माघ १५ गते मतदाता नामावली प्रकाशित यायेगु प्रस्ताव निर्वाचन आयोगं मध्यावधि निर्वाचनया लागि माघ १५ गते मतदाता नामावली प्रकाशित यायेगु प्रस्ताव याःगु दु ।

प्रतिनिधिसभा विघटन याना वैशाख १७ व २७ गते मध्यावधि निर्वाचन घोषणा याःगु खः, तर प्रतिनिधिसभा विघटन असंवैधानिक धाःसे तःगु मुद्दा संवैधानिक इजलासय् विचाराधीन जुयाच्वंगु दु ।

उगु हे इलय् आयोगं राजनीतिक दलपि लिसे मतदाता नामावली सम्बन्धी प्रस्तावित ज्याझ्वः बारे सहलह याःगु दु। आयोगं माघ १५ गते मतदाता नामावली प्रकाशित यायेगु व त्रुटि जुपिनिगु सचे यायेत १६ व १७ गते निवदेन बिइगु प्रस्ताव याःगु दु। उगु सहलय नेकपा प्रचण्ड–माधव समूहया नेता राजेन्द्र पाण्डे नं संसद विघटनया मुद्दा अदालतय् विचाराधीन जूगुलि निर्वाचन ज्याझ्वः न्ह्यने यके मज्यु धका धाःगु दु ।

नाप न्याय परिषद् न सरुवा याये माःपि आयोगया कर्मचारी सरकारं सरुवा यागु विषय न न्ह्यसः पाण्डे ल्ह्वःगु दु । निर्वाचन जुइ मखु, निश्पक्ष ढंगं निर्वाचन यायेत छिकपिन्स फइ मखु धका न वयकलं धयादीगु खः।

प्रतिनिधिसभा पुर्नस्थापनाया माग तया सर्वोच्च अदालतय् रिट दायर यापि निवेदकपिन्स संसद विघटन सम्बन्धी संविधानसभाय् जुगु सहमतिया रेकर्ड झिके यायेगु माग याःगु दु।

रिट निवेदक मध्ये छम्ह वरिष्ठ अधिवक्ता दिनेश त्रिपाठीं आइतवाः संवैधानिक इजलासय् थःथे माग तयादीगु खः। २०४७ सालया संविधानय् धारा ५३ या (४) य् स्पष्ट रुपं प्रधानमन्त्रीयात संसद विघटन यायेगु विशेषाधिकार बिःगु दु धका धयादीगु दु । थुगु अधिकारया पटक–पटक दुरुपयोग जुगुुलि २०७२ या संविधान जारी याःगु इलय् संविधानं प्रधानमन्त्रीया उगु विशेषाधिकार हटे यायेगु निर्णय याःगु खः।

वरिष्ठ अधिवक्ता त्रिपाठीं धयादीगु दु, ‘प्रधानमन्त्रीयात संसद विघटनया अधिकार मबिइगु खँ संविधानसभां सहमति बिःगु खः, उगु अभिलेख झिक याये माल।’ संविधानसभाया समिति उगु इलय् छलफलया अभिलेखीकरण तक जुगु दु धका त्रिपाठीं धयादीगु खः ।उगु रेकर्ड झिके यान विधायिकीपिनिगु मनसाय बुझे यायत अपुइगु जुइ धक धयादीगु खः।

प्रधानन्यायाधीश चोलेन्द्र शम्शेर जबरां माःगु कथ ंसंविधानसभाय् दुगु अभिलेख झिके यायेगु धका धयादीगु खः। संवैधानिक इजलासय् प्रधानन्यायाधीश जबरा, न्यायाधीशपि विश्वेम्भरप्रसाद श्रेष्ठ, अनिलकुमार सिन्हा, सपना प्रधान मल्ल व तेजबहादुरी केसीपि दु । प्रधानमन्त्री केपी शर्मा ओलीया सिफारिसय् ५ पुसय् राष्ट्रपति विद्यादेवी भण्डारीं संसद विघटन असंवैधानिक व अलोकतान्त्रिक धका धाःसे सर्वोच्चय् दायर याःगु रिटय् संवैधानिक इजलासया निरन्तर सुनुवाइ जुयाच्वंगु खः।

शिक्षा विज्ञान तथा प्रविधि मन्त्री कृष्णगोपाल श्रेष्ठं नेपालमण्डल टेलिभिजनया निर्वाचित संचालक समितिया म्हसिका लिसे लसकुस ज्याझ्वलय् जि, छि व झि धइगु भावना तया ज्या यायेफत धासाः समुदाय न्ह्यने न्ह्यावनेत तालाइगु धका धयादीगु दु । मन्त्री श्रेष्ठ भाषा कला संस्कृति संरक्षणया लागि सकले जायेत इनाप यानादीगु खः। ज्याझ्वलय् वयकलं नेवाःभाय् कला संस्कृतिया प्रचारप्रसार याना नेपालमण्डल टेलिभिजनं म्हितावयाच्वगु भूमिकायात च्वछासें न्हूगु संचालक समितिया भिन्तुना देछानादिगु खः।

नेपालमण्डल टेलिभिजनया अध्यक्ष रमेश महर्जनया सभाधक्ष्यताय् जुगु यलया ज्यापू प्रज्ञा भवनय् नव निर्वाचित संचालक समितिया म्हसिका लिसे लसकुस ज्याझ्वलय् मूपाहाँया आसनं नवायेगु झ्वलय् थथे धयादिगु खः। ज्याझ्वलय् वयकलं नेवाःभाय् कला संस्कृतिया प्रचारप्रसार याना नेपालमण्डल टेलिभिजनं म्हितावयाच्वगु भूमिकायात च्वछासें न्हूगु संचालक समितिया भिन्तुना देछानादिगु खः।

अथेहे ज्याझ्वलय् बाङ्मय शताब्दीपुरूष महाविद्यावारिधि डा सत्यमोहन जोशीं अडियो भिन्तुना हसना मार्फत  नेपालमण्डल टेलिभिजन वइगु दिनय् मचा साहित्यया ज्याझ्वय् उत्पादन याना प्रशारण यायेमाःगुलिइ बः बियादिल।अथेहे विशिष्ट पाहाँ काठमाण्डौ उपत्यका मेयर फोरमया उपाध्यक्षलिसें यल महानगरपालिकाया मेयर चिरीबाबु महर्जनं यल महानगरं मूर्त व अमूर्त सम्पदा संरक्षणया लागि यानावयाच्वगु ज्याया बारेय् जानकारी बिसें नेपालमण्डल टेलिभिजनलिसें थप सहकार्य याना न्हयावनेगु धकाः धयादिल।

अथेहे विशिष्ट पाहाँ टोखा नगरपालिकाया उपमेयर ज्ञानमाया डंगोलं नं टोखा नगरपालिकाय् संस्कृति संरक्षित लागा घोषणा याना अनया चाकु थज्यागु टोखाया पहिचान बिइगु ज्या खँ जुयाच्वगु धासें थज्यागु पहिचान बिइगु ज्याखँया प्रचारप्रसार यायेगु लागि नेपालमण्डल टेलिभिजनं तधंगु भूमिका म्हिताच्वगु धयादिगु खः।ज्याभ्वलय् न्हूगु संचालक समितियाप्रतिनिधित्व यासें उद्योगपति पद्म ज्योति कंसाकारं नेवा भाय् कला संस्कति लगायतया संरक्षण लागि तधंगु योगदान बियाच्वगु नेपालमण्डल टेलिभिजनय् थःपिं नं संलग्न जुइखंगुलिइ गैरन्वावित जुगु धारणा तयादिगु खः।

सिद्धिकाली सिलाई प्रशिक्षण केन्द्रया ग्वसालय् सिलाई प्रशिक्षार्थीपिन्त छगु ज्याझ्वः दथुइ दसीपौं लल्हायेगु ज्याझ्वः जुगु दु।

केन्द्रया अध्यक्ष सुष्मा श्रेष्ठया सभाध्यताय् जुगु उगु ज्याझ्वलय् मध्यपुर थिमि नगरपालिकाया उपमेयर अञ्जनादेवी मधिकर्मी मूपाहाँ कथं झायादीगु खः । वःगु स्वला निसे न्ह्यानाच्वंगु उगु ज्याझ्वलय् मध्यपुर थिमिया मिसापि लेबल १ व २ सिलाई प्रशिक्षण बिःगु खः ।

प्रशिक्षण लेबल १ य् गंगा अवाल व लेबल २ य् तुल्सीकृष्ण श्रेष्ठ व सुष्मा श्रेष्ठ प्रशिक्षण बियादीगु खः। उगु प्रशिक्षणय् ब्बति काःपि ४० म्ह प्रशिक्षार्थी मिसापिन्त मूपाहाँ उपप्रमुख अञ्जनादेवी मधिकर्मी व पूर्व मेयर मदनकुष्ण श्रेष्ठं दसीपाखै लल्हानादीगु खः।

ज्याझ्वलय् प्रशिक्षक तुल्सीकृष्ण श्रेष्ठ, गोरी इन्टरनेशनल टेक्निकल ऐकेडेमी प्रा.लि.या अध्यक्ष राजेन्द्र राउट, मध्यपुर थिमि नपा वडा नं. ४ या वडाध्यक्ष कुमार श्रेष्ठ, पूर्व मेयर मदनकृष्ण श्रेष्ठ व मूपाहाँ उपमेयर मधिकर्मी नुँगः खँ तयादीगु खः।