Display Style:
Column Style
चैत २५ तक लकडाउन यायेगु मन्त्रिपरिषद्या निर्णय
लहनान्युज | चौलाथ्व पंचमी ११४०,चैत्र १६ गते
सरकारं सीमा नाकापाखे वयेगु वनेगु रोके यायेगु व लकडाउन २५ गते चान्ह्य तक यायेगु निर्णय याःगु दु ।
थौं आइतवाः सनिलय् च्वंगु मन्त्रिपरिषद् बैठकंं देय् यकं लकडाउनया ई च्यान्हु थपे यायेगु निर्णय याएगु खः ।
अथहे, बैठकं ज्यालादारी मजदुरी याइपिनिगु निति राहतया प्याकेज न पारित याउगु खः ।
कोभिड १९ रोकथामय् गोदावरी नगरपालिकाया सक्रियता
नृपेन्द्रलाल श्रेष्ठ | चौलाथ्व पञ्चमी ११४०,चैत्र १६ गते
हलिंन्यंक न्यनाच्वंगु कोरोना भाइरस कोभिड १९ नेपालय् न्यंकेमबीगु नितिं थीथी थासय् थीथी कथंया तयारी जुयाच्वंगु दु । थ्व हे झ्वलय् गोदावरी नगरपालिका नं थुगु तयारीइ सक्रिय जूगु दु ।
लहनान्यूजलिसे खँ ल्हासें गोदावरी नगरपालिकाया मेयर गजेन्द्र महर्जनं नगरपालिका दुने १० बेडया वाइसोलेसन वार्ड दयेकागु जानकारी बियादिल । लिसें स्थानीय निगू स्कूल व छगू अस्पतालय् क्वारेन्टाइया व्यवस्था यानागु नं कनादिल ।
नगरपालिका दुनेया १४गुलिं हे वडाय् हेल्प डेस्क स्थापना यानागु नं वयकलं धयादिल ।
थज्याःगु इलय् स्वास्थ्यकःमि व चिकित्सकया मनोबल थकायेगु खँय् थःपिन्सै विशेष ध्यान बियागु मेयर महर्जनया धापू दु ।
‘थुगु इलय् स्वास्थ्यकःमि व चिकित्सकयात माःगु थीथी स्वास्थ्य सामग्रीलिसें पिपिईया व्यवस्था यायेधुनागु दु । लिसें स्वास्थ्यकःमिया उच्च मनोवल कायम यानातयेत न्हिं न्यासः तका भत्ताया नं व्यवस्था यानागु दु’ महर्जनया धापू खः ।
एकल महिला, अपाङ्खता व ६ महिना सुत्केरी, दैनिक ज्या मजदुरी यानाः नयेमाःपिनिगु धलः तयार यानाच्वनागु धासें मेयर महर्जनं धलः तयार जुइधुंकाः राहत प्याकेज घोषणा यायेगु वयकःया धापू खः ।
लिसें वयकलं नगरपालिकाय् विदेशं वःपिं झन्डै ४० धइथें दुगु धासें व मध्ये ३०म्हेसिया स्वाब परिक्षण जुइधुंकूगु व ल्यं दुपिं १०म्ह नं होम क्वारेन्टाइनय् दुगु जानकारी बियादिल ।
गोदावरी नगरपालिकाय् कोरोनाया लक्षण दुपिं आःतक्क सुं हे मदुनिगु धासें सुं विरामी खनेदत धाःसा सितिकं वासः यायेगु नं वयकलं धयादिल । उकिया नापं सुयां मृत्यु जूसा मृतकया परिवारयात १० लख तका क्षतिपुर्ति उपलब्ध याकेगु नं वयकःया धापू खः ।
अत्यावश्यक ज्वलंया पसः चायेकेत ई क्वःछीबलय् झन भीडभाड अप्वइगु जूगुलिं खाद्यान्न, तरकारी, मेडिकल लगायतया पसः निर्वाध रुपं चायेकेबियागु नं वयकलं धयादिल ।
नगरपालिका दुने कोरोना भाइरस रोकथाम व नियन्त्रणया ज्या प्रभावकारी रुपं न्ह्यःने यंकेत ५१ लख तकाया आकस्मिक कोष दयेकागु, जानकारी ब्युसें स्थानीय संघसंस्था, व्यापारीयात नं उगु कोषय् ग्वाहालि यायेत वयकलं इनाप यानादिल ।
ख्पपय् बजारय् बिना मास्क हुलमुल जुयाच्वन
राम गोपाल तमखु | चौलाथ्व पंचमी ११४०
ख्वपय् नगर दुने खुल्ला तरकारी व फलफूल न्याीइपि व मिइपिनिगु यक्को हे हुलय् खने दु ।
बजारय् मास्क मतया पिहा वयेगु याना च्वंगु दु । प्रहरी, नगरपालिकांया कर्मचारीपिन्स सम्भे याःसा मनू तयेस वास्ता मया ।
कोरोना भाइरस (कोभिड १९) या संक्रमण नियन्त्रणया लागि सरकारं लकडाउन याना च्वंगु दु ।
नगरपालिकां पसलय् न्यायेगु व मियेगु लागि सुथय् ५ बजे निसे ८ बजे तक व सनिलय् ५ बजे निसे ७ बजे तकया ई तःगु दु । लकडाउनया इलय् म्हति न ३ फिट तापाक च्वने माः।
स्थानिय जनतायात अपुकेत नगरपालिकां पसलय् न्याये मिइत म्हति स्वगु फिट तापाक्क च्वने माःगु ब्यवस्था याउगु दु ।
तर न उकिया बेवास्ता यासे ख्वपय् तरकारी फलफुल न्याइ मिइपिन्स थुकियात पालना याना च्वंगु मदु । प्रहरी व नगरपालिकाया कर्मचारीपिनिगु खँ न्यना च्वंगु मदु ।
अथहे सुर्यबिनायक चोकय्े तरकारी पसःवालपिं स्वया साइकलय् तया फलफुल मिइपि खना स्थानियत ग्याये माःगु खनेदु ।
जिल्ला प्रशासन, प्रहरी, नगरपालिकां लकडाउन पालना यायेत माइकिङ याना वया च्वसा मनूतयेसे बेवास्ता याना वयाच्वंगु दु ।
ख्वपया नगर दुने बंश्गोपाल, नासमना, गःहिटी, तःमारी, सुकुलढोका, गोमारी, तचपाल च्याम्हासींह, कमल बिनायक, सुर्यबिनायक, सल्लाघारी लगायतया थासय् न तरकारी बजार न्याइ मिइपि हुलयाना च्वंगु खने दु ।
लकडाउनय् आः दुनेया वस्तीइ नं कडाइ
समाचार श्रोत : विगेन तुलाधर | चौलाथ्व पञ्चमी ११४०
लकडाउनयात पूर्ण रुपं पालना याकेत आः स्वनिगःया दुनेया वस्तीइ नं कडाइ याइगु जूगु दु । थ्व हे झ्वलय् थौं जनसेवा प्रहरी प्रभागं येँय् दुनेया वस्तीया थीथी थासय् लकडाउन उल्लंघन याःपिन्त नियन्त्रणय् काःगु दु ।
दुनेया वस्तीइ मनूत म्वाःमदयक मुनाच्वनीगु व जुयाच्वनीगु गुनासो अप्वयेधुंकाः जनसेवा प्रहरी प्रभागं येँया दुनेया वस्तीइ कडाइ यानाहःगु खः ।
आइतबाः सुथय् जक हे लकडाउन उल्लंघन यानाः म्वाःमदयक पिहांवःपिं करीब ६सःम्हेसित नियन्त्रणय् कयागु जनसेवा प्रहरी प्रभागया डिएसपि सुनिल जंग शाहं धयादिल ।
थीथी थासं नियन्त्रणय् काःपिं उमित सचेतना कक्षा कयाः त्वःताछ्वयागु डिएसपि शाहं धयादिल ।
थौं सुथसिया ७ः३०ताः ईतक्कया दुने नियन्त्रणय् काःपिं ५सः व १२ मिजं अले सच्छि व ५म्ह मिसातयत सामाजिक दुरी कायम यासें सडकय् हे ३घौ तयाः सचेतना कक्षा काःगु खः ।
लकडाउन उल्लंघन याइपिन्त ६ला कैद वा ६सः तका जरिवाना अथवा नितां सजायँ जुइफइगु व्यवस्था दु ।
आःया अवस्थाय् थुनाय् तयेयंकूसां संक्रमणया जोखिम दुगुलिं प्रहरीं लकडाउन उल्लंघन याःपिन्त नियन्त्रणय् काःगु हे थासय् सचेतना कक्षा कयाः लितछ्वयेगु याःगु दु ।
अथे हे, लकडाउन उल्लंघन याःगु सच्छि व ३ सवारी साधन नं होल्ड यानागु प्रहरीं न्ह्यथंगु दु ।
लकडाउन कडा, पिहा वलकि खुला तक कैद जुइगु
लहनान्युज | चौलाथ्व पञ्चमी ११४०,चैत्र १६ गते
भारत वा मेगु देय् पाखे वइपि क्वारेन्टाइनय् मच्वनिपिं व लकडाउनया इलय् लँय् जुइपिन्त सरकारं कडा कारबाही याइगु जुगु दु ।
थौं आइतवाः कोभिड–१९ रोग संक्रमण रोकथाम तथा नियन्त्रण उच्चस्तरीय समन्वय समिति बैठकं लकडाउनयात झन् कडा यायेगु निर्णय याउगु दु ।
क्वारेन्टाइनय् च्वने माने मजुइपिन्त संक्रामक रोग ऐन २०२० अनुसार कारबाही याये धका धाःगु दु । ‘
ऐनया आदेश अपहेलना याइपिन्त सच्छि निसे लच्छि तक कैद व अधिकृत मनू तयेत ज्याय् पंगः थनिपिन्त खुला तक कैद, खुसः तका जरिवाना याये फइ व्यवस्था दु ।
गुकथं कारबाही याये फइ धका प्रमुख जिल्ला अधिकारीया तजबिजय् जुइगु व्यवस्था ऐनय् दु ।
