Display Style:
Column Style
मनसुन सक्रिय जूगुलिसे खुसि बाः अले चलःया हुनिं ३३म्ह मनूत मन्त
लहानान्युज | बछलागा अष्टमी ११४१, असार १८ शुक्रवाः
मनसुन सक्रिय जूगुलिसे खुसि बाः अले चलःया हुनिं ३३म्ह मनूत मन्त । स्ववाः थुखय् प्राकृतिक विपत्तिइ लानाः ३०म्ह मनूत बेपत्ता जूगु दुसा ३०म्ह हे मनूत घाःपाः जूगु दु ।
वंगु जेठ ३१ गतेनिसें नेपालय् मनसुन सक्रिय जूगु गृहमन्त्रालयं धागु दु । बुधवाःनिसें मनसुनी फय् हाकन सक्रिय जूगुलिं थप भौतिक व मानवीय क्षति जुइगु सम्भावना दु । केन्द्रं सार्वजनिक याःगु धलः कथं थ्व ईलय् यस विपतय् लानाः ४सः व ७५खा छेँ पूर्ण रूपय् क्षतिग्रस्त जूगु दु ।
सछि व १२खा छेँ आंशिक क्षतिग्रस्त जूगु दु । भौतिक क्षतिपाखे ३६गू सरकारी ज्याकू, खुगू सामुदायिक भवन व ब्वनेकू, २२पु झोलुङ्गे ताँ, १३पु पक्की ताँ, जलविद्युत् आयोजना १३गू, सिँया ताँ न्यापू, निगू वित्तीय संस्था प्राकृतिक विपत्तिया हुनिं क्षतिग्रस्त जूगु केन्द्रं धागु दु ।
थ्व ईलंनिसें पाक्षिक प्रतिवेदन सार्वजनिक यानाः राष्ट्रिय विपत् जोखिम न्यूनीकरण तथा व्यवस्थापन प्राधिकरणं आःतक जूगु क्षतिया व्यवस्थापन व आवलिं उकिया न्यूनीकरण यायेत मंका कुतः यानाच्वंगु धागु दु । जेठ ३१ गतेनिसें असार १५ गतेतक खुसि बाः वयाः १५म्ह, चलखं ल्हानाः ११म्ह, तसिकं वा वयाः छम्ह यानाः २७म्ह मनूत सीगु धलः दु ।
थ्व ईलय् ६सः व ७६खा छेँजः विस्थापित जूगु प्राधिकरणया प्रमुख अनिल पोखरेलं जानकारी बियादिल । दकले उप्वः सिन्धुपाल्चोक व मनाङय् क्षति जूगु प्राधिकरणं धागु दु । सार्वजनिक जूगु प्रतिवेदनकथं इपिं निगू जिल्लाय्ु जूगु मनसुनी प्रकोपया हुनिं मेमेगु २६गू जिल्ला तकं प्रभावित जूगु दु ।
मनसुनी विपतया हुनिं देय्या थीथी राजमार्गत अवरुद्ध जूगु दु । उकिमध्ये गुलिख्य थासय् चलःया चा चिइकेगु कुतः न्ह्यानाच्वंगु दुसा गुलिख्य थासय् यातायात सुचारु याःगु दु ।
थ्वहे दथुई मनसुन सक्रिय जूगुलिसे देय्न्यंकंया यक्व धइथें थासय् मदिक्क वा वयाच्वंगु दु । थौं देय्न्यंकं सामान्यनिसें पूर्ण रुपय् बदली जुइगु जल तथा मौसम पूर्वानुमान महाशाखां धागु दु ।
थ्वहेदथुइ प्रदेश १, प्रदेश २, वाग्मती व गण्डकी प्रदेशया यक्व थासय् मध्यमनिसें तसिक्कं वा वइगु धयाःतःगु दु । थ्वहेकथं आः न देय्न्यंकंया मौसमय् सामान्यनिसें पूर्ण रुपय् बदली जूगु दु । देय्न्यंकं मनसुनी फय् सक्रिय जुयाः उकिया प्रभाव खनेदु ।
थौं तराई भूभागलिक्क मनसुनी न्यून चापिय रेखा दु । यक्व धइथें थासय् मध्यमनिसें तसिकं वा वइगु प्रक्षेपण जूकथं भू–क्षय, चलःया जोखिम न दु । अथेहे खुसि व खुचाय् लःया सतह व बहाव अप्वयेफइगु धागु दु । थ्वहेजुयाः यातायात क्षेत्रनिसें दैनिकी तकं प्रभावित जुइफइगुयात मध्यनजर यानाः माःकथं सतर्कता नालेत महाशाखां इनाप याःगु दु ।
येँ ३१६ म्ह कोरोना सक्रमित पुष्टि
लहानान्युज | बछलागा सप्तमी ११४१, असार १७ बिहिवाः
स्वास्थ्य तथा जनसंख्या मन्त्रालयया कथं थौ दकलय् अप्वो येँ ३१६ म्हेसित कोरोना सक्रमित जुगु दु।
अथेहे झापाय् २४८म्ह, कास्कीइ १८९म्ह, मोरङय् १७६म्ह, सुनसरीइ १२९ म्हेसित कोरोना संक्रमण पुष्टि जुगु दु।
अथेहे यलय् ७४म्ह, रुपन्देहीइ ५७म्ह, ताप्लेजुङय् ५२म्ह, चितवन व मकवानपुरय् ४८÷४८ म्ह, तनहुइ ३९म्ह, नवलपरासी पूर्वय् ३८म्ह, काभ्रेपलाञ्चोकय् ३४म्ह, सिन्धुपाल्चोकय् ३२म्ह, नुवाकोटय् ३०म्ह, ख्वपय् २९म्ह, बागलुङय् २८ म्ह व लमजुङय् २५ म्हेसित कोरोना संक्रमितपि थपे जुगु दु।
पाँचथर व दाङय् १८÷१८ म्ह, जुम्ला व सुर्खेतय् १६÷१६ म्ह, स्याङजाय् १५म्ह, सिरहाय् १४म्ह, सप्तरी, दोलखा व गोरखाय् १२÷१२ म्ह, धनुषाय् ११म्ह, पाल्पाय् १० म्हेसित कोरोना संक्रमण जुगु दु धका मन्त्रालयं धागु दु।
थप २७६० म्ह कोरोना सङ्क्रमण पुष्टि
लहानान्युज | बछलागा सप्तमी ११४१, असार १७ बिहिवाः
नेपालय् कोरोना भाइरस सङ्क्रमणपाखे मुक्त जूपि ६ लाख स्वया अप्वो थ्यंगु दु। वंगु २४ घण्टाय् ४ हजार १७ म्ह कोरोना सङ्क्रमणमुक्त जुगु दु ।
थ्व नाप आःतक कोरोनामुक्त जुपिं ६ लाख १४९ म्ह थ्यंगु दु धका स्वास्थ्य तथा जनसङ्ख्या मन्त्रालयं धागु दु। वंगु २४ घण्टाय् २७६० म्हेसित कोरोना सङ्क्रमण पुष्टि जुगु दु।
७१३० म्हेसिगु नमुना पीसीआर परीक्षण यागुलि १८५७ म्ह व ३ हजार ८५५ म्हेसिगु एन्टिजेन परीक्षण यागुलि ९०३ म्ह सङ्क्रमण पुष्टि जुगु धका मन्त्रालयं धागु दु। अथेहे थप ३३ म्हेसित कोरोना सङ्क्रमणया कारण ज्यान वंगु दु ।
थ्व नाप आःतक सीपि ९१४५ म्ह थ्यंगु दु।
नेप्से १९ दशमलव १२ अङ्क थहावंन
लहानान्युज | बछलागा सप्तमी ११४१, असार १७ बिहिवाः
वंगु छु दिंनिसे लगातार घटे जुयाच्वंगुे शेयर बजाः परिसूचक नेप्से थौं बिहीवाः सामान्य थहावंगु दु।
नेप्से थौं १९ दशमलव १२ अङ्क थहावना २८४३ विन्दुइ थ्यंगु दु। थौं निर्जीवन बीमाबाहेक दक्को समूहया शेयर सामान्य थहावंगु दु।
बैंकिङ समूहया शेयर ३ अङ्क, विकास बैंकया १५२ अङ्क, व्यापारय् १९, होटल समूह १३८ व जलविद्युत् समूहया शेयर २१ अङ्कं थहावंगु दु।
अथेहे फाइनान्स समूहया शेयर ६३ अङ्क, माइक्रो फाइनान्स व उत्पादनय् २÷२ अङ्क, मेमेगु ३७, जीवन बीमा समूहय् ७४ व लगानी समूहया शेयर १०७ अङ्क थहावंगु दु।
थौं २२४ कम्पनीया ३ करोड २८ लाख कित्ता शेयर ६ अर्ब ७० करोड रुपैयाँ कारोबार जूगु दु। दकलय् अप्वो नेको इन्स्योरेन्स कम्पनीया ३० करोड ७२ लाख रुपैयाँ शेयर किनबेच जुगु दु।
थौं ओरियन्टल होटल, गुडविल फाइनान्स, ग्रिन डेभलपमेन्ट बैंक व सिन्धु विकास बैंकको शेयर ९ प्रतिशत स्वया अप्वो थहावंगु दु। समग्र बजार थहावंसा थौं कुमारी इक्विटी फन्डया शेयर साढे तीन प्रतिशतं घटे जुगु दु।
विपक्षी गठबन्धनया विद्यार्थी संगठनं बिरोध प्रदर्शनयात
मन्जीत महर्जन | बछलागा सप्तमी ११४१, असार १७ बिहिवाः
विपक्षी गठबन्धनया विद्यार्थी संगठनं थौं बिहीवाः येँया भृकुटीमण्डप प्रदर्शनीमार्गय् सरकारविरुद्ध प्रदर्शन यागु दु।
नेपाली कांग्रेस, नेकपा माओवादी केन्द्र, नेकपा एमालेया माधवकुमार नेपाल समूह, जनता समाजवादी पार्टीया उपेन्द्र यादव समूह व राष्ट्रिय जनमोर्चाया विद्यार्थी संगठनं प्रदर्शनीमार्गय् प्रधानमन्त्रीया पुत्ला दहन याना प्रदर्शन यागु दु।
उगु झ्वलय् प्रहरीं पुत्ला लाकाया स्यागु खः। उगु झ्वलय् भचा प्रहरी व प्रदर्शनकारी दथुइ झदप जुगु खः।
प्रधानमन्त्री केपी शर्मा ओलीं प्रतिनिधिसभा विघटन यागुया विरोधय् विपक्षी गठबन्धनं सतक आन्दोलन सुरु यागु खः।
किपा मन्जीत महर्जन
