नख्खु खुसिइ प्यम्हेसित चुइकूगु दु। निम्ह मिसा, छम्ह मिजं व छम्ह मचायात खुसिइ चुकूगु दु।

थौ सुथय् ९ बजेति खुसिइ चुइकूगु धका नेपाल सशस्त्र प्रहरी बलं धाःगु दु।

म्हिगः निसे मदिक वा वयाच्वंगु खुसि वा वयाच्वंगु दु। खुसि वा वया येँया बुद्धनगर व यलया यूएन पार्क स्वाइगु ताँय् न क्षति जूगु दु।

खुसि बा वया ताँय् च्वय् तक लः वःगु दु। पक्की ताँ सिथय् मनू न्यासी वनिइगु नँया ताँ न त्वःधुगु दु। ताँया थां तक ग्वरतूगु दु।

उगु थासय् खुसिसिथय् छेँय् छेँय् तक लः दुहावंगु दु। प्रहरी प्रशासनं आः लँ बन्दयाना मनू तक जुइके मबिउगु दु।

बल्खु खुसि सिथय् छम्ह सीम्ह लुगु दु।सीम्ह मनूया सनाखत जूगु मदुनि। स्थानीयतय्स सीम्ह खनेवं प्रहरीयात सूचं बिउगु खः।म्हिगm शुक्रवाः बहनि ढुंगेधाराय् छम्ह मनू मोटरसाइकलनाप ढलय् कुतु वंगु खः।

मोटरसाइकल लुगु खःसा मनू तंगु खः।अथेहे थौ सुथय् यल महानगरपालिका १३ कुसुन्ती दिव्यनगरय् नख्खु खुसि बा वया मोटर ग्यारेजय् फसे जूयाच्वपि ३० म्ह मजदुरत सशस्त्र प्रहरीं उद्धार याःगु दु।

उमित उद्धार यायेगुलि सशस्त्र प्रहरीया २१ नम्बर गणपाखे ३० म्हेसिगु व २० नम्बर गणया ११ म्हेसिगु टोलीया डुंगानापं परिचालित याःगु खः। उमित थौ सुथय् ५ बजेनिसे उद्धार यायेगु सुरु याःगु खः।

मदिक्क वाः वयाच्वंगुलि थाय् थासय् चलखं याना लँ बन्द जुगु दु धका प्रहरीं धाःगु दु। सुरुङमार्ग नापं लेदो कुतुवया निखेरं सतक अवरुद्ध जूगु दु।

यक्को वया चलः वया क्षति जुइफुगुलि असोज ११–१२ गते निन्हु हिमाली व पहाडी जिल्लाय् चान्ह्यः बस चल मयायेत सरकारं इनाप याःगु दु।

मनसुन सक्रिय सुरु जुइ न्ह्यः हे जल नाप मौसम विज्ञान विभागं ५६ जिल्लाय् यक्को जोखिम दु धका धलः पिकया सावधानी जयाच्वने धाःगु खः।

विभागया मौसमविद तयेगु कथं वइगु आइतवाः तक वा वइ धका धाःगु खः।

संयुक्त राष्ट्रसंघया ७९ क्वःगु महासभा ब्बति कायेगु निति अमेरिका झायाच्वम्ह प्रधानमन्त्री केपी शर्मा ओलीं अमेरिकी राष्ट्रपति जो बाइडेनयात नापलानादीगु दु।

बाइडेन महासभाय् ब्बति कायेगु झ्वलय् पाहाँपिन्त लसकुस याउगु ज्याझ्वलय् ओलीं राष्ट्रपति जो बाइडेनयात नापलानादीगु खः।प्रधानमन्त्री केपी शर्मा ओलीं थौ हे संयुक्त राष्ट्रसंघया ७९ क्वःगु महासभाय् सम्बोधन यानादीगु खः।

सम्बोधन यायेगु झ्वलय् ओलीें शान्ति प्रक्रियानाप सम्बन्धित ल्यःदनिइगु ज्या याकन क्वचाकेगु नेपाल याःगु प्रतिबद्ध दु धका धयादीगु खः।