राष्ट्रपति रामचन्द्र पौडलया स्वास्थ्य अवस्था थुइकेगु निति प्रधानमन्त्री केपी शर्मा ओली अस्पतालय् वंगु दु।

प्रम ओली थौ राष्ट्रपति पौडेल उपचार यानाच्वंगु त्रिभुवन विश्वविद्यालय, शिक्षण अस्पताल, महाराजगञ्जय् वना स्वास्थ्यवस्थाबारे जानकारी कयादीगु खः।

प्रधानमन्त्री ओलीं राष्ट्रपति पौडेलया भिं उसाँय् या कामना यानादीसे उपचारय् माःगु दक्को प्रबन्ध मिले यायेत अस्पतालया सम्बन्धित अधिकारी व चिकित्सक तय्त इनाप यानादीगु खः।

मंसिर १९ गते अस्पतालय् भर्ना जूयादीम्ह राष्ट्रपति पौडेलया प्रोस्टेटसम्बन्धी समस्या याःगु शल्यक्रिया जुइ धुकुगु दु।

नेपाल पत्रकार महासंघय् न्हुगु नेतृत्वया निति सत्तारुढ व विपक्षी गठबन्धनं अलगअलग प्यानल तयार याःगु दु। नेपाल युनियन युनियन व प्रेस चौतारी नेपाल मिले जूया प्यानल दयकूगु दु।

उगु प्यानलपाखे महासंघया अध्यक्षय् निर्मला शर्मा उम्मेदवार जुगु खः। शर्मा चौतारीया कोटापाखे अध्यक्षया उम्मेदवारी जूगु खः। चौतारीया पाखे अध्यक्ष नापं न्याम्ह पदाधिकारीयाउम्मेदवारी बिउगु खः। मिसा उपाध्यक्षय् नितु पण्डित, आदिवासी जनजाति सचिवय् सविन प्रियासन चौधरी, कोषाध्यक्षय् रामकृष्ण ज्ञवाली व लेखा आयोग संयोजकय् केसी लामिछाने न उम्मेदवारी दर्ता याःगु खः।

प्रेस युनियनया पाखे महासंघया बरिष्ठ उपाध्यक्षय् दीपक आचार्य, समावेशी उपाध्यक्षय् उमिद बागचन्द, महासचिवय् रामप्रसाद दाहालं उम्मेदवारी दर्ता याःगु ख। सचिवय् रमेश खतिवडा (खुल्ला), सोनी शर्मा (मिसा), प्रकाश धौलाकोटी (दलित), बैकुण्ठ पराजुली (एशोसियट) व अशोक तिवारी (मधेशी) या उम्मेदवारी प्रेस युनियनपाखे दर्ता याःगु खः।सत्तारुढ दल निकट युनिनयन व चौतारीया प्यानलविरुद्ध विपक्षी पत्रकार संगठनया प्यानल दयकूगु खः।

थुगु प्यालनपाखे महासंघया अध्यक्षय् प्रेस सेन्टर नेपालया कमल गिरीं उम्मेदवारी दर्ता याःगु खः। गिरीयात समाजवादी प्रेस संगठन, क्रान्तिकारी प्रेस संगठन, जनपत्रकार संगठन, प्रगतिशील पत्रकार संगठन व प्रेस मञ्चं समर्थन याःगु खः।अथहे उगु प्यानलय् वरिष्ठ उपाध्यक्षय् रोशन पुरी, मिसा उपाध्यक्षय् गंगा बराल व समावेशी उपाध्यक्षय् सुवास साह न उम्मेदवारी ब्यूगु खः।

महासचिवय् लेखनाथ न्यौपाने, सचिवय् उत्तर बिष्ट (खुल्ला), सिर्जन झा (मधेशी), सरिता बराईली (दलित), भीषण राई (आदिवासी जनजाति) व विकास कार्की (एशोसियट) उम्मेदवार ब्यूगु खः। कोषाध्यक्षय् रामकृष्ण अधिकारी व लेखा समिति संयोजकय् ध्रुब रावलं उम्मेदवारी ब्यूगु खः।

भुटानया जुजु जिग्मे खेसर नाम्गेल वाङचुकं बौद्धय् दर्शन यानादीगु दु। थौं सुथय् नेपाः झायादीम्ह भुटानया जुजु वाङचुकं थ्व स्वयां न्ह्यः स्वयम्भूया दर्शन यानादीगु खः।

भारतं देय् लिहाँ वनेगु झ्वलय् येँय् झायादीम्ह भुटानया जुजु वाङचुक थौं हे देय् लिहाँझाइगु परराष्ट्र मन्त्रालयं धाःगु दु।

बागमती प्रदेशय् प्रदेश सरकारं ‘योजना बैंक’ नीस्वनिगु जूगु दु।

बागमती प्रदेश नीति व योजना आयोगं बिहीबाः थन ग्वसाः ग्वःगू प्रदेशस्तरीय योजना तर्जूमाया गोष्ठीइ मुख्यमन्त्री बहादुरसिंह लामां ‘योजना बैंक’ नीस्वनेगु खँ धयादीगु खः।

मुख्यमन्त्रीं पहुँचया लिधंसाय् योजना ल्ययेगु परम्परायात पनेत ‘योजना बैंक’ मदयेक मगाःगु धयादिसें थुकिया निंतिं कानुन दयेका छ्यला बुलाय् हयेगु बचं बियादिल।

प्रदेश नीति व योजना आयोगयात अधिकार सम्पन्न दयेकेगु खँय् नं वय्कलं बः बियादिल। गोष्ठीइ प्रदेश अन्तर्गतया नुवाकोट, धादिङ व रसुवाय् च्वंगु ज्याकुथि व स्थानीय तहया प्रतिनिधितय्सं वइगु आर्थिक दँया निंतिं योजनात न्ह्यब्वगु खः।

भुटानया नरेश जिग्मे खेसर नाम्गेल वाङ्चुक अनौपचारिक भ्रमणया झ्वलय् स्वयम्भूया दर्शन यानादीगु दु।

थौ सुथय् १० ता इलय् स्वयम्भू व्यवस्थापन नापं संरक्षण महासमितिया कर्मचारी स्वयम्भु झायादीगु खः। १० ताः इलय् त्रिभुवन अन्तर्राष्ट्रिय विमानस्थलय् झाःम्ह जुजु विमानस्थलं बानेश्वर, कालीमाटी जुजुं १०ः५० ता इलय् स्वयम्भू थ्यंकादीगु खः।

स्वयम्भू लागाय् थ्यंबलय् वय्कःयात बौद्ध परम्पराकथं धर्मगुरु, महासमितिया पदाधिकारी व पुरातत्व विभागया अधिकारीं लसकुस यानादिल। उगु झ्वलय् जुजुपाखे विश्वशान्ति पुखूया दर्शन यानादिल । स्वयम्भू महाचैत्य, ‘शान्तिपूर’लिसें पुरातत्वतिक संरचनाया बारे पुरातत्व अधिकृत देवेन्द्र भट्टराईं नरेशयात ‘ब्रिफिङ’ यानादिगु खः।

स्वयम्भूइ चाःहिले धुंकाः जुजुं स्वनिगःया दृश्यावलोकन यानादिगु खः। स्वयम्भू महाचैत्यय् च्वंगु बुद्ध देगः न्ह्यःने जुजुं मत च्याकाः पुजा यानाः नापं हारती देगलय् मौलिक परम्पराकथं पुजा यानादिगु खः । उगु झ्वलय् बज्राचार्य गुरुतय्सं स्वस्ती पाठ यानादिल ।

स्वयम्भु महायानी देगलय् च्वंगु भगवान् गौतमबुद्धया प्रतीमाय् मत च्याकाः पुजा यानाच्वंगु इलय् लामा गुरुतय्सं स्वस्ती वाचन यानादिगु खः।