लुँया भाः थौं तोलां प्यसः थहावःगु दु।

लुँया भाः थौं तोलाया ९४ हजार ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घ न धाःगु दु।

म्हिगः लुँ तोलाय् ९४ हजार एक सय रुपैयाँ थ्यःगु खः । अथेहे वहः धाःसा थौं स्थिर हे जुगु दु।

वहः तोलां म्हिगःथे थौं न तोलाया १३१० तकां कारोबार जुगु दु धका महासङ्घ धाःगु दु ।

 नेपाल कम्युनिस्ट पार्टी (नेकपा) विभाजन जुइवं प्रचण्ड–नेपाल समूह न प्रदेश २ या संसदीय दलया नेता सत्यनारायण मण्डलयात न हटे यायेगु तयारी याःगु दु ।

थौं शुक्रवाः जनकपुरय् च्वंगु पार्टी कार्यालयय् ग्वसाः ग्वःगु पत्रकार सम्मेलनय् संसदीय दलया नेता मण्डलयात दलया नेतापाखे हटे यायेगु तयारी याःगु दु धका प्रचण्ड–नेपाल समूहया सांसद शत्रुघन महतो न जानकारी बिःगु दु।

प्रदेश २ य् नेकपाया ३२ म्ह सांसद मध्ये १७ म्ह सांसदपिनिगु हस्ताक्षर यासे दलया उपनेता रामकुमार यादव समक्ष मण्डलविरुद्ध अविश्वासया प्रस्ताव दर्ता यायेगु धका सांसद महतो न जानकारी बिःगु दु।

किपू नगरपालिका वडा नं. ६ क्वाःरय् सामुदायिक भवनया शिलान्यास जुगु दु ।

छगु ज्याझ्वः दथुइ किपू नगरपालिका मेयर रमेश महर्जनं उगु भवनया शिलान्यास यानादीगु खः।

उगु ज्याझ्वलय् वडा नं. ६ या अध्यक्ष न्हुच्छे बहादुर महर्जन नाप वडा सदस्यपि सुनिल डंगोल, उत्तम नेपालपिनिगु न उपस्थिति दुगु खः।

सत्तारुढ नेपाल कम्युनष्टि पार्टी (नेकपा) दुने विवादया कारण होल्डय् लानाच्वंगु परराष्ट्र मन्त्री प्रदीपकुमार ज्ञवालीया भारत भ्रमण तयारी हाकान जुइत्यःगु दु ।

थ्व स्वया न्ह्यः डिसेम्बरया निवाः दुने भ्रमण यायेगु गृहकार्य जुगु खः। तर नेकपा दुने विवादया कारण उगु भ्रमण जुइ मफुगु खः, वया लिपा जनवरीया न्हापागु वाःया दुने भ्रमण यायेगु तयारी याःगु खः। तर प्रधानमन्त्री केपी ओलीं अकस्मात् संसद भंग यायेवं उगु मितिइ भ्रमण जुइ मफुगु खः। आः जनवरीया निवाः दुने भ्रमण यायेगु निगु पक्षं तयारी यानाच्वंगु दु।

तर वइगु हप्तापाखे सर्वाेच्चय् संसद विघटनया बारेय् सहलह जुइत्यःगुलि आःतत्कालय् मिती धाःसा घोषणा मयाइगु जुगु  धका जानकारी बिःगु दु। ज्ञवाली संयुक्त आयोगया वैठकय् ब्बति कायेत दिल्ली वने त्यगु खः।

नेपाल बार एसोसिएसनं एमिकस क्युरीया लागि स्वम्ह अधिवक्ताया नां सिफारिस याःगु दु। सर्वोच्च अदालतं संसद् विघटनविरुद्धया रिटय् सुनुवाइ यायेगु झ्वलय् एमिकस क्युरी झिके यायेगु आदेश याःगु दु।

उगु कथं नेपाल बारं संवैधानिक इजलासं माग याःगु कथं स्वम्ह वरिष्ठ अधिवक्ताया नाम सिफारिस याःगु दु धका बारया अध्यक्षं जानकारी बिःगु दु । नेपाल बारया वरिष्ठ अधिवक्ता बद्रीबहादुर कार्की, सतिशकृष्ण खरेल व विजयकान्त मैनालीया नां एमिकस क्युरीया लागि छ्वःगु दु। संवैधानिक इजलासं संसद् विघटन बदरया माग यासे दायर रिटया सुनुवाइ यासे नेपालपाखे स्वम्ह व सर्वोच्च बारपाखे निम्हयाना एमिकस क्युरी झिके याये त्यःगु खः।

सर्वोच्च बारं धाःसा नां छ्वःगु मदुनि। पुस ५ गते प्रतिनिधिसभा विघटन जुइ असंवैधानिक धाःसे छगु दर्जन स्वया अप्वो रिट संवैधानिक इजलासय् विचाराधीन दु। अदालतं छु न विषयया राय कायेत एमिकस क्युरी सतिइ। एमिकस क्युरीं इजलाससमक्ष संसद् विघटनया विषयय् वःगु न्ह्यसः संवैधानिक न्ह्यसलय् थःगु राय बिइ। पुस २२ गतेपाखे संसद् विघटनविरुद्ध दायर रिटया नियमित सुनुवाइ जुइ ।