नेपाल कम्युनिस्ट पार्टी (नेकपा) प्रचण्ड–नेपाल समूह नं बिहीवाःनिसे देयन्यक आमहड्तालया घोषणा याःगु दु ।

नेकपा केन्द्रीय संघर्ष समितिं थौं छगु पत्रकार सम्मेलन यासे कन्ह्यःनिसे आमहड्ताल यायेगु घोषणा याःगु दु । संवैधानिक आयोगय् सिफारिस जुपि पदाधिकारीपिन्स संसदीय सुनुवाइ बिना हे थौं सुथय् पद व गोपनीयताया शपथग्रहण याःगु खः।

उकिया विरोधय् आमहड्ताल घोषणा याःगु खः। सरकारं वःगु मंसिर ३० गते अध्यादेश हया संवैधानिक आयोगय् खाली जूगु पदय् सिफारिस याःगु खः ।

असंवैधानिक तरिकां अध्यादेश हया नियुक्त याःगु संवैधानिक निकायया पदाधिकारीपिन्त शपथ नका जबर्जस्ती नाटक यागु धका संघर्ष समितिया सह–संयोजक पम्फा भुसालं धाःगु खः।

उगु समूह न बुधवाः हे मसाल जुलुस यायेगु धका थौं जुगु पत्रकार सम्मेलनय् जानकारी बिःगु दु ।

नेपाल कम्युनिस्ट पार्टी (नेकपा) या ओली पक्षं अखिल नेपाल महिला सङ्घ (अनेमसङ्घ) नं नेकपा प्रचण्ड–माधव पक्षया नेतृ नाप विघटित प्रतिनिधि सभा सदस्य रामकुमारी झाँक्रीयात ज्वना कारबाही याये माःगु माग याःगु दु ।

थौं बुधवाः गृहमन्त्री रामबहादुर थापायात ज्ञापन पत्र बुझे यासे अखिल नेपाल महिला सङ्घं माघ १६ गते गोरखाया सिरानचोक गाउँपालिकाय् छगू ज्याझ्वलय् नेकपा प्रचण्ड–माधव पक्षया नेतृ रामकुमारी झाँक्रीं राष्ट्रपति विद्यादेवी भण्डारीया चारित्रिक हत्या याःगु धाःसे ज्वना कारबाही याये माःगु माग याःगु दु ।

उगु ज्ञापन पत्रय् नेतृ झाँक्रीं राष्ट्रपति भण्डारीया चारित्रिक हत्या यासे थीथी द्धपः बिया बेइज्जती यागु नाप व्यक्तिगत, पारिवारिक व राष्ट्रपतिया हे इज्जतय् तक धक्का जुइ नियतपाखे हे आपत्तिजनक व अपमानजनक शब्द छ्यगुलि ज्वना कानुनबमोजिम कारबाही याये माःगु माग याःगु खः।

अनेमसङ्घया नेतृ सुजिता शाक्यं झाँक्री नं राष्ट्रपति संस्थाय् हे अपमानजनक व्यवहार याःगुलि तत्काल कारबाही यायेत माग याःगु दु।

लुँया भाः थौं तोलाय् खुसः क्वहावःगु दु धका नेपाल सुन चाँदी व्यवसायी महासंघ धाःगु दु ।

बुधवाःया लागि छापावाल लुँया भाः ९२ हजार रुपैयाँ कायम जूगु दु धका महासंघं धाःगु दु । म्हिगः मंगलवाः लुँ तोलां ९२ हजार ६ सय रुपैयाँ न कारोबार जूगु खः। महासंघं थौंया लागि तेजावी लुँ तोलाया ९१ हजार ५ सय रुपैयाँ कायम जुगु दु धका धाःगु दु।

अथेहे वहः तोलाय् न ६० रुपैयाँ क्वहावःगु दु । म्हिगः मंगलवाः १३८० रुपैयाँ तोलां कारोबार जुगु खःसा थौं बुधवाः १३२० रुपैयाँ कायम जुगु दु धका महासंघं धाःगु दु।

थीथी संवैधानिक आयोगय् सिफारिस जूपिन्स शपथ काःगु दु । बुधवाः सुथय् राष्ट्रपति कार्यालयय् राष्ट्रपति विद्यादेवी भण्डारीया उपस्थितिइ प्रधानन्यायाधीश चोलेन्द्रशमशेर जवरां आयोगया अध्यक्षय् सिफारिस जूपिन्त शपथ याकूगु दु । अथेहे सदस्यपिन्त सम्बन्धित आयोगया अध्यक्षपिन्स शपथ याकूगु खः । सिफारिस जूपि ४५ मध्ये ३२ म्ह पदाधिकारीपिन्स शपथ काःगु दु।

संवैधानिक परिषदं सिफारिस याइगु, संसदीय सुनुवाइ समितिं अनुमोदन यायेवं व राष्ट्रपतिं नियुक्त यायेगु संवैधानिक व्यवस्था दु । तर, संसदीय सुुनुवाइ समितिया प्रस्ताव हे मयासे शपथ याकूगुलि बिरोध याःगु दु । संवैधानिक परिषद् नं नियुक्ति सम्बन्धय् याःगु सिफारिस संसदीय सुनुवाइ समितिं पेस याये माःगु बाध्यात्मक व्यवस्था संविधानया धारा २९२ य् दु । संवैधानिक परिषदं सिफारिस याइ, संसदीय सुनुवाइ समितिं अनुमोदन यासे व राष्ट्रपतिं नियुक्त यायेगु संवैधानिक व्यवस्था दु ।

तर संसदीय सुुनुवाइ समितिइ प्रस्ताव हे मयासे शपथ यागुलि बिरोध जुयाच्वंगु दु ।