विपक्षी न्यागु दलीय गठबन्धननिकट विद्यार्थीपिन्स म्हिगः सरकारविरुद्ध प्रदर्शन यागु दु।

सरकारया ‘असंवैधानिक’ कदमविरुद्ध प्रदर्शन यागु खः। उमिसं मसाल जुलुस पिकागु खः।

मसाल जुलुस पिकायेगु झ्वलय् प्रदर्शनकारी आरती लामा व नेपाललाइभया फोटो पत्रकार निमेषजंग राई घाइते जुगु दु।

अथेहे, फोटो पत्रकार क्लब, नेपालया फोटो पत्रकार राईया पुलिइ घाः जुगु दु।

फोटो मन्जित महर्जन

स्वनिगलय् वंगु २४ घण्टाय् थप ३७६ म्हेसित कोरोना संक्रमण पुष्टि जुगु दु।

वंगु २४ घण्टाय् १० हजार १३३ म्हेसिगु स्वाब नमुनाया परीक्षण यागुलि देयन्यक २ हजार ३२८ म्हेसित संक्रमण खनेदुगु दु।

उकि मध्ये स्वनिगलय् जक ३७६ म्ह संक्रमित जुगु दु। वंगु २४ घण्टाय् थप संक्रमित जूपि येँ जक २४६ म्ह पुष्टि जुगु खः।

अथेहे यलय् ८१ म्ह व ख्वपय् ४९ म्ह संक्रमितपि थपे जुगु खः।

नेकपा एमाले नं साउनया लिपागु वाः दुने विधान सम्मेलन याइगु जुगु दु। नाप निर्वाचन ल्वात धासा महाधिवेशन वैशाखय् सरे यायेगु प्रस्ताव पेश यागु दु।

अध्यक्ष केपी शर्मा ओली पक्षया नेतापि जक सहभागिता दुगु केन्द्रीय कमिटी बैठकं साउन २५ गते विधान सम्मेलन यायेगु निर्णय यागु खः। असार मसान्त दुने सदस्यता नवीकरण यायेगु व केन्दीय विभागयात पूर्णता बिइगु निर्णय यागु दु।

अथेहे भदौ ५ गते वडा व १५ गते पालिकाया अधिवेशन यायेगु कार्यतालिका दयकूगु धका जानकारी बिगु दु।

बैठकय् महासचिव ईश्वर पोखरेलं निर्वाचनया मिति नाप ल्वात धासा  झीक्वःगु महाधिवेशन धासा वइगु वैशाख मसान्त तक प्रस्ताव पेश यागु दु।

थ्व स्वया न्ह्यः झीक्वःगु राष्ट्रिय महाधिवेशन मसिर २ निसे ६ तक यायेगु निर्णय यागु खः।

वंगु २४ घण्टाय् थप २,३२८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक ५,८३७ म्हेसिगु पीसीआर परीक्षणय् १५२७ म्ह व ४२९६ म्हेसिगु एन्टिजेन परीक्षणय् ८०१ म्ह याना २,३२८ म्हेसित संक्रमण पुष्टि जुगु दु। व.गु २४ घण्टाय् ३,०६६ म्ह कोरोना संक्रमणमुक्त जुगु दु ।

अथेहे १९ म्ह सक्रमणं सीगु दु। आःतक कोरोना भाइरसया सक्रिय संक्रमितपि २७ हजार ७१६ म्ह दु।

उकि मध्ये २४ हजार ६७५ म्ह होम आइसोलेसनय् व ३०४१ म्ह होम आइसोलेसनय् च्वना च्वंगु दु।

पृथ्वी राजमार्ग अन्तर्गत धादिङया बेनीघाट रोराङ गाउँपालिका वडा नम्बर १० जवाङ खुसिइ वगु चलखं न्यागः सवारी साधन ल्हाना निम्ह मनू सीगु दु।

अथेहे मेपि खुम्ह घाइते जुगु दु। ना ८ ख ४५४० नम्बरया ट्रकय् च्वपि चितवनया राप्ती नगरपालिका ६ च्वम्ह अन्दाजी १८ दँ दुम्ह बिरबल प्रजा व ना ७ ख ३२० नम्बरया कन्टेनरय् भारतया ४३ दँ दसम्ह सोनी देवी सीगु खः।

हिरो बा १२ च ७१५६ नम्बरया म्याजिक भ्यान, ना ७ ख ३२० नम्बरया कन्टेनर, बा १ ग २८३१ नम्बरया ट्रक, ना ८ ख ४५४० नम्बरया ट्रक व पीएन २८ एए ०१२० नम्बरया ट्रक ल्हागु दु धका जिल्ला प्रहरी कार्यालय धादिङं धागु दु।

घटनास्थलय् उद्धारया लागि इलाका प्रहरी कार्यालय गजुरी व इलाका प्रहरी कार्यालय बेनीघाटपाखे डिएसपीया कमाण्डय् प्रहरी परिचालन यागु खः। स्थानीय सरकार व सतक विभागया टोलीपिन्स खोज व उद्धारय् खटे जुगु दु धका प्रहरीं धागु दु ।