कोरोना भाइरस (कोभिड–१९) संक्रमितपिन्त निःशुल्क उपचार आः सरकारी अस्पतालय् जक याइगु जुगु दु ।

थ्व स्वया न्ह्यः मेडिकल कलेजय्न उपचारया व्यवस्था याना तःगु खः । स्वास्थ्य तथा जनसंख्या मन्त्रालयं दक्को अस्पतालय् परिपत्र छ्वया आः सरकारी अस्पताल जकक कोभिड १९ उपचार अस्पतालयात जक तोके यासे सेवा प्रवाहया व्यवस्थापन याःगु दु ।

तोके यागु मेडिकल कलेजय् आःतक भर्ना जुया उपचार याना वयाच्वपि संक्रमितपिन्त थौंया दिंनिसे झीन्हु तक नियम कथं शोधभर्ना उपलब्ध यायेगु धका मन्त्रालयं धाःगु दु ।

लुँ तोलां थौं प्यसः क्वहावःगु दु ।

म्हिगः बुधवाः लुँ तोलां ९१ हजार ९ सय रुपैयाँय् कारोबार जुगु छापावाल लुँ थौं बिहीवाःया लागि ९१ हजार ५ सय रुपैयाँ कायम जुगु दु धका नेपाल सुन चाँदी व्यवसायी महासंघ धाःगु दु।

अथेहे तेजावी लुँ तोलाया ९१ हजार रुपैयाँ कायम जुगु दु।

अथेतु थौं वहः तोलाय् न नीन्यातका क्वहावःगु दु । म्हिगः बुधवाः १३४० रुपैयाँय् कारोबार जूगु वहः थौं नीन्यातक क्वहावया १३१५ रुपैयाँ कायम जुगु दु ।

नेकपा प्रचण्ड–माधव समूहया नेतृ रामकुमारी झाँक्रीयात ज्वनेगु लागि प्रहरी वयागु छेँय् वःगु दु ।

अथेहे झाँक्रीया समर्थक नाप प्रचण्ड–माधव समूहया कार्यकर्तापि वया ज्वनेत्यःगुलि वया विरोधय् नाराबाजी यानाच्वंगु दु। नेकपा कार्यकर्तापि पञ्चा सिंह, सुदेश पराजुली, आरती लामा लगायत रामकुमारीया निवास शंखमुलय् भेला जुया सरकार व प्रहरी प्रशासन विरुद्ध नाराबाजी यानाच्वंगु दु।

राष्ट्रपतिबारे बिःगु अभिव्यक्तियात कया महानगरीय प्रहरी महाशाखाया टोली झाँक्रीयात ज्वनेगु लालि वःगु खः। झाँक्रीं न धाःसा थ्व राजनीतिक मुद्दा जुगुलि पक्राउ पूर्जी कया वयेत प्रहरीयात इनाप याःगु खः । थ्व स्वया न्ह्य महाशाखां झाँक्रीयात न्यने कने यायेगु लागि सःतूगु खः, तर झाँक्री न प्रहरी वनेत अस्वीकार याःगु खः।

गोरखाय् जुगु छगु ज्याझ्वलय् राष्ट्रपतिबारे यागु छगु टिप्पणीयात कया नेकपा ओली समूह सम्बद्ध अनेमसंघ नं रामकुमारीयात कारबाही यायेत माग याःगु दु ।

किपू नगरपालिका नं थःगु नगरपालिका दुने स्थानीय विषयय् नेपालभाषं हे ब्वंकीगु जूगु दु । उकिया निति पाठ्यक्रम व पाठ्यसफू तयार यायेगु ज्या जुइ धुकुगु दु धका किपू नगरपालिकाया उपमेयर सरस्वति खड्का रिजालं लहानान्युजयात जानकारी बियादीगु दु।  किपुलिइ अप्वो थे वसोवास नेवाःतय्गु दुगुलि व नेपालभासं हे ब्बकेगु तयारी याये त्यःनागु खः धका उपमेयर खड्का धयादीगु खः ।

स्थानीय भासयात मान्यता बिःगु कथं न स्थानीय विषय ब्वंकेगु व्यवस्था यायेत्यनागु धका धयादिगु खः । याकन हे शिक्षक व विद्यार्थीपिन्त नेपालभासं च्वयेगु व ब्वंकेगु तालिम समेत बीइगु तयारी यानाच्वंगु दु। न्हापा किपू नगरपालिकां स्थानीय पाठ्य–क्रम नेपाली भाषां न तयार याना तःगु खःसा आः नेपालभासं न  तयार यायेगु ज्या जुयाच्वंगु दु धका धयादीगु दु ।

नेपालभासया निति किपू नगरपालिकया शिक्षा समितिया दुजःपिं डा. धर्मराज डंगोल, वज्रमुनि वज्राचार्य व जुजुभाइ महर्जनपिन्स पाठ्यसफू तयार याना च्वंगु दु । किपु नगरपालिकाय् निजी व सामुदायिक स्कूल ४० गू स्वयां अप्वः दुगु खँ उप–मेयर सरस्वती खड्कां कनादिगु दु ।

येँ महानगरपालिका नेपालभासं पाठ्यसफू तयार याना ब्बकेगु सुरु यायेव मेमेगु नपाय् नं नेपाल–भाषां ब्वंकेगु तयारी जुयाच्वंगु दु ।