Display Style:
Column Style
१५ गु सरकारं तोके याःगु अस्पतालय् स्वास्थ्य सेवा निःशुल्क
शोभा श्रेष्ठ | अनलाथ्व षष्ठी ११४०,असोज ६ मंगलवाः
गरिब तथा विपन्न वर्गपिन्त १५ गु सरकारं तोके याःगु अस्पतालपाखे प्रारम्भिक चरणया आकस्मिक स्वास्थ्य सेवा निःशुल्क सेवा काये खनिगु जुगु दु ।
गरिब तथा विपन्न वर्गयात केन्द्रीय अस्पतालपाखे प्रारम्भिक चरणया आकस्मिक स्वास्थ्य सेवा निःशुल्क उपलब्ध यायेगु सम्बन्धी कार्यविधि २०७७ जारी यासे स्वास्थ्य तथा जनसंख्या मन्त्रालयं थज्याःगु व्यवस्था याःगु खः ।
स्वनिगः दुने त्रिवि शिक्षण अस्पताल, मनमोहन कार्डियोथोरासिक भास्कुलर तथा ट्रान्सप्लान्ट सेन्टर, बीपी कोइराला लायन्स सेन्टर फर अप्थाल्मिक स्टडिज, कान्ति बाल अस्पताल, राष्ट्रिय ट्रमा सेन्टर, वीर अस्पताल व गंगालाल राष्ट्रिय हृदय केन्द्रय् थुगु व्यवस्था याःगु खः ।
अथेहे स्वनिगः पिने कोसी अस्पताल, नारायणी अस्पताल, भरतपुर अस्पताल, पोखरा स्वास्थ्य विज्ञान प्रतिष्ठान, भेरी अस्पताल, सुर्खेत प्रादेशिक अस्पताल, डडेलधुुरा अस्पताल व महाकाली प्रादेशिक अस्पतालयात मन्त्रालयं प्रारम्भिक या लागि छनौट याःगु दु ।
मन्त्रालयया ज्याझ्वः कथं सुरुवातय् सम्बन्धित अस्पतालयात छु बजेट पेश्कीया रुपमा बिया खर्च रकम सोधभर्नाया लागि पेश याये इलय् इकाइ मूल्य स्वास्थ्य बीमा बोर्डया अधिकतम मू स्वया अप्वो मजुइगु माःगु याःगु दु ।
थुगु ज्याझ्वःया अनुगमन तथा निरीक्षण संघ व प्रदेशया सम्बन्धित निकायपिनिगु आवश्यकता कथं म्हति न निकः तक कार्यविधिइ उल्लेख याःगु दु । कान्ति बाल अस्पताल, राष्ट्रिय ट्रमा सेन्टर लगायत छु अस्पतालय् थुगु सेवा सुरु याये धुकुगु दु।
१३५६म्ह कोरोना संक्रमण पुष्टि, ८२३म्ह डिस्चार्ज
शोभा श्रेष्ठ | अनलाथ्व षष्ठी ११४०,असोज ६ मंगलवाः
नेपालय् थप १३५६ म्ह कोरोना संक्रमण पुष्टि जूगु दु । २४ घन्टाय् देय् यकं थीथी प्रयोगशालाय् याःगु परीक्षणय् १३५६ म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं थौं मंगलवाः पत्रकार सम्मेलनय् जानकारी बिःगु खः ।
प्रवक्ता डा जागेश्वर गौतमं आःतक ६६ हजार ६३२ संक्रमितपि थ्यःगु दु धका धाःगु दु ।
अथेहे २४ घन्टाय् कोरोना संक्रमणमुक्त जूपि ८२३म्ह थ्यःगु दु धका धाःगु दु । थ्व नाप आःतक कोेरोना संक्रमण डिस्चार्ज जुपि ४८ हजार ६१म्ह थ्यःगु दु ।
मन्त्रालयया कथं आःतक पीसीआर विधिपाखे ९ लाख ४९ हजार ७७ परीक्षण याये धुकुगु दु । आःतक क्वारेन्टाइनय् च्वनाच्वपि ७ हजार १७१म्ह दु । अथेहे सक्रिय संक्रमितपि १८ हजार १४२म्ह दु।
येँ ५११म्ह नाप स्वनिगलय् ६४७म्ह कोरोना सक्रमण पुष्टि
शोभा श्रेष्ठ | अनलाथ्व षष्ठी ११४०,असोज ६ मंगलवाः
स्वनिगः दुने २४ घन्टाय् थप ६४७म्ह कोरोना सक्रमण पुष्टि जूगु दु ।
अथेहे येँय् जक ५११म्हेसित कोरोना सक्रमण पुष्टि जूगु दु । यलय् ७३म्ह व ख्वपय ६३ म्हेसित कोरोना सक्रमण पुष्टि जूगु दु धका स्वास्थ्य तथा जनसंख्या मन्त्रालयं ग्वःसा ग्वःगु धका पत्रकार सम्मेलनय् जानकारी बिःगु दु ।
२४ घन्टाय् ११ हजार १५४म्हेसिगु पीसीआर परीक्षण याःगु खः ।
म्हिगः २४ घन्टाय् ६७४म्हेसित संक्रमित जुगु धका स्वास्थ्य मन्त्रालयं जानकारी बिःगु खः ।
अथेहे २४ घन्टाय् कोरोना संक्रमणमुक्त जुया छेँ लिहा वःपि ८२३म्ह दु । थ्व नाप कोरोना संक्रमणमुक्त जुपि ४८ हजार ६१ म्ह थ्यःगु दु ।
स्वास्थ्य तथा जनसंख्या मन्त्रालयया प्रवक्ता डा जागेश्वर गौतमया कथं वःगु २४ घन्टाय् छम्ह मिसा व छम्ह मिजंम्ह सीगु दु धका धाःगु दु । थौं मदुपि येँया ५० दँ दुम्ह व काभ्रेपलाञ्चोकया ५० दँ दुम्ह मिसाम्ह खः ।
नेपालय् कोरोना संक्रमणं सीपि ४२९म्ह थ्यःगु दु
कोरोनायात हल्का मकायेत वरिष्ठ क्याप्टेन विजय लामाया इनाप
लहानान्युज | अनलाथ्व षष्ठी ११४०,असोज ६ मंगलवाः
नेपाल एयरलाइन्सया वरिष्ठ क्याप्टेन विजय लामां कोरोना संक्रमणयात सामान्य कथं मकायेत इनाप याःगु दु । थःगु स्वास्थ्यय् उल्लेख्य सुधार जुया वःगु जानकारी बियादिसे थः याकन हे उडान भरे याना बिदेशय् च्वपि नेपालीपिन्त लिह हयेगु जुइ धका धाःगु दु ।
कोरोना संक्रमित क्याप्टेन लामा स्टार अस्पताल यलय् वासः याका वयाच्वंगु खः । कोरोनाविरुद्ध निवाः न्ह्यनिसे लडाइँलय् थःगु स्वास्थ्यय् यक्को सुधार वःगु जानकारी बियादिगु खः ।
क्याप्टेन लामा फेसबुकय् एकदम जटिल अवस्थापाखे पार याना पुनः स्वस्थ जुयाच्वनागु दु धका धाःसे आः छु ई लिपा थः डिस्चार्ज जुइगु आशा यानागु दु धका धाःगु दु ।
लामा च्वंगु दु हिया नमूना यकूगु मदुनि, नँसाः न नयेगु यः, कमजोरीपनया लक्षण मदु, चान्ह्यः न्ह्यः न वः, डाक्टर या कथं जिगु इन्फेक्सन लेभल घटे जुगु धका धाःगु दु ।
‘थ्व सामान्य ल्वय् मखु’
क्याप्टेन लामां थ्व सम्भव जुइगुया लिउने अस्पतालया दक्को टोलीया योगदान दुगुलि थःगु उपचारय् खटे जुपिन्त सकसित सुभाय् देछागु दु ।
कोरोनायात हल्का रुपं मकायेत व थःगु सुरक्षाय् चुके मजुइत इनाप याःगु दु । क्याप्टेन लामा ‘सकसित इनापयासे थ्व कोविडयात हल्का मकाये धाःगु दु । थःगु सुरक्षाय् गन न चुके मजुइत धाःगु खः । थ्व सामान्य ल्वय् मखु । थुकिइ ज्यान तक काये फइ धका धाःगु दु ।
क्याप्टेन लामा च्वंगु दु सुभाय् दु छिकपिनिगु मतिना व हःपा न थःत थिक जुल । याकन हे उडान भरे याना विदेशय् च्वपि नेपालिपिन्त नेपाल लित हया राष्ट्रप्रति समर्पित जुइ।
लुँया तोलां थौं १७ सय कुहा वल
शोभा श्रेष्ठ | अनलाथ्व षष्ठी ११४०,असोज ६ मंगलवाः
लुँया भाः थौं मंगलवाः तोला झीन्ह्यसः क्वहा वःगु दु।
थौं छगु तोलाया १७ रुपैयाँ क्वहा वया छापावाल लुँ ९५ हजार ५ सय रुपैयाँ कायम जूगु दु।
नेपाल सुनचाँदी व्यवसायी महासंघया कथं म्हिगः सोमवाः छापावाल लुँ ९७ हजार २ सय रुपैयाँ कारोबार जुगु खः।
अथेहे तेजाबी लुँ न छगु तोला १७ सय रुपैयाँ क्वहा बःगु दु। थौं छगु तोलाया ९५ हजार रुपैयाँ कायम जुुगु दु।
अथेहे वहः तोलां ९० रुपैयाँ क्वहा वया १२ सय रुपैयाँ कायम जुगु दु धका महासंघं धाःगु दु।
