Display Style:
Column Style
लकडाउनय् येँ महानगरया विकास निर्माण ज्या जारी
लहनान्युज | तछलाथ्व त्रयोदशी ११४०,जेठ २२ बिहीवाः
लकडाउनया इलय् नं येँ महानगरपालिकां विकास निर्माण व पूर्वाधारया ज्यायात न्ह्याका वयाच्वंगु दु । येँ महानगरपालिकाया शहरी पूर्वाधार विभागया प्रमुख राम थापां लकडाउनया इलय्
नं भौतिक पूर्वाधारया ज्या न्ह्यानाच्वंगु खँ कनादीगु दु ।
येँ महानगरं ‘छुं न्हि न्ह्यव वडा नं. ८ य् जयबागेश्वरीइ सरे याये मिले जूगु आकाशे ताँया शिलान्यास जुल’ वय्कलं कनादील, ‘ अथेहे माइतीघर लिक्कसं स्वास्थ्य तथा जनसंख्या मन्त्रालयया लिक्कसं लाःगु आकाशे तां दयेके क्वचायेत्यंगु दु । आः असार मसान्त तकया दुने दयेके क्वचायेकेगु तयारी दु ।’ धका धयादिगु खः ।
विभागया प्रमुख थापां जयबागेश्वरीया ताँ लकडाउनया इलय् नं दयेके ज्या न्ह्याकेगु व मोहनि तकया दुने दयेके क्वचायेकेगु लक्ष्य दुगु खँ नं कनादीसे वय्कलं आर्थिक दँया दुने खु थाय् सरे याये मिले जूगु ताँ दयेकेगु योजना कथं चाःबही, जयबागेश्वरी व माइतीघरय् दयेके ज्या न्ह्याकागु खँ कनादीगु दु ।
‘थ्व हे दँय् न्हू वानेश्वर व कोटेश्वरय् नं थज्याःगु हे ताँ दयेकेगु क्वःछिनागु खःसां थन सडक विभागं हे ताँ दयेकेगु धाःगुलिं आः मेगु हे थाय् ल्ययेगु ज्या जूगु दु’ वय्कलं धयादीगु दु । वय्कलं महानगरपालिकां झीं थाय् थज्याःगु ताँ दयेकेगु योजना दयेकातःगु दु धका धयादीगु दु ।
अथेहेतु, लकडाउनया इलय् वडा नं. ७, १०, ११, १२, १३, १४ व १६ य् थीथी लँय् पिच यायेगु, ब्लक छापे यायेगु बाहेक ढलान यायेगु, ढः दयेकेगु, वडा भवन दयेकेगु ज्या जुयाच्वंगु जानकारी नं विभागया प्रमुख थापां बियादीगु दु । पिच यायेगु निंतिं श्रमिकत तराईपाखें वयेमाःगु जूगुलि. थ्व ज्या धाःसा न्ह्याकेमफुगु खँ नं वय्कलं धयादीगु दु ।
नाप तु, येँ महानगरपालिकां जीवन निर्वाहया निंतिं पारिश्रमिक कार्यविधि २०७७ नं जारी याःगु दु । लकडाउनया अवस्था ताःहाकः जुयावन धाःसा श्रमया आधारय् पारिश्रमिक व्यवस्था यायेत कार्यविधि हे जारी यानाः महानगरपालिकां अज्याःपिं श्रमिकतय्त सार्वजनिक पूर्वाधार विकास, सार्वजनिक पूर्वाधार मर्मत सम्हार, धः दयेकेगु, फुटपाथ व्यवस्थापन यायेगु, सम्पदा संरक्षण व सौन्दर्यकरण, फोहरमैला व्यवस्थापनया ज्याय् लगे यायेगु तयारी यानाच्वंगु खँ नं विभागया प्रमुख थापां धयादीगु दु ।
थप ३३४म्हेसित कोरोना, संक्रमितत २६३४म्ह थ्यन
लहनान्युज | तछलाथ्व त्रयोदशी ११४०,जेठ २२ बिहीवाः
नेपालय् थौं थप ३३४म्हेसित कोरोना भाइरसया संक्रमण खने दुगु दु ।
स्वास्थ्य तथा जनसंख्या मन्त्रालयं कथं थप ३३४म्ह संक्रमण जूगु पुष्टि याःगु दु ।
येँया राष्ट्रिय जनस्वास्थ्य प्रयोगशालाय् याःगु परीक्षणय् बा्राय् ५म्ह, धनुषाय् ६म्ह, कपिलवस्तुय् १२म्ह, महोत्तरीय् ३ म्ह, रौतहटय ६४म्ह व सर्लाहीय् ३म्ह नापं ९३म्हेसित संक्रमण खनेदुगु खः ।
अथेहे देय् यकं थीथी जिल्लाया प्रयोगशालाय् याःगु परीक्षणय् थप २४१म्हेसित संक्रमण नेदुगु दु ।
थ्व नापं आतक नेपालय् संक्रमितपिनिगु ल्याः २६३४म्ह थ्यंगु दु । उकी मध्ये २४५०म्ह मिजंपि व १८४म्ह मिसापि जुगु दु ।
बांगेमुढाय् हिदान ज्याझ्वः जुल
लहनान्युज | तछलाथ्व त्रयोदशी ११४०,जेठ २२ बिहीवाः
लकडाउन जुया च्वंगु यलय् न येँया बांगेमुढाय् नारायण मन्दिर टोल सुधार समाजया ग्वसालय् हिदान ज्याझ्वः जूगु दु ।
थौं कन्ह्य लकडाउनया इलय् ल्वगिपिन्त हिं या अभाव मजुइमा धैगु उदेश्य हिदान ज्याझ्वः जूगु खः ।
उगु ज्याझ्वः ब्लड डोनर्स एशोसिएसन नेपाल (ब्लोदान)या ग्वाहालिं जूगु खः । उगु हिदान ज्याझ्वलय् ब्लोडानया केन्द्रीय नायः सानुबाबु प्रजापतिया विशेष उपस्थिति दूगु खः ।
उगु हिदान ज्याझ्वलय् ब्लोडानया दांभरी मचाकाजी महर्जन, केन्द्रीय दुजःलिसें येँ महानगरपालिका २४ वडाया वडा दुजः विनोद तुलाधर, पुरुषोत्तम खत्रीलिसे ब्लोडानया सल्लाहकार राजेन्द्र श्रेष्ठपिनिगु उपस्थिति दूगु खः । नेपाल रेडक्रस सोसाइटी २५ वडा, येँ मनपा २५ वडाया वडा दुजः राजेश लिसें बुद्धिजीवि व स्थानीय बासिन्दापिनिगु नं उपस्थिति दूगु खः ।
गण्डकी प्रदेशय् १६म्ह कोरोना सङ्क्रमित थपे जुल
लहनान्युज | तछलाथ्व त्रयोदशी ११४०,जेठ २२ बिहीवाः
गण्डकी प्रदेशय् १६ म्ह कोरोना सङ्क्रमित थपे जुगु दु ।
पोखरा स्वास्थ्य विज्ञान प्रतिष्ठनय् याःगु परीक्षणय् थप १६ म्ह सङ्क्रमण पुष्टि जुगु धका प्रदेश स्वास्थ्य निर्देशनालयं धाःगु दु ।
न्हुपि थपे जुपि स्याङ्जाया कालिगण्डकी गाउँपालिका छेँय् दुपि गाउँपालिकाया हे क्वरेन्टीनय् च्वना च्वपि १६ म्ह कोरोना सङ्क्रमित थपे जुगु खः ।
कञ्चनपुरय् छम्ह स्वास्थ्यकःमियात कोरोना पुष्टि
लहनान्युज | तछलाथ्व त्रयोदशी ११४०,जेठ २२ बिहीवाः
कञ्चनपुरय् छम्ह स्वास्थ्यकःमियात न कोरोना संक्रमण पुष्टि जुगु दु ।
उम्ह कञ्चनपुरयाम्ह स्वास्थ्यकःमि भारतं वःपि नेपाली तयेत स्वास्थ्य परीक्षण यायेगु लागि कञ्चनपुरया गौरिफन्टा नाकाय् खटे जुया च्वम्हेसित संक्रमण खने दुगु खः ।
संक्रमण पुष्टि जुगुलि वयात सेती प्रादेशिक अस्पतालया आइसोलेसनय् तया तःगु दु । वयाःगु स्वास्थ्य सामान्य जुगु व कोरोना संक्रमणया छु न लक्षण खने मदुगु धका धाःगु दु ।
उम्ह स्वास्थ्यकःमि स्वगू तहया सरकार दथुइ ज्या यायेगु तालमेल मिले मजुया व विश्व स्वास्थ्य संगठनया मापदण्ड विपरीत ज्या याये माला स्वास्थ्यकःमिपिं जोखिम दुगु धका धाःगु दु ।
पीपीई लगायतया सुरक्षा सामग्री अभावं ज्या याये माःगु स्वास्थ्यकःमिपिं जोखिम दुगु खँ न्ह्य थःनादिगु खः ।
