Display Style:
Column Style
निगूगु झ्वःया खोप अभियान न्ह्यात
पोहेलागा द्धादशी ११४१, माघ २६ सोमवाः
सरकारं थौंनिसें पत्रकार, युएन एजेन्सी, दूतावास लिसें कूटनीतिक नियोगया कर्मचारीयात कोरोना खोप बिइगु न्ह्याकेत्यंगु दु ।
भारत सरकारं अनुदानय् चूलाकुगु ‘कोभिशिल्ड’ खोप न्हापांगु झ्वलय् प्राथमिकताय् लाःपिं मनूयात बिइधुंका थौनिसें पत्रकार व कुटनीतिक नियोगया कर्मचारीयात खोप न्ह्याकूगु दु ।
११न्हूतक्क देय्यंकया थ्यंमथ्यं निसः केन्द्रपाखं छगू ८४द्वःम्हसिनं न्हापांगु मात्राया खोप तयेधुंका न्हापांगु झ्वया अभियान शनिवाः क्वचागु खः ।
न्हापांगु झ्वलय् स्वास्थ्यकर्मी लिसें कोरोनाभाइरस वासः यायेगु व व्यवस्थापनय् अग्रपङ्तिइ खटेजूपिन्त खोप बिउगु दु । थुगु झ्वलय् थ्यंमथ्यं ३गू लख मनूयात खोप बिइगु योजना दूगु मन्त्रालयं न्ह्यथंगु दु ।
निगूगु झ्व क्वचायेधुंका फागुनया निगूगु वालं निसें न्ह्याइगु धाःगु मेगु झ्वलं जक वैंश पुचःया मनूतयेत खोप बिइगु न्ह्याइ ।
थ्वहे दथुइ मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् लाःपिन्त खोप मतसें प्राथमिकता हे मदूपिन्त खोप बिइगु न्ह्याकुगु धका कुँख्यना न्ह्यागु दु ।
मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् पत्रकार व कूटनीतिक नियोगया कर्मचारी लाःगु मदु ।
लक्षित पुचःया प्राथमिकता कथं न्हापांगु् प्राथमिकताय् स्वास्थ्यकर्मी, सरसफाइकर्मी, एम्बुलेन्स लिसें शववाहन चालक, जेलया बन्दी व अन ज्या यानाच्वपिं सुरक्षाकर्मी, विमानस्थल व भन्सारया कर्मचारी, जेष्ठ नागरिकपिं व दीर्घल्वगियात तयातःगु खः । तर धलःखय् लाःपिं जेष्ठ नागरिक, दीर्घ ल्वगि लिसेंयापिन्सं खोप मकायेवं पत्रकार व कूटनीतिक नियोगया कर्मचारीयात बिइत्यंगु दु । थुगु निर्णययात जनस्वाथ्य विज्ञपिन्सं कुँख्यंगु दु ।
सक्व जेसिसया २१ क्वःगु पदस्थापना क्वचाल
किचः सिं | पोहेलागा द्धादशी ११४१, माघ २६ सोमवाः
सक्व जेसिजया २१ क्वःगु पदस्थापन व सिरपाः बीगु ज्याझ्वः क्वचाःगु दु । सक्व जेसिसया हरेक ज्याय् मदिक्क ग्वाहालि यानावःगु धासें प्रसन्न श्रेष्ठयात रबि अम्बे सिरपा ब्यूगु खःसा सक्व जेसिजया उत्कृष्ट सिरपाः चित्रकार कृष्ण गोपालयात लःल्हाःगु खः । धर्म नारायण गणेश माया सिरपाः जे सि राजेस श्रेष्ठयात बिल ।ज्याझ्वलय् २०२० या नायः सरोज कुँइकेलं २०२० या गतिविधि न्यंकुसें सक्व जेसिसया ज्याकू दय्केत शंखरापुर नगरपालिकाया मेयर सुबर्ण श्रेष्ठयात इनाप यानादिल ।
नेपाः देय्या थीथी लागाया थीथी थासं वःपिं जेसिज पदाधिकारी, सक्व जेसिसयात ग्वाहालि याःगु संघसंस्था, ब्यापारि, पत्रकारपिंत लिसें शंखरापुरया मेयर भाजु श्रेष्ठ, उपमेयर शुक्र लक्ष्मी श्रेष्ठ, सक्व प्रहरी प्रभागया प्रमुख जानुका खरेल, वडा नं ७ या नायः बिष्णु प्रसाद श्रेष्ठयात मतिनाया चिं नं लःल्हाःगु खः ।
ज्याझ्वलय् शंखरापुर नगरपालिकाया मेयर सुबर्ण श्रेष्ठ, उपमेयर शुक्रलक्ष्मी श्रेष्ठ, वडा नं ७ या वडाअध्यक्ष बिष्णु प्रसाद श्रेष्ठ, मातृसाखा येँ लेडि जेसिसया अध्यक्ष रिन्कु बज्राचार्य श्रेष्ठ व सक्व प्रहरी प्रभागया प्रमुख जानुका खरेलया उपस्थिती दुगु खः ।
किपुलिइ न्ह्याइगु यातायातय् विद्युतीय भुक्तानी प्रणाली लागू
लहानान्युज | पोहेलागा द्धादशी ११४१, माघ २६ सोमवाः
किपू नगरय् संचालन जुइगु यातायातय् आवंलिं विद्युतीय भुक्तानी प्रणाली लागू जुइगु जूगु दु । किपुलिइ न्ह्यानाच्वंगु सार्वजनिक यातायातय् विद्युतीय भुक्तानी प्रणाली शुरु यायेत्यंगु खः । किपू बस सेवा प्रा.लिं. यात्रुतय् निंतिं सुरक्षित, विश्वसनीय व प्रभावकारी सुविधा बीगु आज्जुलिसें विद्युतीय भुक्तानी सेवा (ई टिकेटिङ) प्रणाली लागू यायेत्यंगु खः । उकिया नितिं वंगु वालय् छगू सम्झौता नं जुइधुंकूगु दु ।
सम्झौताकथं किपू बस सेवा प्रा.लि.पाखें संचालन जुयाच्वंगु यातायातय् ई टिकेटिङ सेवा लागू यायेत्यंगु खः । माघ १६ गते जूगु चौपक्षीय सम्झौताय् किपू नगरपालिकाया नगरप्रमुख रमेश महर्जन, किपू बस सेवा प्रा.लि.या अध्यक्ष अर्जुन सिंह, एनक्लाउडया प्रमुख कार्यकारी अधिकृत दीपेन्द्रनारायण श्रेष्ठ व वी पे प्रा.लि. या अध्यक्ष डा. शंकरप्रसाद आचार्यं ल्हाःचिं तयादीगु खः ।
थ्व स्वयां न्ह्यः कम्पनीपाखें परीक्षणया रुपय् ई टिकेटिङ सेवा शुरु याःगु खःसा आः वयाः नगरपालिकालिसे जूगु सम्झौता लिपा औपचारिक रुपं हे थ्व सेवायात संचालनय् हःगु दु ।
पञ्चवीर सिरपाः पत्रकार हिमेशयात लःल्हात
लहानान्युज | पोहेलागा एकादशी ११४१, माघ २५ आइतवाः
बुद्ध धर्मसम्बन्धी उत्कृष्ट च्वसु च्वयादिउपिं च्वमि उपप्राध्यापक डा. त्रिरत्न मानन्धर, पत्रकार हिमेश रत्न बज्राचार्य व शोभानानी शाक्ययात शनिबाः पञ्चवीर सिंंह सिरपाः लःल्हायेगु ज्याः जुल ।
नेपाल भाषा टाइम्सय् दँ न्यंकं पिदंगु उत्कृष्ट बौद्ध च्वसुया लागि छम्ह मिजं व छम्ह मिसा च्वमियात युवा बौद्ध समूह, यँे पाखें थ्व सिरपाः लःल्हाना वया च्वंगु दु । लोचनतारा तुलाधर व सहप्राध्यापक मदन रत्न मानन्धर दुथ्यागु निर्णायक पुचलंं बुद्ध संवत २५६२ दँय् उपप्राध्यापक डा मानन्धरया ‘धर्म गुबले यायेगु ?’ शीर्षकया च्वसुयात उत्कृष्ट ठहर यागु खः ।
अथे हे डा. गौतमवीर बज्राचार्य व धर्मसुन्दर बज्राचार्य दुथ्यागु निर्णायक पुचलं बुद्ध संवत् २५६३ दँय् पत्रकार बज्राचार्यया ‘बुद्ध झीथाय् गुबले वल ?’ शीर्षकया च्वसु व शाक्यया ‘बुद्धधर्मया महायान चर्याय् चतुर्निंवृत्ति अभ्यासया महत्व’ शीर्षकया च्वसुयात उत्कृष्ट घोषणा यागु खः ।लेखनया माध्यमं नेपाल भाषा व साहित्यया श्रीवृद्धि व बुद्ध धर्मया प्रवद्र्धनय् उल्लेख्य योगदान बिउपिं च्वमितय्त पुरस्कृत यायेत पञ्चवीर सिंह तुलाधरं थ्व सिरपाः स्वनादिउगु खः ।
सिरपाया राशि रु ११,१११÷– तकाया खः । समूहया नायः मदन बहादुर तुलाधरया सभापतित्वय् थनया गणमहाविहरय् जुगु ज्याझ्वलय् अखिल नेपाल भिक्षु महासंघया मू छ्यान्जे भिक्षु कोण्डन्य महास्थविरंं सिरपाः लःल्हानाबिज्यागु खः । ज्याझ्वलय् ‘ईलोहँ पञ्चवीर परियत्ति सिरपा’ रुबी शाक्ययात लःल्हायेगु नं ज्याः जूगु खः।
२४ घण्टाय् ११९म्ह कोरोना सक्रमित
लहनान्युज | पोहेलागा एकादशी ११४१, माघ २५ आइतवाः
वःगु २४ घण्टाया दुने कोरोना संक्रमणया कारण निम्ह सीउगु दु। थ्व नाप आःतक नेपालय् कोरोनाया कारण सीपि २ हजार ३८ म्ह थ्यःगु दु।
अथेहे वःगु चौबीस घण्टाय् २२५१ म्हेसित पीसीआर परीक्षण याःगुलि ११९ म्हसिगु रिपोर्ट पोजेटिभ वःगु दु । थ्व नाप नेपालय् कोरोना संक्रमितपि निगु लाख ७१ हजार ९२५ म्ह थ्यःगु दु ।
अथेहे वःगु २४ घण्टाय् २६० म्ह संक्रमणमुक्त जुगु दु । थ्व नाप आःतक देशय् कोरोनामुक्त जूपि निगु लाख ६८ हजार ७२ म्ह थ्यःगु दु ।
आःतक क्वारेन्टिनय् ९२ म्ह व आइसोलेसनय् १८१५ म्ह च्वना च्वंगु दु धका स्वास्थ्य तथा जनसंख्या मन्त्रालयं धाःगु दु ।
