प्रतिनिधिसभाया सभामुख देवराज घिमिरें मातृभाषाया पत्रकारितां अभिव्यक्ति व प्रेस स्वतन्त्रताया अभ्यासयात बलाकिइ धका धयादीगु दु।

निक्वःगु अन्तर्राष्ट्रिय मातृभाषा पत्रकारिता सम्मेलनया प्रतिवेदन लःल्हायेगु झ्वलय् थौ विहीवाः नेवाः पत्रकार राष्ट्रिय दबूया पदाधिकारीनाप खँ ल्हायेगु झ्वलय् वयकलं अथे धयादीगु खः। ‘बहुजातीय, बहुभाषिक नेपाः राज्यय् सकसिगु अपनत्व, संघीयताया प्रवद्र्धन यायेगु निति मातृभाषा पत्रकारिताया महत्त्वपूर्ण भूमिका दु। सम्मेलनं उगु भूमिकायात न्ह्यने हःगु दु।’ धका सभामुख घिमिरे धयादीगु दु।

वयकलं सम्मेलनं पिकागु निष्कर्ष, उठान याःगु बहसयात कानुन निर्माण दयकेगु, राज्यं व्यवहारय् कार्यान्वयन यायेगु कुतः यायेगु धका न वयकलं प्रतिबद्धता यानादीगु दु। ‘देशय् च्वपि नाप विदेशी पत्रकार तयेगु सहभागिताय् छिकपिन्स क्वचायकादील सम्मेलनया थःगु हे महत्त्व व विशेषता दु। थुकिइ वःगु निष्कर्ष कार्यान्वयन यायेत जिगु थासं पुरा ग्वहालि याये।’

पत्रकार दबू न वःगु जेठ ३० गते शुक्रवाः ३१ गते शनिवाः याःगु सम्मलेनय् बंगलादेश, भारतया थीथी प्रान्त व नेपाःया थीथी प्रदेशपाखे मातृभाषा पत्रकार तयेगु ब्बति दुगु खः। सम्मेलनं समावेशी पत्रकारिताया विकास, समग्र पत्रकारिताया विकास व मातृभाषा पत्रकारिताया महत्वयात माःगु थीथी निष्कर्ष पिकागु खः।

सिंहदरबारस्थित सभामुखया कार्यकक्षय् जुगु उगु ज्याझ्वलय् नेवाः पत्रकार राष्ट्रिय दबूया केन्द्रीय अध्यक्ष नृपेन्द्रलाल श्रेष्ठ, वरिष्ठ उपाध्यक्ष सुनील महर्जन, महासचिव केके मानन्धर नाप केन्द्रिय दुजः पूर्णभक्त दुवाल व विकास मालीपिनिगु ब्बति दुगु खः।

नेपाःया न्हापाम्ह मातृभाषी पत्रकार धर्मादित्य धर्माचार्यं पत्रकारिता सुरू याःगु सच्छि दँ थ्यःगु लसताय् “मातृभाषा संरक्षणया निति पत्रकारिता” धइगु नार बिया पत्रकार दबू न उगु सम्मेलन याःगु खः

भण्डार पूर्वराष्ट्रपति विद्यादेवी भण्डारीें एमाले केन्द्रीय कमिटी बैठक न्ह्याना च्वंगु इलय् मंगलवाः हे संवाददातापि नापलागु खः।

अन वयकलं पार्टी अध्यक्ष नापं प्रधानमन्त्री केपी शर्मा ओलीं थःत सक्रिय राजनीतिइ वय्त रोके याइगु न्हापा हे खःगु खः, तर आः स्पष्ट जूगु दु थः सुम्क मच्वनेगु धका चेतावनी बियादीगु दु।

मंगलवाः चान्ह्यः क्वचाःगु एमालेया बैठकं भण्डारीयात एमालें राजनीतिइ वयेत रोके यायेगु निर्णय यागु खः। केन्द्रीय कमिटीया उगु निर्णय भदौय् जुइगु विधान महाधिवेशनपाखे अनुमोदन यायेगु पार्टी योजनाय् दु।

बुधवाः सुथय् थः निकटस्थ नेतानाप सहलह यायेगु झ्वलय् भण्डारीं थःगु छु बिचाः दु धका धयादीसे छु दिं दुने हे पित हयेगु जुइ धका धयादीगु दु।

नेकपा एमालें थ्व हे वइगु भदौय् जुइगु विधान अधिवेशनया निति सुझाव संकलन सुरु जूगु दु धका धाःगु दु।

मंगलवाः चान्ह्यः क्वचाःगु केन्द्रीय कमिटीया बैठकया निर्णय थौनिसे क्वयागु कमिटीइ छ्वया सुझाव संकलन यायेगु निर्णय जूगु दु धका प्रचार विभाग प्रमुख राजेन्द्र गौतमं जानकारी ब्यूगु दु।

सेयर बजाः थौ न थहावंगु दु।थौ बुधवाः ५.१७ ल्याखं बजाः थहावना नेप्से परिसूचक २९८० ल्याखय् थ्यःगु दु।

न्हिनय् २ बजे १० मिनतय् बजाः २९५१ ल्याखय् थ्यःगु खःसा बन्द जुगु इलय् २९७८ ल्याखय् थ्यःगु खः। कारोबार रकम थौ सामान्य घटे जुया थौ १९ अर्ब ५७ करोड तका कारोवार जूगु दु। ९८ गु कम्पनीया भाः थहावंगु दु सा १५२ गु कम्पनीया भाः कुहावःगु दु।थौ फाइनान्स समूह दलकय् अप्पो ३.२३ प्रतिशतं थहावःगु दु।

अथेहे हाइड्रोपावर ०.८८, लगानी ०.९०, उत्पादन नाप प्रशोधन ०.४०, मेमेगु १.४४ व व्यापार ०.३१ प्रतिशतं थहवंगु दु।होटल नाप पर्यटन समूह दकलय् अप्पो १.१० प्रतिशतं कुहावःगु दु। बैंकिङ ०.२५, विकास बैंक ०.९२, जीवन बीमा ०.५०, माइक्रोफाइनान्स ०.७२ व निर्जीवन बीमा ०.६१ प्रतिशतं घटे जूगु दु।

निगु न्हुगु कम्पनी ट्रेड टावर व सान्भी इनर्जीया भाः १० प्रतिशतं थहावःगु दु। ट्रेड टावरया भाः ५८९.३० व सान्भीया ५२५.४० तका थ्यःगु दु।अथेहे ग्रीन भेन्चर्सया भाः ९.४, लिबर्टी इनर्जीया ७.०८ व बेस्ट फाइनान्सया ५.९७ प्रतिशतं थहावःगु दु।

भूगोल इनर्जीे ५.३२, ग्रिन डेभलपमेन्ट बैंक ४.२६, अभियान लघुवित्त ४.१३ व आरएसडीसी लघुवित्तया भाः ४.१० प्रतिशतं कुहावःगु दु।थौ यक्को कारोबार जूगु न्यागु कम्पनीइ हिमालयन रिइन्स्योरेन्स, शिवम् सिमेन्ट, निफ्रा, बुटवल पावर व नेपाल पुनर्बी खः।

नेकपा एमालेया केन्द्रीय कमिटी बैठकं पूर्वराष्ट्रपति विद्यादेवी भण्डारीयात सक्रिय राजनीतिइ याये मज्युगु निर्णय याःगु दु।

पार्टीया धारा ८ व ९ क्यसे अध्यक्ष केपी शर्मा ओलीं भण्डारीया सदस्यता नवीकरण याये मफइगु व राजनीति याये मज्युगु निर्णय न्यकूगु खः। निन्हुयकं जुगु केन्द्रीय कमिटी बैठकया समापनय् अध्यक्ष ओलीं अथे निर्णय याःगु खः।

उगु निर्णयया उपाध्यक्षपि सुरेन्द्र पाण्डे व युवराज ज्ञवालीं बिरोध याःगु खः।