Display Style:
Column Style
येँं महानगर दुने खिचा लहिइत अनुमति अनिवार्य
नृपेन्द्रलाल श्रेष्ठ | तछलागा त्रयोदशी ११४०,असार ५ शुक्रवाः
येँ महानगरपालिका दुने खिचा लहिइत आ येँ महानगरपालिकाया अनुमति काये माःगु जूगु दु ।
म्हिगः बिहीवाः राष्ट्रिय सभागृहय् महानगरपालिकाया मेयर विद्यासुन्दर शाक्यं आर्थिक वर्ष २०७७ व ७८ या लागि हःगु नीति तथा कार्यक्रमय् खिचा लहिइत न येँ महानगरया अनुमति अनिवार्य यायेगु निति हःगु दु ।
नीति तथा कार्यक्रमय् छाडा पशुपाखे सतक दुर्घटना जूइ फइगु व ल्वय् फैले जूइगु सम्भावनायात ध्यान तया पशुपिनिगु व्यवस्थापन ‘बहुउद्देश्यीय परियोजना’ पाखे यायेगु उल्लेख याना तःगु दु ।
घरपालुवा व छाडा पशुपाखे रेबिज ल्वय् उन्मूलन यायेत ‘बृहत् भेक्सिनेसन’ ज्याझ्वः हयेगु धका येँ महानगरया मेयर शाक्यं धयादिगु खः ।
अथेहे छेँय् लहिइपि जनावरपिनिगु स्वास्थ्य जाँच सेवाया लागि उपचार केन्द्रया व्यवस्था यायेगु धका न धाःगु दु ।
गण्डकीइ थप २४म्ह कोरोना संक्रमित
लहनान्युज | तछलागा त्रयोदशी ११४०,असार ५ शुक्रवाः
गण्डकी प्रदेशया प्यःगु जिल्लाय् थप २४म्हेसित कोरोना भाइरस संक्रमण पुष्टि जूग दु ।
पूर्वी नवलपरासीय् निम्ह, बागलुङय् १४म्ह, कास्कीइ खुम्ह व स्याङ्जाय् खुम्हेसित कोरोना संक्रमण पुष्टि जूगु दु ।
थ्व नाप गण्डकी प्रदेशय् कोरोना संक्रमण पुष्टि जूपि ३४८म्ह थ्यःगु दु धका गण्डकी प्रदेशया स्वास्थ्य निर्देशनालयं थौं शुक्रवाः सुथया ६ बजे जारी याःगु प्रेस विज्ञप्तिइ धाःगु दु ।
उपि दक्को भारत लिहावपि धका धाःगु दु । दक्को सम्बन्धित पालिकाया क्वारेन्टाइनय् च्वना च्वपि व दक्को सम्बन्धित जिल्लाया आइसोलेसन कक्षय् यंकेगु तयारी जूया च्वगु धका निर्देशनालयय् धाःगु दु ।
गण्डकी प्रदेशय् कोरोना संक्रमितपि ३४८म्ह थ्यःगु दु नाप २२म्ह छेँय् लिहा वने धुकुगु दु । गण्डकी प्रदेशय् मुस्ताङ दक्को जिल्लाय् कोरोना भाइरस संक्रमण खने दये धुकुगु दु ।
येँ महानगरं ल्याय्म्ह तयेगु लागि बिशेष ब्यवस्था याइगु
नृपेन्द्रलाल श्रेष्ठ | तछलागा द्धादशी ११४०,असार ४ बिहीवाः
येँ महानगरपालिकाया मेयर बिद्यासुन्दर शाक्यं आर्थिक वर्ष २०७७÷०७८ या नीति तथा कार्यक्रमय् ‘युवाको जाँगर, समृद्ध महानगर’ ज्याझ्वः न हयादिगु दु ।
येँ महानगरपालिकां ‘युवाको जाँगर, समृद्ध महानगर’ अभियान अनुरुप युवाशक्ति परिचालनया नीति अबलम्बन यायेगु व थुकिया लागि युवा तयेत अर्थपूर्ण सहभागिता व सहकार्यय् जोड बिइगु नीति महानगरपालिका कयाःगु दु धका येँ महानगरया मेयर शाक्यं धयादिगु दु ।
‘कासाया माध्यमं ल्याय्म्ह तयेगु ब्यक्तित्व विकास यायेत महानगर क्षेत्रय् शारीरिक व्यायामशाला, हेल्थ क्लब, रंगशाला÷कबर्डहल व बहुउद्देश्यीय खेल मैदानया विकास व विस्तार यायेगु नीति तथा कार्यक्रमय् धाःगु दु,’ ‘ल्याय्म्ह तयेत कुलत व दुव्र्यसनपाखे बचे यायेत सचेतना मूलक, रोकथाम मूलक व उपचारात्मक ज्याझ्वः न्ह्याकेगु धका धयादिगु दु । ल्याय्म्ह तयेगु
ग्वाहालि पुचःया सूची तयार याना प्रत्येक वडाय् युवासँग मेयर कार्यक्रम सञ्चालन यायेगु धका येँ महानगरया मेयर शाक्य धयादिगु दु ।’
मेड इन काठमाडौं अभियान सञ्चालन
मेयर बिद्यासुन्दर शाक्यं येँ महानगरपालिका दुने थीथी थासय् नेपाली बस्तु बजारय् कोशेली छेँय् वा यस्तै प्रकृतिया मेमेगु बजार विस्तार यायेगु नीति हःगु दु । मरु त्वाःया सिंहसत्तलय् गैर सरकारी संस्था नाप सहकार्यय् निर्यात प्रबद्र्धन केन्द्रया रुपय् विकास याना मेड इन काठमाडौं अभियान सञ्चालन यायेगुु महानगरपालिकाया नीति दु धका धयादिगु दु । ‘ल्याय्म्ह तयेगु न्हुगु बिचाः व प्रविधि नाप आकर्षणयात ध्यानय् तया काठमाडौं हब (K-Hub) या स्थापना यायेगु नीति काःगु दु,’ नीति तथा कार्यक्रमय्,’ ‘स्टार्टअपया माध्यमपाखे उद्यमी जुए न्ह्याम्ह ल्याय्म्हपि उत्पादन डिजाइन, प्रविधि, बजार, वित्त ब्यबस्था, कानुन आदिया परामर्श छगु थासय् उपलब्ध यायेगु ब्यवस्था याःगु दु ।’
नेपालय् संक्रमितपि ७८४८म्ह थ्यन
लहनान्युज | तछलागा द्धादशी ११४०,असार ४ बिहीवाः
नेपालय् वःगु २४ घण्टाया दुने थप ६७१म्हेसित कोरोना भाइरस (कोभिड(१९) या संक्रमण पुष्टि जूगु दु । थ्व नाप संक्रमितपि आः ७८४८म्ह थ्यःगु दु ।
उपि मध्ये २२म्ह सी धुकुग दु । अथेहे, ११८६म्ह डिस्चार्ज जुइ धुकुगु दु ।
स्वास्थ्य तथा जनसंख्या मन्त्रालयया कथं ख्वपय् स्वम्ह, येँ निम्ह व यलय् छम्हेसित कोरोना भाइरसया पुष्टि जूगु दु ।
थौं थपे जूपि अर्घाखाँचीइ ९७म्ह, डडेलधुराय् ८४म्ह, दैलेखय् ९४म्ह, अछामय् ४४म्ह, बाजुराय् ४१म्ह, कैलालीइ ४२म्ह, रोल्पाय् ३५म्ह, सुर्खेतय् ३४म्ह, नवलपुरय् ३२म्ह, धनुषाय् २९म्ह,
बैतडीइ २५म्ह, कपिलवस्तुइ १७म्ह, रुपन्देहीइ १२म्ह व गोरखाय् ११म्हेसित संक्रमण पुष्टि जूगु दु ।
अथेतु स्याङ्जाय् ९म्ह, पाल्पाय् ६म्ह, तनहुँ व पर्वतय् न्याम्ह न्याम्ह, पर्वत व दाङय् प्यम्ह प्यम्ह, बाँके, बर्दिया व गुल्मीइ स्वम्ह स्वम्ह, नुवाकोट, बझाङ, कञ्चनपुर, झापा व सर्लाहीइ निम्ह निम्हनाप मोरङ, नवलपरासी, महोत्तरी, सिन्धुपाल्चोक, सिन्धुली, चितवन, बाग्लुङ, व मनाङय् छम्ह छम्हेसित संक्रमण पुष्टि जूगु खः ।
काष्ठमण्डप पुनःनिर्माण आर्थिक दँया दुने सम्पन्न जुइ
नृपेन्द्रलाल श्रेष्ठ | तछलागा द्धादशी ११४०,असार ४ बिहीवाः
येँ महानगरपालिकां आर्थिक वर्ष २०७७÷०७८ या नीति तथा कार्यक्रम येँ महानगरपालिकाया मेयर बिद्यासुन्दर शाक्यं सार्वजनिक यानादिगु दु । येँ महानगरया मेयर शाक्यं थुगु आर्थिक वर्ष ७७÷०७८ या दुने काष्ठमण्डप पुनःनिर्माण ज्या क्वचाइ धका धयादिगु दु ।
येँ महानगरया मेयर शाक्यं नीति तथा कार्यक्रम कथं हनुमानढोका दरबार क्षेत्र दुने महादेव पार्वती मन्दिर तथा कुमारी छेँ जीर्णोद्वार न थुगु दँय् दुने यायेगु धका धयादिगु दु । येँया दुने याःगु सम्पदा रुपं म्हसिया वयाच्वंगु बागमती, विष्णुमती, धोबीखोला, सामाखुशी, ईच्छुमती, मनोहरा लगायतया खुसि अतिक्रमण मुक्त याना सफा व सुन्दर दयेकेगु जुइ धका धयादिगु दु ।
येँं महानगरपालिका दुने खुसीयात सरसफाई व संरक्षणय् उचित व्यवस्था याना खुसीयात मानव सभ्यता व सौन्दर्यता नाप आबद्ध यायेगु धका निति तथा कार्यक्रमय् दुथ्याकुग दु । त्रिपुरेश्वर निसे टेकु तक वागमती सिथय् श्री हुतराम बैद्य स्मृति पैदलमार्गया रुपय् विकास यायेगु निति हःगु दु । अथेहे पचलीया कालोपुल निसे टेकु दोभान तक खुसी सिथय् श्री भगवानदास मानन्धर स्मृति स्थलया रुपय् विकास यायेगु धका धयादिगु दु ।
येँ महानगरपालिका दुने दुगु विश्व सम्पदा सूचीइ सूचीकृत सम्पदा स्वयम्भु व बौद्धया व्यवस्थापन येँं महानगरपालिका अन्तर्गत हयेगु पहल यायेगु, हनुमानढोका दुने कोत क्षेत्रय् गुरुयोजना 
दयेका कार्यान्वयन यायेगु महानगरपालिकाया नीति दुगु धका येँ महानगरया मेयर शाक्यं धयादिगु खः ।
सम्पदा क्षेत्रय् पर्यटकीय हबया रुपं विकास यायेगु
येँ महानगरया मेयर शाक्यं नीति तथा कार्यक्रमय् हनुमानढोका दरबार क्षेत्र, स्वयम्भू, बौद्ध व पशुपति क्षेत्रय् पर्यटकीय हबया रुपय् विकास यायेगु विशेष ज्याझ्वः हःगु दु, कोभिड–१९ पाखे दकलय् अप्व प्रभावित पर्यटन व्यवसाययात न्हापागु अवस्थाय् हयेत संस्कृति पर्यटन तथा नागरिक उड्डयन मन्त्रालय, नेपाल पर्यटन बोर्ड, नेपाल होटल संघ, रेष्टुरेण्ट तथा बार संघ तथा मेमेगु सम्बन्धित सरकारी तथा गैर सरकारी संस्था नाप सहकार्य याना, स्वनिगः दुने थीथी पर्यटकीय थाय् स्वायेगु विद्युतीय ‘हप अन हप अफ’ बस सञ्चालन यायेगु नीति हयागु दु धका धयादिगु दु ।
