Display Style:
Column Style
न्हूदँ ११४१ या लसताय् थीथी ज्याझ्वः याइगु
लहानान्युज | कछलागा पञ्चमी ११४१, मंसिर २० शनिवाः
नेपाल संवत् राष्ट्रिय न्हूदँ समारोह समिति ११४१ या ग्वसालय् न्हूदँया लसताय् थीथी ज्याझ्वः निरन्तर रुपं न्ह्याकेगु खँ क्वःछ्यूगु दु ।
समारोह समितिया नायः रमेश महर्जनया सभापतित्वय् थौं बुधवाः च्वंगु सचिवालय मुँज्यां थथे थीथी ज्याझ्वः यायेगु क्वःछ्यूगु जानकारी ब्यूगु दु ।
न्हूदँया लसताय् दँय् दसंथें थुगुसी नं सामाजिक दूरी कायम यासें सांस्कृतिक ज्याझ्वः यायेगु क्वःछ्यूगु दुसा नेपाल संवतया तिथियात कयाः प्रशिक्षण ज्याझ्वः यायेगु क्वःछ्यूगु दु ।
अथेहे, शंखधर उद्यानय् शंखधर साख्वाःया झ्वाता व नेपाल संवत आन्दोलन लिसें सकतां ख्यःया न्ह्यलुवाः पद्मरत्न तुलाधरया झ्वाता तःगुलिं येँ महानगरपालिकायात सुभाय् देछायेगुलिसें शंखधर उद्यानयात कयाः पिदनाच्वंगु थीथी विषययात कयाः स्पष्ट यायेत मंकाः विज्ञप्ति जारी यायेगु नं क्वःछ्यूगु दु ।
समारोह समितिया बैठकं नेपाल संवतया आन्दोलनय् पद्मरत्न तुलाधर विषययात कयाः वृत्तचित्र दयेकेगु व समारोह समितिं पिथंगु तिथिपौ देय् न्यंकं थीथी संघसंस्था खलः पुचःयात इनेगु नं क्वःछ्यूगु दु ।
लहना गतिविधिया २५ ब्व पूवन
लहानान्युज | कछलागा पञ्चमी ११४१, मंसिर २० शनिवाः
लहना मिडियाया न्ह्यब्वया कथं नेवाः टिभि एचडिइ न्ह्यानाच्वंगु समाचारमूलक ज्याझ्वः लहना गतिविधिया २५ ब्व पूवंगु दु । थ्व हे झ्वलय् लहना मिडियां छगू ज्याझ्वःया ग्वसाः ग्वसें लसता हंगु दु ।
ज्याझ्वलय् नवाःपिं वक्तापिन्सं नेवाः टिभि ज्याझ्वःया ख्यलय् समाचारमूलक ज्याझ्वःया अभाव जुयाच्वंगुलिइ लहना गतिविधि ज्याझ्वलं उगु अभावयात पूवंकाब्यूगु धाःगु खः । ज्याझ्वलय् नवासें नेवाः पत्रकार राष्ट्रिय दबूया मू छ्यान्जे सुनिल महर्जनं सूचना विभाग लगायतया सरकारी निकाय दुने नेवाःतय्गु पत्रिका धकाः गर्व यानाः नां काय्गु पत्रिका लहना वाःपौ जुयाच्वंगु धासें आः टेलिभिजनय् नं व हे कथं लहना गतिविधिं थःगु छवि दय्कावनाच्वंगु बिचाः तयादिल । ‘लकडाउनया इलय् न्हूगु ज्याझ्वः न्ह्याकाः निरन्तर सामग्री न्ह्यब्वयाच्वनेफुगु धइगु लहनाया सफलता खः,’ महर्जनं धयादिल । ‘आः थुगु सफलतायात कायम यानातय्त लहना मदिक्क न्ह्याःवनाच्वनेमाः ।’
अथे हे वरिष्ठ सिने पत्रकार विजयरत्न असंबरें समाचारमूलक ज्याझ्वःया दथुइ लहना गतिविधि बिस्कं कथंया ज्याझ्वः जूगु धासें ई कथं थुकी ह्यूपाः नं बियाच्वनेमाःगु छ्याता बियादिल । रंगीन वाःपौलिसें नेवाः पत्रकारीता ख्यलय् पलाः न्ह्याकूगु लहना मिडियां ई कथं न्यूज पोर्टल अले आः वयाः टेलिभिजनपाखे नं न्ह्याःवंगु च्वछाय्बहःगु धयादिल ।
अथे हे संस्कृतिविद् जितेन्द्र विलास बज्राचार्यं सत्ययूगनिसें कलियूगतक्कया दसु ब्युसें ईकथं स्वकुमिया चाहनायात थुइकाः न्ह्याःवनेमाःगुलिइ बः बियादिल । इन्द्रजात्रा व्यवस्थापन समितिया वरिष्ठ न्वकू शरद कुमार डंगोलं न्हापा राजतन्त्रया इलय् नवाय्ग स्वतन्त्रता मदुगु ई लुमंकुसें आः व्यवस्था ह्यूगुलिसें सूचनाया स्वतन्त्रता नं दुगु खँय् लसता प्वंकादिल ।
वरिष्ठ पत्रकार सुरेश किरण मानन्धरं नेवाः पत्रकारिता ख्यलय् लहना मिडियां मदिक्क न्ह्याकाच्वंगु पलाःया प्रशंसा यानादिल । लहनां पत्रकारिता ख्यलय् पत्रिका, वेबसाइट धुंकाः आः टेलिभिजनय् नं पलाः न्ह्याकाः थःगु गतिशिलता प्रमाणित याःगु व इलय्ब्यलय् थीथी ज्याझ्वःत नं यानाः नेवाः ख्यलय् छगू तरङ्ग बियाच्वंगु बिचाः तयादिल । ‘लहनां छापालिसें विद्युतीय संचारपाखे पलाः न्ह्याकाच्वंगु ला बांलाःगु हे खत, उकिया नापं युट्युबय् नं न्ह्याःवंगु झन च्वछाय्बहःजू,’ पत्रकार मानन्धरं धयादिल । ‘टिभि स्वय्गु स्वयां आः मनूतय्सं युट्युब स्वइगु जुयाच्वंगु इलय् लहनां युट्युबय् नं सामग्री बियाच्वंगुलिं थनया गतिविधित हलिन्यंक थ्यनेत ग्वाहालि जूगु दु ।’
उगु हे ज्याझ्वलय् लहना गतिविधियात ग्वाहालि यानाच्वंपिं व्यक्ति व संघसंस्थायात मतिनाया चिंलिसे सुभाय् देछाःगु खः । व झ्वलय् नेवाः टिभि एचडि व ज्याझ्वः कजि लिसें निर्देशक अनुप प्रधानयात विशेष सुभाय् कथं विशेष सुभाय् पौ लःल्हाःगु खः । लहना मिडियाया नायः नृपेन्द्रलाल श्रेष्ठया नायःसुइ जूगु ज्याझ्वलय् लहना मिडियाया व्यवस्थापक सुरेन्द्रभक्त श्रेष्ठं लसकुस यानादीगु खः।
येँ महानगर नेपालभाषां १ निसे ८ तक ब्बकेयेगु तयारी
लहानान्युज | कछलागा चौथी ११४१, मंसिर १९ शुक्रवाः
येँ महानगरपालिकां थःगु मातहत दुगु सामुदायिक व संस्थागत ब्बनेकुथिइ ब्बकेत स्थानीय विषयया पाठ्यपुस्तक तयार याःगु दु। येँ महानगरपालिकां कक्षा १ निसे कक्षा ८ तक अनिवार्य विषयया रूपय् नेपालभाषां ‘येँ देय् म्हसीके’ नाया पाठ्यपुस्तक ब्बकेगु तयारी याये त्यःगु खः।
नेपालया संविधान भाग ३ मौलिक हक अन्तर्गत धारा ३२ या उपधारा (२) व (३) य् मुलुकय् हरेक स्थानीय तहपाखे थःगु मातहत दुगु सामुदायिक व संस्थागत ब्बनेकुथिइ स्थानीय पाठ्यक्रमया रूपय् थःम्हेसिया हे छगु विषय अध्ययन अध्यापन याके फइगु व्यवस्था दु । येँं महानगरपालिकां उगु व्यवस्था अन्तर्गत थुगु पाठ्यपुस्तक तयार याःगु खः।
महानगरपालिकां थःगु क्षेत्र दुने दुगु दक्को संस्थागत व सामूदायिक ब्बनेकुथिइ कक्षा १ निसे ८ तक उगु सफू ब्बकेय्गु प्रक्रिया न्ह्यने यकःगु धका जानकारी बिःगु खः । ‘येँ महानगरपालिकाया ५१ क्वःगु कार्यपालिका बैठकं थुगु चालु क्षैक्षिक शत्रपाखे ब्बकेयेगु निर्णय याःगु खः,’ येँ महानगरपालिकाया शिक्षा विभागया अधिकृत मोती खनालं, ‘जिमिसं वःगु वैशाख–जेठ निसे तयारी यानागु खः । तर, कोभिड व उकियाःगु असरं याना पाठ्यपुस्तक छपाइ लगायतया ज्याय् छु भचा ढिला जुगु खः। अय्न, जिमिसं येँ महानगरपालिकां सञ्चालन याना तयागु एफएम व थीथी माध्ययमपाखे ब्बका च्वनागु दु,’ धका धयादीगु खः ।
वयकलं येँ महानगरपालिका दुने ९२ गु सामूदायिक ब्बनेकुथि मध्ये ८६ गु साधारण ब्बनेकुगु, स्वगु विशेष व स्वगु ब्बनेकुथि बन्दीपिनिगु लागि दुगु व संस्थागत ब्बनेकुथिया ल्याः करीब ६४० गु दुगुलि ब्बनेकुथिइ १०० पूर्णाङ्कया स्थानीय विषय याःगु ब्बकेय्गु जानकारी बियादीगु खः।
येँ महानगरपालिकां थःगु महानगर दुने हनिइगु नखः चखः, संस्कार संस्कृति, सीप कौशल, व्यवसाय, नैतिक शिक्षा, स्वास्थ्य व सरसफाई, रहनसहन, व्यक्तित्व परिचय, भाषा व लिपी थे जाःगु विषय बारे म्हसिकेगु उद्देश्यं थुगु विषयया ब्बकेत सुरु यानागु धका वयकलं धयादीगु खः ।
येँ महानगर ऐतिहासिक इलनिसे नेपालभाषा भाषीपिनिगु बसोवास दुगु थाय् जुगु कारणं महानगरपालिकां थुगु पाठ्यपुस्तकयात न नेपालभाषा हे तयार यानागु धका जानकारी बियादीगु खः।
पाठ्यपुस्तक व पाठ्यक्रम च्वयेगुलि न्हापानिसे सहभागी जुयाच्वनादीम्ह संस्कृतिविद् डा. चुन्दा वज्राचार्यया कथं महानगर दुने थीथी जात्रा, पर्व, ल्हवहिति, फल्चा, सतः, व्यक्तिपि सम्बन्धी ब्बकेय्गु समावेश यानागु धका जानकारी बियादीगु खः ।
‘पाठ्यपुस्तकय् येँया प्रमुख जाति नेवाः तयेगु जनजीवन, कला, नय्गु त्वनेय्गु, जात्रापर्व, भाषा, लिपि, परम्परागत कासा थे जाःगु विषय कःघाना तःगु दु,’ धका वयकलं धयादीगु खः, ‘मचा तय्त नेपालभाषा लादे यायेगु मखु, परम्परागत ज्ञानसीपबारे जानकारी बिइगु याना पाठ्यक्रम विकास यानागु खः। थुगु सफूया अध्ययनं येँं महानगरयात न्ह्यन. थुइके अपुइगु धका धयादीगु
खः । थुकिया उद्देश्य न थ्व हे खः ।’
डा. बज्राचार्य नं मचापिन्त सय्केत अपुकेगु उदेश्यं १ निसे ३ तक १०० पूर्णाङ्कय् १०० हे अभ्यासगत ब्बकेयेगु जानकारी बियादीगु खः। ‘कक्षा ४ व ५ य् ७५ अभ्यासगत व २५ सैद्धान्तिक पठन–पाठन जुइगु,’ वयकलं, ‘कक्षा ६,७ व ८ य् धाःसा ५० अभ्यासगत व ५० सैद्धान्तिक पठन–पाठन जुइ व्यवस्था यानागु दु।’
येँ महानगरपालिकां न्ह्यक्वःगु नगरसभां स्थानीय पाठ्यक्रम अन्तर्गत स्थानीय महत्वया विषयया बारे महानगर च्वपिन्त म्हसिकिगु कथं स्थानीय भाषा हे पठनपाठन यायेगु निर्णय याःगु खः। ‘यःमरि, मरुहिटी, क्वहिटी, थँहिटी थे रैथाने शब्द मेगु भाषां थुइकेत थाकूइगुलि, उगु खँ थुइके बिइत विद्यार्थीपिन्त आत्मसात समेत याकेय्गु उद्देश्यं अज्यागु थासय् अवलोकन भ्रमण नाप स्थानीय भाषा हे ब्बकेय्गु तयारी यानागु धका,’ डा. वज्राचार्य न धयादीगु खः।
कोरोनामुक्त जुपि १५७५ म्ह, कोरोना थौं १६म्ह मन्त
लहानान्युज | कछलागा चौथी ११४१, मंसिर १९ शुक्रवाः
वःगु २४ घन्टाया दुने कोरोनामुक्त जुपि १५७५ म्ह डिस्चार्ज जुया छेँ लिहावःगु दु।
नेपालय् थ्व नाप आःतक कोरोनामुक्त जूपि २ लाख २१ हजार ८४७ म्ह थ्यःगु दु धका स्वास्थ्य मन्त्रालयं धाःगु दु।
सक्रिय संक्रमितपि १५ हजार ४४७ म्ह थ्यःगु दु।
वःगु २४ घन्टाया दुने नेपालय् थप १६ म्ह कोरोना संक्रमणं सी धुकुगु दु धका मन्त्रालयं धाःगु दु।
थ्व नाप आः तक नेपालय् कोरोना संक्रमणंं सीपि १५६७ म्ह थ्यःगु दु।
देय्न्यक १२७२म्ह कोरोना सक्रमित
लहानान्युज | कछलागा चौथी ११४१, मंसिर १९ शुक्रवाः
वःगु २४ घन्टाया दुने नेपालय् थप १२७२ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।
वःगु २४ घण्टाय् जम्मा ८ हजार ३१ म्हेसिगु पीसीआर परीक्षण याःगु खः।
मन्त्रालयया कथं थुपि नाप आःतक नेपालय् कोरोना संक्रमितपि २ लाख ३८ हजार ८६१ म्ह थ्यःगु दु।
