येँ महानगरपालिकाया मेयर विद्यासुन्दर शाक्यं महानगरय् कन्ह्यनिसे निःशुल्क पिसिआर परीक्षण यायेगु धका धयादीगु दु।

पिसिआर परिक्षणया लागि स्वाब संकलन यायेगु ज्या न्ह्या वनाच्वंगु दु धका धयादीगु दु।

थौं येँया शंखधर पार्कय् जुगु राष्ट्रिय विभूति शंखधर साख्वा व मानव अधिकारवादि नेता नाप नेवाः न्ह्यलुवाः पद्मरत्न तुलाधरया झ्वाता अनावरण ज्यााझ्वलय् मेयर शाक्यं अथे धयादीगु खः।

अथेहे वयलं कन्ट्याक्ट ट्रेसिङय् लापि अशक्त व जेष्ठ नागरिकपिनिगु पीसीआर परीक्षणया लागि स्वाब संकलन यायेत मोबाइल भ्यान सञ्चालन यायेगु तयारी तक दुगु धका धयादीगु खः।

मेयर शाक्यं कन्ट्याक्ट ट्रेसिङय् लापि व लक्षण खनेदुपिन्स जक पिसिआर टेष्ट यायेत इनाप यानादीगु खः। स्वनिगलय् वःगु छु ई निसे कोरोना संक्रमण अप्वोया वना च्वंगु उगु चक्र तोडे यायेत प्रभावकारी पलाः ल्ह्वनेइगु ई वःगु दु धका धयादिगु खः।

वःगु २४ घण्टाया दुने २ हजार ३२३ म्हेसित कोरोना संक्रमणपि डिस्चार्ज जुगु दुु धका स्वास्थ्य मन्त्रालयं धाःगु दु।

थ्व नाप नेपालय् कोरोनामुक्त जूपि १ लाख ९३ हजार ३२५ म्ह थ्यःगु दु धका धाःगु दु ।

अथेहे २४ घण्टाया दुने कोरोना संक्रमणं न्ह्यम्ह मन्त। थ्व नाप नेपालय् कोरोना सीपि आःतक १ हजार ३०५ म्ह थ्यःगु दु।

वःगु २४ घण्टाया दुने शनिवाः थप १ हजार ६७४ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप नेपालय् कोरोना संक्रमितपि २ लाख १८ हजार ६३९ म्ह संक्रमितपि थ्यःगु दु धका मन्त्रालयं धाःगु दु ।

मन्त्रालयया कथं आःतक पीसीआर विधिपाखे १६ लाख ५२ हजार ४३म्हेसिगु परीक्षण याये धकुगु दु। 

वःगु २४ घण्टाय् जम्मा ८ हजार १४४ म्हेसिगु पीसीआर परीक्षण याःगु खः। देय् यकं सक्रिय संक्रमितपि आःतक २४ हजार ९म्ह दु।

आःतक क्वारेन्टाइनय् च्वना च्वपि ७५७ म्ह थ्यःगु दु।

वःगु २४ घण्टाया दुने स्वनिगलय् थप ८९९ म्हेसित कोरोना संक्रमित जुगु दु धका स्वास्थ्य तथा जनसंख्या मन्त्रालयं धाःगु दु।

थौं शनिवाः संक्रमित पुष्टि जूपि ३८७ म्ह मिसा व ५१२ म्ह मिजंपि खः।

थौं येँ जक ६८५म्हेसित कोरोना पुष्टि जूगु दु। अथेहे, ख्वपय् ४९ म्ह व यलय् १६५ म्हेसित संक्रमित जूगु दु धका धाःगु दु।