ब्लड डोनर्सएशोसिएसन नेपाल (ब्लोदान) केन्द्रया आह्वानय् सर्वहित नेपालं ग्वसाः ग्वःया छगु हिंदान ज्याझ्वः जुगु दु ।

उगु ज्याझ्वः जागरुक युवा समाज, ब्लोदान काठमाडौं, ब्लोदान काठमाडौं मध्य क्षेत्र सह आयोजनाय् जुगु खः ।

ज्याझ्वलय् संघीय सांसद जीवनराम श्रेष्ठं ब्लड ब्याग बियाः हिदान ज्याझ्वः न्ह्याकूगु उगु ज्याझ्वलय् रक्त संकलन ज्या रक्तसञ्चार केन्द्र सोल्टीमोडपाखें जूगु खःसा संयोजन राजीव श्रेष्ठ यानादीगु खः। 

प्रधानमन्त्री व नेकपा अध्यक्ष केपी शर्मा ओलीं सरकारयात प्यख्यः घेराबन्दी याःगुलि प्रतिनिधिसभा विघटन याये माःगु धका धयादीगु खः ।

थौं सोमवाः न्हिनय् देशवासीया नामय् सम्बोधन यासे सरकारं याःगु गुलि न प्रस्तावय् संसदय् छलफल याके मबिइगुलि प्रतिनिधिसभा विघटन यानागु धका दाबी यानादीगु खः। वयकलं सम्बोधनया झ्वलय्, ‘वःगु छु महिनानिसे सरकारयात गज्यागु घेराबन्दी याःगु खः छिकपिन्स स्यू ह खः। प्रधानमन्त्रीविरुद्ध अविश्वासया प्रस्ताव दर्ता यायेगु कुतः जुल, पार्टी अध्यक्ष नाप संसदीय दलया नेतायात खवर हे मयासे संसद् अधिवेशन सनिगु ज्या जुल।

लिपुलेक, कालापानी व लिम्पियाधुरा सहितया नक्सा प्रकाशन लगायतया यक्को राष्ट्रवादी ज्या जुल तक सरकारयात घेराबन्दी यायेगु विडम्बणापूर्ण खः धका धयादीगु खः। वयकलं सत्तापक्षया हे गुलि नेता प्रतिपक्ष दलया नेता स्वया अप्वो आक्रामक रुपं पिहवःगु आरोप बियादीगु खः।

प्रधानमन्त्री ओलीं प्रधानमन्त्री जुइगु तयारीइ दुगु पार्टीया नेता व प्रतिपक्ष दलयात न्हुगु निर्वाचनं थःगु लोकप्रियता मापनया लागि ग्वाहालि जुइगु दाबी यानादीगु खः ।

नेकपाया अध्यक्ष पुष्पकमल दाहाल व वरिष्ठ नेता माधवकुमार नेपाल समूह न प्रधानमन्त्री केपी शर्मा ओलीयात कारबाहीबारे निर्वाचन आयोगय् जानकारी बिःगु दु।

दाहाल व नेपाल समूह नं प्रधानमन्त्री तक जुयादीम्ह नेकपाया अध्यक्ष ओलीयात कारबाही याःगु बारे निर्वाचन आयोगयात जानकारी बिःगु दु।

आइतवाः स्थायी कमिटी बैठकं ओलीयात अनुशासनया कारबाही सिफारिस याःगु खः।

थ्व हे निर्णय स्थायी कमिटी सदस्य लीलामणि पोखरेलं थौं सोमवाः न्हिनय् आयोग वना थुकिया जानकारी बिःगु खः। स्थायी कमिटीया बहुमत सदस्यपिनिगु उपस्थितिइ पार्टी अध्यक्ष ओलीयात कारबाही यायेगु निर्णयया कपी बुझे याःगु खः।

आइतवाः स्थायी कमिटी बैठकं ओलीयात अनुशासनया कारबाही यायेगु सिफारिस यासे मंगलवाः च्वंगु केन्द्रीय कमिटीइ थुकिया प्रस्तावय् यकंगु निर्णय याःगु खः।

तर, ओली समूह न धाःसा सुना नं कारबाही याये फइ मखु धका धाःगु दु। 

पूर्वराष्ट्रपति डा. रामवरण यादवं प्रतिनिधिसभाया विघटन संवैधानिक, राजनीतिक व नैतिक रुपं गलत खः धका धयादीगु दु।

देशय् जुयाच्वंगु राजनीतिक व संवैधानिक घटनां थः तसक दुःखी व मर्माहत जुगु दु धका धयादीगु दु। पूर्वराष्ट्रपति यादवं थौं सोमवाः सम्बोधन यानादीसे जितः म्हिगःया घटनां मर्माहत व दुःखी जुगु दु, प्रधानन्त्री व राष्ट्रपतिया उगु पलाखं संवैधानिक, राजनीतिक व नैतिक रुप मिले मजु।

आइतवाः प्रधानमन्त्री केपी शर्मा ओलीं प्रतिनिधिसभा विघटन यायेगु सिफारिस व राष्ट्रपति विद्यादेवी भण्डारीं अनुमोदन याःगु यात कया पूर्वराष्ट्रपति यादवं संविधान विपरीत जगु दु धका धाःगु खः। संविधानया मर्म भावना विपरीत जुगु ज्यायात कया राष्ट्रपति संस्थाय् न्ह्यसः वःगु दु धका धाःगु दु ।

थुगु संविधान व जनतां सर्वोच्च निकाय संसद् पाखे समस्याया छिनोफानो याना न्ह्यने वने माःगु हे थुगु इलय् आवश्यकता दु। जनतां सर्वोच्च निकाय संसद् भंग जुइवं थः नाप ३ करोड जनता मर्माहत जूगु दु धका धयादीगु दु। पूर्वराष्ट्रपति यादवं सम्बोधनया अन्त्यय्, ‘आशा व विश्वास दु। थुकिइ सम्मानित सर्वोच्च अदालतया ध्यान वनि, वनेहे माः।

जिगु विनम्र इनाप दु।’ दीक्षान्त समारोहय् लिखित मन्तव्य बियादीसे वयकःया सम्बोधनया अन्त्यय् प्रतिनिधिसभाया असंवैधानिक विघटनया विषयय् खँ ल्ह्वनादीगु दु।

विकसित लिपाःगु राजनीतिक घटनायात कया प्रधानमन्त्री केपी ओलीं थौं देशवासीया नामय् सम्बोधन याये त्यःगु दु।

संसद् विघटन व न्हुगु निर्वाचनबारे प्रधानमन्त्री ओलीें सम्बोधन यायेत्यःगु धका सचिवालयं धाःगु दु। सम्बोधन नेपाल टेलिभिजन व रेडियोपाखे न्हिनय् ३ बजे प्रसारण जुइ त्यःगु खः।

प्रधानमन्त्री ओलीया सिफारिसय् आइतवाः राष्ट्रपति विद्या भण्डारीं प्रतिनिधिसभा विघटन यासे वइगु  वैशाखय् निगु चरणय् निर्वाचन तिथि क्वछिगु खः।

थ्व हे दथुइ सोमवाः प्रधानमन्त्री निवास बालुवाटारय् थः समर्थित सांसदपिन्त सम्बोधन यासे प्रधानमन्त्री व नेकपा अध्यक्ष केपी शर्मा ओलीं थीथी बहानाय् सरकारयात झुले यायेगु ज्या जुगुनि ताजा जनादेश कायेत न्हुगु निर्वाचनय् वने माःगु धका धाःगु दु।