Display Style:
Column Style
महानगरपालिकां सम्पदाया संरक्षण प्राथमिकताय् तया ज्या याइगु
नृपेन्द्रलाल श्रेष्ठ | दिल्लागा दशमी ११४०,असार ३१ बुधवाः
येँ महानगरपालिकां ऐतिहासिक व वातावरणीय दृष्टिं महत्वपूर्ण पुखू, देगः, ल्वःहँहिति, बहाःबही लिसे सांस्कृतिक सम्पदाया संरक्षण व सम्बर्द्धनयात प्राथमिकताय् तया ज्या याना वयाच्वंगू दु ।
कला संस्कृति व सम्पदाया संरक्षण व सम्बद्र्धधनय् येँ महानगरपालिका जनप्रतिनिधि दथुइ नं छगूमतं महानगरपालिकाया आर्थिक दँ २०७७ व ०७८ या बजेटय् ९० गू शीर्षकय् सम्पदा निर्माण व पुनःनिर्माण यायेगु लागि बजेट विनियोजन याःगु दु । महानगरपालिकां कला संस्कृति व सम्पदाया संरक्षण व सम्बद्र्धन शीर्षकया योजना २० लखनिसें २ करोड तकया छुटे याःगु दु ।
७२ सालया तःभुखाचं पूर्णरुपं क्षतिग्रस्त येँ महानगरपालिकाया वडा न. २२ य् च्वंगु नासःद्यःया द्यःछेँ पुनःनिर्माणया नितिं नं येँ महानगरपालिकां आर्थिक ग्वाहालि यायेगु प्रतिबद्धता प्वंकूगु दु । नासःद्यःया द्यःछेँ पुनःनिर्माणया नितिं छुं दिं न्ह्यः याःगु क्षमापूजा ज्याझ्वलय् येँ महानगरपालिकाया मेयर विद्यासुन्दर शाक्य व उपमेयर हरिप्रभा खड्गी श्रेष्ठ निम्हं उपस्थित जूगु खः ।
इलय् ब्यलय् येँ महानगरपालिकाया जनप्रतिनिधि दथुया विवादया हुनिं सम्पदा पुनःनिर्माण लिसेंया ज्यां गति काये मफयाच्वंगु धैगु द्वपं जनप्रतिनिधिपिन्सं फयाः वयाच्वंगु दु । तर, क्षमापूजाय् सहभागी येँ मनपाया उपमेयर हरिप्रभा खड्गी श्रेष्ठं महानगरपालिकाय् जनप्रतिनिधि निर्वाचित जुयाः वयेधुंकाः कला संस्कृति व सम्पदाया संरक्षण लिसें सम्बद्र्धनय् अतिकं महत्वं जाःगु भूमिका म्हिताः वयाच्वंगु धासें मेयर शाक्ययाःगु प्रशंसा याःगु दु ।
मेयर शाक्ययात संकेत यासें उपमेयर खड्गीं धाःगु दु, येँ महानगरपालिकाय् जनप्रतिनिधि निर्वाचित जुयाः वयेधुंकाः थनया कला संस्कृति व सम्पदा संरक्षण नितिं अतिकं तःधंगु भूमिका म्हिताः वयाच्वनागु दु । येँ महानगरपालिकाया मेयर, जि नाप फुक्क वडाया जनप्रतिनिधि नं सम्पदा संरक्षणया अभियानय् अहोरात्र खटेजुयाच्वंगु दु धका धयादिगु खः ।
१ करोड २५ लखय् पुनःनिर्माण जुयाः वतुया नाट्यश्वर देगः द्यःछेँ पूर्णरुपं क्षति जुइ धुंकाः वतु नाट्यश्वर गुथिं काम चलाऊ रुपं पुनःनिर्माण यानाः पूजाआजा यानाः वयाच्वंगु खः । क्षतिग्रस्त अवस्थाया देगःयात पुनःनिर्माण यायेत अन दूगु सामान मेथाय् तयेमाःगु व द्यःछेँ तकं पिइमाःगु जूगुलिं उकिया नितिं क्षमापूजा यायेमाःगु परम्परा कथं उगु पूजा यानाः पुनःनिर्माणया ज्या न्ह्यःने यंकूगु वतु गुथिया नायः शान्तराज महर्जनं जानकारी ब्यूगु दु ।
पुरातात्विक व अभिलेखया संरक्षण यायेगु ज्या नाट्यश्वर गुथिं यानाः वयाच्वंगु दु । गुथिया नायः महर्जनं धाःगु दु, येँ महानगरपालिकां थ्व देगःया पुनःनिर्माणया नितिं तुइगु सकतां आर्थिक ग्वाहालि यायेगु प्रतिबद्धता प्वंकूगु दु । महानगरपालिकाया मेयर विद्यासुन्दर शाक्यं गुथिं संरक्षण यानाच्वंगु गुथिछेँय् च्वंगु पुरातात्विक महत्वया व अभिलेखया संरक्षण यायेत जिमित आग्रह याःगु दु ।
निर्माण ज्याया सकतां खर्च महानगरपालिकां ब्यहोरे यायेगु प्रतिबद्धता प्वंकूगु नं महर्जन जानकारी बिसें साउनया निगूगु वाःनिसें देगः पुनःनिर्माणया ज्या न्ह्यःने वनी धकाः जानकारी ब्यूगु दु । महर्जनं धाःगु दु, निर्माण लिपा अन मत, हिति व पुरातात्विक महत्वयात न्ह्यब्वइगु हलंज्वलंया खर्च गुथिं ब्यहोरे याइ ।
क्षमापूजा ज्याझ्वलय् येँ महानगरपालिकाया मेयर शाक्य, संघीय सांसद कृष्णगोपाल श्रेष्ठ, प्रदेश सांसद डा. अजयक्रान्ति शाक्य, येँमनपाया उपमेयर हरिप्रभा खड्गी श्रेष्ठ, वडाध्यक्ष चिनकाजी महर्जन, गुथिया दुजः लिसेलिसेंया व्यक्तिपिनिगु उपस्थिति दूगु खः ।
देगः वइगु आर्थिक दँया असोज मसान्ततकया दुने पुनःनिर्माण क्वचायेकेगु आज्जु काःगु दु । नासःद्यः पुनःनिर्माणया नितिं थ्यंमथ्यं १ करोड २५ लख तका दां तुइगु अनुमान याःगु दु ।
चालू आर्थिक दँय् निर्माण व पुनःनिर्माण ज्याय् येँ महानगरपालिकां आर्थिक दँ २०७६ व ०७७ य् कीर्तिपुण्य महाविहार दुगुद्यः, दुर्गाविनारयक देगः, मुगःद्यः, वलाछेँ त्वाःछेँ, स्वयम्भू स्तुप
भजनछेँ लिसेंया पुनःनिर्माण क्वचायेकेधुंकूगु दु ।
अथेहे, सत्यनारायण देगः, लयाश्वर देगः, दीप्याखं द्यःछेँ, कोटेश्वर महादेवस्थानय् भगवती देगः, जनबहाः दिगीछेँ, किलाद्यः त्वाःछेँ, न्हयमू त्वाःछेँ, वतु भद्रकाली देगः, भगवान बहाः, गोरखनाथ देगः परिसर, पंचेधारा निर्माणया ज्यायात नं पूर्णता ब्यूगु दु ।
तेबहालय् च्वंगु क्वाःपाः द्यःछेँ, क्वहिति सतः व बहाः, मणिसंघ महाविहार, परम्परागत लायकुसाः गुथि छेँ, नाट्यश्वरी गुथि छेँ, नित्यनाथ गुथि छेँ आदिया पुनःनिर्माण ज्या न्ह्यःने न्ह्यानाच्वंगु महानगरपालिकां जानकारी ब्यूगु दु ।
परम्परागत बाजा स्यनीपिं गुरुपिन्त सम्मान यायेगु, ऐतिहासिक सोह्रखुट्ट् पाटी पुनःस्थापना यायेगुथें जाःगु ज्या क्वचाइगु चरणय् लानाच्वंगु दु ।
विश्व सम्पदा धलखय् लाःगु लुम्बिनीइ गुरुयोजना अन्तर्गत नेपाल बज्रयान महाविहारय् मौलिक परम्परागत प्रवेशद्वार, झ्याः व टुँडाल निर्माणया नितिं नेपाल परम्परागत बौद्ध धर्म संघयात, धम्महल भवन निर्माणया नितिं अन्तर्राष्ट्रिय बौद्ध भावना केन्द्र बुद्धनगरयात व भवन निर्माणया नितिं बागबजारय् च्वंगु बुद्धविहारयात आर्थिक ग्वाहालि उपलब्ध याकेगुथें जाःगु ज्या नं महानगरं याःगु दु ।
थप ११६म्हेसित कोरोना संक्रमण
लहनान्युज | दिल्लागा दशमी ११४०,असार ३१ बुधवाः
वःगु २४ घण्टाय् थप ११६म्हेसित कोरोना भाइरस (कोभिड–१९) या संक्रमण पुष्टि जूगु दु ।
देय् यकं प्रयोगशलाय् न्याद्धः व ९०म्हसिगु नमुना परीक्षण याःगु इलय् ११६म्हेसित संक्रमण पुष्टि जूगु दु धका धाःगु दु ।
थ्व नाप आः संक्रमितपि १७ द्धः १७७म्ह थ्यःगु दु ।
निजी स्कुलं कन्ह्य साउन १ निसे अनलाइन कक्षा बन्द
लहनान्युज | दिल्लागा दशमी ११४०,असार ३१ बुधवाः
निजी विद्यालयपिन्स कन्ह्य साउन १ निसे अनलाइन कक्षा बन्द यायेगु घोषणा याःगु दु ।
थःपिन्स ल्ह्वःनागु माग सम्बोधन मजूगु धाःसे प्याब्सन व एन–प्याब्सनं बैकल्पिक शिक्षण सयकेगु क्रियाकलाप स्थगन यायेगु व शिक्षकपिन्त नाप कर्मचारीपिन्त बेतलवी घर विदा बिइगु निर्णय यायेगु दु ।
आः भौतिक रुपं स्कूल सञ्चालयया अनुमति लिपा जक स्कूल प्रशासन चायेकेगु धका निगू हे संगठन धाःगु दु ।
नाप शिक्षक व कर्मचारीया तलब लगायतया सुविधा स्कूल सञ्चालन जुलकि आम्दानी सुनिश्चित लिपा जक क्रमशः उपलब्ध यायेगु निजी स्कूल धाःगु दु ।
कोरोनां रौतहतय् छम्ह सीत
दिल्लागा दशमी ११४०,असार ३१ बुधवाः
कोरोना भाइरस संक्रमणया कारण नेपालय् थौं बुधवाः छम्ह सीगु दु ।
रौतहटया पर्रोहा नगरपालिका ७ या ३६ दँ दुम्ह मिजं सीगु धका स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं जानकारी बिःगु दु ।
वया दाजु न भारतय् कोरोनाया कारण सीगु खः ।
वयागु अन्त्येष्टिय् ब्बति कया लिहा वया परिवारया सदस्यपि नाप क्वारेन्टिनय् च्वना च्वपि खः ।
वया झ्वलय् त्यस सेंख चाया, ज्वरो वया सास ल्हायेगु समस्या वःगुलि वःगु असार २९ गते वीरगञ्जया नारायणी अस्पतालय् आईसीयूलय् भर्ना याःगु खः ।
साझां च्याःगु रुटय् २६गः बस चले याइगु
लहनान्युज | दिल्लागा दशमी ११४०,असार ३१ बुधवाः
साझा यातायातं कन्ह्य बिहीवाः निसे थःगु सेवा न्ह्याके त्यःगु दु । साझाया २६गः बसं च्याःगू रुटय् न्ह्याके त्यःगु खः ।
थुगु इलय् सेवायात प्राथमिकता तया पुलागु दक्को हे रुटय् बस चले याये त्यःगु खः । लगनख्यः निसे गोदावरी, थानकोट, लामाटार, बालाजु, सूर्यविनायकय् साझा चले जुया वयाच्वंगु रुटय् बस चले याये त्यःगु खः । साझां सरकार तोके याःगु स्वया साविकय् ५० प्रतिशत अप्व भाडा कया सेवा बिइ त्यःगु खः ।
सरकारं तोके याःगु फुक्क मापदण्ड पालना न याना चले याये त्यःगु खः । यात्रुपिन्त अनिवार्य मास्क तया व खुद्रा ध्यवा ज्वना वयेत न इनाप याःगु दु ।
वःगु सोमवाः निसे मयूर, संयक्त, महानगर, सुन्दर यातायात लगायतया बस कम्पनीं राजधानीया सार्वजनिक बस चले याये धुकुगु दु । यातायात व्यवसायी कम्पनीया छाता संगठनपिन्स बस
चले मयायेगु निर्णय यासा कम्पनी तयेस निर्णय अवज्ञा याना बस चले याःगु खः ।
स्वनिगःया सम्बन्धित जिल्ला दुने जक सवारी चले याये दइ कथं सार्वजनिक सवारी खुला याःगु खः ।
