उच्च अदालत पाटनं करारय् प्राविधिक कर्मचारी भर्ना कायेगु यल महानगरपालिकाया निर्णय कार्यान्वयनय् रोके याःगु दु। अदालतं महानगरपालिकाया नामय् अन्तरिम आदेश बिउसे कर्मचारी भर्ना मयायेत धाःगु दु। महानगरपालिकां कार्यपालिकाया बहुमत सदस्यपिनिगु निर्णयया भावनायात वान्छ्वया विहीवाः प्रयोगात्मक परीक्षा व अन्र्तवार्ता तय याःगु खः।

अदालतया दक्को प्रक्रिया स्थगित यायेत बुधवाः अन्तरिम आदेश बिःगु दु। उच्च अदालत नियमावली २०७३ या दफा ४२ बमोजिम उगु आदेश बिःगु खः। उगु रिट निवेदनय् स्थानीय सरकार सञ्चालन ऐन २०७४ या दफा ८३ य् उपदफा (८) व (१०) दुगु कानूनी प्रावधान तक  आधार माने याना उगु निर्णय रोके यायेत अन्तरिम आदेशया माग याःगु खः। उगु ऐनया उपदफा (८) य् गाउँपालिका व नगरपालिकां नगर प्रहरी, सवारी चालक, कार्यालय सहयोगी, प्लम्बर, इलेक्ट्रिसियन, चौकीदार ,माली, बगैचा व सरसफाई सम्बन्धी पदय् स्थायी पदपूति मयासे प्रतिस्पर्धाया आधारय् सेवा करारय् काये माःग् धका धयातःगु दु।

उगु बाहेक मेगु पद व सेवाय् करार कर्मचारी करारपाखे पदपूर्ति याये मदइग न ऐनय् उल्लेख याना तःगु दु। अथेहे उपदफा १० य् संगठन व व्यवस्थापन सर्र्वेक्षणया प्रतिवेदन नगरसभापाखे पारित याये माः धका धयातःगु दु।कार्यपालिकाया बहुमत सदस्यपिन्सि ध्यानाकर्षण याक याकू न महानगरपालिकाया मेयर चिरिबाबु महर्जन व प्रमुख प्रशासकीय अधिकृत विष्णुप्रसाद कोइरालां कर्मचारी भर्ना यायेगु निर्णय यायेवं उगु निर्णय कानुनसम्मत मजुगु धाःसे गोपाल डंगोलं उच्च अदालतय् मुद्दा दर्ता याःगु खः ।अदालतया आदेश वयेवं महानगरपालिकाया पदपूर्ति समितिं विहीवाः छगु सूचं प्रकाशित यासे पूर्व निर्धारित परीक्षाया दक्को ज्या स्थगित याःगु दु।

वःगु असार ३१ गते छगु विज्ञापन पाखे सिभिल इन्जिनियर खुगु तह, आर्किटेक्ट खगु तह, इलेक्ट्रिकल इन्जिनियर खुगु तह, कम्प्युटर इन्जिनियर खुगु तह, जुनियर इन्जिनिर आर्किटेक्ट न्यागु तह, सिभिल मेकानिक्स न्यागु तह, कम्युटर अपरेटर न्यागु तहया विज्ञापन याःगु खः।अदालत बिःगु अन्तरिम आदेशयात निरन्तरता बिइगु वा मबिइगु सम्बन्धय् सहलह यायेत वइगु पुस २२ गते निगु पक्षयात सतूगु दु । नाप निवेदकया माग दाबी बमोजिम आदेश छाय् जारी जुइम्वाः धका न्ह्यन्हुया दुने लिखित जवाफ पेश यायेत विपक्षीया नामय् अदालतं आदेश बिःगु दु।

क्षत्रपाटी निःशुल्क चिकित्सालयया न्हगु भवन दयेकेत्यःग् “माऊ बद्री भवन“या ग्वाहालिया निति सानी कपाली थौं न्ह्यय्गु लख (७००,०००) ग्वाहालि याःगु दु।

थौं चिकित्सालयया अधक्ष्य डा.मनोजमान श्रेष्ठयात सानी कपाली व कृष्ण गोपाल रञ्जितकार उगु ध्यवा लःल्हानादीगु खः।

येँया शोभाभगवती स्वां मिइगु ज्या यानाच्वम्ह कपालीं थः वां सुकुमान कपाली, मां प्रेम कुमारी कपाली व तता मैंया कपालीया लुमन्ती न्हुगु भवन दयेकेगु लागि ग्वाहालि यानादीगु खः।

थौं हिमाली क्षेत्र हुम्ला व जुम्लाय् हिमपात जुगु दु । आइतवाः बहनिनिसे हिमपात जुया जनजीवन कष्टकर जुया हवाई सेवा प्रभावित जुगु दु।

हुम्लाया सदरमुकाम सिमकोट व नाम्खा गाउँपालिकाय् ख्वातुक्क पुगाःगु द्। हिमपातं याना उडान मजुया सिमकोटपाखे नेपालगञ्ज व सुर्खेत वनेत तयारी जुयाच्वपि हुम्ला हे रोके जुगु दु। अथेहे उत्तरी नाम्खा गाउँपालिकाया हिल्सा नाका वनेगु लँ व अन नाप जःखःच्वंगु डाँडा बालाक्क पूगाःगु दु। अथेहे जुम्लाय् छगु फिट पू गाःगु दु। चःछिं समान्य वाः वःगुलि जुम्ला सदरमुकामय् सोमवाः सुथय् निसे पू गाःगु दु ।

पश्चिमी वायुया प्रभावं आइतवाःनिसे उच्च पहाडी व हिमाली जिल्लाय् हिमपात जुगु दु। बुधवाः तक मौसम बद्ली जुइ धका जल तथा मौसम पूर्वानुमान महाशाखां धाःगु दु।

नेकपा अध्यक्ष पुष्पकमल दाहाल ‘प्रचण्ड’ जहान सीता दाहालयात थप उपचार यायेत थौं भारतया मुम्बईपाखे यकूगु दु।

नेपाल एयरलाइन्स नं थौं सुथय् ११ बजे उडानपाखे दाहालयात मुम्बई यकूगु खः। सीतानाप अध्यक्ष प्रचण्ड व म्ह्याय् गंगा दाहाल न मुम्बईपाखे वःगु खः । सीताया उपचार न्यूरोजेन ब्रेन एण्ड स्पाइन इन्सटिच्युटय् जुइ त्यःगु खः। वयात अस्पतालया डाइरेक्टर नाप कन्सलट्यान्ट न्यूरो सर्जन डा. आलोक शर्माया टोलीं उपचार याइ धका प्रचण्डया प्रेस सल्लाह विष्णु सापकोटां जानकारी बिःगु खः।

सीता दाहालयात ताः ईनिसे पार्किन्सनया समस्या खनेदुगु खः। वःगु इलय् भैसेपाटीया मेडिसिटी अस्पतालय् उपचार यासे छेँय् आराम याना वयाच्वम्ह दाहालयात थौं सोमवाः मुम्बईलय् यकूगु खः।

कोरोना भाइरस सङ्क्रमणं विदेशय् थप स्वम्ह नेपाली सीगु दु।गैरआवासीय नेपाली संघया कथं थुगु वाःया दुने बेलायतय् छम्ह व पोर्चुगलय् निम्ह नेपाली सीगु दु ।

संघया अन्तर्गत स्वास्थ्य समितिया कथं थ्व नाप विदेशय् कोरोना भाइरसपाखे सीपि (२० गु देशय्) ३१५ म्ह थ्यःगु दु। संघया कथं शनिवाः तक ५० गु देशय् ५३ हजार ३८५ म्ह नेपालीपिन्त कोरोना सङ्क्रमण खने दुगु दु ।

उकि मध्ये ५० हजार ६५६ म्ह कोरोनामुक्त जुइ धुकुगु दु। थ्व धइगु कूल सङ्क्रमितपि ९४ प्रतिशत खः।