Display Style:
Column Style
ख्वपय् भदौ मसान्त तक सार्वजनिक यातायात बन्द
लहनान्युज | ञंलागा ९ ११४०,भाद्र २६ शुक्रवाः
ख्वप नगरपालिका दुने भदौ मसान्त तक सार्वजनिक यातायात सञ्चालनय् रोक लगे याःगु दु। निषेधाज्ञा छ्वासुकुसा स्वनिगःया स्वगू जिल्ला प्रशासन कार्यालयं सार्वजनिक यातायात जोर–बिजोर प्रणाली लागू याना सञ्चालन यायेत अनुमति बिउगसा ख्वप नगरं थथे निर्णय याःगु खः ।
नगर दुने स्वनिगः दुने थीथी थासय् सञ्चालनय् जुया च्वंगु रुट नम्बर १, ७ व ९ य् चले जुइगु गाडी भदौ ३१ गते तकया लागि बन्द यायेगु निर्णय यानगु दु धका ख्वप नगरया मेयर सुनिल प्रजापति धाःगु दु ।
नगरपालिकां यातायात व्यवसायी नाप सहलह याना भदौ मसान्त तक सार्वजनिक यातायात बन्द यायेगु निर्णय यानागु धका धाःगु दु ।
अथेहे, नगरया मेयर प्रजापतिया अध्यक्षताय् भक्तपुर उद्योग वाणिज्य संघ व भक्तपुर घरेलु तथा साना उद्योग संघया प्रतिनिधिपि नाप च्वंगु बैठक सुरक्षाया उपाय अपने याना व्यवसाय सञ्चालन यायेत इनाप याःगु दु ।
व्यवसायीपिन्स मास्क, पञ्जा तया शारीरिक दूरी कायम याना स्वास्थ्य सुरक्षा नीति अपने याना जक व्यापार व्यवसाय यायेत इनाप याःगु खः।
छन्हुया दुने १४५४म्ह संक्रमित, ६७२म्ह संक्रमणमुक्त
लहनान्युज | ञंलागा ९ ११४०,भाद्र २६ शुक्रवाः
वःगु २४ घण्टाया दुने जक १४५४म्हेसित कोरोना भाइरस (कोभिड(१९) या संक्रमण पुष्टि जूगु दु । देय् यकंया प्रयोगशालाय् याःगु १०७०१म्हेसिगु नमुना परीक्षणय् ४६३ मिसा व ९९१म्ह मिजंपिन्त संक्रमण पुष्टि जूगु दु ।
थ्व नाप आःतक संक्रमितपि ५१ हजार ९१९ म्ह थ्यःगु दु । उकि मध्ये ३२२ म्ह सी धुकुगु दु सा आःतक ३६ हजार ६७२म्ह संक्रमणमुक्त जुइ धुकुगु दु । वःगु २४ घण्टाय् जक ९७२म्ह डिस्चार्ज जूगु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया कथं स्वनिगः दुने जक ६९६म्ह संक्रमित थपे जूगु दु । उकि मध्ये ६२०म्ह येँ च्वपि जक खः । यलय् व ख्वपय् ३८म्ह व ३८म्ह खः ।
अथेहे रुपन्देही १०२म्ह, कैलालीइ ६७म्ह, मकवानपुरय् ५४म्ह, मोरङय् ४७म्ह, सुनसरी ४४म्ह, सिराहाय् ४२म्ह, नवलपुरय् ३८म्ह, नवलपरासीइ ३५म्ह, कपिलवस्तुइ २८म्ह, सुर्खेतय् २६म्ह, गुल्मीइ २०म्ह, बाँकेय् १८म्ह, झापा व संखुवासभाय् १४म्ह,१४म्ह, प्युठानय् १३म्ह, पाल्पाय् १२म्ह, काभ्रे, कास्की व रुकुम पूर्वया ११म्ह, तनहुया ८म्ह व सर्लाहीय् न्ह्यम्ह कोरोना संक्रमण पुष्टि जूगु दु ।
दाङय् न्याम्ह, रौतहट, गोरखा, लमजुङ व डोटीइ खुम्ह खुम्ह, सप्तरी व स्याङ्जाय् प्यम्ह, प्यम्ह, पर्सा, नुवाकोट व रोल्पाय् स्वम्ह स्वम्ह, धनुषा, बारा, महोत्तरी, सिन्धुपाल्चोक, सिन्धुली, पर्वत व कञ्चनपुरय् निम्ह निम्ह व धादिङ, रामेछाप, बर्दिया व जुम्लाय् छम्ह छम्हेसित संक्रमण खने दुगु खः ।
थ्व नाप देय् यकं संक्रिय संक्रमितपि १४ हजार ९२५म्ह थ्यःगु दु । उकि मध्ये २५ म्ह भेल्टिलेटर व १७०म्ह आईसीयूलय् वासः याका च्वंगु दु । ६ हजार ६३४म्ह होम आइसोलेनसय् च्वना च्वंगु दु धका मन्त्रालयं धाःगु दु
येँ ६२० स्वनिगः यकं ६९६ म्ह कोरोना संक्रमण
शोभा श्रेष्ठ | ञंलागा ९ ११४०,भाद्र २६ शुक्रवाः
स्वनिगः दुने जक वःगु २४ घण्टाय् ६९६म्हेसित कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयया कथं येँ जक ६२०म्हेसित कोरोना संक्रमण पुष्टि जूगु दु ।
अथेहे यलय् ३८ म्ह व ख्वपय् ३८ म्हेसित कोरोना संक्रमण पुष्टि जूगु दु ।
वःगु २४ घण्टाय् देय् यक १४५४ म्हेसित कोरोना भाइरस संक्रमण पुष्टि जूगु दु । मन्त्रालयया कथं १०७०१म्हेसिगु परीक्षण याःगुलि १४५४ म्हेसित संक्रमण पुष्टि जूदु ।
वःगु २४ घण्टाय् कोरोना भाइरस संक्रमण मुक्त जूपि ९७२ म्ह डिस्चार्ज जूगु दु ।
शिक्षा मन्त्रालयं असोजनिसे विद्यार्थीपिन्र्त निःशुल्क इन्टरनेट उपलब्ध
लहनान्युज | ञंलागा ९ ११४०,भाद्र २६ शुक्रवाः
शिक्षा, विज्ञान तथा प्रविधि मन्त्रालयं न स्यनेगु सहजीकरणया लागि विद्यार्थी व स्कूलयात वइगु असोजपाखे निःशुल्क इन्टरनेट उपलब्ध याकेगु व्यवस्था याये त्यःगु दु ।
मन्त्रीस्तरीय निर्णयपाखे भदौ १९ गते पारित जुगु विद्यार्थीपिन्त स्यनेगु सिकाइ सहजीकरण निर्देशिकाय् शिक्षा मन्त्रालयं निःशुल्क इन्टरनेट बिइगु धका उल्लेख याःगु दु ।
नेपाल टेलिकम लगायत इन्टरनेट सेवा प्रदायक संस्थापाखे शैक्षिक प्रयोजनया लागि जक जुइ कथं निःशुल्क वा सहुलियत शुल्कय् डाटा प्याकेज काये फइगु स्कूल व विद्यार्थीयात निःशुल्क उपलब्ध याकेगु निर्देशिकाय् मन्त्रालयया भूमिकाबारे स्पष्ट च्वया तःगु दु ।
थ्व निर्देशिकाय् १ असोजपाखे अनिवार्य कार्यान्वयनया लागि शिक्षा मन्त्रालयं संघ, प्रदेश व स्थानीय तहया निकाय व सरोकारवालायात निर्देशन बिःगु दु । मन्त्रालयपाखे जारी निर्देशिका कार्यान्वयन सम्बन्धी सूचं राष्ट्रिय पाठ्यक्रम प्रारुपं निर्दिष्ट याःगु स्यनेगु उपलब्धी हासिल यायेत व स्कूल थःगु दँया मस्तयेत दँया अनुकुल कथं सयकेगु वातावरण सिर्जना यायेगु लागि स्वगू तहया सरकारं निर्देशिका कार्यान्वयन याये माःगु धका धाःगु दु ।
स्कूलया विद्यार्थीपिनिगु इन्टरनेट थिके जुगुया कारण अनलाइन कक्षा प्रभावित जुगु सः वःगुलि मन्त्रालयं निःशुल्क इन्टरनेटया व्यवस्था याये माःगु उल्लेख याःगु खः ।
येँ महानगरं बँपसः व ठेला व्यापारय् प्रतिबन्ध तयेत माग
लहनान्युज | ञंलागा ९ ११४०,भाद्र २६ शुक्रवाः
येँ महानगरपालिकाया उपप्रमुख हरिप्रभा खड्गीं काठमाडौंया प्रमुख जिल्ला अधिकारी जनकराज दाहालयात छगु पौं च्वया बँपसः व ठेला व्यापारय् पूर्ण प्रतिबन्ध तयेमाःगु नाप हाकन निषेधाज्ञाया आदेश जारी यायेत इनाप याःगु दु ।
थ्व स्वया न्ह्य स्वनिगलय् निषेधाज्ञा बन्द याना बँ पसः व ठेला ब्यापार भदौ २४ गतेनिसे चायेकूगु खः । उपप्रमुख खड्गीं बँपसः व ठेला व्यापारं शहरय् समुदायलय् कोरोना संक्रमण फैलै जुइगु जोखिम अप्वोया वनि धका धाःगु दु ।
थज्यागु व्यापारं स्वास्थ्य सुरक्षायात उपाय अवलम्बन याइगु सम्भावना न्युन जुगु व उकिया प्रभावकारी अनुगमन यायेत तक समस्या जुइ धका धाःगु दु ।
यदि थज्याःगु व्यापारं कोरोना संक्रमण खनेदतकि प्रभावकारी ढंगं कन्ट्याक्ट ट्रेसिङ तक याये थाकूइ धका येँ महानगरया उपप्रमुख खड्गीं बँपसः व ठेला व्यापारय् नियन्त्रण यायेगु महानगरपालिकाया नीति दुगुलि थज्यागु बन्द यायेत माग न याःगु दु ।
