Display Style:
Column Style
लहनान्यूजया सम्पादकलिसें प्यम्ह पत्रकार सत्यमोहन जोशी शताब्दी पदकपाखें सम्मानित जुइगु
लहनान्यूज सम्वाददाता | ने.सं. ११४१ चिल्लाथ्व द्वादशी (२०७७ चैत्र १३)
थुगुसीया ‘सत्यमोहन जोशी शताब्दी पदक’ पाखें लहनान्यूज डट कमया प्रधान सम्पादक नृपेन्द्रलाल श्रेष्ठ सम्मानित जुइगु जूगु दु ।
त्रिमूर्ति निकेतनं जारी याःगु सुचं कथं सम्मानित जुइपिं थप १४ म्हमध्ये लहनान्यूजया सम्पादक श्रेष्ठ नं सम्मानित जुइत्यंगु दु ।
श्रेष्ठलिसें नेवाः पत्रकारिता ख्यलय् सक्रिय मेपिं स्वम्ह पत्रकार नं उगु पदकपाखें सम्मानित जुइत्यंगु दु ।
उगु पदकपाखें लहना वाःपौया कार्यकारी सम्पादक सुरेन्द्रभक्त श्रेष्ठ नं सम्मानित जुइत्यंगु दुसा राष्ट्रिय प्रसारणय् दक्कले न्हापांम्ह टेलिभिजन ज्याझ्वः न्ह्याकामि बिराजकाजी राजोपाध्याययात नं पदक लःल्हाइगु जूगु दु । अथे हे, नेवाः पत्रकार राष्ट्रिय दबूया मू छ्यान्जे अले नेपाल समाचारपत्रकर्मी सुनिल महर्जन नं पदकपाखें सम्मानित जुइगु जूगु दु ।
अथे हे, शिक्षा तथा विज्ञान प्रविधिमन्त्री कृष्णगाेपाल श्रेष्ठ व उद्याेगपति वसन्त चाैधरी नं थुगुसी पदकपाखें सम्मानित जुइत्यंगु दु ।
त्रिमूर्ति निकेतनं थ्वयां न्ह्यः नं पदकपाखें सम्मानित जुइपिं २९ म्हेसिया नां सार्वजनिक यायेधुंकूगु दु । थुगु पदकपाखें आःतक्क २५ राष्ट्रया २५५म्ह सम्मानित जुइधुंकूगु दु ।
कोरोना संक्रमण रोकथामया नितिं सार्वजनिक यातायातय् कडाइ याइगु
चिल्लाथ्व त्रयादशी ११४१, चैत्र १३ गते शुक्रबाः
कोरोना संक्रमण रोकथामया नितिं जिल्ला प्रशासन ज्याकू यँ नं सार्वजनिक यातायातय् कडाइ याइगु जूगु दु ।
जिल्ला प्रशासन कार्यालय व यातायात व्यवसायी दथुई थौं जूगु सहलहय् निगुलिं पक्षं स्वास्थ्य सुरक्षाया नितिं सार्वजनिक सवारी साधानय् कडाई यायेगु निर्णय याःगु खः । मू जिल्ला अधिकारी, यातायात व्यवस्था विभाग, ट्राफिक प्रहरी, यातायात व्यवसायी व यातायात मजदूरपिं दथुई जूगु सहलहस कोभिड संक्रमण रोकथाम व नियन्त्रणया नितिं सार्वजनिक यातायात क्षेत्रय् कडाई यायेगु निर्णइ याःगु खः ।
सार्वजनिक यातायात लागाय् अनिवार्य मास्क, सिट क्षमता कथं जक यात्रुत तयेगु, भौतिक दूरीयात व्यवस्थित यायेगु निर्णय जूगु प्रमुख जिल्ला अधिकारी कालीप्रसाद पराजुलीं जानकारी बियादिल ।
नेपाल यातायात व्यवसायी राष्ट्रिय महासंघया वरिष्ठ न्वकू विजयबहादुर स्वाँरं भारतय् कोरोनाया संक्रमण दर थपू जुयावंगु व नेपालय् नं अप्वःया वनेफइगु जूगुलिं पूर्व सावधानीया विषयस् सहलह जूगु धयादिल ।
सार्वजनिक यातायात क्षेत्रयात गुकथं जोखिमपाखें तापाकेफइ धैगु विषयस् सहलह जूगु धयादिल । कोभिड संक्रमणया निगूगु झ्वः न्ह्याइगु सम्भावना खनेदूगुलिं जिल्ला प्रशासन ज्याकू येँ नं संक्रमण रोकथाम व कजय् कायेत थीथी निकायस् सहलह जुयाच्वंगु दु ।
भासिक कार्यकर्ता अनिल स्थापितया अबु मन्त
लहानान्युज | चिल्लाथ्व त्रयोदशी ११४१, चैत्र १३ शुक्रवाः
नेपाल लिपि गुथिया न्वकु नाप लिपि गुरु भासिक कार्यकर्ता अनिल स्थापितया अबु सप्तरत्न स्थापित म्हिगः बहनिइ ११ः३० बजे इलय् मंत ।
मदुम्ह सप्तरत्न स्थापित ८० दँय् छेँय् हे मदुगु खः।
वयकःया अन्त्येष्टि थौं शोभा भगवतीया कर्णद्धिपय् याये त्यःगु दु। वयकःया जहान नाप स्वम्ह काय् व छम्ह म्ह्याय दिइ।
अनिल स्थापित माइलाम्ह काय् खः।
कोरोना संक्रमण अप्वयावंगु धासें सार्वजनिक थासय् होली म्हितेत जिप्रकां तल रोक
लहनान्यूज | चिल्लाथ्व एकादशी, ११४१, चैत्र १२ विहीबाः
कोरोना संक्रमण अप्वयावंगु धासें स्वनिगलय् सार्वजनिक थासय् होली म्हितेत रोक तःगुदु । येँ, यल व ख्वपया जिल्ला प्रशासन ज्याकुथिं विज्ञप्ति जारी यासें सार्वजनिक थासय् होली म्हितेत रोक तःगु खः ।
चैत १५ व १६ गते होली पर्वयात छेँय् हे हनेत नं इनाप याःगु दु । येँया प्रमुख जिल्ला अधिकारी कालीप्रसाद पराजुलीं संक्रमणया दर अप्वयावंगु अवस्थाय् सार्वजनिक थासय् मुनाः होली म्हितेत रोक तयागु धयादिल । सार्वजनिक थासय् वयेवने यायेबलय् मास्क मछ्यलीपिं व स्वास्थ्य मापदण्ड मलीपिं मयाइपिं मनूतय्त संक्रामक रोग ऐन, २०२० कथं कारबाही जुइगु नं पराजुलीं धयादिल ।
वय्कलं स्वनिगलय् अप्वयाच्वंगु संक्रमणया दरयात क्वपालेत स्वास्थ्य मापदण्ड अनिवार्य पालना यायेत नं इनाप यानादिल । अथे हे कोरोना रोकथाम अले नियन्त्रणया लागिं दयेकूगु क्वारेन्टाइन, आइसोलेसन केन्द्रया अवस्था छु दु धइगु सम्बन्धय् दक्वं स्थानीय तहमार्फत अनुगमन यानाः तयारी अवस्थाय् तयेगु निर्णय जूगु नं पराजुलीं धयादिल ।
ब्वनेकू न्ह्याःगु अवस्थाय् विद्यार्थीतय्त अनिवार्य मास्क तयेगु व्यवस्था यायेगु, कक्षाकोथाया व्यवस्थापन व हे कथं यायेगु, सेनिटाइजर छ्यलेगु, ल्हाः सीके बीगु खँयात अनिवार्य पालना यायेगु व्यवस्था यायेत नं इनाप यानादीगु दु ।
पत्रकार दबू चितवन कचाया प्यक्वःगु साधरणसभा क्वचाल
बिकाश | ने.सं. ११४१ चिल्लाथ्व दशमी (२०७७ चैत्र ११) बुधबाः
नेवाः पत्रकार राष्ट्रिय दबू चितवन कचाया प्यक्वःगु साधरणसभा क्वचाःगु दु । थौं भरतपुरय् पत्रकार दबू चितवन कचाया साधरणसभा याःगु खः ।
साधरणसभाया उद्घाटन शत्रय् नवासें पत्रकार दबूया केन्द्रिय वरिष्ठ उपाध्यक्ष नृपेन्द्र लाल श्रेष्ठं दबुलिं न्ह्याबलें पत्रकारिताया हितया लागिं ज्या यानावयागु धयादिल । पत्रकारया सर्वाङ्गिण विकासलिसें हक अधिकार प्राप्तिया लागिं पत्रकार दबू न्ह्याबलें क्रियाशिल जुयाच्वनेगु उपाध्यक्ष श्रेष्ठं प्रतिवद्धता प्वंकादिल ।
दबूया केन्द्रीय महासचिव सुनिल महर्जनं राज्यं भाषा संस्कृतिइ प्रहार याःगु धासें पत्रकारितामार्फत निरन्तर सः तयाच्वनेमाःगु खँय् बः बियादिल ।
ज्याझ्वलय् नेपाल पत्रकार महासंघ चितवनया नायः राधेश्याम खतिवडां नेवाःतय् भाषा सस्कृति व रहनसहनबारे सकसित जानकारी बीत पत्रकारितामार्फत उजागर यायेमाःगु धयादिल । क्रियाशील महिला पत्रकार मन्च चितवनया नायः प्रमिता ढकालं मिसा नेतृत्वयात कोटाया रुपं जक मखसें क्षमता व दक्षताया आधारय् मूल्याङ्कन यायेमाःगु धयादिल । पत्रकार दबू चितवनया नायः कमलमान श्रेष्ठं चितवनया नेवाः पत्रकारत संगठित जुयाः अन्तरक्रियात्मक सम्वन्ध कायम यासें पत्रकारिता क्षेत्रया वृहत्तर हितय् जायेमाःगु धयादिल ।
ज्याझ्वलय् पत्रकार दबूया केन्द्रिय उपाध्यक्ष सन्दीपकुमार श्रेष्ठ, नेपाल आदिवासी जनजाति पत्रकार महासंघका केन्दिय सदस्य राजु चौधरी, थारु पत्रकार महासंघका महासचिव सन्त कुमार चौधरीलिसें नं पत्रकारतय् हकहित प्राप्तिया लागिं देय्न्यंकया पत्रकारत संगठित जुइमाःगुलिइ बः बियादिल ।
अथे हे, नेपाल प्रेस युनियन चितवनया न्वकू सूर्य प्रसाद अधिकारी, तामाङ पत्रकार संघ चितवनया नायः ज्ञानेन्द्र तामाङ, थारु पत्रकार संघ चितवनया नायः सुमित्रा महत्तो, प्रेस सेन्टर चितवनया नायः प्रकाश ज्ञवाली, नेपाल आदिवासी महासंघ चितवनया छ्यान्जे महेन्द्र दुरा, नेवा पुचः नारायणगढया नायः ज्ञानेन्द्रमान् शाक्य लिसें नं थःथःगु नुगःखँ तयादीगु खः ।
