यलय् खुसि बा वया फसे जुयाच्वंपि गुम्हेसित हेलिकोप्टरं उद्धार याःगु दु। शनिवाः नेपाली सेनाया हेलिकोप्टरं उमित उद्धार याःगु खः।

यलया मख्खुबेँसी इलाकाय् हेलिकोप्टरं न्याम्हेसित उद्धार याःगु दु धका नेपाली सेनां जानकारी ब्यूगु दु। उद्धार याना उमित येँ हःगु दु।

अथेहे, यलया महानगरपालिका–१४, कान्तिपुर कोलोनीइ निम्हेसित हेलिकोप्टरं उद्धार याःगु खः। यलया हे कुसुन्ती चुकं निम्हेसित हेलिकोप्टरं उद्धार याःगु दु धका सेनां धाःगु दु।

मदिक्क वा वया च्वंगु स्वनिगःया खुसि बा वयाच्वंगु दु।खुसि बा वया थाय् थासय् लँ बन्द जुयाच्वंगु दु।

खुसि बा वया चोभारय् बागमती खुसि खने दुगु किपा ।

किपा सामाजिक संजालपाखे

खुसि वा वया यल जिल्लाय् थी थी थासं गुम्ह मनू सीउगु  दु। जिल्ला प्रहरी परिसर यलया एसएसपी शेखर खनालया कथं गुम्ह सीपि लुगु दु सा झींछम्ह मनू तना च्वंगु दु।

वयकःया कथं आःतक २८१ म्हेसित शकुसल उद्धार याःगु दु। सानेपा क्षेत्रपाखे ७७ म्ह, नख्खु हार्मोनी कोलोनीं १४ म्ह, नख्खिपोट क्षेत्रपाखे १५ म्ह, बुङ्मती क्षेत्रं ७५ म्ह, चापागाउँ क्षेत्रं ५५ म्ह, इमाडोल क्षेत्रं २८ म्ह व युएन पार्क क्षेत्रं छम्हयाना २८१ म्हेसित उद्धार यागु दु धका वयकलं धयादीगु दु।

उद्धार यायेगु निति प्रहरीपि जक ११ सय स्वया अप्पो जनशक्ति परिचालन जूगु दु धका वयकलं धयादीगु खः।

मदिक्क वा वया ख्वपय् छेँय् छेँय् लः दुहावंगु  दु।खुसि बा वया चलः वया न्याम्ह मनू तंगु दु। जिल्ला प्रहरी परिसर ख्वपया प्रवक्ता मोहनमणि अधिकारीया कथं थिमी चलः वया प्यम्ह मनू व आशापुरीइ खुसि बा वया छम्ह मनू तंगु दु।

उमिगु नां सिइ दुगु मदुसा मालेगु ज्या जुयाच्वंगु दु। मनोहरा, हनुमन्ते घट्टे खुसिइ बा वंगुलि सतक व बस्ती तक लः दुहावया  जनजीवन अस्तव्यस्त जूगु दु। घट्टे खुसिया ताँ न त्वःधुगु दु।

ख्वपया सिद्धी स्मृति अस्पताल, जगाती, इवामुरी अस्पताल, सल्लाघारी, महेश्वरी खेल मैदान, राम मन्दिर, राधेराधे नाप यक्को थासय् लः मुनाच्वंगु दु।

जिल्ला प्रहरी परिसर ख्वपया प्रवक्ता मोहनमणि अधिकारीं डुंगा छ्यला जगातीपाखें करिब ५० म्हेसित उद्धार याःगु दु धका जानकारी बिउगु दु।नेपाली सेना, प्रहरी, ख्वप नगरपालिकाया जनप्रतिनिधितय्स उद्धार यायेगु ज्या यानाच्वंगु दु।

मदिक्क वा वयाच्वंगुलि ख्वपया हनुमन्ते खुसिइ ग्यासया बुलेट चुइकूगु दु। खुसिं चुइकूगु उगु ग्याँसया बुलेट लिक तक जूगु दु।

उगुु बुलेट छु ई न्ह्यः यलया च्यासलस्थित एमाले पार्टी कार्यालय न्ह्यने ताँय् तक्यःगु दु।