाः मांयात नापलाःगु दु । वय्कः म्हिगः न्हिनय् इलामस्थित छेँय् थ्यंगु खः । वय्कलं मांयात चाकुमरि ज्वनावःगु खः ।
वय्कःया मामं थः काय् वइ धकाः लँ स्वयाच्वनागु व आः नापलायेखंबलय् नुगः लसतां भय्ब्यूगु धयादिल । कलकत्तास्थित दमदम जेलं शनिबाः रिहा जूम्ह तिम्सिना बसं म्हिगः काँकडभिट्टा थ्यंकादीगु खः ।
इलामं दुर्गाप्रसाद १९ दँ दुबलय् ज्या मामां दार्जिलिङ थ्यंगु खः । दार्जिलिङय् हत्या द्वपनय् ज्वनेधुंकाः वय्कःया थीथी जेलय् तल । सन् १९८२ स वय्कः अदालती सुनुवाइया लागि मानसिक रुपं स्वस्थ मजूगु जिल्ला अदालत दार्जिलिङं धाःगु खः । व धुंकाः जाँचया रिपोर्ट अदालतय् मब्यूबलय् वय्कः ४० दँतक्क कारागारय् च्वनेमाःगु खः ।
कोलकाताको या दमदम कारागारय् दाधेश्याम दास नांया कैदीं वय्कःयात १० दँ न्ह्यः खंगु खः । वंगु जनवरीइ नं दुर्गायात नं दुर्गायात अन हे खनाः न्यनेकने याःबलय् वय्कः ४० दँ न्ह्यःनिसें सुनुवाइविना कारागारय् च्वनाच्वंगु सीदुगु खः ।
राष्ट्रपति भण्डारी बंगलादेश प्रस्थान, नेपाल व बंगलादेश दथुइ थीथी क्षेत्रय् समझदारी जुइगु
लहनान्यूज | चिल्लाथ्व नवमी ११४१, चैत्र ९ सोमबाः
निन्हुया राजकीय भ्रमणया लागिं राष्ट्रपति विद्यादेवी भण्डारी थौं बंगलादेश झाःगु दु । बंगलादेशया राष्ट्रपति मोहम्मद अब्दुल अमिदया मैत्रीपूर्ण ब्वनाय् राष्ट्रपति उखेपाखे झाःगु खः ।
भ्रमणया झ्वलय् नेपाल व बंगलादेश दथुइ थीथी क्षेत्रय् समझदारी जुइ । सांस्कृतिक स्वापू, पर्यटन क्षेत्र, कृषि अले पशुपन्छीयात छ्यलीगु विषादी लिसेंया विषयस सहलह जुइगु सञ्चारमन्त्री पार्वत गुरुङं जानकारी बियादिल ।
अथे हे, रेल्वे, यातायात, बन्दरगाह सुविधायात नेपाललिसे स्वायेगु, बंगलादेशं नेपालयाके विद्युत् न्यायेत यानाच्वंगु पहलया विषयस नं सहलह जुइ । भ्रमणया झ्वलय् राष्ट्रपति भण्डारीं बंगलादेशया राष्ट्रपिता रहमानया सतवार्षिकी जन्म जयन्ती ज्याझ्वलय् नं ब्वति कायेगु ज्याझ्वः दु । राष्ट्रपतिं भण्डारी बंगलादेशी समकक्षीं ग्वसाः ग्वइगु बेलिइ नं ब्वति कयादी ।
अथे हे, राष्ट्रपति भण्डारीं अनया सहिद स्मारकया भ्रमण यायेगु ज्याझ्वः नं क्वःज्यूगु दु । भ्रमण दलय् परराष्ट्रमन्त्री प्रदीपकुमार ज्ञवाली, परराष्ट्र सचिव भरतराज पौडेल व मेपिं छुं उच्च सरकारी अधिकारी व छगू सांस्कृतिक टोली नं दइ ।
वय्कलं ढाकास्थित नेपाली दूतवास भ्रमण यानाः अन दुपिं नेपाली समुदाययात नापलायेगु नं ज्याझ्वः दु । राष्ट्रपति भण्डारी वइगु बुधबाः स्वदेश लिहांझाइ ।
भारतय् कोरोना संक्रमण अप्वोया वःगुलि सचेत जुइत इनाप यात
शोभा श्रेष्ठ | चिल्लाथ्व अष्टमी ११४१, चैत्र ८ आईतवाः
भारतय् कोरोना भाइरस संक्रमितपि अप्वोया वःगुलि नेपाल सरकारं न स्वास्थ्य सुरक्षा सतर्कता ध्यान बिइत इनाप याःगु दु ।
स्वास्थ्य तथा जनसंख्या मन्त्रालयं थौं आइतवाः छगु विज्ञप्ति जारी यासे भारतय् कोरोना भाइरस संक्रमण अप्वोया वःगुलि नेपालय् न संक्रमण अप्वोफु धाःसे सचेत जुइत इनाप याःगु खः।
नेपालय् न संक्रमण अप्वो फुगुलि सभा, गोष्ठी, जुलुस, ¥याली, भेला, जमघट, सेमिनार, बैठक, हुलमुल जुइगु व्यावसायिक ज्या मयायेत मन्त्रालयं इनाप याःगु दु ।
प्रवक्ता डा. जागेश्वर गौतमं छगु विज्ञप्ति पिकया सामाजिक÷भौतिक दूरी, मास्कया अनिवार्य प्रयोग यासे सावं लखं बालाक्क ल्हासिले माःगु, स्यानिटाइजर प्रयोग लगायत जनस्वास्थ्यया मापदण्ड पालना यायेत इनाप याःगु दु।
भारतय् वःगु २४ घण्टाय् ४३ हजार ८४६ म्हेसित कोरोना भाइरस संक्रमण पुष्टि जुगु खः।
