जनकपुरधामय् जुइगु रामजानकी ब्याहाय् ब्बति कायेत वःपि जन्तीतय्त मटिहानीइ लसकुस याःगु दु। भारतया अयोध्यां जन्ती वःगु खः।

मटिहानीया नगरप्रमुख हरिप्रसाद मण्डलनापं जनप्रतिनिधि, जिल्लाया प्रमुख जिल्ला अधिकारी लालबाबु कवारी व नेपाली सेना, नेपाल प्रहरी व सशस्त्र प्रहरीयया जिल्लास्थित प्रमुखपिन्स मटिहानीइ जन्तीयात लसकुस याःगु खः।

मटिहानीस्थित लक्ष्मीनारायण मठया मानमहन्थ, सामाजिक सङ्घसंस्थाया न्ह्यलुवा, मटिहानीस्थित याज्ञवल्क्य लक्ष्मीनारायण विद्यापिठया आचार्य व राजकीय संस्कृत माध्यमिक विद्यालय (मटिहानी गुरुकूल)या  शिक्षक, वटुकपि नाप महोत्तरी उद्योग वाणिज्य सङ्घया पदाधिकारीपिनिगुु ब्बति दुगु खः।

अमेरिकाया सहायक विदेशमन्त्री डोनाल्ड लु नेपालय् वइगु जूगु दु। दक्षिण नाप मध्य एसिया मामिला स्वइगम्ह सहायक विदेशमन्त्री लु भारत, श्रीलंका व नेपाल भ्रमण यायेत्यःगु खः।

३ डिसेम्बरनिसे १० डिसेम्बरतक लु न भम्रण यायेत्यःगु खः। अमेरिकाया विदेश मन्त्रालयं ब्यूगु जानकारी कथं सहायक विदेशमन्त्री लु न नेपालय् शीर्ष नेता व युवा नेतापि नापवाइगु ज्याझ्वः दु।

प्रधानमन्त्री केपी शर्मा ओली प्यन्हुया औपचारिक भ्रमण यायेग झ्वलय् थौ चीनया राजधानी बेइजिङ थ्यःगु खः।

चिनियाँ समकक्षी ली छ्याङया ब्बनाय् प्रधानमन्त्री ओली नेतृत्वया टोली चीनया स्थानीय ई कथं थौ सनिलया ६ बजे बेइजिङ क्यापिटल इन्टरनेसनल विमानस्थलय् थ्यःगु दु धका हिमालय एयरलाइन्सं धाःगु दु।

प्रधानमन्त्री ओली नेतृत्वया टोली सोमवाः सुथय् ११ बजे हिमालय एयरलाइन्सया विशेष चार्टर विमानपाखे चीन प्रस्थान याःगु खः।

भ्रमणया झ्वलय् मंसिर १८ गते चिनियाँ समकक्षी छ्याङं प्रधानमन्त्री ओलीयात लसकुस याःगु खः।

किपू नगरपालिका उपनिर्वाचनया अन्तिम मतपरिणाम कांग्रेस उम्मेदवार कृष्णमान डंगोल विजयी जूगु दु। महर्जनं ५ हजार ३ सय ३४ मत हया विजयी जूगु खः।

अथेहे निकटतम् प्रतिद्वन्द्वी नेकपा माओवादी केन्द्रया प्रा.डा शिवशरण महर्जनं ४ हजार ५ सय ५५ मत हःगु खःसा नेकपा एमालेया उम्मेदवार डा. सुरेन्द्र मानन्धरं ४ हजार ३ सय ३७ मत हःगु खः।

स्वतन्त्र उम्मेदवार राजमान महर्जनं २ हजार ३६ मत हःगु खः।

विसं २०७२ या तः भुखाचं क्षति जुयाः पुनःनिर्माण जूगु ऐतिहासिक धरहरां छगू वाः दुने १४ लख ७० द्वः राजस्व मूंगु दु।

थ्व हे मङ्सिर ९ गतेनिसें सर्वसाधारणया निंतिं शुल्क कया चायेकूगु धरहरा गःवपिनिपाखें १६ गते आइतबाः तक १४ लख स्वयां अप्वः राजस्व मूंगु खः। कामु आयोजना निर्देशक प्रकाश अर्यालं बुधबाः बन्द जुया व मेगु दिं न्हिथं थ्यं मथ्यं द्वःछि व निसलं धरहरा गः वःगु धयादिल। “९ गतेनिसें आःतक च्याद्वः व स्वसः व १६ म्हेसिनं धरहरा गये धुंकूगु दु। थुकिइ १२ दँ क्वय्या मचातय् ल्याः दुथ्याःगु मदु”, वय्कलं धयादिल, “सुथे साढे १० निसें ३ तक धरहरा गयेगु व्यवस्था याना तयागु दु।

चिहाकःगु इलय् नं नागरिकया गाक्कं उपस्थिति खनेदत। ई मगाना थन वपिं सकसितं टिकटया व्यवस्था यायेफयाच्वंगु मदु।” सुथंनिसें सनिलय् तक धरहरा गयेगु व्यवस्था यायेफूगु खःसा न्हिथं द्वःछि व न्यासः मनुतय्सं धरहरा गयाः अवलोकन याइगु अनुमान यानागु अर्यालं धयादिल। धरहरा गयेत छम्ह मनुखं निसः दां पुलेमाः। ब्वनामि, ज्याथः जिथी, मस्त, अपाङ्गता जुपिं मनुतय्त शुल्कय् ५० प्रतिशत छ्यापं बियातःगु दु।

सार्क राष्ट्रपाखें वइपिं पर्यटकतय्त म्हतिं न्यासः व सार्कबाहेक राष्ट्रं वइपिन्त म्हतिं द्वछि दां तोके यानातःगु दु। विशिष्ट संरचना सञ्चालन व व्यवस्थापन विकास समिति गठन आदेश, २०८१ कथं दां कयाः थ्व हे मङ्सिर ९ निसें धरहरा गयेके बिउगु खः। व सिबे न्ह्यः थ्व हे मङ्सिर ६ गते च्वंगु मन्त्रिपरिषद् बैठकं धरहरा चायेकेगु व उकिया निंतिं कायेगु शुल्कयात नं स्वीकृति बियेगु निर्णय याःगु खः। सहरी विकास मन्त्रालयया प्रस्ताव कथं उगु निर्णय जूगु खः। थन पार्किङ याःसा प्यचाः घःचाःया निंतिं घौछिया २० तका व निचाः घःचाःयात १० तका शुल्क तोके यानातःगु दु।

अथे हे, धरहरा परिसरय् दुहां वनेया निंतिं धाःसा ५० तका शुल्क तोके यानातःगु धाःगु दु। धरहरा स्तम्भय् राष्ट्रिय महत्वया विज्ञापन यायेत घौछिया न्याद्वः तोके यानातःगु दु। व्यावसायिक भिडियो छायाङ्कनया निंतिं घौछिया न्याद्वः व फोटो खिचेयायेगु खःसा घौछिया द्वःछि तका शुल्क पुलेमाः।