नेपाली कांग्रेसया न्ह्यय्म्ह नेता नापं पूर्वपदाधिकारी तय्सं कांग्रेस एमाले मिले जूया गठनबन्धन सरकारं संविधान संशोधन प्रक्रिया न्ह्यने मयकूगु धका धाःगु दु।

सोमवाः न्हिनय् चाक्सीबारीइ जूगु सहलह याये धुका सञ्चारकःमि नाप खँ ल्हायेगु झ्वलय् कांग्रेस नेता कृष्णप्रसाद सिटौंलां गठबन्धन सरकारं संविधान संशोधन प्रक्रिया न्ह्यने मयकूगु धका धाःगु खः। नेता सिटौलां धाःगु दु, ‘कांग्रेस–एमाले दथुइ गठबन्धन जुगु इलय्  संविधान कार्यान्वयनया समीक्षा यायेगु व संशोधन यायेगु सहमति जूगु खः।

नापं सरकारं थःगु नीति व कार्यक्रम तःगु खः। तर आःतक महत्वपूर्ण थुगु ज्या न्ह्यने यकूगु मदुनि। थुकियात न्ह्यने यकेमाः।’ धका वयकलं धयादीगु खः।

मध्यपुर थिमि नगरपालिका दुने तिगनी लागाय् लाःगु ऐतिहासिक नापं सांस्कृतिक रुपं महत्वपूर्णगु निलबाराही अभियानय् नेवाःतय्गु मंकाःगु राष्ट्रिय संगठन नेवाः देय् दबूपाखें एक्यताबद्ध प्वंकेगु ज्या याःगु दु।

देय् दबू मध्यपुर थिमि नगर समितिया इनापय् केन्द्रीय समिति, स्वनिगः विशेष प्रदेश समिति, स्वनिगःया स्वंगू हे जिल्ला समितिनिसें स्वनिगःया फुक्क हे पालिका समितिइ आबद्धता दुपिन्स ब्बति काःगु खः।

नेकपा एमालेया स्थायी कमिटी सदस्य कर्णबहादुर थापां पूर्वराष्ट्रपति विद्यादेवी भण्डारी न निदँ न्ह्यः हे सदस्यता नवीकरण याये धुकुगु धका दाबी यानादीगु दु।

अध्यक्ष केपी शर्मा ओली व पूर्वराष्ट्रपति भण्डारी दथुइ नापलायेगु ज्या जुयाच्वंगु इलय् च्यासलय् सञ्चारकःमिपि नापलायेगु झ्वलय् अथे धयादीगु खः।

म्हिगः जक एमाले प्रचार विभाग प्रमुख राजेन्द्र गौतमं भण्डारीया सदस्यता नवीकरणया विषय पेन्डिङय् दु धका धाःगु खः।

प्रधानमन्त्री केपी शर्मा ओलीया बहुप्रतीक्षित भारत भ्रमण भदौ ३१ गते जुइगु दु। भारतीय प्रधानमन्त्री नरेन्द्र मोदीपाखे समकक्षी ओलीयात निन्हु भ्रमणया निति ब्बनापौ वःगु दु।

प्रधानमन्त्री कार्यालय स्रोतया कथं ओलीया थुगु भ्रमण सम्भवतः आःतक हे दकलय् चिहाकःगु भारत भ्रमण जुइ। ३१ भदौय् भारतया राजधानी न्हुगु दिल्ली वना असोज १ गते येँ लिहावःगु ज्याझ्वः दु।

नेपालभाषा साहित्य ख्यलय् सक्रिय प्राज्ञिक संस्था नेपालभाषा एकेदेमिया ग्वसालय् शनिवाः “सर्जक व सिर्जना”या प्यक्वःगु ज्याझ्वः जुल।

साहित्यकार भुषणप्रसाद श्रेष्ठलिसे जूगु “सर्जक व सिर्जना” ज्याझ्वलय् नेपालभाषा साहित्यया थीथी विधाय् ७० गू सफू व प्यचाः म्ये चाः पिथना दिइ धुंकूम्ह बरिष्ठ साहित्यकार श्रेष्ठया साहित्य न्यनेगु व वय्कःयात हनेगु ज्याझ्वः जूगु खः।

नेपालभाषा एकेदेमिया चान्सलर मल्ल के. सुन्दरया सभाध्यक्षताय् जूगु उगु ज्याझ्वलय् कलाकारपिं धनबहादुर गोपाली, तीर्थ माली, निशा देसार, रिता महर्जन, सुरेन्द्र श्रेष्ठ, शतिश महर्जन व सुरजवीर बज्राचार्यपिन्सं साहित्यकार श्रेष्ठं रचना यानादीगु गजल म्ये न्यंकादीगु खः।

एकेदेमिया ल्यूछ्याञ्जे राजितबहादुर श्रेष्ठं न्ह्याकादीगु उगु ज्याझ्वलय् साहित्यकारपिं नारद बज्राचार्यं बाखं, शरद कसाः व हृदयप्रसाद मिश्रं ख्यालिन्हिलि, रामेश्वर मिश्रण श्रेष्ठं हाइकु न्यंकादीगु खः।ज्याझ्वलय् प्राज्ञ प्रा. प्रेमशान्ति तुलाधरं साहित्यकार भूषणप्रसाद श्रेष्ठया म्हसीका व डा. केशवमान शाक्यं थःगु सङ्गत व अनुभव न्ह्यब्वया दीगु खः।

ज्याझ्वलय् एकेदेमिया भाइस चान्सलर डा. पुष्पराज राजकर्णिकारं लसकुस नुगः खँ व दुजः छ्याञ्जे महेन्द्रगोपाल कर्माचार्यं सुभाय् देछाना दीगु खः।