थौ संसदया स्वंगू संसदीय समितिया बैठक च्वनिइगु जुगु दु।सार्वजनिक लेखा समिति, विधायन व्यवस्थापन समिति व संघीयता सबलीकरण नापं राष्ट्रिय सरोकार समितिया बैठक च्वनिइगु जुगु दु।

लेखा समितिइ ‘जगदुल्ला जलविद्युत् आयोजनाया निर्माणसम्बन्धी उजुरीउपर सहलह’ जुइ। अथेहे, नेपाल सरकारया सचिवनाप मंकाः बैठक च्वनिइगु तिथि निर्धारण क्वछिइगु प्रस्ताव दु।

विधायन व्यवस्थापन समितिइ ‘जलस्रोत विधेयक, २०८१ य् दफावार’ सहलह याइगु धलखय् दु।

पूर्व राष्ट्रपति विद्यादेवी भण्डारीयात राजनीतिइ लिहावयेगुलि रोके यायेगु पार्टीया निर्णय नेकपा एमालेया स्वम्ह नेतातय्स असहमति क्यंगू दु।

पार्टी बैठकय् अध्यक्ष केपी शर्मा ओलीं पार्टी विधानया धारा ८ व ९ क्यसे सदस्यता नवीकरण याये मज्युगु नहुने निर्णय न्यकूगु खः।ओलीें उगु निर्णय यागुलि उपाध्यक्षपि सुरेन्द्र पाण्डे, युवराज ज्ञवाली व कर्ण थापापिन्स फरक मत तःगु खः।स्वम्हेसिया पार्टीया उगु निर्णयया असहमति तःगु धका प्रचार विभाग प्रमुख राजेन्द्र पाण्डे न जानकारी ब्यूगु दु।

‘सुरेन्द्र पाण्डे, युवराज ज्ञवाली व कर्ण थापां असहमति प्वकूगु दु,’ पाण्डें धाःगु दु, ‘वयकःपिन्स थःगु थासं दना असहमति तःगु खः।’ निन्हुयकं जुगु केन्द्रीय कमिटी बैठक लिपा थज्यागु निर्णय याःगु खः।

म्हिगः जक हे पूर्व राष्ट्रपति भण्डारीं थः आः लिहा वनेगु मफु धका धाःगु खः।

पूर्वराष्ट्रपति विद्यादेवी भण्डारीं थः लिउने वनेगु अवस्थाय् मदु धका धयादीगु दु। राजनीतिक रिपोर्टर नाप खँ खल्हायेगु झ्वलय् पूर्वराष्ट्रपति भण्डारीं तुति खाकेगु स्थितिइ मदु धका धयादीगु दु।

‘जि न्ह्यावने धुनं, तुतिं खाकेमखु’, वयकलं धयादीगु दु।थः सक्रिय राजनीतिइ वयेगु खँ सुं ग्यायेम्वाः धका पूर्वराष्ट्रपति भण्डारीं इनाप यानादीगु दु।

‘बरु जिगु पक्षय् न्ववाइपिन्त आतंकित यायेत स्वयाच्वंगु दु, थ्व दिकेमाः’, भण्डारीं धयादीगु दु। पूर्वराष्ट्रपति भण्डारीं एमालेया राजनीतिइ लिहावयेगु निर्णय न न्यकूगु खः।

सभामुख देवराज घिमिरेें प्रतिनिधि सभाय् जुयाच्वंगु पंगः चायकेत राष्ट्रिय स्वतन्त्र पार्टी (रास्वपा) व राष्ट्रिय प्रजातन्त्र पार्टी (राप्रपा) यात इनाप यानादीगु दु।मंगलवाः न्हिनय् सभामुख घिमिरें कानून, न्याय लिसे संसदीय मामिला मन्त्री अजयकुमार चौरसियानाप रास्वपा व राप्रपाया नेतापि नाप सहलह यानादीगु दु।

उगु सहलह यायेगु निति रास्वपा कार्यवाहक सभापति डीपी अर्याल व राप्रपा उपाध्यक्ष बुद्धिमान तामाङं ब्बति काःगु खः। सभामुखया सचिवालयया कथं घिमिरे धयादीगु दु, ‘भिजिट भिसा प्रकरणयात कया निगु दल निरन्तर संसदीय कारबाहीलय् ब्बति काःगु मदु, सरकार व छिकपि दथुइ संवाद मजुगुलि उकिया असर संसदय् लागु दु’संसद् न्ह्याना च्वंगु इलय् थथे पंगः जुयाच्वंगुलि थःत मछिगु महसुस जुगु दु धका सभामुख घिमिरें धयादीगु दु।

‘सभामुखया कथं जितः मछिगु कथं कयागु दु, जिगु थासय् मेम्ह सभामुख जूसा संसद न्ह्याकेमाःगु बाध्यतात्मक स्थिति दु’, घिमिरें धयादीगु दु।

नेकपा एमालेया केन्द्रीय कमिटी बैठकय् सदस्यतयसं न्ववायेगु सुरु जूगु दु।बैठकय्, गण्डकी प्रदेशया केन्द्रीय सदस्य तयस थःपिनिगु बिचाः तये धुकुगु दु।

आःमधेश प्रदेशया दुजःतय्स न्ववायेगु सुरु जूगु दु। उपाध्यक्ष विष्णु पौडेलं न्ह्यब्बःगु विधान संशोधन प्रस्ताव व महासचिव शंकर पोखरेलं न्ह्यब्बःगु संगठनात्मक प्रतिवेदनय् नेतातय्सं थःपिनिगु बिचाः तयाच्वंगु खः। आःतक धारणा तःगु मध्ये अप्पोसिया पार्टी अध्यक्ष केपी शर्मा ओलीया पक्षय् न्ववायेगु याःगु दु।

पूर्वराष्ट्रपति विद्यादेवी भण्डारीया राजनीतिक सक्रियताबारे न नेतातयस सकारात्मक बिचाः तःगु दु।केन्द्रीय सदस्य दिवाकर देवकोटां उमेर हदया विषय न्ह्यसः तःगु खः। वयकलं न्हापा ७० दँया उमेरहद तयेगु व आः चिकेमाःगु छाय् धका माले माः धका धाःग खः।