प्रधानमन्त्री केपी शर्मा ओली गृह जिल्ला झापा झाःगु दु।

थीथी ज्याझ्वलय् ब्वति कायेत झापा थ्यंक झाम्हः प्रम ओलीयात चन्द्रागढी विमानस्थलय् कोसी प्रदेशया न्हापाया मुख्यमन्त्री लिसें नेकपा (एमाले) स्थायी कमिटी दुजः शेरधन राई, एमालेया कोसी प्रदेश सभापति घनश्याम खतिवडालगायतं लसकुस यानादीगु खः।

वय्कलं थौं हे मेचीनगर नगरपालिका–४ य् १९ गू कचाः कथं नीस्वंगु मानवसेवा आश्रम व दमक नगरपालिका–३ दापगाछीइ न्हूगु दयेकूगु दमक व्यावसायिक कम्प्लेक्सया उलेज्या यानादीगु ज्याझ्वः दूगु प्रमुख जिल्ला अधिकारी बन्धुप्रसाद बास्तोलां कनादिल।

प्रजिअ बास्तोलाया कथं व्यापारिक कम्प्लेक्सया उलेज्या ज्याझ्वलय् उपप्रधान व शहरी विकासमन्त्री प्रकाशमान सिंह व खानेपानीमन्त्री प्रदीप यादवं नं ब्वति कयादी।

चितवनपाखें येँ वयाच्वंगु भारतीय ग्यास बुलेट धादिङय् दुर्घटनाय् लाःगु दु।

पृथ्वी राजमार्ग दुने धादिङया बेनिघाट रोराङ गाउँपालिका–७ कृष्णभीरय् थौं सुथय् दुर्घटना जुयाः बुलेट सतकंं कुतुंवंगु खः। जिल्ला ट्राफिक प्रहरी ज्याकू गजुरीया कथं आः उद्धार ज्या न्ह्यानाः च्वंगु दु।

चालक व सहचालक ध्वः मदूगुलिं मालेज्या जुयाच्वंगु दु। सडकं कुतुंवंगु गाडीया छुं ब्वः भीरय् थानाःच्वंगु ध्वः दूगु दु। उगु लागा लिक्कः च्वनिपि स्थानीयतय्त सतर्क जुया च्वनेत प्रहरीं इनाप याःगु दु।

ग्यास ज्वःगु खन धाःसा उघ्रिमय् हे प्रहरीया १०० नम्बरय् खबर यायेत इनाप यानाःगु प्रहरी निरीक्षक सुरज श्रेष्ठं धयादिल।(रासस)

भगवान् श्रीपशुपतिनाथया तात्विक स्वरुप व पञ्चकृत्यया व्याख्यापाखें भक्तजनतय्त लँ क्यनेत व पशुपतिनाथया बारे दयाच्वंगु जिज्ञासाया लुइकेत अपुकेया निंतिं ‘भगवान् श्रीपशुपतिनाथ’ नांया सपूm पिदंगु दु।

श्री पशुपति अर्चना सुव्यवस्था प्रतिष्ठानं पिथंगु उगु सपूmतिइ न्यागू ब्वः दु। प्रतिष्ठानया थ्व न्यागूगु पिथना खः। सफूया न्हापांगू ब्वय् स्तुति, निगूगु ब्वय् तत्व दर्शन, स्वंगूगु ब्वय् उपासना, प्यंगूगु ब्वय् इतिहास–संस्कृति व न्यागूगु ब्वय् अनुसूची दुथ्याकातःगु दु।

तत्व दर्शन ब्वय् थीथी विद्वान तय्गु २५ च्वसुत दु। उपासना ब्वय् १८ च्वसुत दुथ्याकातःगु दुसा इतिहास–संस्कृति ब्वय् इतिहास व तजिलजिनापं सम्बन्धित विद्वानतय् २१ च्वसुत दुथ्यानाच्वंगु दु।

पशुपति लागाय् पलिस्था यानातःपिं द्यःत, गुह्येश्वरी पीठ, पशुपति लागाया जात्रा, नखः, पाशुपतसूत्रम् थेज्याःगु च्वसुत दूगु थुगु सफूतिइ झिंछसः व ६४ पाना दु। (रासस)

राष्ट्रिय समाचार समिति (रासस) या फोटो पत्रकार लिसें राष्ट्रिय फोटो पत्रकार समूह (एनएफपिजे) नेपाःया नायः प्रदीपराज वन्त नेतृत्वया १४ म्हेसिया फोटोपत्रकार पुचः किपा ब्वज्याया निंतिं चीनया सान्तोङ वंगु दु।

पिन्चाओ फोटोग्राफर एशोसिएसनया ब्वनाय् एनएफपिजेया पुचः उखे वंगु खः। चीनया फोटाग्राफर सु छुई व नेपाः–चीनमैत्री संघ जानाः यायेत्यंगु ‘सान्तोङ सांस्कृतिक सप्ताह व मनमोहक नेपाः’ किपा ब्वज्याय् नेपाःया पर्यटन लागा, तजिलजि, जीवनशैली व विविधता जाःगु सच्छिपाः किपा सान्तोङ प्रान्तया थीथी सहरय् लच्छियंक ब्वइगुु ब्वज्याया कजि सुनिल शर्मां धयादीगु दु।(रासस) 

राष्ट्रपति रामचन्द्र पौडेल स्वास्थ्यलाभ यानाः डिस्चार्ज जुयादीगु दु। वय्कः वंगु बुधबाः प्रोस्टेटसम्बन्धी उपचार यायेत महाराजगञ्जय् च्वंगु त्रिभुवन विश्वविद्यालय शिक्षण अस्पतालय् भर्ना जुयादीगु खः।

वय्कःया उकुन्हु हे प्रोस्टेटसम्बन्धी शल्यक्रिया जूगु खः। अस्पतालया निमित्त कार्यकारी निर्देशक घनश्याम गुरुङं विज्ञप्ति पिकया राष्ट्रपति पौडेल स्वास्थ्यलाभ यानाः थौं न्हिनय् डिस्चार्ज जूगु धयादीगु खः।

थ्व हे दथुइ, राष्ट्रपति पौडेलं थःगु उपचारय् जुयाजूपिं फुक्क चिकित्सक, स्वास्थ्यकःमि, अस्पतालया मेमेपिं कर्मचारीलिसें स्वदेश व विदेशं थःगु स्वास्थ्य लाभया भिंतुना बियादीपिं सकसितं नं सुभाय् बियादिल।

राष्ट्रपतिया ज्याकुथिं पिकाःगु विज्ञप्तिइ उगु खँ न्ह्यथनातःगु खः।(रासस)