सरकार ३१ म्ह सहसचिवयात छक्वल सरुवा व पदस्थापन याःगु दु।

प्रतिनिधिसभा पुनःस्थापना जुगु निन्हु लिपा हे संघीय मामिला तथा सामान्य प्रशासन मन्त्रालयं छक्वल ३१ म्ह सहसचिवपिन्त सरुवा व पदस्थापन याःगु दु । गृह मन्त्रालयय् खगेन्द्रप्रसाद रिजालयात हःगु दु । थ्व स्वया न्ह्यः अख्तियार दुरुपयोग अनुसन्धान आयोगय् दुम्ह खः । अथेहे छविलाल रिजालयात सञ्चार मन्त्रालयं गृहय् हःगु खः ।

अथेहे रामप्रसाद आचार्ययात रक्षा मन्त्रालयपाखे प्रधानमन्त्री तथा मन्त्रिपरिषदया कार्यालय सरुवा याःगु खः ।

लगानी बोर्डया कार्यालयय् च्वम्ह धर्मेन्द्रकुमार मिश्र मधेसी आयोगय् वःगु दु सा दीर्घराज मैनालीयात प्रधानमन्त्री तथा मन्त्रिपरिषदया कार्यालयपाखे अर्थ मन्त्रालय सरुवा याःगु दु।

नेकपा प्रचण्ड–माधव समूहया नेतापि राजेन्द्रप्रसाद पाण्डे व मुक्तिनारायण प्रधान बुधवाः बहादुरभवनय् निर्वाचन आयोगया कार्यालयय् वःगु दु ।

नेकपाया आधिकारिकता सम्बन्धी विवाद गुलि दिं दुने समाधान जुइ धका न्यनेत आयोगय् वःगु खः। सर्वोच्च अदालतं संसद पुनःस्थापना याये धुका आःया बैठकय् प्रधानमन्त्री ओलीविरुद्ध अविश्वासया प्रस्ताव हयेगु तयारी प्रचण्ड–माधव समूह न याःगु दु। तर, सत्तारुढ दलया पाखे हे अविश्वासया प्रस्ताव हयेत मछिनिइगुलि निर्वाचन आयोगं याकन हे नेकपा विभाजन सम्बन्धी मुद्दा छिनोफानो याये माःगु प्रचण्ड–माधव समूहया नेतापिनिगु माग दु ।

थ्व हे मागयात कया ताकेता यायेगु लागि नेता पाण्डे व पूर्वमहान्यायाधिवक्ता प्रधान बुधवाः आयोगया कार्यालयय् वःगु खः। आयोगं याकन हे नेकपा विभाजनयात बैधानिकता मबिगुलि उकिया असर संसदय् प्रधानमन्त्री ओलीविरुद्ध हयेत्यःगु अविश्वासया प्रस्तावय् न खनेदइ।

बुधवाः आयोगय् वःपि पाण्डे व प्रधानयात आयोगया अधिकारीपिन्स नेकपाया विवाद क्वचाय्केत निला स्वया अप्वो लगे जुइ धका लिसः बिःगु दु।

जगतसुन्दर ब्वनेकुथिया स्वीछदँ क्यःगु लसताय् छगु ज्याझ्वः जुगु दु । उगु ज्याझ्वलय् मूपाहाँ येँ महानगरपालिका १५ वडाया वडा अधक्ष्य नाप येँ महानगरया प्रवक्ता ईश्वरमान डंगोलं छगु ज्याझ्वः दथुइ त्वाः देवाय् मत च्याका उलेज्या यानादीगु खः।

उगु ज्याझ्वलय् थःगु खँ तयादीसे मूपाहाँ वडा अधक्ष्य डंगोलं थौं स्वया स्वीदँ न्ह्यः नेपालभासं ब्बक्यगु सुरु याःगु थु ब्बनेकुथि न्ह्याकूगु थौं येँ महानगरपालिका न थुगु दँनिसे महानगर दुने दुगु स्कूलय् स्थानीय भासा कथं नेपालभासं ब्बकेयगु सुरु यानागु धका धयादीगु खः।

म्हिगः जगत सुन्दर ब्बनेकुथि सुरु याःगु पलाः हे येँ महानगरपालिका न्ह्याकुगु खः। उगु ज्यााझ्वलय् ब्वनेकुथिया संचालक दुजःपि प्रा.डा चुन्दा बज्राचार्य, अमेश बज्राचार्य, राजभाई जकःमिपिन्स भिंतुना देछानादीगु खः । ब्वनेकुथिइ नीन्यादँ तक्क मदिक्क ज्यायाना ग्वाहालि यानादीपिं लेखापाल विजयरत्न बज्राचार्य व शिक्षिका रमिता मालाकारयात दोसल्लां न्ययेका हनेज्या याःगु खः ।

अथेहे आर्टय् ताःलाःपि न्हाप रवि श्रेष्ठ, ल्यु खुशी विश्वकर्मा व ल्युयाल्यु सलिना महर्जनया दसिपौ मूपाहाँ डंगोलं लःल्हानादीगु दीगु खः । संस्थापक दुजः अनाररत्न बज्राचार्यया सभाधक्ष्यताय् जुगु खः।