नेपाली कांग्रेस बागमती प्रदेश संसदीय दलया नेता बहादुरसिंह लामायात दल याःगु नेतापाखे चिइकेत संसदीय दलय् अविश्वासया प्रस्ताव दर्ता याःगु दु।

लामायात नेपाली कांग्रेस संसदीय दलया नेतां चिइकेगु निति सांसद तय्स अविश्वासया प्रस्ताव दर्ता याःगु दु। छु ई न्ह्यः जक नेपाली कांग्रेस बागमती प्रदेश संसदीय दलया कार्यालयय् लामाविरूद्ध अविश्वासया प्रस्ताव दर्ता याःगु दु।अविश्वासया प्रस्तावय् नेपाली कांग्रेसपाखे आः प्रतिनिधित्व यानाच्वपि प्यम्ह मन्त्री नाप २१ म्ह सांसद तय्स ल्हाःचिं तःगु दु।

संसदीय दलया कार्यालयय् कांग्रेस बागमती प्रदेश सभापति तक जुयादीम्ह सांसद इन्द्रबहादुर बानियाँया नेतृत्वय् सांसद तयेगु बैठक च्वंगु खःसा बैठक लिपा अविश्वास प्रस्ताव दर्ता याःगु खः। मुख्यमन्त्री लामाया नेतृत्वय् सरकारं आव २०८२÷८३ या निति उगु बजेटय् कांग्रेस दुने विवाद जुगु खः। अविश्वास प्रस्ताव दर्ता याये न्ह्यः कांग्रेसपाखे प्रतिनिधित्व यानाच्वपि प्यम्ह मन्त्रीतय्स राजीनामा ब्यूगु खः।

सरकारया प्रवक्ता नाप आन्तरिक मामिला लिसे कानुन मन्त्री सुरजचन्द्र लामिछाने, संस्कृति पर्यटन मन्त्री बिमल ठकुरी, सहकारी लिसे गरिबी निवारण मन्त्री मधु श्रेष्ठ व युवा लिसे खेलकुद मन्त्री मीनकृष्ण महर्जनपिन्स मुख्यमन्त्री बहादुरसिं लामायात राजीनामा पौ ह्वाट्सएपपाखे छ्वःगु खः।

राष्ट्रपति रामचन्द्र पौडेलयात सभामुख देवराज घिमिरें नापलानादीगु दु। वय्कःपिं राष्ट्रपति निवास शितल निवासय् नापलानादीगु खः।

नापलायेगु झ्वलय् सभामुख घिमिरें संसदया सभामुखपिनिगु जेनेभाय् थ्व हे जुलाई २९ निसें ३१ तक जुइ त्यंगु विश्व सम्मेलनय् नेपाःया ब्वतिबारे राष्ट्रपति पौडेलयात जानकारी याकादीगु राष्ट्रपतिया संचिवालयं धाःगु दु।

सभामुख घिमिरे सभामुखपिनिगु विश्व सम्मेलनय् ब्वति कायादीत थ्व हे जुलाई २७ य् जेनेभा झायादीत्यंगु दु।

वंगु च्यान्हु निसे सेयर बजार कारोबारय् लगातार थहा वनाच्वंगु दु। म्हिगः बुधवाः ५.१७ ल्याखं थहावंगु खःसा थौ बिहीवाः ३.७६ ल्याखं थहावंगु खः।

थ्व नापं नेप्से परिसूचक २९८२ ल्याखय् थ्यःगु दु।थौ १२३ गु कम्पनीया भाः थहावंगुलि १२७ गु कम्पनीया भाः कुहावःगु खः।थौ हाइड्रोपावर समूह दकलय् अप्पो २.०० प्रतिशतं थहावःगु दु। विकास बैंक १.०६, होटल नाप पर्यटन ०.४६, लगानी ०.२५ लिसे व्यापार ०.२८ प्रतिशतं थहावःगु खः।

बैंकिङ ०.६१, फाइनान्स ०.७६, जीवन बीमा ०.२३, उत्पादन नाप प्रशोधन ०.५८, माइक्रोफाइनान्स ०.२३, निर्जीवन बीमा ०.५७ व मेमेगु ०.०९ प्रतिशतं घटे जूगु दु।थौ हाइड्रोपावर समूह जक हे ८ अर्ब ४० करोडया कारोबार जूगु दु। कुल कारोबारय् हाइड्रोपावर समूह हिस्सा ४५ प्रतिशत खः।

बैंकिङ समूहया १ अर्ब ३२ करोड, विकास बैंकया १ अर्ब ८५ करोड, माइक्रोफाइनान्सया १ अर्ब ७९ करोड नापं मेमेगु समूहया १ अर्ब ९ करोडया कारोबार जूगुलि ल्यः दनिइगु समूहया कारोबार रकम १ अर्ब स्वया म्हो खः।थौ यक्को कारोबार जूगु न्यागु कम्पनीइ राधि विद्युत्, ङादी ग्रुप, ग्रिन भेन्चर, लुम्बिनी विकास बैंक व हिमालयन रिइन्स्योरेन्स खः।

बाँकेय् प्रमुख राजनीतिक दल नेपाली कांग्रेस व नेपाल कम्युनिष्ट पार्टी (एमालें) नेपालगञ्जनिसें दिल्ली उडानं थनया अर्थतन्त्र चलायमान जुइगु जुयाः उकिया निंतिं प्रधानमन्त्री केपी शर्मा ओलीया ध्यानाकर्षण याकीगु जूगु दु।

उडानया निंतिं थनया उद्योग व्यवसायी लिसें राजनीतिक दलनापंया सर्वपक्षीय बैठकं प्रधानमन्त्री ओलीया आः वइगु भदौ लिपांगु वाः जुइगु भारत भ्रमणय् नेपालगञ्ज–दिल्ली तप्यंक उडानयात एजेण्डा दयेकेत इनाप याःगु दु। नेकपा (एमाले) बाँकेया नायः निरक गुरुङं एजेण्डायात प्राथमिकता बियाः ल्ह्वनेगु व उकिया लिच्वः पिहां मवतले सुम्क मच्वनेगु धासें थुकिया फाइदा व बेफाइदाया बारे प्रष्ट जुइमागु धयादिल।

“आः थुगु खँयात ल्ह्वनाः दथुइ त्वतेगु मखु, थुगु क्षेत्रया विकासया निंतिं मदिक्क न्ह्यानाच्वनेमा”, वय्कलं धयादिल। नेपाली कांग्रेस बाँकेया सचिव सुधाँशु कोइरालां फुक्क दलयात विकासया खँय् छथाय् दनाः न्ह्या वनेत इनाप यासें थुजाःगु विषय नेपालगञ्जया म्हसिका पलिस्था जुइगु धयादिल। प्रधामन्त्रीया निकट भविष्यय् जुइत्यंगु जःला खःला देय् भारत भ्रमणय् थ्व विषययात न्ह्यने तयाः ल्ह्वनेत पहल यायेगु निर्णय यानागु धकाः उद्योग वाणिज्य सङ्घया महासचिव भीमबहादुर रानाभाटं धयादिल।

रानाभाटया कथं नेपालगञ्ज–दिल्ली उडानया दबाब बिइत वंगु जेठ २३ गते जूगु सर्वपक्षीय सरोकारवालाया भेलां सङ्घया नायः टङ्कबहादुर धामीया संयोजकत्वय् ‘नेपालगञ्ज–दिल्ली उडान दबाब समूह’ नीस्वंगु खः। “दबाब प्रभावकारी दयेकेत थी थी कार्ययोजना दयेकाच्वनाःगु दु”, दबाब पुचःया सदस्य–सचिवनापं जुयाच्वनादीम्ह सङ्घया महासचिव रानाभाटं धयादिल।

सङ्घया नायः धामीं थुगु एजेण्डा पलिस्था यायेगु महत्वपूर्ण ह्वःताः जूगुलिं फुक्क राजनीतिकि दलयात समन्वय यानाः ध्यानाकर्षण याकेत प्रधानमन्त्रीतक वनेगु धाःगु दु। नेपालगञ्जयात ‘मानसरोवर गेटवे’या कथं पलिस्था यायेगु निंतिं नेपालगञ्ज–दिल्ली तप्यंक उडान जुइमाःगु तायेका तःगु दु। थुकिं मू यानाः सुदूरपश्चिम, कर्णाली व लुम्बिनी प्रदेशया थ्यंमथ्यं २५ गू जिल्लाया बासिन्दायात तप्यंक लबः जुइगु जूगुलिं सकसितं स्वानाः प्रधानमन्त्रीया ध्यानाकर्षण आवश्यक जूगु स्वापू दूपिंसं बैठकय् धाःगु दु।

थुकिया निंतिं नेपाल पत्रकार महासङ्घ बाँकेया नायः नविन गिरीया संयोजकत्वय् पूर्वअध्यक्ष झलक गैरे, नेपाल कांग्रेसया सचिव कोइराला, पत्रकार शरण कर्माचार्य, शङ्कर खनाल, आशिष गुप्ता व विज्ञ हरि सुवेदी दुजः दूगु अध्ययन प्रतिवेदन समिति नीस्वंगु दु । समितिं झिन्हुया दुने नेपालगञ्ज–दिल्ली उडानया आवश्यकता, औचित्य व महत्वबारय् अध्ययनलिसेंया प्रतिवेदन तयार यायेत्यंगु दु। प्रतिवेदन प्रधानमन्त्री ओलीयात लःल्हायेगु धाःगु दु। प्रधानमन्त्री ओली आः वइगु भदौ ३१ गते न्हूदिल्ली झायादीत्यंगु दु।

चाँगुनारायण नगरपालिकां थःगु नगर दुनेया ऐतिहासिक, पुरातात्विक लिसें धार्मिक ल्याखं महत्वपूर्ण सम्पदाया उत्खनन ज्या नापनापं संरक्षण याइगु जूगु दु।

नगरकोट भ्रमण दँ–२०८२या लसताय् साउनय् लच्छियंंक शिव पुराण ज्ञान महायज्ञ लिसें विष्णु पुराण ज्ञान महायज्ञया लसताय् बुधबाः वडा नं ७ या लोकंह्वाःगु बागेहिटीइ च्वंगु त्रिलोकेश्वर महाद्यःया देगः लागाय् ग्वसाः ग्वःगु ज्याझ्वलय् नगरप्रमुख जीवन खत्रीं सम्पदा उत्खनन यायेगु नापनापं संरक्षण नं यायेगु धयादीगु दु।

वय्कलं धयादिल, “चाँगुनारायण नगरपालिका–१ निसें ९ तक हे अल्याख्य सम्पदा, धार्मिक मठ, देगः, ऐतिहासिक लिसें पुरातात्विक महत्वं जाःगु थाय्त दु। उकिसनं गुलिखय् न्हनावने धुंकल, गुलि मालेमानी नापनापं गुलिसिया अनुसन्धान व उत्खनन यायेमाःगु अवस्थाय् दु। अज्यागु सम्पदाया नगरपालिकां मालेगु व अनुसन्धान याइ।

उकिया संरक्षणय् हे न्ह्यचिलेगु जुइ।”नगरप्रमुख खत्रीं नगरकोट भ्रमण दँया लसताय् लाकाः नगरपालिकां गुंगूलिं वडाया सम्पदाया संरक्षण, न्हनावंगु माला अनुसन्धानय् ग्वाहालि यायेत स्थानीयतय्त इनाप यानादिल। लुयावःगु सम्पदाया उत्खननया निंतिं पुरातत्व विभागया समन्वयय् विज्ञत छ्यलाः थुकिया संरक्षण यायेगु नगरया योजना दु।

नगरपालिका लागाया आर्थिक विकास, सगरमाथाया अवलोकन नापनापं सुद्र्यः लूगु व बीगु जक मखुसें नगर क्षेत्रया सम्पदाया विकास यायेगु यानाः योजना दयेकागु धकाः नगरप्रमुख खत्रीं धयादिल।