Display Style:
Column Style
नवीन्द्रराज जोशीया अवस्था गम्भीर
लहानान्युज | चौलाथ्व चतुर्थी ११४१, चैत्र ४ बुधवाः
पूर्वमन्त्री नाप नेपाली कांग्रेसया नेता नवीन्द्रराज जोशीया अवस्था गम्भीर खनेदुगु दु।
मष्तिष्कघात जुया नर्भिक इन्टरनेशनल हस्पिटलय् उपचाररत जोशीया अवस्था गम्भीर दुगु व वयागु भेन्टिलेटरय् तया उपचार जुयाच्वंगु दु धका अस्पतालं धाःगु दु
जोशीयात मष्तिष्कघात जुया वःगु फागुन १४ गते नर्भिकय् भर्ना जूगु खः ।
छु दिं उपचार लिपा वयागु अवस्था सुधार जुया वःगु खःसा लिपा हाकनं गम्भीर जुया वःगु धका अस्पतालं विज्ञप्तिपाखे जानकारी बिःगु दु ।
आः पाँचखालय् अय्ला त्वनेत अनुमति कायेमाः
लहानान्युज | चौलाथ्व चतुर्थी ११४१, चैत्र ४ बुधवाः
काभ्रेपलाञ्चोकया पाँचखाल नगरपालिकां अन च्वपि नागरिकयात मदिरा उत्पादन व सेवन यायेत अनुमति काये माःगु व्यवस्था याःगु दु ।
‘मदिरा नियमन तथा व्यवस्थापन ऐन २०७७’ कथं नागरपालिकां मदिरा उत्पादन व सेवन यायेत अनुमति काये माःगु व्यवस्था कार्यान्वयनय् हःगु दु । नगर दुने सदाचार, स्वास्थ्य, सुविधा व आर्थिक हित कायम तया सभ्य, शान्त व सकारात्मक लँय् समुदाययात न्ह्यने यकेत व घरेलु हिंसा न्यूनीकरणया लागि नगरपालिका दुने मदिरा उत्पादन, बिक्री वितरण व सेवन ज्याय् नियमन नाप व्यवस्थापन यायेगु लागि थःथे व्यवस्था लागू यायेत्यनागु दु धका नगरपालिकां धाःगु दु।
ऐन विपरित मदिरा सेवन याना समुदायय् होहल्ला, शान्ति भङ्ग जुइगु क्रियाकलाप नाप ल्वापू याइपिन्त न्हापागु पटकया लागि रु ५०० जरिवाना नाप उम्ह मनूखं पटक पटक अथेहे लिसा कया यातकि २० प्रतिशतया दरं जरिवाना याना वनिइगुे प्रावधान याःगु दु । मदिरा उत्पादन, बिक्री वितरण व सेवनया लागि अनुमति काये माःगु व मदिरा सेवनकर्तां वार्षिक शुल्क पुलां जक ‘सेवन कार्ड’ काये माःगु व्यवस्था नगरपालिकां याःगु दु।
उगु ऐनं १८ दँ स्वया कम जूपिन्त मदिरा बिक्री वितरण याये मदइगु व्यवस्था याःगु दु। छगु वडाय् छगु जक अय्ला पसः व न्यागु ओसारपसार मदिरा पसःयात जक अनुमति बिइगु ऐनय् उल्लेख दु । जाती विशेषया नखः चखः नाप परम्परा व संस्कृतिया इलय् नगरपालिका नाप पूर्वस्वीकृति कया क्वछिगु इलय्, थासय् व उगु ल्याखं अय्ला यके दइगु व्यवस्था ऐनय् दु ।
सेवनकर्तां नगरपालिकापाखे सेवन कार्ड काये माःगु व उगु वापत वार्षिक छक्वलं ५०० तका व नवीकरण नाप कार्डबापत ५०० तका बुझेयाये माःगु व्यवस्था दु। अतिथि कार्डबापत न्हि १०० तकां पुलेमाःगु व्यवस्था ऐनय् याःगु दु ।
अथेहे ऐन विपरित ज्या यागु ध्यवां २५ प्रतिशत सुरक्षा व्यवस्थापनय्, २५ प्रतिशत शिक्षा व स्वास्थ्य क्षेत्रय्, १५ प्रतिशत सुराकीयात, १५ प्रतिशत सूचना व २० प्रतिशत ध्यवा नगरपालिकाया सञ्चित कोषय् जम्मा यायेगु व्यवस्था याःगु दु धका नगरपालिकां धाःगु दु।
पेट्रोल व डिजेल, मचिकंया भाः लिटरय् नितका थहावन
लहानान्युज | चौलाथ्व चतुर्थी ११४१, चैत्र ४ बुधवाः
नेपाल आयल निगमं पेट्रोलियम पदार्थया भाः थकाःगु दु ।
पेट्रोल व डिजेल, मचिकंया भाः छगु लिटरय् नितका थकाःगु दु ।
आः पेट्रोलया छगु लिटर ११८ व डिजेल, मचिकं १०१ रुपैयाँ थ्यःगु दु। हवाई ईन्धन (आन्तरिक उडानपाखे) या साविक खुद्रा बिक्री मूल्यय् छगु लिटरय् नितका थकाया आः ७४ रुपैयाँ कायम जूगु दु ।
एलपी ग्यास व हवाई इन्धन (आन्तर्राष्ट्रिय उडान पाखे) या खुद्रा बिक्री मूल्य यथावत हे कायम तया तःगु दु धका निगमया प्रवक्ता विनितमणि उपाध्यायं जानकारी बिःगु दु ।
चीनं दयेकूगु कोभिड–१९ या खोप कापिं जक चीन वनेफइगु
चौलाथ्व तृतीया ११४१, चैत्र ३ मंगलवाः
उत्तरी छिमेकी चीनं थःगु देशं दयेकूगु कोरोनाको खोप काःपिं नेपाःमि पिन्त जक चीन भ्रमणया भिसा बिइगु धाःगु दु ।
येँ च्वंगु चिनियाँ दूतावासं छगू प्रेस विज्ञप्ती जारी याना चीनं दयेकूगु कोभिड–१९ खोप पुवंक काःपि नेपाःमि पिन्त जक भिसा आवेदनय् ग्वहाःलि यायेगु धाःगु दु । ‘चीन व विदेशी देय्त दथुई ज्याकःमि वयेवनेत ज्या बाँलाक्क यायेत नेपालय् च्वंग्ु चिनियाँ दूतावासं उगु भिसा आवेदकपिन्त सहजिकरण याई, गुकिं चीनय् दयेकूगु कोभिड–१९ या भ्याक्सिन काःगु प्रमाणलिसें निवेदन बिइफई ।’
विज्ञप्तिमा धयातःगु दु । अथेहे चीन वनिपिं यात्रुपिन्सं कोभिड नेगेटिभ सर्टिफिकेट अनिवार्य पेश यायेमाःगु नं विज्ञप्ति न्ह्यथनातःगु दु । चीनय् थ्येनेवं क्वारेन्टाइन न च्वनेमालिगु धाःगु दु । भारत सरकारं निला न्ह्यः नेपाःयात १० लाख डोज कोरोनाया खोप उपलब्ध याना नेपालं खोप अभियान गाँगाँ तक्क थ्यंकेत सुथांलाःगु खः ।
उखे चीनं धाःसा नेपाःयात अनुदानय् बिइगु धाःगु खोप आःतकं नं थ्यंगु मदुनि । चिनियाँ कम्पनी सिनोफार्मं दयेकूगु खोप नेपाःयात बिइगु धाःसां ढुवानी नेपालं हे यायेमाःगु शर्त तसेंलि खोप हयेगु प्रक्रिया अलपत्र जूगु खः ।
नेपाःया विजुली बंगलादेश निर्यातया नितिं पारवहनया सुविधा बिइत भारत तयार
चौलाथ्व तृतीया ११४१, चैत्र ३ मंगलवाः
नेपालय् उत्पादन जूगु विजुली बंगलादेश निर्यातया नितिं सहजीकरण यायेत थःपिं तयार दूगु भारतं न्ह्यथंगु दु ।
नेपालं ३गूगु देशय् विजुली निर्यातया नितिं पारवहनया सुविधा बिइत भारत तयार दूगु भारतया विदेश सचिव हर्षवर्द्धन श्रींगलां धयादीगु दु ।
वयेकलं छुं दिं न्ह्यः ‘नेपालं भारत व बंगलादेशय् विजुली निर्यात याये फइगु’ अभिव्यक्ति बियादीगु खः । नेपाःया बिजुली बंगलादेश निर्यातया नितिं भारतीय भूमि जुया वनेमाः ।
उकिया नितिं भारतं सहजीकरण याइ कि मयाइ धइगुलिइ नेपाः व बंगलादेश निगुलिं शशंकित दु । ऊर्जाया उच्च माग दूगु बंगलादेशं ताः ई निसें भारतलिसे सहजीकरणया नितिं इनाप यानावःगु खः ।
भारत व बंगलादेश दथुइ जुइगु हरेक उच्चस्तरीय मुँज्याय् थुगु विषयलं प्राथमिकता चूलाकेगु याःगु दु । लिपांगु इलय् भारतया उच्च अधिकारीतयेपाखें बिजुली निर्यातया नितिं पारवहन सुविधा बिइगु प्रतिवद्धता वःगु दु ।
अय्सां थ्व सम्बन्धी विस्तृत गृहकार्य धाःसा ल्यं दनिइ । छुं वा न्ह्यः भारतं उर्जाया आयात व निर्यात सम्बन्धी कार्यविधि संशोधन याःगु खः ।
तर, उगु कार्यविधिइ भारतलिसे सिमाना स्वागु छुं नं ३गूगु देशं लगानी याःगु परियोजनाया बिजुलीया नितिं धाःसा उगु सुविधा मबिइगु उल्लेख यानातःगु दु । उगु प्रावधानं चिनियाँ लगानीयात धाःसा लिच्वः लाकिगु खनेदु ।
