सर्वोच्च अदालतं संसद विघटन बदर यायेवं नेपाल कम्युनिष्ट पार्टी (नेकपा) प्रचण्ड–माधव समूहया संसदीय दलया बैठक सःतूगु दु ।

थौं न्हिनसिया ४ बजेया लागि संसदीय दलया बैठक सताःगु दु धका प्रवक्ता नारायणकाजी श्रेष्ठं जानकारी बिःगु दु । उगु बैठकय् संसदीय दलं वइगु संसद बैठकय् म्हित्यमाःगु भूमिका व रणनीति तय याइ धका धाःगु दु। प्रचण्ड–माधव समूह न थ्व स्वया न्ह्यः केपी शर्मा ओलीयात संसदीय नेतापाखे हटे याना प्रचण्डयात नेता ल्यःगु खः ।

उगु समूह न ओलीयात नेकपाया साधारण सदस्य तक मदुइगु कथं कारबाही याःगु खः।

प्रतिनिधिसभा विघटनया निर्णययात सर्वोच्च अदालतं बदर यायेवं नेकपा प्रचण्ड–नेपाल समूह न थौं देयन्यक विजय जुलुस पिकाय् त्यःगु दु ।

स्वनिगः पिने ८ बजे निसे विजय जुलुस पिकाःगु दु सा थुगु समूह न केन्द्रीय संघर्ष समिति धाःगु दु । येँ धाःसा न्हिनया १२ बजे शान्तिवाटिका न विजय जुलुस पिकाय त्यःगु धका समितिं धाःगु दु ।

शान्तिवाटिकाया जुलुसय् समूहया अध्यक्षपि पुष्पकमल दाहाल ’प्रचण्ड’ व माधवकुमार नेपाल सहभागी जुइगु सम्भावना दु धका प्रचण्डया प्रेस संयोजक विष्णु सापकोटां जानकारी बिःगु दु । निम्हं अध्यक्षपि चितवनय् दु ।

वइगु मार्च २७ तारीख चैत्र १४ गतेया दिनस हलिं नेवाः दिवस नेपालय् नंं तःजिक हनीगु जूगु दु । दँय्दसं मार्चया लिपागु शनिबाः हलिं नेवाः दिं हनावःगुलिइ थुगुसी वइगु मार्च २७ तारीखय् प्यक्वःगु हलिं नेवाः दिवस हनेत्यंगु खः ।

थ्व हे झ्वलय् नेपालय् नं प्यक्वःगु हलिं नेवाः दिं तःजिक हनेगु नितिं तयारी न्ह्याःगु दु । उकिया झ्वलय् हलिं नेवाः दबू नेपाः कन्ट्रि च्याप्टरया सुरेन्द्रभक्त श्रेष्ठया संयोजकत्वय् प्यक्वःगु हलिं नेवाः दिवस ११४१ तयारी समिति गठन जूगु दु ।

सल्लाहकारद्वय सुमित्रा मानन्धर व नरेश ताम्रकार तकंया उपस्थितीइ च्वंगु हलिं नेवाः दबू नेपाः कन्ट्रि च्याप्टरया सचिवालय मुँज्यां श्रेष्ठया संयोजकत्वय् गठन याःगु तयारी समितिइ सुदय शिलाकार र रमेशमान मुनिकारयात ल्यू कजि तःगु दु ।

अथे हे, थीथी उपसमितिमध्ये संचार उपसमितिइ रत्नकाजी महर्जन, प्रचार प्रसारय् नवीन जोशी, आर्थिक उपसमितिइ उर्मिला डंगोल, साँस्कृतिक उप समितिइ सविता महर्जन, मंच व्यवस्थापनय् मंगल ताम्राकार, अतिथि सत्कारय् कस्तुरी श्रेष्ठयात कजि ल्यःगु दु । व हे कथं थीथी विषयस जुइगु प्यानल डिस्कसन नेपाः च्याप्टरया नायः शाक्य सुरेनया भालाय् लाःगु दु ।

हलिमय् न्यंक च्वनाच्वंपिं नेवाःत जानाः हनीगु हलिं नेवाः दिवसया झ्वलय् नेवाःतय् आदिभुमि नेपाःया ज्याझ्वः अझ विशेष जुइमा धइगु ल्याखं परिकल्पना दयेकाः योजनाय् न्ह्याःवनागु तयारी समितिया कजि सुरेन्द्र भक्त श्रेष्ठं धयादिल ।

नेवाः पत्रकार राष्ट्रिय दबू ख्वप जिल्लाया न्ह्यक्वःगु साधारणसभा थौं मंगलवाः क्वचाःगु दु । उगु सभाया उलेज्या पत्रकार दबूया केन्द्रीय अध्यक्ष सुरजवीर बज्राचार्यं यानागु खः। वयकलं नेपाःया पत्रकारिताया दायरा विस्तार यायेगु लागि समावेशी सञ्चार व मातृभाषा पत्रकारिताया महत्व व आवश्यकता दु धका धयादीगु खः।

उगु ज्याझ्वलय् नेपाली पत्रकारिता ख्यलय् विषयगत व समाचारकक्षया विविधताया हिसाबं समावेशीया अभ्यास यायेत पत्रकार दबू न काःगु नीति व ज्याझ्वः जिल्ला शाखां दृढतापूर्वक लागू याये माः धका अध्यक्ष बज्राचार्य बः बियादीगु दु।

ज्याझ्वलय् पत्रकार दबूया केन्द्रीय महासचिव सुनील महर्जनं आःतक समाचारया विषय मजुगु भाषिक, सांस्कृतिक व वर्गीय हिसाबं उत्पीडनय् लाःपिनिगु मुद्दा व विषययात सञ्चारमाध्यमं थाय् बिया पत्रकार दबू न महत्वपूर्ण भूमिका निर्वाह यायेमाः धका धयादीसे ख्वप शाखा स्थापनाकाल निसे महत्वपूर्ण योगदान भुमिका म्हितिगु दु धका महासचिव महर्जनं धयादीगु दु ।

ज्याझ्वलय् वि सं २०६९ सालय् स्थापना जुगु नेवाः पत्रकार राष्ट्रिय दबू ख्वप शाखाया संस्थापक अध्यक्ष केके मानन्धर, निवर्तमान अध्यक्ष ईश्वरकाजी खाइजु, कृष्ण किसी, सुरेश सैंजु, सीमान्त शिल्पकार लगायत पत्रकारपिनिगु योगदानया न तधःगु भुमिका दु धका धयादीगु दु । अथेहे कोषाध्यक्ष सुरेन्द्रभक्त श्रेष्ठं पत्रकार दबूलय् आबद्ध सञ्चारकर्मीपिन्त जटिल रोग जुलकि आर्थिक ग्वाहालिया निति १५ लाखया अक्षयकोष स्थापना जुइ धुकुगु दु धका धयादीसे दच्छिया दुने कोषय् ५० लाख थ्यकिइगु प्रतिबद्धता यानादीगु खः।

उगु ज्याझ्वलय् पत्रकार दबूया स्थापनाकाल निसे महत्वपूर्ण भूमिका म्हिता च्वनादिम्ह पत्रकार रत्न श्रेष्ठं वयकःया मां व अबुया लुमन्ति ‘हरिलाल, श्रीलक्ष्मी लुमन्ति पत्रकारिता सिरपा’ या घोषणा यानादीगु दु। पत्रकारिता पाखे योगदान याःपि सञ्चारकर्मीपिन्त प्रोत्साहित यायेत १० हजार नगद राशिया उगु पुरस्कार स्थापना यानागु धका पत्रकार श्रेष्ठं धयादीगु खः ।

पुरस्कारया लागि कोषाध्यक्ष चन्द्रकृष्ण (गोपाल) श्रेष्ठ पाखे पत्रकार दबूयात उगु नगद लल्हानादिगु खः। पत्रकार दबू ख्वप जिल्लाया अध्यक्ष रामगोपाल तमखुं नेपाली समाजय् विविधतायात सञ्चार ख्यलय् प्रतिविम्बित यायेत पत्रकार दबू न ज्या याना वयाच्वंगु दु धका धयादीगु खः।