Display Style:
Column Style
पशुपति स्थानीयपिन्स विरोध प्रदर्शन यात
लहानान्युज | अनलागा ३ ११४०,असोज १९ सोमवाः
पशुपति क्षेत्र विकास कोषं तयार याःगु गुरुयोजनाया विरोधय् स्थानीयपिन्स प्रदर्शन याःगु दु।
पशुपतिनाथया प्राचीनता न्ह्यके कथंया गुरुयोजना तयार धाःसे सोमवाः स्थानीयपिन्स विरोध प्रदर्शन याःगु खः। पशुपति क्षेत्रया विकासया नामय् परापूर्वनिसे बस्ती न्ह्यकेगु व स्थानीय संस्कृति, जात्राया विनाश यायेगु गुरुयोजना हःगु धका स्थानीय पिन्स आरोप बियावया च्वंगु खः।
पशुपति क्षेत्र संयुक्त संघर्ष समितिया संयोजकया कथं पशुपति क्षेत्र विकास कोषं हःगु गुरुयोजनाया विरुद्धय् आन्दोलन सुरु यानागु धका धाःगु दु। गुरुयोजनां स्थानीय धार्मिक, समाजिक, सांस्कृतिक सम्पदा नष्ट यायेइगु जुगुलि उकिया जगेर्नाया लागि गुरुयोजना खारेज यायेत माग यासे आन्दोलनय् क्वहा वःगु खः।
पशुपति क्षेत्र विकास कोषं पशुपति क्षेत्रया प्यंगु किल्लाया दुने च्वपिनिगु पुलागु बस्तीयात विस्थापित यायेत व जात्रा पर्व विनाश यासे व्यापारीकरण याये त्यःगु धका धाःगु दु।
कोषं २०५२ सालय् तयार याःगु न्हापागु गुरुयोजना २०५६ सालय् स्वीकृत याःगु खःसा २०५८ सालनिसे लागू जूगु खः। पुलागु योजनाया समीक्षा मयासे न्हुगु गुरुयोजना तयार याःगुलि विरोध याये माःगु खः धका स्थानीयपिन्स धया वयाच्वंगु खः।
महालक्ष्मीया मेयर रामेश्वर श्रेष्ठ सक्रमणमुक्त
लहानान्युज | अनलागा ३ ११४०,असोज १९ सोमवाः
महालक्ष्मीया नगरपालिकाया मेयर रामेश्वर श्रेष्ठ थौं कोरोना सक्रमणमुक्त जूगु दु।
सक्रमण जुगु २२ दिं लिपा मेयर श्रेष्ठ व १९ दि लिपा वयकया तिरिमय्जु अन्जिका श्रेष्ठ कोरोना भाइरस संक्रमणमुक्त जुगु दु।
मेयर श्रेष्ठया संक्रमित जुइ इलय् थःगु स्वास्थ्यय् निरन्तर वासः यापि चिकित्सकपिन्त नाप हेरचाह यायेगुलि संलग्न किस्ट शिक्षण अस्पतालया चिकित्सकपिन्त सुभाय् देछानादिगु दु।
अथेहे भिं उसाँय् या कामना यानादिपिन्त सकसित सुभाय् देछानादिगु दु।
लुँया भाः तोलां प्यसः क्वहावल
शोभा श्रेष्ठ | अनलागा ३ ११४०, असोज १९ सोमवाः
नेपाली बजारय् थौं सोमः लुँया भाः क्वहा वःगु दु।
म्हिगः तोलां ९४ हजार ५ सय न कारोबार जूगु छापावाल लुँ थौं ९४ हजार १ सय रुयैयाँ कायम जुगु दु धका नेपाल सुनचाँदी व्यवसायी महासंघं जानकारी बिःगु दु।
अथेहे तेजाबी लुँ न प्यसः क्वहा वया तोलां ९३ हजार ६ सय रुपैयाँ कायम जुगु धका धाःगु दु।
थौं वहःया भाः धाःसा तोला ११८० रुपैयाँ जुया स्थिर हे जुगु दु।
ज्यापु समाज यलया नीन्हय्क्वःगु दँमुँज्या क्वचाल
सुरेन्द्रभक्त श्रेष्ठ | अनलागा ३ ११४०,असोज १९ सोमवाः
ज्यापु समाज यलया नीन्हय्क्वःगु दँमुँज्याया उलेज्या छगू ज्याझ्वःया दथुइ संघीय सांसद कृष्णलाल महर्जनं यानादिल।
समाजया नायः चन्द्र महर्जनया सभाध्यक्षताय् जूगु उगु ज्याझ्वलय् रामकाजी अवाले नं झायादीगु खः।
समाजया छ्याञ्जे सरिता महर्जनं न्ह्याकादीगु उगु ज्याझ्वलय् बरिष्ठ न्वकू सन्तमान महर्जनं लसकुस यानादीगु खः।
नीति व कार्यक्रम पूवंकेगु प्रतिबद्धता
सुरेन्द्रभक्त श्रेष्ठ | अनलागा ३ ११४०,असोज १९ सोमवाः
किपू नगरपालिकाया ग्वसालय् नियमित पत्रकार सम्मेलनय् नगरपालिकाया नीति व कार्यक्रम सार्वजनिक याःगु दु।
किपू नगरपालिकाया न्हय्क्वःगु नगरसभां पारित याःगु नगरपालिकाया नीति व कार्यक्रम सार्वजनिक ज्याझ्वलय् प्रमुख प्रशासकीय अधिकृत सीता परियारं स्थानीय संचारमाध्यमं स्थानीय सरकारया सकतां ज्याझ्वःया गतिविधिया मू संवाहकया रुपं ज्या याइगु जूगुलिं स्थानीय सरकारया नितिं स्थानीय मिडिया नुगःचु जूगु बिचाः तयादीगु खः।
अथेहे, स्वास्थ्य शाखा प्रमुख सन्तमान मानन्धरं आःया कोरोना भाइरस सम्बन्धी किपूया गतिविधियात नगरपालिकाया ख्वाःपौ नगर सन्देशलिसें नगरपालिकाया वेभसाइटपाखें तथ्यांक सम्प्रेषण यानाच्वनागु जानकारी बियादिल।
सार्वजनिक जूगु नीति व कार्यक्रमय् कोभिड–१९पाखें ब्वलंगु संकट व्यवस्थापन सम्बन्धी क्षेत्रगत नीति दुने क्वारेन्टाइन सम्बन्धी व्यवस्था, पीसीआर परीक्षण प्रयोगशालाया व्यवस्थालिसें
पीसीआरया नितिं माःगु जनशक्ति व्यवस्थापनयात प्राथमिकता बियातःगु दुसा सामाजिक क्षेत्रलिसे स्वास्थ्य, खानेपानी, शिक्षा, सरसफाई व पूर्वाधारयात बः बियातःगु दु।
वंगु २०७७ असार १७ गते किपू नगरपालिकाया न्हय्क्वःगु नगरसभां पारित याःगु नीति व कार्यक्रम वंगु शुक्रवाः नगरपालिकाया न्हूगु भवनया हलय् कोरोना महामारीया हुनिं स्थगित जुयाच्वंगु नियमित पत्रकार भेटघाट ज्याझ्वः यानाः सार्वजनिक याःगु खः।
