Display Style:
Column Style
दुप्चेश्वर गाउँपालिकाया अध्यक्ष नाप ११म्ह कोरोना सङ्क्रमण
लहानान्युज | अनलागा ८ ११४०,असोज २४ शनिवाः
नुवाकोट जिल्लाया दुप्चेश्वर गाउँपालिकाया अध्यक्ष, उपाध्यक्ष नाप ११ म्हेसित कोरोना सङ्क्रमण पुष्टि जुगु दु। असोज २१ गते याःगु स्वाब परीक्षणया लिच्वः कथं गाउँपालिकाया अध्यक्ष योविन्द्रसिंह तामाङ, उपाध्यक्ष अञ्जु आचार्य नाप ११ म्हेसित सङ्क्रमण जूगु दु धका गाउँपालिकाया स्वास्थ्य शाखां धाःगु दु।
गाउँपालिकाया अध्यक्ष तामाङं थःत व उपाध्यक्ष नाप मेपि ११ म्हेसित सक्रमण जुपिनाप च्वपि सम्पर्कय् दुपि सुरक्षित जुया क्वारेन्टिनय् च्वनेत इनाप यासे स्वाब जाँचय् यायेगु प्रबन्ध मिले यायेगु जानकारी बिःगु दु।
अध्यक्ष तामाङया कथं कोरोना सङ्क्रमण पुष्टि जूपि गाउँपालिकाया अध्यक्ष, उपाध्यक्ष, अध्यक्षया सवारीचालक, गाउँपालिकाया कार्यालय सहयोगी, निम्ह एम्बुलेन्स चालक व न्याम्ह शिक्षकपि खः।
वःगु बुधवाः १८म्हेसिगु स्वाब सङ्कलन यागुलि ११ म्हेसित सङ्क्रमण खनेदुगु धका स्वास्थ्य शाखां धाःगु दु। सङ्क्रमण लिपा गाउँपालिकाया ज्याकू दुगु थाय् समुन्द्रटार बजार ‘सिल’ याःगु खः।
फूलपाती बढाइँ सांकेतिक रूप जक जुइगु
लहानान्युज | अनलागा ८ ११४०,असोज २४ शनिवाः
थुगु दँय् फूलपाती बढाइँ धर्म, संस्कृति व परम्परायात निरन्तरता बिइत सांकेतिक रूप जक ग्वसाः ग्वयेत्यःगु दु। नेपाली सेनां सैनिक मञ्च तिनिख्यलय् भव्य समारोहया दथुइ फूलपाती बढाइँ हरेक दँय् मानेयाना वयाच्वंगु खः।
कोभिड–१९ या संक्रमणयाना हर्षोल्लासया साथ मयासे धर्म, संस्कृति व परम्परायात जक जीवन्तत बिइगु कथं प्रतीकात्मक रूपं जक बढाइँ याइगु धका सैनिक प्रवक्तां जानकारी बिःगु दु। थुगु दँय् फूलपाती वइगु कात्तिक ७ गते शुक्रवाः लागु दु।
वगु दँय् बढाइँ पूर्व, पश्चिम व दक्षिणपाटापाखे ८४म्ह व ८४म्हेसिया गुल्मं बढाइँ याइगु खःसा थुगु दँय् सामाजिक दूरी कायम याना २५म्ह, २५म्हेसिया जक याये त्यःगु खः।
बढाइँ ज्याभ्वलय् प्रमुख पाँहा कथं राष्ट्रपति सहभागी जुइगु परम्परा दु।
न्हापा थे तधःगु ज्याझ्वः मयासे चिहाकयेक बढाइँ व टुकडीं सैनिक व्याण्ड प्रदर्शन यायेत्यःगु दु। न्हापा सेनाबाहेक मेमेपि न पाहाँपि वइगु खःसा थुगुसि सेना नाप सच्छिम्हति पाँहापि दुथ्याकेत्यःगु खः। पाँहापि च्वनिगु थाय् पञ्जा व स्यानिटाइजरयात प्रयोग अनिवार्य याःगु दु।
रुपन्देही व दाङय् छम्ह छम्ह कोरोना संक्रमितपि मन्त
लहानान्युज | अनलागा ८ ११४०,असोज २४ शनिवाः
रुपन्देही व दाङय् छम्ह छम्ह कोरोना संक्रमितपि वासः यायेगु झ्वलय् मदुगु दु। रुपन्देहीया शुद्धोधन गाउँपालिका–६ या ५७ दँ दुम्ह कोरोना विशेष अस्पताल बुटवलय् शुक्रवाः न्हिनय् मदुगु दु खः।
असोज १९ गते प्रादेशिक अस्पताल वासः याकेगु झ्वलय् उगु हे दिं कोरोना पुष्टि जुइवं कोरोना विशेष अस्पताल भर्ना जुगु खः। अस्पतालया सूचना अधिकारीया कथं संक्रमित क्षयरोगया दीर्घरोगी खः। थ्व नाप रुपन्देहीइ कोरोना संक्रमित जुया मदुपि ३४ म्ह थ्यःगु दु।
अथेहे दाङया घोराही या १५ दँ दुम्ह कोरोना संक्रमण मदुगु दु। कोरोना पुष्टि जुइवं नेपालगन्ज मेडिकल कलेज कोहलपुरय् भर्ना जुम्ह वासः यायेगु झ्वलय् वयागु शुक्रवाः बहनि ८ः३० बजे मदुगु धका स्वास्थ्य कार्यालय बाँकेया कोरोना फोकलपर्सनं पुष्टि याःगु दु।
मदुम्ह १९ गते कोरोना पुष्टि जुगुलि प्लाज्मा थेरापीया बिधिं वासः यायेगु झ्वलय् मदुगु खः। थ्व नाप अन सीपि १२ म्ह थ्यःगु दु।
टोखाय् कोरोना सङ्क्रमितपि १३००म्ह स्वया अप्वोल
लहानान्युज | अनलागा ८ ११४०,असोज २४ शनिवाः
टोखा नगरपालिकाय् कोरोना सङ्क्रमितपि १३०० स्वया अप्वो जुइ धुकुगु दु।
येँया उत्तरी क्षेत्रय् च्वंगु टोखाय् शुक्रवाः जक ६६ म्ह सङ्क्रमितपि थपे जुइवं नगरपालिकाय् आःतक १३०१ म्ह थ्यःगु दु। टोखा नगरपालिकाय् दकलय् कम वडा नं १ य् २८ म्ह व दकलय् अप्वो वडा नं ८ य् १५६ म्ह सङ्क्रमित पिहावःगु दु ।
टोखामा ११ वडाय् आःतक सक्रमितपि वडा नं १ य् २८म्ह, २ य् ६२म्ह, ३ य् १५२म्ह, ४ य् ६३म्ह, ५ य् १३६म्ह, ६ य् १३३, ७ य् १५५म्ह, ८ य् १५६म्ह, ९ य् ८७म्ह, १० य् १०४म्ह व ११ य् ९८ म्ह सङ्क्रमितपि पिहावःगु दु। आःतक सक्रमित जुपि ७३६म्ह मिजंपि व ५६५म्ह मिसापि खः।
कोरोना सङ्क्रमितमुक्त जुपि ८०७ म्ह छेँय् न लिहावने धुकुगु दु सा ४८९ म्ह सक्रिय सङ्क्रमित दु। सक्रिय सङ्क्रमितपि मध्ये ४११म्ह होम आइसोलेशन व ५६म्ह बिरामीपि थीथी अस्पतालय् वासः याका वयाच्वंगु दु। टोखाय् आःतक कोरोना सङ्क्रमण्ं न्याम्ह सी धुकुगु दु।
नगरपालिका दुने दक्को वडाय् पिसिआर परीक्षणया दायरा अप्वोकूगु दु। आःतक न्याद्धः स्वया अप्वोसिगु पीसीआर परीक्षण याये धुकुगु दु। टोखा नगरपालिकां थ्व स्वया न्ह्यः कोरोना पोजेटिभ खनेदया होम आइसोलेशनय् च्वनाच्वपिन्त न्हि ३५० भत्ता बिइगु निर्णय याःगु खः।
येँय् १११६म्ह नाप स्वनिगलय् १४०९म्ह कोरोना संक्रमित
लहानान्युज | अनलागा ७ ११४०,असोज २३ शुक्रवाः
थौं स्वनिलय् जक थप १४०९ म्ह कोरोना संक्रमित पिहावःगु दु। वःगु २४ घण्टाय् जक १४०९ म्हेसित कोरोना पुष्टि जुगु धका स्वास्थ्य तथा जनसंख्या मन्त्रालयं थौं शुक्रवाः जूगु पत्रकार सम्मेलनय् जानकारी बिःगु खः।
प्रवक्ता डा.जागेश्वर गौतमया कथं थौं येँय् जक १११६म्हेसित कोरोना सक्रमण जूगु दु।
अथेहे यलय् १६३ म्ह व ख्वपय् १३० म्हेसित कोरोना सक्रमण जुग दु धका धाःगु दु।
२४ घण्टाया दुने १३ हजार २७९ म्हेसिगु पीसीआर परीक्षण याःगु खः। आइसोलेसनय् च्वनाच्वपि कोरोना संक्रमित २७५३ म्ह दु अथेतु ४ हजार ७३ म्ह क्वारेन्टाइनय् च्वनाच्वपि दु धका प्रवक्ता गौतमं धाःगु दु।
