Display Style:
Column Style
किपू नगरपालिकाया न्हय्क्वःगु नगरसभा क्वचाल
नृपेन्द्रलाल श्रेष्ठ | दिल्लागा द्धादशी ११४०,श्रावण २ शुक्रवाः
किपू नगरपालिकाया मेयर रमेश महर्जन व उप मेयर सरस्वति खड्कां मंकाः कथं न्ह्यक्वःगु नगरसभाय् त्वाःदेवाय् मत च्याकाः उलेज्या यानादीगु दु ।
उगु नगरसभाया न्हापांगु चरणय् नीति तथा कार्यक्रम व अनुमानित बजेट न्ह्यब्वःगु खः । निगुलिं प्रस्तावयात कयाः वंगु असार १७ गते च्वंगु नगरसभाया निक्वःगु बैठकय् सहलह यानाः सर्वसम्मतिं पारित याः । उगु सभा असार २५ गते बजेट पारित यानाः नगरसभा क्वचायेके माःगु खःसां सभा स्थगित जूगुलिं असार ३१ गते बैठक च्वनाः सिधयेकूगु खः ।
किपू नगरपालिकाया मेयर महर्जनया सभाध्यक्षताय् जूगु बैठकय् उपमेयर खड्कां आर्थिक दँ ०७७÷७८या निंतिं बजेट न्ह्यब्वयादीगु खः । नगरपालिकां चालु आर्थिक दँया निंतिं चालुपाखे ४८ गू करोड २५ गू लाख झिंन्याद्वः व पूँजीगतपाखे ५५ गू करोड १९ गू लाख ग्वीगु द्वः व नगर दुनेया झिगू वडापाखें ११ गू करोड यानाः मुक्कं १ गू अर्ब १४ गू करोड ४५ गू लाख झिंप्यद्वःया बजेट न्ह्यब्वःगु खः ।
प्रस्तुत बजेटय् दक्वं वडाया वडाअध्यक्षं ब्वति कायेगु झ्वलय् थःथःगु धारणालिसें वडाया बजेट नं न्ह्यब्वःगु खः । उपमेयर खड्कां बजेट सहलहया नितिं न्ह्यब्वगु खः । सहलहलिपा सर्वसम्मतिं पारित जूगु सभाध्यक्षलिसें मेयर महर्जनं घोषणा यानादीगु खः । नगरपालिकाया प्रमुख प्रशासकीय अधिकृत ध्रुवराज आचार्यं चालु आर्थिक दँया निंतिं थीथी प्रस्ताव न्ह्यब्वयादीगु खः ।
नगरसभापाखें न्हापा हे पारित जुइ धुंकूगु कर्मचारीतय् तह मिलान कार्यान्वयन मजूगु खँय् अप्वःथे वडाअध्यक्षपिंसं असन्तुष्टि प्वंकुसे उकियात तत्काल कार्यान्वयन यायेत नं सभाय् माग याःगु खः । वडाअध्यक्षपिन्स असन्तुष्टियात संबोधन यायेगु झ्वलय् सभाअध्यक्षलिसें मेयर महर्जनं कर्मचारीपिनिगु तह मिलान सम्बन्धय् नगरसभां न्हापा हे निर्णय याःगु खःसां नं प्रदेश सरकारं कानुन दयेकेगु धाःगुलिं छुं भचा लिपा लाःगु जानकारी बियादीगु खः ।
मेयर महर्जनं बियादीगु जानकारी बिउवं उपमेयर खड्कां वडाअध्यक्षपिनिगु मागयात संबोधन यासें न्यादँतक सेवा यायेधुंकूपिं कर्मचारीतय् १ तह मिलान यायेगु घोषणा सभाय् यानादीगु खः ।
थौं १०१म्हसित कोरोना संक्रमण
लहनान्युज | दिल्लागा द्धादशी ११४०,श्रावण २ शुक्रवाः
थौ शुक्रवाः नेपालय् १०१म्हेसित कोरोना संक्रमण जूगु दु । स्वास्थ्य तथा जनसंख्या मन्त्रालयया कथं कोरोना संक्रमितपि आः १७ द्धः व ४४५म्ह थ्यःगु दु ।
शुक्रवाः ४ द्धः व ६८८म्हेसिगु आरटी पीसीआर विधिपाखे परीक्षण याःगु खः ।
उकि मध्ये २८५म्ह डिस्चार्ज जुुइ धुकुगु दु । आःतक ११द्धः व ५३४म्ह डिस्चार्ज जुइ धुकुगु दु धका मन्त्रालयया प्रवक्ता डा. जागेश्वर गौतमले जानकारी बिःगु दु ।
५८७१म्ह संक्रमित आइसोलेसनय् वासः याका च्वंगु दु सा क्वारेन्टिनय् २२७५६म्ह च्वना च्वंगु दु ।
गण्डकीइ थप २५म्हेसित कोरोना संक्रमण
लहनान्युज | दिल्लागा द्धादशी ११४०,श्रावण २ शुक्रवाः
गण्डकी प्रदेशय् २५म्हेसित कोरोना भाइरस (कोभिड(१९) या संक्रमित जूगु दु ।
क्षयरोग केन्द्र पोखरा व प्रदेश जनस्वास्थ्य प्रयोगशाला हेटौंडाय् याःगु परीक्षणय् थप २५म्हेसित कोरोना संक्रमण पुष्टि जूगु दु ।
थ्व नाप गण्डकीइ संक्रमितपिनिगु ल्याः १२५६म्ह थ्यःगु दु ।
गण्डकी प्रदेशय् स्वास्थ्य निर्देशनालयया कथं संक्रमितपि मध्ये नवलपरासी पूर्वया गैंडाकोट नगरपालिकाया १८म्ह मिजं व तनहुया व्यासया स्वम्ह, म्याग्दे व भानु च्वपि निम्ह निम्ह याना न्ह्यम्हेसित पुष्टि जूगु खः ।
थौं लुँ तोला न्यासः कुहा वल
लहनान्युज | दिल्लागा द्धादशी ११४०,श्रावण २ शुक्रवाः
लुँ वहःया भाः क्वहाः वःगु दु ।
लुँ भाः तोलाय् थौं न्यासः क्वहाः वया ९२ द्धःव निसः न कारोवार जुगु दु धका नेपाल सुनचाँदी व्यवसायी महासंघं धाःगु दु ।
अन्तर्राष्ट्रिय बजारय् लुँया भाः १२ डलर कुहा वःगु खः । अन्तर्राष्ट्रिय बजारय् कुहा वःगुलि नेपालय् न भाः कुहा वःगु खः ।
म्हिगः तोलाय् छगू तोलाया ९२ द्धः व न्ह्यसः न कारोबार जूगु खः ।
अथेहे वहः तोलां न झीतका कुहा वःगु दु । छगू तोला वहः ९९५ तका कारोवार जूगु दु धका महासंघं धाःगु दु ।
धरानय् कोरोना संक्रमित छम्ह मन्त
लहनान्युज | दिल्लागा द्धादशी ११४०,श्रावण २ शुक्रवाः
कोरोना संक्रमणया कारण बीपी कोइराला स्वास्थ्य विज्ञान प्रतिष्ठान धरानय् वासः याका वयाच्वम्ह छम्ह मन्त । सप्तरी राजविराज नगरपालिका–१ छेँ दुम्ह उम्ह मनू ७३ दँयाम्ह खः ।
प्रदेश १ या कोरोना संक्रमितम्ह सीगु थ्व हे न्हापागु घटना खः । थ्व नाप देय् यकं कोरोनां सीपिनिगु ल्याः ४०म्ह थ्यःगु दु ।
बीपी कोइराला स्वास्थ्य विज्ञान प्रतिष्ठान धरानया प्रवक्ताया कथं उम्ह मनू बुधवाः अस्पताल भर्ना जूगु खः ।
चिनी, पेसर व मुटु ल्वय या लागि वासः यायेत वम्हेसित बुधवाः स्वाब संकलन याय्गु खः ।
बिहीवाः वयात कोरोना पोजेटिभ रिपोर्ट वये वः आइसोलेसनय् भर्ना याःगु खः । आइसोलेसनय् वास यायेगु झुवलय् बिहीवाः मदुगु धका प्रवक्तां धाःगु दु ।
