राष्ट्रिय सभाया छम्ह सांसद व न्याम्ह कर्मचारीपिन्त कोरोना संक्रमण जुगु दु।

थौं शुक्रवाः निसे सुरु जुगु राष्ट्रिय सभाया हिउँदे अधिवेशन जुइ न्ह्यः म्हिगः हे कोरोना परीक्षण याःगु खः। उकि मध्ये खुम्ह संक्रमण जुगु दु धका संसद् सचिवालय धाःगु दु।

राष्ट्रिय सभाया अधिवेशन जुइ न्ह्यः म्हिगः बिहीवाः ४१ म्ह सांसद नाप ९७ म्हेसिगु कोरोना परीक्षण याःगुलि खुम्हेसित कोरोना संक्रमण पुष्टि जुगु दु धका संसद् सचिवालयया सहप्रवक्तां जानकारी बिःगु दु।

वःगु २४ घण्टाया येँ १३४म्ह, यलय् १८म्ह, ख्वपय् १५ म्ह संक्रमित जूगु दु धा स्वास्थ्य मन्त्रालयं धाःगु दु।

अथेहे मेमेगु जिल्लाय् कैलाली २९म्ह, कास्की २६म्ह, बाँके २३म्ह, दाङ १९म्ह, झापा १६म्ह, चितवनय् १३म्ह, रुपन्देही १२म्ह, रसुवा व कञ्चनपुरय् ११म्ह,११म्ह व मोरङय् झीम्हेसित कोरोना संक्रमित पुष्टि जूगु दु।

वःगु २४ घण्टाया दुने कोरोना भाइरस संक्रमणमुक्त जूपि ७४८ म्ह थ्यःगु दु।

आःतक संक्रमणमुक्त जूपि २ लाख ५३ हजार १०७ म्ह थ्यःगु दु। आःतक सक्रिय संक्रमितपि ६०४८ म्ह थ्यःगु दु।

अथेहे कोरोना भाइरस संक्रमणया कारण वःगु २४ घण्टाय् च्याम्ह मन्त। थ्व नाप आःतक सीपि १८६४ म्ह थ्यःगु दु धका स्वास्थ्य तथा जनसंख्या मन्त्रालयं धाःगु दु।

वःगु २४ घण्टाया दुने थप ४२६ म्हेसित कोरोना भाइरस संक्रमण पुष्टि जुगु दु ।

स्वास्थ्य तथा जनसंख्या मन्त्रालयया कथं ५२२५ म्हेसिगु परीक्षणय् मिजंपि २७३ म्ह व मिसापि १५३ म्ह याना ४२६ म्ह संक्रमण पुष्टि जूगु दु।

थ्व नाप नेपालय् कोरोना भाइरस संक्रमितपि २ लाख ६१ हजार १९ म्ह थ्यःगु दु। 

बागमती प्रदेश सरकारं प्रदेशसभाया हिउँदे अधिवेशन माघ ७ गते सःतेगु सिफारिस याःगु दु। शुक्रवाः हेटौंडाय् च्वंगु बागमती प्रदेश मन्त्रिपरिषदया वैठकं प्रदेश प्रमुखयात प्रदेश सभाया वैठक आह्वान यायेगु सिफारिस यायेगु निर्णय याःगु दु। वःगु साउन ८ गते स्थगित वर्ष अधिवेशन स्थगित जुइ धुका हिउँदे प्रदेशसभा बैठक च्वंगु मदुनि ।

सत्तारुढ दल नेकपा दुने आन्तरिक विवादया प्रभाव प्रदेश तहय् न खने दुगु दु। सरकार मछिइगु इलय् प्रदेशसभाया अधिवेशन सिफारिस याःगु खः। छु दिं न्ह्यः जक नेकपा प्रचण्ड–माधव समूहपाखे मुख्यमन्त्री डोरमणि पौडेलविरुद्ध प्रदेशसभा सचिवालयय् अविश्वास प्रस्ताव दर्ता याःगु खः।