१४ दँ स्वयां क्वंपि मस्तय् क्यान्सरया उपचार सित्तिकं याइगु सरकारी अस्पतालय् १४ दँ स्वयां क्वंपि मस्तय् क्यान्सरया उपचार सित्तिकं याइगु जूगु दु।

स्वास्थ्यनापं जनसङ्खया मन्त्री प्रदीप पौडेलं मन्त्रीस्तरीय निर्णय याःकथं कान्ति बालअस्पताल, येँ, ख्वप क्यान्सर अस्पताल, ख्वप व बिपी कोइराला मेमोरियल क्यान्सर अस्पताल, भरतपुरय् निःशुल्क उपचार याइगु जूगु दु। थ्व हे मंसिर १ गतेनिसें निर्णय लागु जुइकथं व्यवस्था जूगु स्वास्थ्य मन्त्रालयं धाःगु दु। मन्त्री पौडेलं पदय् च्वसांनिसें मस्तय्त क्यान्सर उपचार सेवा निःशुल्क यायेगु कुतः यानाच्वनादीगु खः।

सरकारं दक्व मनूतय्त उपचार यायेत बिइगु ध्यबा मगाःत धाःसा मन्त्रालयया आन्तरिक स्रोतपाखें व्यवस्थापन याइगु खँ प्रवक्ता डा. प्रकाश बुढाथोकीं कनादिल। नेपालय् सीपिनिगु ल्याःमध्ये ७१ प्रतिशत सरे मजुइगु ल्वचं कयाःसिनाच्वंगु दु। उकिसनं ११ प्रतिशत क्यान्सरं सिनाच्वंगु खँ मन्त्रालय अन्र्तगतया इपिडिमियालोजी व रोग नियन्त्रण महाशाखापाखें पिकाःगु तथ्याङ्कय् न्ह्यथनातःगु दु।

थन सन् २०२२ य् २२ द्वः न्हूपिं ल्वगित खने दूगुलिइ १४ द्वः सिबे अप्वः मनूत सीगु दु। नेपालय् दँय्दसं थ्यंमथ्यं द्धःछि व न्यासः मस्तय्त क्यान्सर जुइगु खँ महाशाखां धाःगु दु।

प्रधान सेनापति अशोक राज सिग्देलयात नेपाः चाःह्यू वयाच्वंपिं भारतया राष्ट्रिय क्याडेट कोर (एनसिसी)या पुचलं नापलाःगु दु।

भारतीय सेनाया विङ कमान्डर पिआर पोनप्पाया नेतृत्वय् नेपाः चाःह्यूवयाच्वंपिं १८ दुजःया पुचलं नापलाःवःगु खँ सैनिक जनसम्पर्क नापं सूचना निर्देशनालयं धयादीगु दु। राष्ट्रिय सेवा दलया दच्छिया ज्याझ्वः मध्ये जुयाच्वंगु थ्व ल्याय्म्ह कालबिल चाःहिलेगु ज्याझ्वलय् ब्वति कायेत भारतया पुचः वंगु कात्तिक ५ गते थन वःगु खः।

नेपाः चाःहिलेत वःपिं भारतया पुचःयात लक्ष्य यानाः दयेकूगु थी थी ज्याझ्वलय् नेपाःया राष्ट्रिय सेवा पुचःया विद्यार्थीपिन्सं नं ब्वतिकाःगु दु। विसं २०२२ य् नेपालय् नीस्वंगु राष्ट्रिय सेवा पुचःया तालिम कयाच्वंपिं ब्वनामिपिंसं नं विसं २०२६ पाखें थी थी देशय् जुयाच्वंगु तालिमय् ब्वतिकयाः वयाच्वंगु नं निर्देशनालयं धयादीगु दु।

नेपाःपाखें राष्ट्रिय सेवादलया ब्वनामिपिंसं भारत, श्रीलङ्का, बङ्गलादेश, भूटान, मालदिभ्स, पाकिस्तान व सिङ्गापुरय् चाःहिलेगु ज्या सिधयेधुंकूगु खँ कनादिल। नेपालय् थौंतक ७४ द्वः प्यसः व ८० म्ह ब्वनामितय्सं सिनियर व जुनियर डिभिजनय् च्वनाः राष्ट्रिय सेवा पुचःया तालिम कायेधुंकूगु खँ नं निर्देशनालयं धयादीगु दु। थुगु दँय् जक न्हयद्वः व न्हयसः व प्यम्ह ब्वनामितय्सं उगु तालिमय् ब्वतिकाःगु खः।

राष्ट्रपति रामचन्द्र पौडेलं निष्ठा, आदर्श व नैतिकतायात बचेयानाः लोकतन्त्र व संविधानया संरक्षण यायेत देय्पाखें वःगु भाला पूवंकेत लगे जुयाच्वनागु खँ कनादीगु दु।

राष्ट्रपति भवन शीतल निवासय् आत्रेय गोत्रीय पौडेल कुलपुजा व्यवस्थापन समितिं याःगु अभिनन्दन ज्याझ्वलय् वय्कलं थःम्हसिनं पद स्वयां नं निष्ठा, आदर्श व नैतिकतायात न्ह्याबलें तःधं तायेका च्वनागुलिं राजनीतिक जीवनय् बांमलाःगु न्ह्यसः वइकथं छुं नं ज्या मयानागु खँ कनादिल। राष्ट्रपति पौडेलं थथे धयादिल, “जित पद स्वयां नं निष्ठा, आदर्श व नैतिकता तःधं ताः। ताःहाकः राजनीतिक ख्यलय् थःगु कुलया इज्जत बचे यानाःतइगु दु।

किचःलाइगु छुं नं ज्या यानागु मदु व गुबलेंयाये नं मखु ।” वय्कलं लोकतन्त्र व संविधानया संरक्षणनापं राष्ट्रिय छवाःया प्रवर्द्धन व देय्या हित जुइगु ज्या न्ह्याबलें यानावनेगु बचं बियादिल । वय्कलं थथे धयादिल, “जित देय्नं ब्यूगु अभिभावकीय भाला पूवंकेगु झ्वलय् छुं नं कथंया कसर ल्यंकाः तयेमखु। जीवनभर निष्ठा, आदर्श व नैतिकता बचे यानाः कुलया जक मखु फुक्क नेपाःमितय्गु हे इज्जत तये।” राष्ट्रपति पौडेलयात कुल वंशीय ज्याथःम्ह दुजः पुण्यप्रसाद पौडेलं अभिनन्दन पौ लःल्हानादीगु खः।

ज्याझ्वलय् कजि साहित्यकार मुकुन्द पौडेलं कूलवंशया परम्पराबारे जःह्वलाः ब्वनातःपिं सकलसित लसकुस यानादिल। कवि व कलाकार रमेश पौडेलं राष्ट्रपति पौडेल आस्था व निष्ठाया आदर्श ज्वना कुलया जः जुयाच्वनादिल धयादिल। अभिनन्दननापं सम्मान ज्याझ्वलय् तनहुँ, चितवन व येँया आत्रेय गोत्रीयलगायत ख्यःया स्याःन्याःपिन्सं ब्वतिकयादीगु खः।

प्रधानमन्त्री केपी शर्मा ओलीं मानवअधिकारवादी नेता नाप पूर्व मन्त्री पद्मरत्न तुलाधरया खुक्वःगु स्मृति दिवसय् वयकःयात लुमकेगु ज्या जुगु दु।

शान्ति व मातृभाषाया अभियन्ता नाप साहित्यकार तुलाधरया लुमन्तिइ थौ पद्मरत्न तुलाधर स्मृति प्रतिष्ठानया ग्वसालय् थौ शंखधर साख्वा स्मृति पार्क, रत्नपार्कय् जूगु खः।

सोमवाः थौ सेयर बजाःया दक्को सूचक थहावंगु दु। नेप्से परिसूचक म्हिगः स्वया थ्व २७.४१ ल्याखं थहावंना नेप्से २६४५ य् थ्यःगु दु।

नेप्सेनापं सेन्सिटिभ सूचक ०.६८ प्रतिशतं थहावंगु दु। दक्को सेक्टरया सूचक थहवंना कारोबार रकम न थहावःगु दु। म्हिगः ४ अर्ब ७३ करोडया कारोबार जूगुलि थौ ५ अर्ब ३४ करोडया कारोवार जूगु दु।

२१३ गु कम्पनीया थहावंगुलि २८ गु कम्पनीया भाः कुहावंंगुलि निगु धाःसा स्थिर जूगु दु। फाइनान्स समूह दक्को हे ३.४६ प्रतिशतं थहावंगु दु। बैंकिङ ०.३६, विकास बैंक १.५७, होटल नाप पर्यटन १.१७, हाइड्रोपावर १.५८, लगानी ०.८५, जीवन बीमा १.८४, उत्पादन १.३४, माइक्रोफाइनान्स १.२६, निर्जीवन बीमा ०.६४, मेमेगु ०.५७ व व्यापार ०.७५ प्रतिशतं थहावःगु दु।

जानाकी फाइनान्स, दोल्ती पावरया भाः १० प्रतिशतं थहावंगु दु सा रिभर फल्स पावर ९.५४, मेन्छियाम हाइड्रोपावरया ९.१३, मायाखोला हाइड्रोपावरया ६.९९, प्रोग्रेसिभ फाइनान्सया ६.६२ व बेस्ट फाइनान्सया भाः ६.५७ प्रतिशतं थहावंगु दु। पाँचथर पावरया भाः ६.०२ प्रतिशतं कुहावंगु दु।

कालिन्चोक दर्शनया ४.३५, समृद्धि फाइनान्सया ३.९६, विन नेपाल लघुवित्तया २.८९, एसबीआई बैंकया २.६३ प्रतिशतं भाः कुहावःगु दु। कारोबार रकमया आधारय् नेपाल फाइनान्स, समृद्धि फाइनान्स, लाइफ इन्स्योरेन्स कर्पोरेसन, जानाकी फाइनान्स, पिपुल्स हाइड्रोपावर न्ह्यने दु।