Display Style:
Column Style
किपू नगरपालिकां अनलाइन चिकित्सा परामर्श सेवा सुरु
लहनान्युज | दिल्लागा षष्ठी ११४०,असार २७ शनिवाः
किपू नगरपालिकां अनलाइन चिकित्सा परामर्श सेवा मोबाइल एप्लिकेसन सञ्चालनय् हःगु दु ।
छगू ज्याझ्वः दथुइ कीर्तिपुर अस्पताल उगु एप्स किपू नगरपालिका स्वास्थ्य समितिया संयोजक नाप वडा नं. १ या अध्यक्ष हर्ष महर्जनं मोवाइलं उलेज्या यानादिगु खः ।
थौंकन्ह्य फैले जुयाच्वंगु कोभिड १९ या महामारीया इलय् स्वास्थ्यमा समस्या जूपिनिगु लागि अस्पताल तक वने म्वायेक व वासः न्यायेत पसलय् वने म्वायेक छेँ छेँय् थ्यकिगु कथं किपू नगरपालिकं उगु जीभी कम्पनी नाप jeevee नांया एप्स निर्माण यासे ग्वाहालि याःगु खः । थुगु एप्स मोबाइलय् निःशुल्क डाउनलोड याये फइ धका धाःगु खः ।
स्वास्थ्य शाखाया प्रमुख सन्तमान मानन्धरं लसकुस याना न्ह्याःगु उगु ज्याझ्वलय किपू वडा २ या वडाध्यक्ष लक्ष्मण डंगोल, जीभी कम्पनीपाखे आभुषण कसाकारपिन्स थःथःगु खँतयादिगु खः ।
उगु एप्सं प्रत्यक्षरुपं सितिक परामर्श बियादिपि स्वम्ह डाक्टरपिन्त दसिपौ लःल्हायेगु ज्या जुगु खः ।
हलियकं छन्हु निगु लाख २८द्धः संक्रमित
लहनान्युज | दिल्लागा षष्ठी ११४०,असार २७ शनिवाः
विश्व स्वास्थ्य संगठन (डब्ल्यूएचओ) नं कोरोना भाइरस पूर्णरुपं मदयेकत थाकुइ धका धाःगु दु । विश्व स्वास्थ्य संगठनका इमर्जेन्सी प्रोग्राम प्रमुख डा. माइक रायनं शुक्रवाः ग्वसाः ग्वगु
सम्मेलनय् उगु जानकारी बिःगु खः ।
जेनेभाय् जूगु उगु अनलाइन पत्रकार सम्मेलनय् वःगु २४ घण्टाय् कोरोना संक्रमितपिनिगु ल्याः आः तक या दुगु धका धाःगु दु । संगठनया कथं वःगु २४ घण्टाय् कोरोना संक्रमितपि निगु लाख २८१०२म्ह थपे जुगु धका धाःगु खः ।
जोन्स हप्किन्स विश्वविद्यालयया तथ्यांक कथं आः हलियकं कोरोना संक्रमितपि छगू करोड २४ लाख ५९ द्धः व ३६३म्ह थ्यःगु दु । अथेहे कोरोना संक्रमणं सीपिनिगु ल्याः निगु लाख ५९ द्धः व ४३९म्ह थ्यःगु दु ।
अमेरिकाय् जक दकलय् अप्व ३१ लाख ८१ द्धः व ८४६म्हेसित संक्रमण जूगु दु । कोरोनापाखे मेगु प्रभावित देय् ब्राजिलय् १८ लाख स्वया अप्व दुगु धका जोन्स हप्किन्स विश्वविद्यालयं धाःगु दु ।
पेट्रोल, डिजेल व मचिकंया भाः थकाःगु दु
लहनान्युज | दिल्लागा पंचमी ११४०,असार २६ शुक्रवाः
नेपाल आयल निगमं हाकनं पेट्रोलियम पदार्थया भाः थकागु दु ।
निगमं पेट्रोल, डिजेल व मचिकंया भाः छगू लिटर छतका थकाःगु दु ।
सरकारं असार १६ गते न पेट्रोलियम पदार्थया भाः थकाःगु खः ।
झीन्हुया दथुइ पेट्रोल छगू लिटरय् खुतका व डिजेलय् स्वतका थकाःगु दु ।
आः पेट्रोल छगू लिटरय् १०२ तका थ्यःगु दु धका निगम प्रवक्तां धाःगु दु ।
डिजेल व मचिकनय् छगू लिटरया ८८ तक थ्यःगु दु ।
हवाई इनधन व जा थुइगु ग्यासय् भाः यथावत तयातःगु दु ।
स्वनिगलय् थप ४२म्हेसित कोरोना संक्रमण
लहनान्युज | दिल्लागा पंचमी ११४०,असार २६ शुक्रवाः
स्वनिगलय् थौं शुक्रवाः जक ४२ म्हेसित कोरोना भाइरस संक्रमण पुष्टी जूगु दु ।
स्वास्थ्य तथा जनसंख्या मन्त्रालयया कथं थौं येँ २८म्ह, यलय् १३म्ह व ख्वपय् छम्हेसित कोरोना संक्रमण जूगु दु ।
मन्त्रालयय् थौं कोरोना संक्रमण जूपि गन च्वपि धका धाःगु मदुनि ।
येँ २८म्ह व यलय् १३म्हसित कोरोना संक्रमण
लहनान्युज | दिल्लागा पंचमी ११४०,असार २६ शुक्रवाः
वःगु २४ घण्टाय् थौं थप ११८म्हेसित कोरोना भाइरस (कोभिड–१९) या संक्रमण पुष्टि जूगु दु ।
थ्व नाप आः संक्रमितपिनिगु ल्याः १६ द्धः व ६४९ म्ह थ्यःगु दु । उकि मध्ये ३५म्ह सीगु दु । अथेहे च्याद्धः व ११म्ह डिस्चार्ज जुइ धुकुगु दु । वःगु २४ घण्टाय् १२०म्ह डिस्चार्ज जुगु दु ।
मन्त्रालयया कथं येँ यक्को धेरै संक्रमित पिहा वःपि दु । येँ जक २८म्ह कोरोना संक्रमण पुष्टि जूगु दु ।
थ्व नाप यलय् १३म्ह, सुर्खेतय् ११म्ह, सर्लाही व तनहुँ च्याम्ह च्याम्ह, गुल्मीइ खुम्ह व धनुषा, महोत्तरी व पाल्पाय् प्यम्ह प्यम्हसित संक्रमण पुष्टि जूगु दु ।
इलाम, पाँचथर, सिराहा, काभ्रे, रौतहट, बाग्लुङ, नवलपरासी व दैलेखय् निम्ह निम्ह व रसुवा, डोटी, चितवन, बाँके, भक्तपुर, रामेछाप, सिन्धुली, सिन्धुपाल्चोक, रुपन्देही, मकवानपुर, धादिङ, कैलाली, गोरखा, बाजुरा, डोल्पा व सल्यानय् छम्ह छम्ह संक्रमित पिहावःगु दु ।
