Display Style:
Column Style
लुँ तोला ९०० क्वहावल
शोभा श्रेष्ठ | कछलागा दशमी ११४१, मंसिर २५ बिहीवाः
लुँ तोलाय् थौं ९ सय क्वहा वःगु दु ।
म्हिगः बुधवाः छगु तोला ९३ हजार ४०० तका कारोबार जूगु छापावाल लुँ थौं बिहीवाः ९२ हजार पाँच सय रुपैयाँ तोके याःगु दु धक नेपाल सुन चाँदी व्यवसायी महासंघं धाःगु दु।
अथेहे थौं तेजाबी लुँ छगु तोलाया ९२ हजार ५० तोके याःगु दु धक महासंघ धाःगु दु।
वहः तोलां झीन्यातका क्वहा वःगु दु । थौं वहः छगु तोलाया १२ सय रुपैयाँ न कारोबार जुगु दु धका महासंघ धाःगु दु।
सम्पदा संरक्षणया विषय ख्वपय् अन्तरक्रिया
लहानान्युज | कछलागा दशमी ११४१, मंसिर २५ बिहीवाः
ऐतिहासिक पूखु व सम्पदा बचाउ अभियानय् क्रियाशील जुयाच्वम्ह सम्पदा संरक्षण परिषदया अध्यक्ष भागवत नरसिहं प्रधान व ख्वप नगरपालिकाया मेयर सुनिल प्रजापति दथुइ नगरपालिकाया जनप्रतिनिधि नाप सम्पदा संरक्षणया विषय अन्तरक्रिया ज्याझ्वः जुगु दु।
ख्वप नगरपालिकां शैक्षिक अवस्था लगायत विकास निर्माणयाबारे जानकारी बियादिसे थँबही (ठमेल) या पलेस्वाँ पूखु संरक्षण (कमलपोखरी) या लागि भागवत नरसिंह प्रधानया संघर्षप्रति साथ दइ धका वडाअध्यक्ष रबिन्द्र ज्याख्वः न धयादीगु खः ।
उगु ज्याझ्वलय् परिषदया अध्यक्ष प्रधानं सभ्यता विकासया झ्वलय् न्हापा झीगु पुर्खां दयेका तःगु फल्चा, सतः, पूखु नाप मूर्त अमूर्त देय् या हे तधःगु सम्पति खः। थ्व हे स्वयेगु लागिु बिदेश पर्यटकपि वइगु खः धका धयादीगु खः। ख्वप नगरपालिकां सम्पदा संरक्षणयाःगु ज्या तसक च्वछाय् बहःजु धका धयादीसे देय्या पहिचान, सम्पदा संरक्षण सम्बर्द्वनय् तसक न्ह्यने लाः धका धायदीगु खः।
उगु ज्याझ्वलय् ख्वप नगरपालिकाया मेयर प्रजापतिं देश व समाज उत्थानया लागि याइगु ज्या द्दढ संकल्प ज्वना न्ह्यने वनेमाः। थौं कन्ह्य देशय् विदेशी अतिक्रमण अप्वाया वःगुलि सार्वजनिक सम्पदा अतिक्रमण जुया वयाच्वगुलि सम्पदाप्रेमी छप्प जुइमाः धका धयादीगु खः। नगरवासीया ग्वाहालि दत धाःसा सम्पदा पुनर्निर्माण यायेत बिदेशी तयेत ग्वहाली आवश्यक मालिमखु धका धयादीगु खः।
मेयर प्रजापतिं परिषदयात ख्वपय् आःतक निर्माणाधीन सम्पदाया विवरण दुथ्यागु ‘किपा सफू’ व नगरपालिकाया पिथना तःगु सफूत उपहार कथं देछाःगु खः। अथेहे ख्वप–९ या वडाअध्यक्ष रबिन्द्र ज्याख्वं प्रतिनिधि पुचःयात टपूली व म्हिचाः बिया लसकुस याःगु खः।
जिवनरामं सितापाईलाय् सामुदायिक भवनया शिलान्यास
शोभा श्रेष्ठ | कछलागा दशमी ११४१, मंसिर २५ बिहीवाः
संघीय सांसद जीवन राम श्रेष्ठं नार्गाजुन नगरपालिका वडा न. ५ छोकडोल सितापाईलाय् सामुदायिक शिक्षण संस्था श्रृजना कलेज अफ फाइन आर्ट भवन निर्माण यायेगु झ्वलय् उगु भवनया शिलान्यास यानादीगु ।
निगु रोपनी क्षेत्रफलय् निर्माण जुइ त्यःगु उगु भबनया कुल लागत पाँच करोड पचास लाखया बजेत दु। थुगु भबन निर्माणया लागि येँ महानगरपालिका व युजिसि पाखे ग्वाहालि व मगाःगु ध्यवा सघिय व प्रदेश सरकारनाप ग्वाहालिया अपेक्षा यानागु दु धका कलेज संचालकं धाःगु दु।
सांसद श्रेष्ठं आर्त बिधाय् गैर नाफामुलक समुदायपाखे सन्चालन याःगु छःगु जक कलेज जुगु व राष्ट्रयात म्हसिकेत संस्कृति सम्पदा व इतिहासयात संरक्षण याना कला व संस्कृतियात ल्यका तयगु लागि झीसं पलाः छिलेमाः धका धयादीगु खः। बर्तमान सरकार सम्बृद्धिया लक्ष्य ज्वना न्ह्यने वनाच्वंगु थुगु भवन दयेकेगु लागि सरकारंपाखे न ग्वाहालि दइगु खँय् भलसा कयादीगु खः। थुगु भवन इलय् ज्या क्वचायकेगु लागि थःम्ह माःगु ग्वाहालि यायेगु बचं बियादिगु खः।
उगु ज्याझ्वलय् नार्गाजुन नगरपालिकाया उपमेयर सुशिला अधिकारी, वडा न. ५ या अध्यक्ष महेश रिमाल, कलेज संचालक समितिया अध्यक्ष मनमोहन श्रेष्ठ लगायत संचालक समितिया पदाधिकारी नाप स्थानीय जनसमुदायया न उपस्थिती दुगु खः।
आनन्दकुटीइ आइशोलेशन दयेकीगु तयारी
लहानान्युज | कछलागा दशमी ११४१, मंसिर २५ बिहीवाः
नेपाल ओलम्पिक कमिटीया अध्यक्ष नाप प्रतिनिधिसभाया सांसद जीवनराम श्रेष्ठं सांसदविकास कोषपाखें १ करोड ५० लाख ४० हजार तका ग्वाहालि याना येँया आनन्दकुटी आइसोलेसन दयेकीगु लागि तयार यानादीगु दु।
आनन्दकुटीइ ५० बेड क्षमताया आइसोलेशन दयेके तयारी दु धका सांसद श्रेष्ठं अन छगु निरिक्षणयासे अथे धयादीगु खः।
थौं कन्हय बिश्वन्यंकं महामारी कथं वयाच्वंगु कोभिड–१९ लहर न्ह्यानाच्वंगु नेपालय् महामारी जुया च्वंगुलि पूर्वतयारी कथं आइसोलेशन दयेके त्यनागु धका सांसद श्रेष्ठ धयादीगु खः । थनया थाय् तसक बालागुलि आइसोलेशनय् माःगु योगाभ्यास नाप शारीरिक व्यायामया यायेत थुगु थाय् उपयुक्त जुइगु धका धयादीगु खः। आःया लागि ५० बेदयाना लिपा माःसा ८० बेडतक आइसोलेशनया व्यवस्था याये फइ धका सांसद श्रेष्ठ धयादीगु खः।
थुगु आइसोलेशनया लागि स्थानीय रोटरी क्लब, मनाङ्ग क्लबं नाप येँ महानगर नं ग्वाहालि दइ धका धयादीगु खः।
प्रेस प्रतिनिधि प्रमाणपत्र हुलाक कार्यालयपाखे काये फइगु
शोभा श्रेष्ठ | कछलागा नवमी ११४१, मंसिर २४ बुधवाः
पत्रकारपिन्स आः जिल्ला हुलाक कार्यालयपाखे प्रेस प्रतिनिधि प्रमाणपत्र कायेगु व नवीकरण याये दइगु ब्यवस्था याःगु दु।
सञ्चार तथा सूचना प्रविधिमन्त्रीं सूचना विभागया महानिर्देशक अधिकार प्रत्यायोजनया निर्णय याःगु दु।
आः प्रेस प्रतिनिधि प्रमाणपत्र कायेत जिल्ला हुलाक कार्यालयय् निवेदन बिइ माःगु दु। त्यही कार्यालयय् माःगु भ्वँ स्वया विभाग छ्वया व प्रेस प्रतिनिधि प्रमाणपत्र छ्वया बिइ।
अथेहे प्रेस प्रतिनिधि प्रमाणपत्र व अनलाइन नवीकरणया अधिकार जिल्ला हुलाक कार्यालययात हे बिःगु दु।
