येँ महानगरपालिकाया वडा नं. १५ या म्ह्याय्मचा मय्जु कृषा महर्जन मिस नेवाः ११४१ या उपाधि त्याकेत ताःलाःगुलिं लसहना ज्याझ्वः क्वचाःगु दु ।

नेवाः देय् दबू, १५ वडा समितिं मय्जु महर्जनयात १५ वडाया सामुदायिक भवनय् नेवाः परम्परा कथं खेँ सगं बिया हंगु खः । मिस नेवाः ११४१ या उपाधि त्याकेत ताःलाम्ह मय्जु महर्जनं नेवाः जाति, भाषा व नेवाः कला, संस्कृतिया हलिंन्यंकं च्वन्ह्याकेगु ज्याय् पला सदां धिसिलाक न्ह्यानाच्वने फयेमा धकाः हना पौ लिसें मतिना चिंपाखें सम्मानित याःगु खः ।

ज्याझ्वलय् मूपाहाँ कथं येँमहानगरपालिका १५ वडाया वडाध्यक्ष एवं येँमनपाया प्रवक्ता भाजु इश्वरमान डंगोल झायादीगु खः । वय्कलं ने.सं. ११४१ मिस नेवाः जुइत ताःलाःम्ह मय्जु कृषा महर्जनयात हनापौ लिसें मतिनाया चिं लःल्हानादीगु खः । सम्मान यायेगु झ्वलय् डंगोलं येँ महानगरपालिकाय् पला पतिकं यक्व हे सम्पदा दुगु अले उगु सम्पदात ल्यंका तयेत सचेतना ज्याझ्वः मिस नेवाः ११४१ कृषा महर्जनपाखें न्ह्याकेगु धयादिल ।

‘नेवाः भाषां याना हे नेवाः संस्कृति, सम्पदा ल्यनाच्वनी । थ्व खँयात मनन् यानाः येँमनापापाखें स्थानीय भाषाया माध्यमं येँ देय्या सम्पदा संस्कृति म्वाका तयेत स्थानीय विद्यालयय् अनिवार्य कथं तगिं छगु निसें च्यागु तक ‘येँ देय् म्हसिके’ धैगु पाठ्यसफू दुथ्याःगु खः ।’ मूपाहाँ डंगोलं धयादिल । हना ज्याझ्वलय् विशेष पाहाँ कथं नेवाः देय् दबूया केन्द्रीय नायः भाजु नरेश ताम्राकार झायादीगु खः ।

वय्कलं नेवाः समाजय् म्ह्याय् मस्तय्त मेपिनिगु समाजय् सिवें माःगु कथं उच्च प्राथमिकता बियाच्वंगुलिं गर्व तायेकादिल । ‘मिस नेवाः ११४१ कृषा महर्जनं आः याकनं हे जुइत्यंगु जनगणनाय् नेवाःतय्गु ल्याः न्हंके मबिकेत सचेतना ज्याझ्वःपाखें थःगु भूमिका म्हितादीगु भलसा कयाच्वना ।’ ताम्राकारं धयादी, ‘नेवाः देय् दबूया न्हापांगु वडा कचा १५ वडा समितिं सम्मानित यानादिम्ह मय्जु कृषा महर्जनं समग्र नेवाः जाति, भाषा, कला, संस्कृतिया च्वन्ह्याकेगुली पलाः सदां सुथां लायेमा ।’

ज्याझ्वलय् पाहाँकथं नेवाः देय् दबू बागमती प्रदेशया नायः भाजु उमेश स्थापित, येँ महानगरपालिका नायः भाजु मचाराजा महर्जनलिसें सम्मानित जुयादिम्ह मय्जुया बा कृष्णकाजी महर्जन व मां हसना महर्जन झायादीगु खः । हना ज्याझ्वलय् समितिया दुजः मय्जु निर्मला डंगोलं सकसित लसकुस यानादीगु खःसा ज्याझ्वःया सभानायः नेवाः देय् दबू १५ वडा कमितिया नायः भाजु मनराजा रंजितं थुगु हना ज्याझ्वलय् झायाः हःपाः व तिव बियादीपिं सकल उपस्थिति भाजु मय्जुपिन्त सुभाय् देछासें सभा क्वचायेकूगु खः ।

नेकपा एमाले संसदीय दलं गुटगत भेला यानाच्वपिन्त स्पष्टीकरण कायेगु निर्णय याःगु दु ।

प्रधानमन्त्री निवास बालुवाटारय् थौं च्वःगु दलया बैठकं संसदीय बोर्डपाखे स्पष्टीकरण कायेगु प्रक्रिया न्ह्यने यकेगु निर्णय याःगु दु धका प्रमुख सचेतक विशाल भट्टराई न जानकारी बिःगु दु ।

वरिष्ठ नेता माधवकुमार नेपाल समूह न चैत ४ व ५ गते राष्ट्रिय कार्यकर्ता भेला याःगु खः ।

थुगु समूहय् आबद्ध सांसदपि संसदीय दलया बैठक तक मवः। ३८ सांसदपाखे ज्ञापनपत्र बुझे याःवपि स्वम्ह सांसदयात दलया नेता केपी शर्मा ओलीं व्यक्तिगत धारणा न्यनिइगु तर गुटया प्रस्ताव स्वीकार मयायेगु धका धाःगु खः ।

संसदीय दलया बैठकय् पार्टी अध्यक्ष नाप दलया नेता ओलीं थःगु निर्देशन विपरित भेला याःगु धाःसे स्पष्टीकरण तक न्यनयेगु धका धाःगु खः।

थौं येँया थीथी थासय् छु ईया लागि मत मवइगु जुगु दु।

नेपाल विद्युत् प्राधिकरणं सतक विस्तार लगायतया कारण मत मवइगु जानकारी बिःगु दु। बानेश्वर वितरण केन्द्र अन्तर्गत कोटेश्वर महाद्यःया देगः नाप, कोटेश्वर चोक, जडीबुटी चोकपाखे  मनोहरा महाद्यःया देगः जुया लालीगुराँस स्कुल, सीसीआरसी कलेज, सूर्यकोट गेट तक मत मवइगु धका प्राधिकरणं धाःगु दु ।

थुगु थासय् थौं सुथय् १० बजे निसे न्हिनय् २ बजे तक मत मवइगु धका प्राधिकरणं सूचं बिःगु दु। सतक विस्तारया लागि ११ केभी भूमिगत तार तयेगु नितिं मत काटे याये माःगु जुगु धका प्राधिकरणं धाःगु दु। अथेहे, बत्तीसपुतली सुथय् ८ बजेनिसे न्हिनय् ४ बजे तका मत मवइगु जानकारी प्राधिकरणं बिःगु दु ।

पशुपति कलेज, मित्रपार्क, जयवागेश्वरी, मुसे गणेश, गौशाला, तिलगङ्गा, शारदा स्कूल, सूचना विभाग लगायतया थासय् लाइन मर्मत यायेगु निति मत मवइगु सूचं बिःगु खः।

नेकपा एमालेया केन्द्रीय कमिटी बैठक थौं च्वनेत्यःगु दु। थ्व स्वया न्ह्यः संसदीय दलया बैठक सःतूगु दु ।

प्रधानमन्त्री निवास बालुवाटारय् थौं सुथय् १० बजे संसदीय दलया बैठक सःतूगु दु । संसदीय दलया बैठक लिपा केन्द्रीय कमिटीया बैठक तयेगु लागि प्रधानमन्त्री नाप पार्टी अध्यक्ष केपी शर्मा ओलीें तयारी याःगु खः ।

माधव नेपाल व झलनाथ खनाल समूह न धाःसा बैठकय् मवनेगु धका धाःगु दु। प्रधानमन्त्री नाप पार्टी अध्यक्ष केपी शर्मा ओलीं थ्व स्वया न्ह्य सःतूगु केन्द्रीय कमिटी व संसदीय दलया बैठकय् नेपाल–खनाल समूह मवःगु खः ।

ओलीया कार्यशैलीइ विरोध यासे उमिसं छुट्टै बैठक व भेला याःगु खः ।

उद्योगी नाप व्यवसायी किशोर प्रधान नेकपा एमालेय् प्रवेश याःगु दु ।

प्रधान नाप २३५ म्ह उद्योगी व्यवसायपि बालुवाटारय् छगु ज्याझ्वः दथुइ पार्टी प्रवेश याःगु दु धका प्रधानमन्त्रीया प्रमुख आर्थिक सल्लाहकार धाःगु दु ।

प्रधानमन्त्री केपी शर्मा ओलीं खादा न्ययका उद्योगी व्यवसायीपिन्त पार्टी प्रवेश याकूगु खः।

थ्व स्वया न्ह्यः एमाले प्रवेश याःम्ह प्रधान थ्व स्वयाह्यः हे नेपाल उद्योग वाणिज्य महासंघया वरिष्ठ उपाध्यक्षय् निकः तक पराजित जुइ धुकुगुम्ह खः । न्हापा शेखर गोल्छा नाप बुगु खःसा लिपागु पटक चन्द्र ढकालनाप बुगु खः।

प्रधाननाप सिताराम अग्रवाल, हितेश गोल्छा, पुनम ब्यास, कृष्ण प्रसाइँ, मदन मित्तल, अजय सरावगी लगायतया उद्योगी व्यवसायपि नेकपा एमालेय् प्रवेश याःगु खः।