Display Style:
Column Style
येँ २४म्ह, यलय् २० व ख्वपय् १०म्ह कोरोना संक्रमण
लहनान्युज | दिल्लागा पारु ११४०,असार २२ सोमवाः
वःगु २४ घण्टाया दुने थप १८०म्हेसित कोरोना भाइरस (कोभिड–१९) या संक्रमण पुष्टि जूगु दु ।
थ्व नाप संक्रमितपि १५ द्धः व ९६४म्ह थ्यःगु दु । उकि मध्ये ३५म्ह सीगु दु । अथेतु ६ द्धः ८११ म्ह डिस्चार्ज जूगु धका स्वास्थ्य तथा जनसंख्या मन्त्रालयं धाःगु दु ।
मन्त्रालय बिगु जानकारी कथं दकलय् अप्व येँ २४म्हसित कोरोना संक्रमण जुगु दु ।
अथेहे, यलय् २०म्ह, लमजुङय् ११म्ह, ख्वपय् १०म्ह, सप्तरी, कैलाली, व कास्की च्याम्ह च्याम्ह, गोरखाय् न्ह्यह, बाग्लुङ, सर्लाही व रौतहटय् खुम्ह खुम्ह, सिन्धुपाल्चोक, नवलपरासी, मकवानपुर, डडेलधुरा वझापाय् न्याम्ह न्याम्हसित संक्रमण पुष्टि जूगु दु ।
प्युठान व काभ्रेय् प्यम्ह प्यम्ह, ओखलढुंगा, खोटाङ, चितवन व पाल्पाय् स्वम्ह स्वम्ह, सिराहा, सुनसरी, दोलखा, सिन्धुली व दाङय् निम्ह निम्ह नुवाकोट, चितवन, बारा, जाजरकोट, जुम्ला, धादिङ, नवलपुर, संखुवासभा, ताप्लेजुङ, अर्घाखाँची व उदयपुरय् छम्ह छम्हसित कोरोना संक्रमण पुष्टि जूगु दु ।
कोरोना संक्रमणया वासः याका छेँय् लिहा वपि २६४म्ह थ्यःगु दु । डिस्चार्ज जूपिनिगु ल्याः ६ द्धः व ८११ म्ह थ्यःगु दु ।
येँ महानगरपालिं ए डिभिजन क्लबयात १० लाख ग्वाहालि यात
लहनान्युज | दिल्लागा पारु ११४०,असार २२ सोमवाः
येँ महानरपालिका दुने दुगु खुगु ए डिभिजन क्लबयात आर्थिक ग्वाहालि रकम हस्तान्तरण याःगु दु ।
थौं छगू ज्याझ्वः राष्ट्रिय सभागृहय् छगू ज्याझ्वः यासे येँ महानगरपालिकाया मेयर बिद्यासुन्दर शाक्यं थःगु नगर दुने लाःगु खुगु क्लवय् छगू क्लव १० लाख ग्वाहालि ध्यवा हस्तान्तरण याःगु दु ।
येँ महानगरपालिकां वःगु दँय् ए, वि व सि डिभिजन क्लवयात आर्थिक ग्वाहालि याःगु दु ।
महानगरपालिका दुने आर्थिक ग्वाहालि याःगु खुगु क्लब मछिन्द्र क्लब, सरस्वती युवा क्लव, हिमालयन शेर्पा क्लब, काठमाडौँ खेल मण्डल (एनआरटी), संकटा क्लब व मनाङ मस्र्यादी क्लबपिन्त ग्वाहालि याःगु खः ।
उगु ग्वाहालि यायेगु ज्याझ्वलय् थःगु खँ तयादिसे मेयर शाक्यं खेलकुद विकास तथा प्रर्वद्धनया लागि थुुगु रकम हस्तान्तरण यानागुु धका जानकारी बियादिगु खः । मेयर शाक्यं कासामिपिन्त न्हिन्हि, व्यायाम व कासा विकासया लागि कासा सहरी जीवन पद्धति दयेकेत महानगरं कासाय् न लगानी अप्वकाः वनिगु नीति हयागु जानकारी बियादिगु खः ।
‘जनप्रतिनिधि निर्वाचित जुइ धुका भौतिक पूर्वाधार निर्माण, संम्पदा संरक्षण, हरियाली प्रर्वद्धन लगायतया थासय् येँ महानगरपालिकां ज्या याना वयाच्वनागु धका मेयर शाक्यं धयादिगु खः, ‘थ्व नाप जिमिस खेलकुद, शिक्षा, स्वास्थ्य थेज्याःगुलि विशेष प्राथमिकताय् तया निरन्तर ज्या याना वया च्वनागु दु धका धयादिसे थ्व खेलकुद विकास तथा प्रर्वद्धनया लागि जिमिगु चिधःगु ग्वाहालि खः धका धयादिग खः ।
मेयर शाक्यं महानगरपालिका दुने ए डिभिजनयात १० लाख, वि यात स्वगू लाख व सीयात निगु लाखं ग्वाहालि यानागु धका जानकारी बियादिगु खः । ‘वःगु दँय् थे थुगु दँय् न ए, वि व सि डिभिजनयात छक्वल हे आर्थिक ग्वाहालि याये धाःसा थौं ए डिभिजनयात ग्वाहालि याना लिपा वि व सियात मेगु दिं ग्वाहालि यायेगु जुइ धका धयादिगु खः
उगु ज्याझ्वलय् उपप्रमुख हरिप्रभा खड्गी (श्रेष्ठ), अखिल नेपाल फुटबल संघ (एन्फा)या अध्यक्ष कर्मा छिरिङ शेर्पा, मछिन्द्र क्लबया अध्यक्ष प्रवोधविर सिंह कंशाकार, प्रमुख प्रशासकीय अधिकृत एकनारायण अर्याल, प्रवक्ता ईश्वरमान डंगोल, सहचिव राजेश्वर ज्ञवाली,सामाजिक विकास विभागका प्रमुख सनतकुमार थापा लगायत पिनिगु न ब्बति दुगु खः ।
मास्क मतसे छेँय् न पिहा वःपिन्त प्रहरीं कारवाही याइगु
लहनान्युज | दिल्लागा पारु ११४०,असार २२ सोमवाः
मास्क मतसे छेँय् न पिहा वःपिन्त प्रहरीं ज्वनेइगु याये त्यःगु दु । गृह मन्त्रालयं मास्क मतसे छेँय् न पिहाँ वइपिन्त ज्वनेगु लागि प्रहरी प्रधान कार्यालययात निर्देशन बिःगुु दु ।
मास्क मतसे छेँय् पिहा वइपिन्त प्रहरी ज्वना संक्रामक रोग ऐन २०२० अनुसार कारबाही यायेत गृह मन्त्रालयया सूचना अधिकारी उमाकान्त अधिकारीं जानकारी बिःगु दु ।
कोरोना संक्रमणया खतरा आः न दुगुलि हाल लकडाउन पूर्ण रुपं खोले मजुगु थुकियात व्यवस्थित जक याःगु धका सरकारं धाःगु दु ।
जरुरी ज्या बाहेक छेँय् न पिहा मवनेत, पिहा वने माःसा अनिवार्य मास्क तयेत, छम्ह मेम्ह नाप २ मिटरया सामाजिक दूरी कायम याये माःगु सरकारं धाःगु दु ।
लकडाउनया कडाइ मजुगुलि कोरोना महामारी नियन्त्रणय् समस्या जुइगुलि थुगु निर्देशन बिःगु धका अधिकारीं धाःगु दु ।
नेपाल एयरलाइन्सया स्वम्ह पाइलट नाप १४गु उडान कर्मचारीपिन्त कोरोना संक्रमण
लहनान्युज | दिल्लागा पारु ११४०,असार २२ सोमवाः
स्वम्ह पाइलट नाप नेपाल वायुसेवा निगमया १४ गु उडान कर्मचारीपिन्त कोरोना संक्रमण पुष्टि जूगु दु ।
उकि मध्ये स्वम्ह पाइलट व मेपि झींछम्हेसिे क्याविन क्रु जुगु धका नेपाल वायुसेवा निगमया स्रोतं पुष्टि याःगु दु ।
थथे पुष्टि जुपि पाइलट तथा उडान कर्मचारी सकसित होटल क्वारेन्टिनय् तया तःगु धका स्रोत धाःगु दु ।
नेपाःपिन्त छेँ लित हयेगु अभियानय् थीथी गन्तब्यं पाखे उडान हःपि कर्मचारीपिन्त कोरोना खनेदुगु खः ।
किपू नगरपालिकां पांगा स्कूलय् शैक्षिक सामग्री लल्हात
नृपेन्द्रलाल श्रेष्ठ | दिल्लागा पारु ११४०,असार २२ सोमवाः
किपू नगरपालिकां छगू ज्याझ्वः पांगा माध्यमिक विद्यालयय् शैक्षिक सामग्री सुन्दर महर्जनया लल्हानादिगु दु ।
शैक्षिक सामग्री कथं ल्यापटप, फ्यान, प्रोजेक्टर, स्मार्ट टेलिभिजन छगू ज्याझ्वः दथुइ किपू नगरपालिकाया मेयर रमेश महर्जनं पाँगा माध्यमिक विद्यालयया प्रधानाध्यापक श्याम सुन्दर महर्जनया लल्हानादिगु खः ।
सामग्री लल्हानादिसे मेयर महर्जनं थौंकन्ह्य विषम इलय् नगरपािलकां स्वास्थ्य क्षेत्रय् उल्लेख्य ज्या जूयाच्वंगु धका धयादिसे नगरपालिकाया ग्वाहालि कीर्तिपुर अस्पतालय् हेमोडायलाइसिस सेवा सञ्चालन जूइ धुकुगु दु धका धयादिगु खः ।
कोरोनाया परिक्षण प्रयोगशाला न मंगलवाः निसे जुगु धका धयादिगु खः । मेयर महर्जनं नगरपालिकायात माःगु ग्वाहालि यायेगु धका धयादिगु दु ।
स्कूल व्यवस्थापनया संस्थापक अध्यक्ष प्रा.डा.नन्द त्रहादुर महर्जनया सभाध्यताय् जूगु उगु ज्याझ्वलय् स्कूलया निर्देशक रमेशमान महर्जनं थुगु शैक्षिक सामग्री ग्वाहालि यागुलि किपू नगरपालिकायात सुभाय् बियादिगु खः ।
स्कूलया प्रधानाध्यापक श्याम सुन्दर महर्जनं लसकुस याना न्ह्याःगु उगु ज्याझ्वलय् वडा नं. ८ या अध्यक्ष विनोद महर्जनया ब्बति दुग खः ।
