Display Style:
Column Style
लुँ तोलां ७०० थहावंन
रसिया श्रेष्ठ | कछलागा एकादशी ११४१,जेष्ठ २३ आईतवाः
थौं आइतवाः लुँया भाः तोलां न्ह्यसः थहावंगु दु।
वंगु शुक्रवाः छन्हु हे झीन्यासः क्वहावंगु खःसा थौं न्ह्यसः थहावंगु दु धका नेपाल सुनचाँदी व्यवसायी महासंघं धागु दु।
आइतवाः छापावाल लुँया भाः तोलां ९४ हजार एक सय रुपैयाँ ताके यागु दु। शुक्रवाः छापावाल लुँ ९३ हजार चार सय रुपैयाँ कारोबार जुगु खः।
आइतवाःया लागि तेजावी लुँया भाः तोलां ९३ हजार ६ सय रुपैयाँ तोके यागु दु। शुक्रवाः छापावाल लुँ तोलां ९२ हजार ९ सय रुपैयाँ कारोबार जुगु खः।
आइतवाः वहः तोलां झीन्यातका थहावंगु दु। शुक्रवाः तोलां आः १३४० रुपैयाँ खरिद बिक्री जुगु खःसा थौं आइतवाः १३५५ रुपैयाँ तोके यागु खः ।
कृष्ण थापां सर्वोच्चय् दायर यागु रिटय् थौं सुनुवाइ जुइगु
रसिया श्रेष्ठ | कछलागा एकादशी ११४१,जेष्ठ २३ आईतवाः
सांसद पदमुक्त जुम्ह गण्डकी प्रदेश सभा सदस्य कृष्ण थापां सर्वोच्चय् दायर यागु रिटय् थौं सुनुवाइ जुइगु दु।
थापां थःगु सांसद पद खारेज यागु जनमोर्चाया निर्णय बदर याये मागु माग यासे सर्वोच्चय् रिट बिगु खः। उगु रिटया पेसी थौं तोके यागु दु। थापायागु रिट निवेदनय् सांसद पद यथावत जुइमागु धका धागु खः।
पार्टी निर्देशन विपरीत गण्डकीया मुख्यमन्त्री पृथ्वीसुब्बा गुरुङ नेतृत्वया सरकार बचे यायेत जुगुलि जनमोर्चाले कारबाही यागु खः।
पेट्रोलियम पदार्थया भाः थकाल
रसिया श्रेष्ठ | कछलागा एकादशी ११४१,जेष्ठ २३ आईतवाः
नेपाल आयल निगमं पेट्रोलियम पदार्थया भाः थकागु दु।
डिजल, पेट्रोल, मचिक व आन्तरिक हवाई इन्धनया भाः छगु लिटरय् नितका थहावंगु दु धका नेपाल आयल निगमं धागु दु।
भाः थहावनेवं स्वनिगः दुने पेट्रोलया लिटरं १२५, डिजल व मचिकं १०८ नाप हवाई इन्धन आन्तरिकपाखे लिटर ८० रुपैयाँ थ्यंगु दु धका निगमं धागु दु।
निषेधाज्ञाया दुने वंगु जेठ २ गते निगम इन्धनया भाः थकागु खः।
बरिष्ठ कलात्मक हस्तकलाया कलाकार नाप मूर्तिकार राजकुमार शाक्य मन्त
लहानान्युज | कछलागा दशमी ११४१,जेष्ठ २२ सनिवाः
नेपाःया नांजाःम्ह यलया गौरव बरिष्ठ कलात्मक हस्तकलाया मूर्धन्य कलाकार नाप मूर्तिकार राजकुमार शाक्य थौं शनिवाः सनिलय् आकाझाकां सुमेरु अस्पतालय् वासः यायेगु झ्वलय् मन्त ।
मदुम्ह शाक्य कोरोना भाइरस संक्रमण जुयाः वासः यानाः लनेधुंकूगु व प्यन्हु न्यान्हु न्ह्यः हाकनं स्वास्थ्यय् गडबडी वःगुलिं अस्पताल भर्ना जुयादीगु खः। परम्परागत हस्तकलायात सीमित थःपिनिगु छेँजः दुने जक लिमकुंकूसे सार्वजनिक रुपं सकलसिनं खुल्ला रुपं ज्या सयेकेकेगु अधिकार दयेमाः व उगु कलायात जीवनय् उपयोगी कथं छ्यलेमाः धैगु विचारधारा प्रेरित जुयाः यक्वःसित मदुम्ह शाक्यं कला प्रशिक्षण बियादिगु खः।
मदुम्ह शाक्य भुटानय् ११५ फिट तःधिकःम्ह पद्मसम्भव गुरुया मूर्ति पलिस्थाया छम्ह न्ह्यलुवा जुयादीम्ह खःसा वय्कःया ज्यापाखें अतिकं प्रभावित जुयाः भुटानया राजकीय सम्मान तकं कायेत ताःलाःम्ह हस्तकला कलाकार खः । वय्कलं आपालं हे सम्मान लिसें सिरपाःत त्याकादी धुंकूगु दुसा नेपाल सरकारपाखें मदुम्ह कलाकार राजकुमार शाक्ययात गोरखा दक्षिण बाहुपाखें नं सम्मानित यायेधुंकूगु दु ।
मदुम्ह राजकुमार शाक्यया जहानलिसें निम्ह काय् दी ।
खोप केन्द्र क्वजिइत दक्वः वडायात महानगरया पत्राचार
लहनान्यूज | कछलागा दशमी ११४१,जेष्ठ २२ सनिवाः
येँ महानगरपालिकां वइगु जेठ २५ गतेनिसें ६०दँ निसें ६४दँ दुपिन्त कोभिड १९ विरुद्धया खोप अभियान न्ह्याकेत खोप केन्द्रया नां व थाय् क्वजिना हयेत वडा खोप समितियात पत्राचार याःगु दु ।
स्वास्थ्य तथा जनसंख्या मन्त्रालयं जेठ१८ गतेया निर्णया लिधंसाय् जिल्ला जनस्वास्थ्य ज्याकू व यँे महानगरपालिकाया शहरी स्वास्थ्य तथा खाद्य पदार्थ नियमन विभागं दक्व वडाय् छगू÷छगू खोप केन्द्र न्ह्याकेगु निर्णया याःगु दु ।
उगु हे निर्णय कथं वडाय् खोप केन्द्र निस्वनेत पत्राचार याःगु खः । उगु उमेर समूहया मनुपिन्त चिनियाँ खोप भेरोसेलया न्हापांगु मात्रा बिइगु जुई । सरकारं खोप ज्याझ्वः अन्तर्गत न्हापांखुसी महामारी कजय् कायेया नितिं न्ह्यलुवा कथं ज्या याइपिं, वयाँलिपाः ६५दँयसिबें च्वय्पिन्त व स्वंगुगु झ्वलय् १८दँनिसें ५९दँ दुपिन्त खोप अभियान न्ह्याकूगु खः ।
लिपांगु पटक चीनं बिउगु झिगू लखः डोज खोप बिइत्यंगु खः ।
