अमेरिकी सेनाय् ज्या यानाच्वम्ह भरत सिंह पेलापाखें यल महानगरपालिकाया वडा ल्याः ९ वडा च्यासलय् च्वंगु श्री श्रमिक शान्ति माध्यमिक ब्वनेकुथिइ आखः ब्वनाच्वंपिं ब्वनामिपिन्त छगू ज्याझ्वः दथुइ थीथी सामाग्री बियाः ग्वाहालि याःगु दु ।

उगु ब्वनेकुथि जूगु ज्याझ्वलय् विद्यालय व्यवस्थापन दुजः राजु व्यञ्जनकारया मूपाहाँसुइ, प्रधानाध्यापक सानुलाल व्यञ्जनकार, सहायक प्रधानाध्यापक पवन विक्रम कार्की व शिक्षक प्रतिनिधि उद्धव प्रसाद तिमल्सिनाया सहभागी जूगु खः ।

ज्याझ्वलय् अनाथ, असहायलिसें आर्थिक स्थिति कमजोर जूपिं जेहेन्दार ब्वनामिपिं ल्यज्या यानाः छगू तगिंलिसें च्यागू तगिमय् आखः ब्वनाच्वंपिं मुक्कं नीन्याम्हेसित छगू छगू सेट स्कुल ड्रेस व दच्छितक गाक्क स्टेसनरी सामाग्री लःल्हाःगु खः।

ब्वनेकुथिइ च्यागू तगिंमय् आखः ब्वनाच्वंम्ह खुस्बु यादवया आर्थिक स्थिति अतिकं कमजोर जुगु हुनिं खुस्बुया हामापिसं आखः ब्वंकेगु त्वःतकेत्यंगु खबर सिया खुस्बुयात दच्छिया नितिं आखः ब्वंकेगु व्यवस्था लिसें मुक्कं नीखुम्ह विद्यार्थीपिन्त शैक्षिक सामाग्री लःल्हाःगु खः ।

येँया दिगु तलेजुइ मूल पूजारी नियुक्त जूगु दु । वंगु कार्तिकनिसें खालि जुयाच्वंगु मूल पूजारीइ येँया मखनय् च्वंम्ह द्यःबाज्या पुरुषोत्तम सुवेदी राजोपाध्याययात नियुक्त याःगु खः ।

शनिबाः दिगु तलेजुया सहायक पूजारी नारायणमान जोशीं स्वांमाः क्वखायेकाः न्हूम्ह नियुक्त मूल पुजारी पुरुषोत्तम सुवेदीयात दिगु तलेजु देगलय् दुकाःगु खः । दिगु तलेजुया सहायक पूजारी जोशी थकाली पुष्पमान जोशीया अनुपस्थितीइ नारायणमान जोशीं सुवेदीयात दिगु तलेजुइ दुकाःगु खः । सहायक पूजारी मदनराज जोशीया कजिसुइ मूल पूजारी दुकायेगु ज्या जूगु खः ।

मूल पूजारी सुवेदीं शनिबाःनिसें हे नित्य पूजा नं न्ह्याकादीगु दु ।

वंगु कार्तिक १९ गते दिगु तलेजुया तत्कालीन मूल पूजारी नारायण राज सुवेदी राजोपाध्याय मदयेधुंकाः मूल पूजारी पद रिक्त जुयाच्वंगु खः । थनया पूजा दिक्षा दुम्ह द्यःबाज्या राजोपाध्यायं हे यायेमाःगु जुयाः मूल पूजारी पद रिक्त जुयाच्वंगु खः । मूल पूजारी मदुबलय् थनया नित्य पूजा सहायक पूजारी जोशीतपाखें पूजा जुयावःगु खः ।

‘दिक्षा दुम्ह मूलपूजारी मदयाच्वंगु अवस्थाय् समस्या जुयाच्वंगु खनी, थःगु पुर्खां न्ह्याकावःगु परम्परायात निरन्तरता बीत थम्हं छुं योगदान बी खनाः लयतायाच्वना’ मूल पूजारी सुवेदीं धयादिल ।

दिगुतलेजु मल्ल जुजुतय् कुलदेवीया रुपं काइ । न्हापा नित्य पूजाया झ्वलय् जुजुपिं थः हे उपस्थित जुइगु धयातःगु दु । येँया हनुमानध्वाखास्थित तलेजु देगः पिने प्रतापमल्लया स्तम्भया न्ह्यःने हाथुद्यः नापं दिगु तलेजुया प्यागोडा शैलीया ६२ कु तजाःगु कलात्मक देगः दु ।

भाषा वंशावली कथं थुगु देगः जुजु शिवसिंह मल्लं दयेकूगु खः । लिपा वि.सं. १७२७ भाद्रय् जुजु प्रताप मल्लं थुगु देगलय् लुँया पौ व गजू तयाः देगः जीर्णोद्धार याःगु खः ।

कुलदेवता वा देवीयात बिस्कं हे कोथाय् तयाः पूजा यायेगु प्रचलन दु । कुलदेवता दुगु देगलय् न्ह्याम्हं दुहांवने मदइगु नियम दइ व कुलदेवता वा देवीया पूजा गुप्त रुपं यायेगु याइ । येँया दिगुतलेजुया हे अनुकरण यानाः यलय् जुजु सिद्धिनरसिंह मल्लं वि.सं. १६९७ फागुनय् दिगुतलेजु देगः दयेकूगु खः ।

सभामुख अग्निप्रसाद सापकोटां प्रतिनिधि सभां बिस्तारै लय ज्वनिइ धका धयादीगु दु ।

थौं शनिवाः जी.पी.कोइराला मेमोरियल(सामुदायिक) कलेजया च्याक्वःगु वार्षिकोत्सव समारोहय् सम्बोधन यासे सभामुख सापकोटां प्रतिनिधिसभा सञ्चालनय् भचा समस्या वःगुलि उकिया न्हापा थे तु लय हयेत मेहनत याये माःगु आवश्यकता दु धका धयादीगु दु।

संसद छलफल, बहस, वादविवाद व सम्वाद याना न्ह्यावने माःगु खँय् बःबियादीसे वयकल चुनौती याःगु सामना यासे प्रतिकुलताय् न अनुकूलता हयेमाःगु उपाय मालेगु जुइ धका धयादीगु दु ।