Display Style:
Column Style
किपू नगरपालिकाय् ६ वडाय् न्हुगु भवन उलेज्या
नृपेन्द्रलाल श्रेष्ठ | सिल्लाथ्व अष्टमी ११४१, फागुन ८ सनिवाः
किपू नगरपालिकाय् ६ वडाय् न्हुगु भवन उलेज्याकिपू नगरपालिका ६ न. वडाय् न्हू वडा भवनया उलेज्या जूगु दु ।
वंगु जेष्ठ १७ गते येँ जिल्ला समन्वय समितिया प्रमुख शिव सुन्दर राजवैद्य व किपू नगरपालिकाया मेयर रमेश महर्जनं मंकाः शिलान्यास यानादीगु उगु वडा भवन वयकःपिन्सं छगु ज्याझ्वः दथुइ मंकाः उलेज्या यानादीगु खः ।
उगु उलेज्या झ्वलय् येँ जिल्ला समन्वय समितिया उप–प्रमुख सरिता दाहाल, किपू नगरपालिकाया उप–मेयर सरस्वती खड्का, किपू नगरपालिकाया वडा अध्यक्षपिंलिसें सर्वसाधारणतयगु ब्वति दुगु खः ।
किपू नगरपालिकाय् मिसा पुचःपिन्त आर्थिक तिवः जुइग ज्याझ्वः जुल
सिल्लाथ्व अष्टमी ११४१, फागुन ८ सनिवाः
किपू नगरपालिकाय् मिसापिन्त आर्थिक तिवः जुइगु कथं छगु ज्याझ्वः जुगु दु ।
किपू नगरपालिका वडा नं. १ य्ं वडाच्वपि मिसा पुचःयात आर्थिक तिवः जुइगु कथं लं सुइगु कल (सिलाइ मेशिन) व मसला दयेकेगु मेशिन लःल्हाःगु दु ।
उगु ज्याझ्वलय् किपू नगरपालिकाया मेयर रमेश महर्जन, उप–मेयर सरस्वती खड्कालिसें वडा नं. १ या अध्यक्ष हर्ष महर्जनं मिसा पुचःयात उगु मेशिन लःल्हानादीगु खः । उगु ज्याझ्वः किपू नगरपालिका वडा नं. १ या अध्यक्ष हर्ष महर्जनया अध्यक्षताय् जूगु खः।
राष्ट्रपति विद्यादेवी भण्डारीं संविधानया रक्षा मया, पूर्वराष्ट्रपति यादव
लहनान्युज | सिल्लाथ्व सप्तमी ११४१, फागुन ७ शुक्रवाः
पूर्वराष्ट्रपति डा. रामवरण यादवं वर्तमान राष्ट्रपति विद्यादेवी भण्डारीं संविधानया रक्षा मयागु धका धयादीगु दु । शोभाकर पराजुली च्वयादीगु लिखिनत समाजवाद व वीपी कोइराला नाप वीपी विचार संग्रह सफू जनकपुरधामय् बिमोचन यानादीसे डा. यादवं धयादीगु दु, ‘राष्ट्रपतिं संविधानया पालना यानादीगु मया । रक्षा यानामदी ।’
प्रधानमन्त्रीं संसद बिघटनया सिफारिस यायेवं राष्ट्रपतिं दलदुनेया विवादं संसद विघटन याये मज्यु धका धयादीगु दु । ‘छि थःगु दल दुनेया विवाद समाधान यानादीस व, समाधान मजुसा सदनय् झाँस। मेगु नाप सहमति कयादीसँ । मेगु दलं साथ बिउसा सरकार चले याकादीस। मखुसा अविश्वासया प्रस्ताव फेस यानादीस । व संविधानं स्टेप कथं झाँस धका धायेमाःगु खः’ डा. यादवं धयादीगु दु। वयकलं राष्ट्रपति भण्डारीें दलीय आवद्धता मत्वतुगु आशय प्रकट यानादीगु दु ।
‘वयकः ला राजनीतिक दलय् मदु, जि न कांग्रेसपाखे राष्ट्रपति जुयागु इलय् तत्कालिन सभापति गिरिजाप्रसाद कोइराला समक्ष राजीना बियागु खः। वयकलं न बियादीगु दु जुइ जि आशा यायें’ डा. यादवं धयादीगु खः । लोकतन्त्रया थाः राजनीतिक दल खः धयादीसे वयकलं धयादीगु दकलय् तधःगु दल विभाजित जुगु व मेगु दल कांग्रेसया अवस्था न ठीक मजुगु धका धयादीगु दु । ‘दकलय् ऐतिहासिक, लोकतन्त्र व समाजवादीया पर्यायवाची जुगु पार्टीया अवस्था छु दु ? ठीक दु ?’ वयकलं न्ह्यसः तयादीगु दु ।
ओलीं सरकारं संविधान हाचां गाइमखु : प्रधानमन्त्री ओली
लहनान्यूज | सिल्लाथ्व सप्तमी ११४१, फागुन ७ शुक्रवाः
प्रधानमन्त्री केपी शर्मा ओलीं आःया सरकारं संविधान हाचां गाइमखु धयादिगू दु ।
थःगु नेतृत्वया सरकारं लोकतन्त्रया लँपु त्वः मफिकिइगु तकं प्रधानमन्त्री ओलीं भलसाः प्वंकालिद ।
प्रजातन्त्र दिवसया लसताय् थौं येँया तिन्ख्यलय् जूगु ज्याझ्वलय् वय्कलं नागरिकया अभिमत अःखः थः मवनेगु समेत धयादिल ।
राष्ट्रिय एकतालिसें न्ह्यःने वनेमाःगु आःया आवश्यकता जूगु धासें प्रधानमन्त्री ओलीं मेगु दँ तक्क नेपाः अल्पविकसित देशं विकासशील देय्लय् न्ह्यावनिगु धयादिल । देय्यात अस्थिरतापाखें तापाकेत जनअनुमोदित प्रक्रियाय् वनेगु लँपु ताजा जनादेश जूगु धासें वय्कलं क्वछिनातःगु ईलय् हे चुनाव जुइगु ठोकुवा यानादिल ।
प्रधानमन्त्री ओलीं गुगुनं कथंया अलमल यायेगु व लोकतन्त्रयात अलमल याकेगु ज्याय् सुनानं यायेमज्यूगु धासें वयकलं चिचिधंगु मतभेदयात त्वःता वृहत्तर राष्ट्रिय हितया नितिं छप्पं जुया न्ह्यने वनेमाःगु धयादिल ।
लुँया भाः म्हो जुइगु झ्वलय्
सिल्लाथ्व सप्तमी ११४१, फागुन ७ शुक्रवाः
थौं लुँया भाःलय् द्वछिं कुहाँवःगु दु । म्हिग तोलाया ८९द्वः २सःलय् कारोबार जूगु लुँ थौं धाःसा द्वःछि कुहाँवया ८८द्वः व २सःलय् कारोबार जुयाच्वंगु नेपाल सुनचाँदी व्यवसायी महासंघ न्ह्यथंगु दु ।
अथेहे वः तोलाय् ३० म्हो जूगु दु । वः थौं तोलाय् १३सः व ५तकाये कारोबार जुयाच्वंगु महासंघं न्ह्यथंगु दु । वः म्हिग तोलाया १३सः व ३५तकाये कारोबार जूगु खः ।
अथेहे वाःलय् लुँया भाःलय् २द्वः व ७सःलं कुहाँवःगु दु । आईतबाः ९०द्वः व ९सः लय् कारोबार जूगु लुँया भाः शुक्रबाःतकया दुने ८८द्वः व २सः तक्क थ्यंगु दु । अन्तराष्ट्रिय बजारय् लुँया भाःलय म्हो जुइवं स्थानीय बजारय् नं लुँया भाःलय् म्हो जूगु नेपाल सुनचाँदी व्यवसायी महासंंघं जानकारी विल । अथेहे वंगु छवाःया वः या भाःलय् धाःसा १५ तका जक कुहाँवःगु दु ।
आईतबाः वःया प्रतितोला १३सः व २० तका ध्येबाय् कारोबार जूगु खः । अथेहे शुक्रबाः १३सः व ५ तका प्रतितोला थ्यंगु खः ।
अन्तराष्ट्रिय बजारय् लुँ प्रति औन्स १७सः व ७० तका डलरया हाराहारीइ कारबोबार जुयाच्वंगु दु । हलिंयंकया कोरोना खोपया सकारात्मक समाचारं लुँया भाःलय् छुं भचा दनावःगु खः ।
