Display Style:
Column Style
सुपथ मूल्य पसः थौनिसे सन्चालन जुइगु
लहानान्युज | अनलाथ्व १५ ११४०,असोज १५ बिहीवाः
अनलाइन अर्डरपाखे मोहनि, स्वन्ति व छठ पर्व लक्षित सुपथ मूल्य पसः थौनिसे सन्चालन यायेत्यःगु दु।
खाद्य व्यवस्था तथा व्यापार कम्पनी लिमिटेड व साल्ट ट्रेडिङ कर्पोरेशन नं देय् यकं दुगु कार्यालय, डिपो, डिलर व घुम्ती पसःपाखे सुपथ मूल्य पसः चायेके त्यःगु दु।
छु भचा ध्यवा छुट नाप न्हिन्हि माःगु उपभोग्य वस्तु न्याये दइगु सुपथ मूल्यया पसः थ्व हे वइगु मंसिर ६ गते तक सञ्चालन जुइ त्यःगु खः।
येँ सिंहदरबार, टेकु, कालिमाटी, कोटेश्वर, सतुंगल, यल व ख्वपय् १६ गु थासय् सुपथ मूल्य पसः चायेके त्यःगु खः। अथेहे स्वनिगः पिने बनेपा, बिर्तामोड, विराटनगर, राजविराज, लहान लगायतया ६५ गु थासय् सुपथ पसल सञ्चालन याये त्यःगु खः।
एकीकृत सहुलियत पसलय् जाकि प्रतिकिलो न्यातका, चिं प्रतिकिलो नितका, बासमती जाकी, गेडागुडी व कर्णालीया सिमी प्रतिकिलो झीतका छुट बिइत्यःगु खः। चिनी प्रतिकेजी न्यातका छुट बिइत्यःगु दु।
अथेहे च्यांग्र्रा व खसी–बोका म्वापि प्रतिकिलो झीतका छुट बिइत्यःगु दु धका मन्त्रालयं धागु दु। उपभोक्तापिन्त डीडीसी ध्यः प्रति लिटर ३० तका छुट दइ।
मन्त्रालयया कथं येँ सिंहदरबार, टेकु, कालिमाटी, कोटेश्वर, सतुंगल, यल व ख्वपय् सहुलियत पसः दइ धका धाःगु दु।
पत्रकार विक्रम शाक्य मन्त
लहनान्युज | अनलाथ्व पुन्हि ने.सं. ११४० (असाेज १५, २०७७) मंगलवाः
नेवाः पत्रकार राष्ट्रिय दबू यल कचाया पुलांम्ह छ्याञ्जे विक्रम शाक्य मन्त । नेपालभाषा प्रकाशन पत्रकारिताय् मूवंगु याेगदान यानादीम्ह शाक्य लाेकंह्वाःम्ह रेडियाेकर्मी नं खः ।
मेट्राे एफएमय् आवद्ध शाक्य नेपालभाषा आन्दाेलनया छम्ह सक्रियम्ह दुजः नं खःसा थीथी संघसंस्थाय् च्वनां नं निरन्तर ज्या यानाच्वनादीम्ह खः । प्रचलित नेपाललिपि व रञ्जना लिपि संरक्षण व प्रचारया नितिं लिपि थपू गुथिइ आवद्ध जुयाः कम्प्यूटर फन्ट विकास यायेगु ज्या यासें थपू लयपाै पिथनेगु ज्याय् नं सहसम्पादककथं ज्या यानादीगु खः ।
साहित्यय् नं मन क्वसाःम्ह वयकः छम्ह बांलाम्ह दबू ज्याझ्वः न्ह्याकामि खःसा न्वंवायेगु कला व ज्याझ्वः न्ह्याकेज्या स्यनामि नं खः ।
जीवनरामया नेतृत्वय् कोभिड आइसोलेसन केन्द,सिन्धुलीमाढीया निरीक्षण
नृपेन्द्रलाल श्रेष्ठ | अनलाथ्व १५ ११४०,असोज १५ बिहीवाः
संघीय संसद, शिक्षा तथा स्वास्थ्य समिति अन्तर्गत कोभिड १९ या सम्बन्धय् सरकारं याःगु ज्याय् अनुगमन यायेत गठन यागु उपसमिति संयोजक माननीय जीवन राम श्रेष्ठया नेतृत्वय्
सिन्धुली अस्पताल अन्तर्गत लच्छिया दुने निर्माण क्वाचाय् कुगु कोभिड आइसोलेसन केन्द, सिन्धुलीमाढीया निरीक्षण याःगु दु।
अस्पताल ब्यवस्थापन समितिया अध्यक्ष न उगु अस्पतालय् अक्सिजन प्लान्ट जडानया लागि संयोजक माननीय श्रेष्ठयात ज्ञापनपत्र लल्हानादिगु दु।
लगमय् शिलखाना मखसें ऐतिहासिक वौद्ध विहार दयेकेत स्थानीयया माग
नृपेन्द्रलाल श्रेष्ठ | अनलाथ्व चतुर्दशी ११४० (असोज १४) बुधवाः
येँ महानगरपालिका २१ वडा लगं त्वालय् ऐतिहासिक वौद्ध विहार थुनां थापा परिवारं दरवार व तबेला दयेकूगु थासय् हाकनं नं थापातय्गु दरवार दयेकेमाःगु मागया स्थानीयं विरोध याःगु दु ।
थौंकन्हय् शिलखाना धकाः म्हस्यूगु थासय् ४सः दँ न्ह्यः प्रताप मल्लया पालय् हे वौद्ध विहार दुगु व अन आः ऐतिहासिक वौद्ध विहार हे दयेकेमाःगु माग स्थानीय वासिन्दां याःगु दु । थापा परिवारलिसें छुं मनूतयसं शिलखाना न्हंकेमज्यूगु सः तयेधुंकाः स्थानीय वासिन्दां पुलांगु ईतिहासयात कायम तयाः वौद्ध विहार हे दयेकेत माग याःगु खः ।
उगु थासय् येँ महानगरपालिकां वौद्ध विहार व शिलखाना नितांया ईतिहास खनेदइगु कथं संग्रहालय व लगं पार्क दयेकेगु योजना न्ह्यःने हःगु खः ।
अधिवक्ता प्रकाशमणि शर्मा, सञ्जय अधिकारी व राष्ट्रिय विभूति भीमसेन थापा स्मृति प्रतिष्ठानया कोषाध्यक्ष सुशीलविक्रम थापां शिलखाना हे दयेकेत माग यासें सर्वोच्चय् रिट दर्ता यायेधुंकाः थनया निर्माण ज्या द्यूगु दु ।
न्यायधीश हरिकृष्ण कार्की व पुरुषोतम भण्डारीया असोज ८ या मंकाः इजलासं असोज १८ या पेसी क्वःछ्यूगु दु । सर्वोच्चं शिलखानाया जगयात लिच्वः मलाइगु कथं संरचना दयेकागु प्रमाणलिसें निगुलिं पक्षयात उपस्थित जुइत धाःगु दु ।
प्रताप मल्लया पालय् हे अस्तित्वय् दुगु किर्तिपुण्य महाविहार लगं बहाःया कचा बहाःया रुपं दुगु खः । तर, आः भीमसेन थापाया किजाया इतिहासलिसे स्वानाः ईतिहासयात हे किचलय् लाकेगु ज्या जुयाच्वंगु स्थानीयया कुंखिना दु ।
भीमसेन थापाया किजा रणवीरसिंह थापा (स्वामी अभयानन्द) या छेँया जक इतिहास उल्लेख यानाः मल्लकालिन इतिहासयात तोडमोड यायेगु ज्या जुयाच्वंगु स्थानीयया द्वपं दु ।
आः नं उगु थासय् ऐतिहासिक विहारया बौद्ध चैत्यया लिसें विहारलिसे सम्बन्धित मुर्ति व शिलापत्रलिसेंया भग्नावशेष दनि ।
थन येँ महानगरपालिकां पार्क दयेकीगु जानकारी वयेधुंकाः स्थानीय वासिन्दां २०७६ जेठय् हे येँ महानगरपालिका सहरी योजना आयोगय् उगु थासय् बौद्ध विहार हे दयेकेत माग यासें निवेदन ब्यूगु खः ।
येँ माहानगरपालिकां ऐतिहासिक व पुरात्वात्तिक महत्वयात ल्यंकाः पार्क दयेकेत पटक–पटक सहलह यायेधुंकाः थःपिं सकारात्मक जुयागु स्थानीयया धापू दु ।
‘घना बस्ती दथुइ चकंगु थाय् म्ह्वः जक दुगु अवस्थाय् सर्वसाधारणयात स्वच्छ फय्या नितिं पार्क दयेकेगु खँय् जिमिगु समर्थन दु,’ स्थानीय रिपक शाक्यया धापू दु । ‘तर, इतिहास हे न्हंकाः संरचना दयेकेज्या जुल धाःसा कानुनी लडाईँया लँपु ज्वनेत जिपिं बाध्य जुइ ।’
ताः ई प्रधानमन्त्री जूम्ह भिमसेन थापां उगु विहारय च्वनीपिं लगं बहाःया शाक्य परिवारया अनं भचा क्वय् ध्वाखासी नाय्पाच्वय् छ्वयाबियाः उगु थाय् अतिक्रमण यानाः छेँ व सलया तबेला दयेकूगु इतिहास दुगु नं शाक्यं धयादिल ।
आः भवनय् दुगु विश्वरुपया अंगःकिपाय् न्ह्यथनातःगु मिति कथं थुगु संरचना वि.सं. १८७६य् दयेकूगु खनेदु । लिपांगु इलय् शिलखानाया रुपं छ्यलावःगु उगु भवन २०७२ सालया भुखाचं क्षतिग्रस्त जूगु खः ।
प्रस्तावित लगं पार्क क्षेत्रय् प्रताप मल्लया पालय् हे बौद्ध विहार अस्तित्वय् दुगु व उगु क्षेत्रय् प्रताप मल्लया कायपिं नृपेन्द्र मल्ल व चक्रपतेन्द्र मल्लया पालय्या शिलालेख अले चैत्यत आःतक्कं दनिगु स्थानीयं धाःगु दु ।
२०७७ साल माघ मसान्ततक्कय् ज्या क्वचायेकेगु कथं कंडेल/के.एण्ड केजी/रमिता जे.भीं पार्क दयेकेगु जिम्मा काःगु दु । थुगु पार्कया करीब ४ करोड लागत अनुमान याःगु दु ।
२४ घण्टाया दुने च्याःगु निजी प्रयोगशालायात अल्टिमेटम
लहानान्युज | अनलाथ्व चतुर्दशी ११४०,असोज १४ बुधवाः
स्वास्थ्य तथा जनसंख्या मन्त्रालयं च्याःगु निजी प्रयोगशालायात पीसीआर टेष्ट शुल्क समायोजन यायेत २४ घण्टाया अल्टिमेटम बिःगु दु।
भाः समायोजन मयागुलि पीसीआर टेष्टया लागि बिःगु स्वीकृति खारेज यायेगु व कालोबजारीइ कारबाही यायेगु मन्त्रालय न निर्णय याःगु दु।
सरकारं भदौ २८ निसे आरटी(पीसीआर टेष्टया शूल्क २ हजार रुपैयाँ तोके याःगु खः।
तर स्टार अस्पताल, हृयाम्स अस्पताल, बी एण्ड बी अस्पताल, मेडिसिटी अस्पताल, डिकोड जिनोमिक्स एण्ड रिसर्ज सेन्टर, सौर्य हेल्थ केयर, सेन्ट्रल डायगनोस्टिक व इन्ट्राप्रिड डायगनोस्टिक मंकाः रुपं ३८९९ रुपैयाँ शूल्क तोके याःगु खः।
ल्याबपिन्स अनुगमन यायेगु गुणस्तर मापन तथा नियमन महाशाखां तोकि याःगु स्वया अप्वो शुल्क कया वया च्वंगु प्रतिवेदन बुझे याःगु खः । मन्त्रालयया इन्सिडेन्ट कमाण्ड सिस्टमं अप्वो शुल्क बिःगु ल्याबयात सचेत यायेगु व २४ घण्टाया दुने शुल्क समायोजन मयासा परीक्षण स्वीकृति खारेज यायेगु राष्ट्रिय जनस्वास्थ्य प्रयोगशालायात निर्देशन बिइगु निर्णय याःगु दु धका प्रवक्ता डा. जागेश्वर गौतमं धाःगु दु ।
नाप कोलोबजारीया कारबाही याःगु ल्याब बन्द यायेगु गृह मन्त्रालय व बाणिज्य विभागयात इनाप याःगु दु।
