काभ्रेय् भुखाय् ब्बःगु दु।

थौं सुथय् १० बजे जुया ५ मिनेट वःगु इलय् सिसाखानी धइगु थासय् केन्द्रविन्दु जुया ४.१ रेक्टर स्केलया भुखाय् ब्बःगु दु धका राष्ट्रिय भूकम्प मापन केन्द्रया सहयाक प्राविधिक राजेश शर्मा जानकारी बिःगु दु।

आदिबासी मातृभाषां च्वसा न्ह्याका वया च्वंपिं साहित्यकार तयेगु संगठन कथं निस्वंगु आदिबासी जनजाति साहित्यकार महासंघया नेवाः राज्य समितिइ शाक्य सुरेनया कजिसुइ गठन जुःगु दु ।

यलया सातोआकि भवनय् जुःग उगु घोषणा ज्याझ्वलय् आदिबासी जनजाति साहित्यकार महासंघया केन्द्रिय तदर्थ समितीया कजि राजन मुकारुङ्ग मूपाहाँ कथं झायादीगु खःसा वयकलं हे नेवाः राज्य समिति घोषणा यानादीगु खः ।

उगु ज्याझ्वलय् नेवाः देय् दबूया नायः नरेश ताम्रकार, पूर्व सांसद जितबीर लामा, तामाङ घेडुङ्गया उपाध्यक्ष अजित तामाङ, आदिबासी जनजाति साहित्यकार महासंघ केन्द्रिय तदर्थ समितीया दुजः रजनी मिला, नेवाः न्ह्यलुवापि डा पुष्पराज राजकर्णिकार व डा महेश मान श्रेष्ठ पिनिगु ब्वति दुगु खः। घोषणा जुगु नेवा राज्य समितिया तदर्थ समिति संयोजकय् शाक्य सुरेन, सह संयोजक सुधीर ख्वबि च्वनादीगु खः।

अथेहे सचिब नबिन प्रकाश श्रेष्ठ, दाँभरीं कबिन्दलाल श्रेष्ठ नाप दुजःपिं राजुराम मुनकःमि, विमलप्रभा बज्राचार्य, दिव्या ताम्रकार, शिला सायमि, अर्जुन महर्जन, मीना बज्राचार्य व ज्ञानीराजा मानन्धरपिन्त दुजः कथं ल्यःगु खः ।

अथेहे बुद्घिजिवी दुजःया रुपय् डा पुष्पराज राजकर्णिकार व त्रिरत्न शाक्ययात नं ल्यःगु दु ।

छगु हे स्कूलय् निम्ह प्रधानाध्यापक दुगु सिरहाया बरियारपट्टी गाउँपालिका वडा नम्बर– १ या कचनारीय् बिवाद तच्वःगु दु। कचनारीय् दुगु उगु श्री आधारभुत विधालयय् करिब च्याला निसे प्रधानाध्यापकया बिषय ल्वापू जुया अन बिधार्थीपिनिगु भबिष्य अन्यौलय् लाःगु दु । कक्षा ८ तक दुगु उगु स्कूलय् २०७७ भदौ १७ गते निसे प्रधानाध्यापकया बिषयमा ल्वापू जुया वयाच्वंगु दु।

प्रधानाध्यापकयम बिषय बिबाद जुगुलि उच्च आदालत जनकपुर राजबिराजय् मुद्दा दायर जुगु दु। प्यम्ह जक शिक्षक दुगु उगु बिद्यालयय् निम्ह निमित प्रधानाध्यापकया बिषय थःव थः बिबाद जुया अनया ब्बमिपि तक प्रभाबित जुगु दु धका स्थानियपिन्स धाःगु दु । निमित प्रधानाध्यापक रामनाथ भगत यादवं २०७७ बैशाख १० गतेनिसे बिद्यालयया प्रधानाध्यापकया रुपय् कार्यभार काःगु खः।

शिक्षा विकास व समन्वय ईकाई, सिरहा कार्यालयं बरिष्ठतायो आधारमा प्रअ रामनाथ भगत यादबयात मान्यता बिया वयाच्वंगु खःसा अनया गाउँपालिकां २०७७ भदौ १७ गत उगु हे बिद्यालयय् काजय् बिन्देश्वर प्रसाद यादबयात निमित प्रधानाध्यापकया रुपय् छ्वयेवं बिबाद जुगु खः ।

न्हापायाम्ह निमित प्रधानाध्यापक रामनाथ भगत यादबं गाउँपालिकां काजय् छ्वया हःम्ह बिन्देश्वर प्रसाद यादबयात सहमती बिःगु मदुनि । उगु स्कूलय् ३९६ बिधार्थीपि ब्वनाच्वःगु दु सा अन छम्ह कार्यालय सहयोगी व प्रअ लगायत प्यम्ह शिक्षकपिनिगु भलसाय् कक्षा संचालन जुया वयाच्वंगु खः ।

कक्षा कोठाया अभावं कक्षा १ निसे ३ तक बिधार्थीपि छगु हे कोठाय् तया ब्वका च्वंगु खःसा कक्षा ४, ५, व  ६,७ या बिधार्थीपिन्त छगु हे  कक्षा कोठाय् ब्बका च्वंगु खः ।

उगु स्कूलय् त्वनेगु लः व चःबि तक मदु धका अनया बिधार्थीपिन्स धाःगु दु ।

येँ महानगरपालिकां नगर–नगर साझेदारी ज्याझ्वः कथं स्वनिगः दुनेया न्यागु नगरपालिकायात धार्मिक व पर्यटकीय पार्क नाप बहुदेश्यीय उद्यान निर्माणया लागि ग्वाहालि यायेगु सम्झौतापत्रय् ल्हाचिं तःगु दु ।

निगु नगरपालिका नाप याकन हे ल्हाचिं तयेगु ज्याझ्वः दु धका महानगरपालिकां जानकारी बिःगु दु। येँया राष्ट्रिय सभागृहय् जूगु ज्याझ्वलय् येँ महानगरपालिकाया मेयर विद्यासुन्दर शाक्यं उगु चेक हस्तान्तरण यानादीगु खः । येँ महानगरपालिकां २०७७÷०७८ या स्वीकृत नीति तथा कार्यक्रमय् नगर–नगर साझेदारी कार्यक्रम शीर्षकय् कागेश्वरी मनोहरा, दक्षिणकाली, ताराकेश्वर, किर्तिपुर व मध्यपुर ठिमी नगरपालिकायात धार्मिक नाप पर्यटकीय पार्क व बहुदेश्यीय उद्यान निर्माणया लागि आर्थिक ग्वाहालि यायेगु सम्झौताय् उल्लेख दु धका येँ महानगरपालिकाया मेयर शाक्यं जानकारी बियादीगु खः। सम्झौता कथं दक्षिणकाली नगरपालिकाय् वडा–५ गोरखनाथ डाँडाय् बहुदेश्यीय उद्यान निर्माणया लागि थप छगु करोड रकम हस्तान्तरण याःगु खः।

थ्व स्वया न्ह्यः उगु हे थासय् उद्यान निर्माणया लागि महानगरपालिकां छगु करोड ग्वाहालि याये धुकुगु खः । अथेहे ताराकेश्वर नगरपालिकाय् वडा–५ य् भ्युटावर व वडा–२ या ताराकेश्वर राष्ट्रिय झण्डा पार्क निर्माणया लागि छगु करोड ग्वाहालि याःगु खः। थ्व स्वया न्ह्यः ताराकेश्वर धाम निर्माणया लागि छगु करोड ग्वाहालि याये धुकुगु दु ।

अथेहे कागेश्वरी मनोहरा नगरपालिका वडा–१ य् कागेश्वरी द्यः व अन कागेश्वरी धाम निर्माणया छगु करोड ग्वाहालि याःगु खः । अन न न्हापा हे छगु करोड ग्वाहालि याये धुकुगु दु। अथेतु, किपू नगरपालिकाय् युद्धस्मारक पार्क निर्माणया छगू करोड लल्हागु दु । उगु नगरपालिका वडा १,२ व १० य् करीब ५५ रोपनी क्षेत्रफल दुगु युद्ध स्मारक पार्क निर्माण जुयाच्वंगु खः।

मध्यपुर ठिमी नगरपालिका वडा नम्बर–४ य् निर्माणधिन शंखधर पार्क निर्माणया लागि थप छगु करोड ग्वाहालि याःगु दु । थ्व स्वया न्ह्यः न छगू करोड ग्वाहालि याये धुकुगु खः।

चेक हस्तान्तरण ज्याझ्वलय् येँमनपाया मेयर शाक्यं सू न याकचा न्ह्यने वने फइमखु सकसिगु ग्वाहालि जुलकि जक स्वनिगः व समग्र देय् या विकास जुइ धका सन्देश बिइत थुगु ज्याझ्वः न्ह्यने यकगु खः धका धयादीगु दु । ‘झीसं गन गन नगरपालिका नाप सम्वन्ध कायम यानागु दु उगु उगु नगरपालिका नाप आत्मियता अप्वोया वःगु दु,’ धका धयादीससे, ‘अन स्थानीय नाप न महानगरपालिका जिमिगु खः धका अनुभुति जुइ कथं महानगरयात महानगर दयेकेत ग्वाहालि यायेगु भावना ब्बलनिइगु अपेक्षा यानागु दु।’ शाक्यं सम्पदा, पर्यटन व पर्यापर्यावरणयात ध्यानय् तया ग्वाहालि यानागु धका धयादीगु खः।