Display Style:
Column Style
सुकुम्वासी आयोगया खँय् हलिं नेवाः दबूया आपत्ती
विकाश | बछलागा तृतीया ११४०
हलिंन्यंक च्वनाच्वंपिं नेवाःतय् कुसा संगठन विश्व हलिं नेवाः दबुलिं नेपाल सरकारं सुकुम्वासीतयत ६ आना जग्गा बीगु धकाः याःगु निर्णय प्रति आपत्ती प्वंकूगु दु ।
दबूया केन्द्रीय मुँज्याय् थुगु विषयस सहलह यासें हलिंन्यंक लिसें नेपालय् नं कोभिड १९ या संक्रमण न्यनाः सकलें लकडाउनय् च्वनाच्वंगु इलय् सुकुम्वासी आयोग हयेगु लिसें थुकथंया निर्णय यायेगु पायछि ज्या मखूगु धाःगु खः ।
स्वनिगःया रैथाने नेवाःतयत विस्थापित याइगु कथंया पलाः नेपाल सरकारपाखें ल्ह्वन धाःसा नेपाःया खलःपुचः सकललिसे जानाः दबूपाखें नेपाल सरकारयात अन्तर्राष्ट्रिय कानून कथं मुद्दा न्ह्याकेगु निर्णय जूगु दबूया नायः सिजन श्रेष्ठं जानकारी बियादिल ।
दबूया अनलाईन वैठकय् नेपाल लिसें अमेरिका, क्यानडा, लन्डन, इजरायल व थीथी यूरोपीय देशय् च्वनाच्वंपिं ज्यासना पुचःया दुजःतय् ब्वति दुगु खः ।
राहत मखसें रोजगार बीगु नीतिइ नगरपालिका फोरम
बिराजकाजी राजोपाध्याय | बछलागा तृतीया ११४०,बैसाख २८ गते
उपत्यका नगरपालिका फोरमं आः राहत बीगु मयासें दक्ष जनशक्तियात लजगाः बीगु निर्णय याःगु दु ।
संघीय सरकारं न्ह्याकातःगु लकडाउनयात पालना यासें सक्षम जनशक्तियात श्रम व लजगाःलिसें स्वानाः अर्थतन्त्रयात चलायमान दयेकेगु निर्णय नगरपालिका फोरमं याःगु खः ।
स्वनिगः दुनेया निगू महानगर व १६ नगरपालिकाया मेयर–उपमेयरतय् मंकाः संगठन उपत्यका नगरपालिका फोरमया बैठकं थथे निर्णय याःगु खः ।
‘संघीय सरकारं लकडाउन छुं छ्वासुकेगु निर्णय याःगु अवस्थाय् न्हापा थें राहत बीमाःगु अवस्था दइमखु’ कामपा प्रमुख शाक्यं धयादिल । ‘अथेसां भुथू हे मच्याइगु अवस्था दुसा जिपिं ग्वाहालि यायेत तयार दु ।
प्रमुख शाक्यं अत्यावश्यक उद्योगत न्ह्याकेत सहजीकरण यासें लकडाउन पालना यायेगु याकेगु निर्णय नं बैठकय् जूगु जानकारी बियादिल ।
आगमनयात व्यवस्थित यासें संक्रमण रोकथाम व नियन्त्रणया लागिं स्वनिगः दुहांवयेगु नाकाय् वयेधुंकाः जक पनेगु मयासें गनं वःगु खः अन हे वयेवने याकेमबीगु व्यवस्था ताःलाकेत संघीय सरकारयात इनाप यायेगु निर्णय नं वैठकय् जूगु दु ।
मजिमगाःगु ज्याया लागिं स्वनिगः दुहां वयेमाःगु बाध्यता हे खःसा अनुमति कयाः जक दुहां वयेदइगु व्यवस्था यायेत नं इनाप यायेगु निर्णय वैठकं याःगु दु ।
छुं दिं न्ह्यः तिनि नगरपालिका फोरमया पदाधिकारीं कोभिड–१९ सम्बन्धी उच्चस्तरीय समन्वय समितिया कजि तकं खःम्ह उपप्रधान अले रक्षामन्त्री ईश्वर पोखरेलयात नापलानाः स्वनिगलय् निर्वाध वयेवनेयात कडाई यानाः स्वनिगलय् लकडाउन छुं छ्वासुकेमाःगु माग याःगु खः ।
‘वयेवनेगुलिइ कडाई यायेगु व निश्चित क्षेत्र दुने सामाजिक दूरी तयाः आर्थिक ज्याखँ चलायमान यानातयेगु खःसा संक्रमणं नं तापायेफइ, भविष्यय् जुइफुगु आर्थिक संकटयात नं छुं हदतक्क क्वपालेफइ’ शाक्यया धापू खः ।
मध्यपुर ठिमी नगरपालिकाया प्रमुख अले नगरपालिका फोरमया सचिव मदनसुन्दर श्रेष्ठं बैठकय् संक्रमणया खँय् शंकास्पद मनूत तयेत क्वारेन्टाइनया व्यवस्थापन यायेत संघीय सरकारयात इनाप यायेगु निर्णय जूगु जानकारी बियादिल ।
‘वइगु दिनय् विदेशं तःधंगु ल्याखय् नेपाली नागरिकतयत उद्धार यानाः थन हयेमालेफु । अज्याःगु अवस्थाय् स्थानीय तगिमं थःथःगु पहलं क्वारेण्टाइन दयेकेबलय् आपाः खर्च जुइ’ श्रेष्ठं धयादिल । ‘स्वनिगलय् क्वारेण्टाइनया व्यवस्थापन संघीय सरकारं यायेगु व उकिया लागिं माःगु ग्वाहालि स्थानीय तगिमं यायेगु निर्णय बैठकं याःगु दु ।’
फोरमं थ्वयां न्ह्यः हे छगू प्रदेशं मेगु प्रदेश, छगू जिल्लां मेगु जिल्ला व छगू स्थानीय तगिमं मेगु स्थानीय तगिमय् निर्वाध रुपं वयेवने यायेबलय् संक्रमणया खतरा अप्वइगु धासें अथे मयायेत इनाप याःगु खः ।
भुल्केय् हाकनं मेम्ह छम्हेसिके खनेदत कोरोना संक्रमण
शोभा श्रेष्ठ | बछलागा द्धितिया ११४०,बैसाख २७ गते
उदयपुरया त्रियुगा नगरपालिका–३ भुल्केय् हाकनं मेम्ह छम्हेसिके कोरोना भाइरस (कोभिड(१९) या संक्रमण पुष्टि जूगु दु ।
विराटनगरया प्रयोगशालाय् याःगु परीक्षणय् ४३दँया मिसायाके कोरोना पोजेटिभ खनेदुगु खः ।
निक्वःगु खुसी मुंकूगु थ्रोट स्वाब परीक्षण याःबलय् थौं सनिलय् थप छम्हेसिके संक्रमण खनेदुगु खः ।
थौं सुथय् तिनि उदयपुरया स्वम्ह लिसें ७म्हेसिके कोरोना संक्रमण पुष्टि जूगु खः ।
कपिलबस्तुया स्वम्ह व पर्साया छम्हेसिके नं थौं सुथय् तिनि कोरोना संक्रमण पुष्टि जूगु खः ।
थ्व लिसें थौं जक उदयपुरय् ४म्ह व देयन्यंक ८म्हेसिके कोरोना संक्रमण पुष्टि जूगु दु ।
सुथय् संक्रमण पुष्टि जूपिं उदयपुरया स्वम्ह मिसातयत विराटनगरया कोसी अस्पताल भर्ना याःगु दु ।
सनिलय् संक्रमण पुष्टि जूम्ह मिसायात धाःसा कन्हय् अस्पताल यंकेगु तयारी जुयाच्वंगु दु ।
संक्रमित सकसिगु स्वास्थ्य अवस्था सामान्य दुगु धाःगु दु ।
देयन्यंक कोरोना संक्रमितया ल्याः ११० थ्यंगु दु । उकी ३१म्हेसित ल्वय् लनेधुंकूगु खःसा लंपिंमध्ये स्वम्हेसिके हाकनं संक्रमण पोजेटिभ खनेदयाः अस्पताल भर्ना याःगु दु ।
किपू नगरपालिकां ८द्वः परिवारयात राहत इन
शोभा श्रेष्ठ | बछलागा दुतिया ११४०,बैसाख २६ गते
किपू नगरपालिकां न्ह्यानाच्वंगु लकडाउनया इलय् पिनं वयाः किपुलिइ च्वनाः अध्ययन यानावःपिं विद्यार्थीयात राहत ब्यूगु दु ।
किपू नगरपालिकाया मेयर रमेश महर्जनं आः न्ह्यानाच्वंगु लकडाउन ई दुने १५सःम्ह विद्यार्थीतयत किपू नगरपालिकाया हे आन्तरिक बजेटपाखें राहत ग्वाहालि यानागु जानकारी बियादीगु दु ।
किपुलिइ च्वनाः ब्वनाच्वंपिं सुं नं विद्यार्थी सुं हे द्यांलानाः च्वनेम्वाःलेमा धइगु खँय् विशेष ध्यान बियागु किपूया मेयर महर्जनं धयादिल ।
संचारकःमितलिसेया खँल्हाबल्हाया झ्वलय् मेयर महर्जनं किपू नगरपालिकाय् च्वनाच्वंपिं विपन्न ज्यालम मजदुरी यानाः नयेमाःपिं ८द्वः परिवारयात राहत बी धुनागु कनादिल ।
कोरोना संक्रमण रोकथाम व नियन्त्रणया खँय् लिसें किपू नगरपालिकां यानावःगु ज्याया जानकारी कायेत नेवाः पत्रकार राष्ट्रिय दबूया केन्द्रीय न्वकू नृपेन्द्रलाल श्रेष्ठ, मू छ्याञ्जे सुनिल महर्जन, केन्द्रीय दांभरिं सुरेन्द्रभक्त श्रेष्ठलिसे नेवाः एफएम १०६.७ या प्रबन्ध निर्देशक बीरेन्द्र विनु शाक्य विविशा, किर्ति अनलाइनया म्यानेजिङ्ग डिरेक्टर प्रताप महर्जन व ज्वजलपा वाःपौया प्रकाशक नजरराम महर्जन किपू नगरपालिकाया ज्याकू थ्यंगु खः ।
धात्थें आपतय् लाःपिं मनूतयत राहत उपलव्ध याकेत थःपिन्सं स्थलगत अध्ययन यानाः हे राहत बीगु यानागु जानकारी नं मेयर महर्जनं बियादीगु दु ।
मेयर महर्जनं किपू नगरपालिकाय् कोरोना संक्रमित सुं हे मदुगु व संक्रमित दुहांवयेफुगुपाखे नं बिचाः यानाः सचेतता नालागु धयादिल ।
थ्व सवन्धमा जःलाखला नगरपालिकात दक्षिणकाली नगरपालिका व चन्द्रागिरि नगरपालिकालिसे समन्वय यानाच्वनागु मेयर महर्जनया धापू दु ।
‘किपू नगरया सीमाना धैगु हे दक्षिणकाली व चन्द्रागिरी नगरपालिका खः । दक्षिणकाली व चन्द्रागिरी नगरपालिकां सीमानाकाय् कडाइ यात धाःसा किपू नगरपालिकायात छुं समस्या वइमखुु’ मेयर महर्जनं धयादिल ।
मेयर महर्जनं लकडाउन झन् झन् ताःहाकयावंगु इलय् किपू नगरया जनसमुदाययात मग्यासें सचेत व सतर्क जुयाः कोरोना भाइरसया सामना यायेत इनाप यानादिल । लिसें नेपाल सरकारं घोषणा यानातःगु लकडाउनयात पूर्ण रुपं पालना यायेत नं वयकलं आह्वान यानादीगु दु ।
स्वांया पुन्हिया लसताय् मेयर शाक्यया ५०क्वःगु खुसी हिदान
नृपेन्द्रलाल श्रेष्ठ | बछलाथ्व पुन्हि ११४०,बैसाख २३ गते
येँ महानगरपालिकाया प्रमुख बिद्यासुन्दर शाक्यं ५०क्वःगु खुसी हिदान यानादीगु दु ।
थौं २५६४क्वःगु स्वांया पुन्हिया लसताय् येँ महानगरपालिका वडा–२१या श्री गणेश युवा क्लबं याःगु हिदान ज्याझ्वलय् मेयर शाक्यं ५०क्वःगु खुसी हिदान यानाद्यूगु खः ।
उगु वडाय स्थानीय वासीन्दा तकं खःम्ह मेयर शाक्यं क्लवया स्थापनाकालनिसें हे दँयदसं हिदान यानावयागु धयादिल ।
थुगु श्री गणेश युवा क्लब वि.स.२०४४ सालय् स्थापना जूगु खः ।
कोरोना भाइरस रोग (कोभिड–१९)या रोकथामया लागिं चैत ११ निसें न्ह्यानाच्वंगु लकडाउनया इलय् रक्तस्राव, प्रसूति, दुर्घटना, शल्यक्रिया लिसेंया विरामीयात हिया अभाव जुइके मबीत हिदान यानागु शाक्यया धापू खः ।
‘लकडाउनया हुनिं थीथी संघसंस्थां नं हिदानयात स्थगन यायेमाःगु व हिदातां नं हिदान मयाःगु हुनिं केन्द्रीय रक्तसञ्चार सेवा (ब्लड बैंक)य् हिया अभाव जुइफु,’ वयकलं धयादिल ‘थज्याःगु अवस्थाय् सामाजिक दूरी कायम यासें फक्व सुरक्षाया उपाय नालाः याःगु हिदानं उपचारमा ग्वाहालि जुइमा धइगु मनंतुनाच्वना ।’
केन्द्रीय रक्तसञ्चार सेवा (ब्लड बैंक)या निर्देशक डा. मनिता राजकर्णिकारं नं लकडाउनया इलय् हिया अभाव जुइकेमबीत फक्व सुरक्षाया दक्वं उपाय नालः हि मुंकागु जानकारी बियादिल ।
‘हिदान यायेबलय् सामाजिक दूरी कायम यानाः सुरक्षित जुयाः, स्वस्थ मनुखं जक हिदान यायेफइगु व्यवस्था यानावयागु दु । थौं नं व दक्वं उपाय नाला हि मुंकागु दु’ डा.राजकर्णिकारं धयादिल ।
लकडाउनया पूर्ण पालना यासें हिदान यायेफइगु वयकःया सुझाव दु । सामाजिक दूरी कायम यायेगु, यक्व भिडभाड मयायेगु, हिदाताया ज्वर, प्रेसर लिसें दक्वं जाँच यायेगु लिसें हिदान यायेगु थाययात नं न्ह्यः हे यचुपिचु यानाः जक हि कायेगु यानागु वयकलं जानकारी बियादिल ।
पिनेपाखे संक्रमित अप्वयाच्वंगुलिं जिल्लां नकतिनि वःपिं, विदेशं वःपिं व उमिगु स्वापुतिइ दुपिनिगु हि कायेगु मयानागु नं वयकलं धयादिल ।
गणेश युवा क्लवया छ्यान्जे अनन्त शाक्यं नं फक्व दक्वं मापदण्ड पूवंकाः हिदान ज्याझ्वः यानागु जानकारी बियादिल ।
शाक्यया कथं थौं ८०म्हेसिनं हिदान याःगु खः । हिदान याःपिं दक्वं स्थानीय मनूत खः ।
