Display Style:
Column Style
किपू नगरपालिकाय् न्हुम्ह प्रमुख प्रशासकीय अधिकृतयात लसकुस
नृपेन्द्रलाल श्रेष्ठ | अनलाथ्व १५ ११४०,असोज १५ बिहीवाः
किपू नगरपालिकाय् न्हुम्ह प्रमुख प्रशासकीय अधिकृतय् सीता परियारयात नगरपालिका भवनय् छगु ज्याझ्वः दथुइ लसकुस याःगु दु।
किपू नगरपालिकाया मेयु रमेश महर्जन, उप–प्रमुख सरस्वती खड्का नाप दक्को शाखा प्रमुखपिनिगु उपस्थितिइ प्रमुख प्रशासकीय अधिकृत परियारयात लुसकुस याःगु खः।
लुँ वहःया भाः क्वहावल
शोभा श्रेष्ठ | अनलाथ्व १५ ११४०,असोज १५ बिहीवाः
लुँया भाः तोलाय् निसः क्वहा हःगु दु।
थौं लुँ तोलाय् निसः क्वहा वया तोलाय् ९४ हजार ५ सय रुपैयाँ निर्धारण जूगु दु धका नेपाल सुनचाँदी व्यवसायी महासङ्घं धाःगु दु।
म्हिगः लुँ तोलय् न्यासः थहा वना तोलाय् ९४ हजार ७ सय रुपैयाँय् कारोबार जूगु खः।
अथेहे वहः तोलाय् न झींन्यातका क्वहा वःगु दु।
थौं वहः तोलाया ११७५ रुपैयाँ न कारोबार जूगु दु।
लानिपूखुया बालगोपालेश्वर देगलय् गजू छुत
शोभा श्रेष्ठ | अनलाथ्व १५ ११४०,असोज १५ बिहीवाः
लानिपूखुया दथुइ च्वंगु बालगोपालेश्वर देगलय् थौं बिहीवाः गजू तःगु दु।
वःगु २०७२ सालया तःभुखाय् न क्षतिग्रस्त जूगु उगु बालगोपालेश्वर देगलय् पुननिर्माणया ज्या लिपागु चरणय् थ्यःगुलि थौं बिहीवाः लुँसिया तःगु गजू तःगु खः। थ्व स्वया न्ह्यः गुम्बज शैलीइ निर्माण याये त्यःगु बालगोपालेश्वरया देगः विज्ञपिनिगु प्रतिवेदनया कथं प्रताप मल्लया पालाय् दयेका तःगु ग्रन्थकुट (शिखर) शैलीइ पुनर्निर्माण याःगु खः।
१८९० या भुखाचं देगलय् क्षति जुया गुम्बज शैलीइ पुननिर्माण याःगु खः। तर थुगु पटक हाकन पुलागु हे शैलिइ पुनर्निर्माण याये त्यःगु खः।
देगःया च्वय् गजूया उचाइ ६ फुट १० इन्च दु। ताम्रपत्रय् लुँसिया देयकुगु खः। उगु गजू झण्डै २८ तोला लुँया जलप तःगु खः। देगःया गजू १२३ दशमलव ७५ किलो ग्राम ताम्रपत्र दयेकूगु खः। मुख्य गजूलय् २५ दशमलव ७३ तोला लुँ छ्याला तःगु खः। उगु गजू दयेकेगु लागि जक झण्डै ३३ लाख रुपैयाँ खर्च जुगु धका धाःगु दु।
महानगरपालिकां २६ गु पसःयात कारबाही यायेगु सिफारिस
लहानान्युज | अनलाथ्व १५ ११४०,असोज १५ बिहीवाः
येँ महानगरपालिकां कालोबजारी याःपि २६ गु पसःयात कारबाही यायेगु सिफारिस याःगु दु। महानगरपालिकां वःगु २२ दिं बजार अनुगमनय् कालोबजारी याःपि २६ गु पसलय् पिन्त कारबाही यायेगु सिफारिस याःगु दु।
कोरोना महामारीया मौकाय् व्यापारी तयेस उपभोक्तापिन्त ठगे याःगु गुनासो वःगुलि अनुगमन याःगुलि महानगरं स्वनिगः दुनेया थीथी २२ गु पसः सञ्चालकपिन्त कारबाही यायेगु लागि
वाणिज्य, आपूर्ति तथा उपभोक्ता संरक्षण विभागयात सिफारिस याःगु दु।
महानगरपालिकां येँया मुख्य तरकारी तथा फलफूल बजाः कालीमाटी, बल्खु, नक्साल, तीनकुने, मनोहरा, माछापोखरी व कुलेश्वरय् अनुगमन याःगु खः। नाप दाल जाकि लगायत तधःगु खाद्यान्नया गोदामय् तक अनुगमन याःगु खः।
अथेहे अनुगमनया झ्वलय् महानगरपालिकां १२९ मध्ये २६ गु पसलय् उपोभोक्ता ठगी याःगुलि १२ लाख ८७ हजार रुपैयाँ आर्थिक जरिवाना याना व्यापारय् जूगु कसुरया आधारय् कारबाही यायेत विभागयात पौ छुवयाःगु धका उपमेयर हरिप्रभा खड्की धाःगु दु।
उपमेयर खड्कीं अनुगमनया झ्वलय् म्याद सिधःगु सामान मिइगु ११ गु पसलपाखे करिब ११ लाख रुपैयाँ बराबरया सामान बरामद याना नष्ट यानागु धका धाःगु दु।
अथेहे खुद्रा व्यापार याइपि ७३ पसलय् पिन्त न्ह्यन्हुया दुने दर्ता प्रकियाय् वयेत निर्देशन बिःगु दु।
सेनाय् कोरोना संक्रमितपि २३५६म्ह थ्यन, ७९१म्ह डिस्चार्ज
लहानान्युज | अनलाथ्व १५ ११४०,असोज १५ बिहीवाः
नेपाली सेनाय् ज्यायाइपि २३५६म्हेसित कोरोना संक्रमण पुष्टि जूगु दु ।
नेपाली सेनाया प्रवक्ताया कथं संक्रमित मध्ये ७९१ म्ह डिस्चार्ज जुइ धुकुगु दु। १५६३ सक्रिय संक्रमित जुया च्वंगु दु।
कोरोना संक्रमण याना आःतक निम्ह सैनिकया ज्यान वने धुकुगु दु। सेना क्वारेन्टिन, आइसोलसन, संक्रमितपिनिगु शव व्यवस्थापन लगायतया ज्याय् सक्रिय जुया वयाच्वंगु दु।
