स्वनिगः दुने जक सक्रिय संक्रमितपि २२ हजार ४४ म्ह दु। उकि मध्ये येँ जक १३ हजार १५९ म्ह सक्रिय संक्रमितपि दु।

आःतक यलय् ५११८ व ख्वपय् ३७६७ सक्रिय संक्रमितपि दु। अथेहे स्वनिगः दुने लिपागु २४ घण्टाय् ९३७ म्हेसित संक्रमण पुष्टि जुगु दु ।

२४ घण्टाया दुने १६ हजार ८१४ गु स्वाब नमुना परीक्षण यागुलि देयन्यक ५ हजार ४२ म्हेसित संक्रमण पुष्टि जुगु धका स्वास्थ्य तथा जनसंख्या मन्त्रालयं धागु दु।

लिपागु २४ घण्टाया दुने देयन्यक ३ हजार ५४० म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयं बिगु जानकारी कथंथीथी जिल्लाय् यागु ११ हजार ४७१ म्हेसित पीसीआर परीक्षणय् ३ हजार ५४० म्हेसित कोरोना पुष्टि जुुगु दु।

अथेहे, ५ हजार ३४३ एन्टिजेन परीक्षणय् १ हजार ५०२ म्ह कोरोना संक्रमण खनेदुगु खः।  अथेहे, २४ घण्टाय् जक ८ हजार २४३ म्ह कोरोना संक्रमणमुक्त जुगु दु। थ्व नाप आःतक कोरोना संक्रमणमुक्त जुपि ४ लाख ८४ हजार ३७३ म्ह थ्यंगु दु।

नेपालय् सक्रिय संक्रमितपि ९२ हजार ९२८ म्ह दु। क्वारेन्टाइन आः ७३० म्ह च्वना च्वंगु दु।मन्त्रालयं बिगु जानकारी कथं देयन्यक थप ६८ म्हेसिगु ज्यान वंगु दु। थ्व नाप आःतक नेपालय् कोरोनां सीपि ७ हजार ७९९ म्ह थ्यंगु दु।

बालमन्दिर नक्साल व सिफलय् च्वपि ५२ म्ह मस्त कोरोना संक्रमणमुक्त जुया कीर्तिपुर अस्पतालं डिस्चार्ज जुगु दु।

बाल गृहय् च्वनाच्वपि मस्त झीन्हु न्ह्यः जक कोरोना संक्रमण पुष्टि जुगु खः । कोरोना संक्रमण जुइवं कीर्तिपुरको आयुर्वेदिक अस्पतालया आइसोलेसन सेन्टरय् भर्ना जुगु खः।

थौं शनिवाः बालमन्दिरय् हे लिहावंगु दु। अस्पतालं डिस्चार्ज जुइगु इलय् स्वास्थ्यकर्मीपिन्स प्याँखः हुला म्ये हाला मस्त बिदा यागु खः।

पर्साया वीरगञ्ज महानगरपालिका दुने असार १ गतेनिसे विद्यालय खुले याइगु जुगु दु।

असार १ गतेनिसे कक्षा ८ स्वया च्वयागु कक्षा सञ्चालन यायेगु निर्णय जुगु दु धका महानगरपालिकाया प्रमुख प्रशासकीय अधिकृत प्रदिपकुमार निरौलां धागु दु।

विद्यार्थीपिनिगु शैक्षिक भविष्य अन्यौल मजुइकेगु रणनीति कथं असार १ गतेनिसे कक्षा सञ्चालन यायेगु निर्णय जुगु धका धागु दु। विद्यालय भौतिक उपस्थिति याना ब्बकेत विद्यार्थीयया अभिभावकपिनिगु लिखित सहमति कायेगु व स्वास्थ्य सुरक्षाया मापदण्डयात अनिवार्य पालना याये मागु धका महानगरपालिकाया शैक्षिक प्रशासन महाशाखाया प्रमुख अरविन्दलाल कर्णं विज्ञप्ती पिकया जानकारी बिगु खः।

अथेहे वीरगञ्ज महानगरपालिका दुने विद्यालय असार १ निसे ७ गते तक विद्यार्थी भर्ना लगायत व्यवस्थापकीय ज्या जुइ धका धागु दु। थ्व हे असार ८ निसे १५ गते तक भर्ना सप्ताह अन्तर्गत छेँ छेँ वना ज्याझ्वः सञ्चालन यायेगु महानगरपालिकां निर्णय यागु दु। असार १५ गते लिपा नियमित रुपं दक्को विद्यालय खोले यायेगु तयारी दु धका महानगरपालिकां विज्ञप्ति पिकया धागु दु।