Display Style:
Column Style
राजदूत शाक्यं कोरोना नियन्त्रणया माःगु इजरायली सफ्टवेयर एप्लिकेसन हइगु
लहनान्युज | चौलाथ्व षष्ठी ११४०, चैत्र १७ गते
इजरायलया लागि नेपाली राजदूत अञ्जान शाक्यं कोरोना भाइरस (कोभिड–१९) या संक्रमणयात नियन्त्रण यायेत इजरायलयात छ्यलाच्वंगु सफ्टवेयर एप्लिकेसन ‘सेफ प्लेस’ यात नेपालय् न छ्यलेत गुलि सम्भव जुइ धका सहलह याःगु दु ।
कोरोनाया संक्रमणं हलियकं ग्यानापुसे च्वना वनाच्वंगु इलय् राजदूत शाक्यं उगु सफ्टवेयर एप्लिकेसन नेपालय् छ्यले फइ मफइ विषयय् इजरायलया केएलपी मामन कम्पनीया प्रतिनिधिपिं नाप व नेपाःया स्वास्थ्य तथा जनसंख्या मन्त्रालयया पदाधिकारीपि नाप भिडियो कन्फरेन्समार्फत सहलह याःगु खः ।
उगु कम्पनीया प्रतिनिधिपिन्स एप्लिकेसन कोरोना संक्रमणयात गये याना नियन्त्रण याये फइ धका भिडियो कन्फरेन्सपाखे न्ह्यब्बःगु खः ।
नेपाःया स्वास्थ्य तथा जनसंख्या मन्त्रालयपाखे प्रमुख विशेषज्ञ डा. दिपेन्द्र रमण सिंह नेतृत्वया पुचल उगु एप्लिकेसन नेपालय् उपयुक्त जुइ वा मजुइ बारेय् जानकारी बियादिगु खः ।
उगु सहलहय् एचइओसी प्रमुख, वरिष्ठ जनस्वास्थ्य प्रशासक सागर दाहाल, गुणस्तर मापन तथा नियमन महाशाखापाखे वरिष्ठ जनस्वास्थ्य अधिकृत लगायत पिनिगु न ब्बति कयादिगु खः ।
इजरायलय् उगु सफ्टवेयर एप्लिकेसन छुयःगुया कारणं लकडाउन हे मयासे कोरोना संक्रमणयात नियन्त्रण कायेत ताःलागु धका कम्पनीं जानकारी बिउगु खः ।
थुगु एप्लिकेसन इटाली, क्यानडा, दुबई तथा मेक्सि लगायत नाप मेगु देशय् न छ्यलिगु ज्या जुइ धुकुगु दु धका कम्पनिं जानकारी बिउगु खः ।
शाक्यं थ्व स्वया न्ह्य कोरोना भाइरसया बारेय् परराष्ट्रमन्त्री प्रदीपकुमार ज्ञवाली, श्रम, रोजगार तथा सामाजिक सुरक्षा मन्त्री रामेश्वर यादव तथा नेपाल सरकारया उच्चस्तरीय पदाधिकारीपिं नाप दुथ्याःगु भिडियो कन्फ्रेन्सय् ब्बति कया इजरायल व साइप्रसया कोरोना संक्रमणसम्बन्धी तथ्यांक, नेपाली तयेगु अवस्था, नेपाली तयेगु कोरोनाया कारण खने दइगु समस्या, नकारात्मक प्रभाव, वये फइगु समस्या, समस्या समाधानया उपायबारे सहलह जुगु खः ।
उगु सहलह ज्याझ्वलय् दक्षिण अफ्रिका, मलेसिया, जापान तथा दक्षिण कोरियाया नेपाली नियोगया राजदूतपिनिगु ब्बति दुगु खः
येँ महानगरं छेँय् च्वना कोरोना दु मदु सिइके फइ प्रविधि एप्स दयकल
नृपेन्द्रलाल श्रेष्ठ | चौलाथ्व षष्ठी ११४०,चैत्र १६ गते
कोरोना (कोभिड — १९) या सम्भावित महामारीयात निगरानी यायेत येँं महानगरपालिकां आइतवाः ‘नेपाल कोभिड १९ निगरानी प्रणाली’ सार्वजनिक याउगु दु ।
येँ महानगरया प्रमुख बिद्यासुन्दर शाक्यं उगु प्रणाली विकासकर्तापिं नाप थःथःगु थासं भिडियो कन्फरेन्सयाना सभा—गृहपाखे उगु प्रणालीयात न्ह्याकुगु खः ।
थुकियालागि सूचना प्रबिधि महाशाखां समन्वय याइगु खः । सफ्टवेयर विकासकर्ता सूचना प्रविधि विशेषज्ञपिन्स प्रणाली विकास याउगु खः । प्रणालीइ वःगु सूचयात सम्वन्धि ल्वय् या सम्बन्धित विशेषज्ञ डाक्टर, तथ्याङ्क विशेषज्ञ, भौगोलिक सूचना–प्रविधि विषेषज्ञपिन्स तथ्य विश्लेषण याना उकिया आधारं जिज्ञासु प्रयोगकर्ता व महानगरया अवस्थाया बारेय् उगु प्रणालीपाखे सूचं बिइ ।
तथ्य विश्लेषण लिपा विरामीयात सावधानी अपने याये माः वा म्वाः, छेँय् सुरक्षित जुइ वा स्वास्थ्य संस्था् वनेमालि ? विशेषज्ञ स्वास्थ्य सेवा आवश्यक मालिला ? अज्यागु बिरामीया अवस्था सिइकेत अःपुइ ।
थुगु प्रणालीं संक्रमणया आशंका जुपिं मनूत अस्पताल वना भीड जुइगु अवस्थाय् कमी जुइगु बिश्वास प्रणाली विकासकर्ता तयेस याःगु दु ।
महानगरं तथ्यया आधारित स्वास्थ्य सेवा प्रवाह याये फइ व सम्वन्धित मनू तयेस छेँय् च्वना सेवा कायेगु अवसर न दइ ।
थुगु प्रणाली शुभारम्भ यानादिसे प्रमुख शाक्यं वःगु छु ई संवेदनशील परिस्थितियात ध्यानय् तया थुगु प्रणाली बिकास यानागु खःधका धया दिगु खः । गुनं इलय् मनूतयेस सावधानी जक न सेवा प्रवाहयायेत अपुइ ध न धयादिगु खः । सेवा बिइ थाय् वासः मयासे मगाःम्ह बिरामीयात अनावश्यक प्रक्रिया, झन्झट व खर्च याये मालि मखू । जिमिस थुगु सेवां बालाक व व्यबस्थित दयेका यकिगु जुइ धका धयादिगु खः ।
येँ मनपाया प्रमुख शाक्यं प्रभावकारी लिच्वःया अपेक्षा तयागु दु धका धयादिगु खः । ‘आतक दुगु ज्ञान व अनुभवपाखे विश्व स्वास्थ्य संगठनं याःगु सार्वजनिक तथ्यया आधारय् थुगु प्रणालीं कोभिड–१९ या संक्रमणया सम्भावनायात अपुइगु, व मनू तयेगु स्थितिया गम्भीरता थपिन्स हे मुल्याङ्कन यायेत अपुइ धका धयादिगु खः । ‘थुकियात अझ व्यवस्थित याना यंकेत मेगु छु माःसा जिमित महानगरपालिकाया ग्वाहालिं सञ्चालन जुगु नेपाल एम्बुलेन्स सेवा (१०२) यात परिचालन याना सेवा याकन व उपचारय् गुणस्तरीय दयेकेगु जुइ धका धयादिगु खः ।’
थुगु प्रणाली आतक या कोभिड नियन्त्रणया लागि तयार यानागु खः धका जानकारी बियादिगु खः।’
प्रणालीया बिकासकर्ता एवं सुचना प्रणालीविज्ञ भुषणराज श्रेष्ठ महामारी नियन्त्रणय् वये धुका थुकियात महानगरं नियमित छ्यले फइ धका धयादिगु खः।
उगु ज्याझ्वलय् उपप्रमुख हरिप्रभा खड्गी श्रेष्ठ, प्रवक्ता एवं वडा १५ या अध्यक्ष ईश्वरमान डंगोल, प्रशासन बिभागया प्रमुख नमराज ढकाल, सूचना प्रबिधि बिभागया निमित्त प्रमुख युवराज खनाल व जनस्वास्थ्य महाशाखाया प्रमुख नरेन्द्रबिलास बज्राचार्यपिनिगु न सहभागीदुगु खः।
गये याना जानकारी काये फइ ?
छिकपिन्स थ्व एप्स गुगलय् ‘प्लेस्टोर’पाखे डाउनलोड याना इन्स्टल याये फइ । इन्स्टल जुइ धुका थःगु बारे सूचना भरे याये फइ । छित बिःगु सूचनाया आधारय् कोभिड (१९या जोखिम दु वा मदु, गुलि जोखिम दु धका याःगु याउक सिइके फइ व दक्को सूचना सर्भरय् अभिलिखित जुइ । थुगु सूचनायात ड्यासबोर्डय् दुपिं डाक्टर लगायतया स्वास्थ्यकःमिपिन्स तत्काल स्वये फइ नाप अनुगमन शुरु याइ । गन थासं सूचं वःगु, तत्काल ड्याशबोर्डपाखे पत्ता लगे जुइ । थःथे दर्ता जुगु मनूयात स्कः तक थःगु स्थितिबारे एप मार्फत् सूचं बिइमा । उकिया आधारय् ड्याशबोर्डय् दुपिं स्वास्थ्यकःमिपिन्स छित स्थिति गयेच्व?, याकन लनिइ कि मलनिइ सिइके फइ । उकिया आधारं छेँय् हे ‘सेल्फक्वरन्टिन’ य् च्वनेमाः वा म्वाः, अस्पतालय् भर्ना जुइमा वा म्वाः सल्लाह बिइ ।
सर्भिलेन्स प्रणालीय् आवद्ध जुइ माःगु एप ‘कोविड–१९ एप प्ले स्टोरपाखे डाउन–लोड यायेत अझ न छु ई हालया लागि येँ महानगरपालिकां वेब साइट डब्लुडब्लुडब्लु डट काठमाडौँ डट जिओवी डट एनपीपाखे डाउन लोड याये फइ ।
निजी ब्बनेकुथिपिन्त राहत बिइमा
लहनान्युज | चौलाथ्व षष्ठी ११४०, चैत्र १७ गते
निजी ब्बनेकुथिपिन्स चैत महिनाय शुल्क मिनाहा यायेत शर्त तःगु दु । सरकारं आइतवाः कोरोना भाइरस (कोभिड–१९) पाखे प्रभावित जुपिन्त राहत घोषणा यायेगु झ्वलय् माध्यमिक तहतक निजी ब्बनेकुथिपिन्स लच्छिया लागि शुल्कय् आवासबाहेक मेगु छुट बिइगु निर्देशन बिउगु खः ।
निजी तथा आवासीय विद्यालय संघ नेपाल (प्याब्सन)पाखे सरकारं याउगु निर्णय लसकुसयासे थःपिन्स मखु सरकारं न राहत बिइमा धका धयादिगु खः ।
प्याब्सनया अध्यक्ष टिकाराम पुरी बैंकपाखे ऋण कयातपि ब्बनेकुथियात लच्छिया बैंक ब्याज मिनाहाया व्यवस्था याये माः धका धाःगु दु ।
जग्गा व भवन भाडाय् कयातपिनिगु ब्बनेकुथिगु लच्छिया भाडा लगे मजुइगु व्यवस्था सरकारं मिले याये माःगु अध्यक्ष पुरीं माग याःगु दु । सरकारं असंगठित क्षेत्रया श्रमिकपिनिगु लच्छिया छेँय् या भाडा मकायेत छेँय् थुवा तयेत इनाप याःगु खः ।
प्याब्सन अध्यक्ष पुरीं थुगु विषयय् लकडाउन खुले जुइ धुका सरोकारवालापिं नाप सहलह यायेगु जानकारी बिउगु खः ।
यलया १६ वडापाखे मास्क इनेगु ज्या न्ह्याकाच्वन
लहनान्युज | चौलाथ्व षष्ठी ११४०, चैत्र १७ गते
हलियकं महामारी जुयाच्वंगु कोरोना भाइरसपाखे नेपालय् न सरकारले लकडाउनया घोषण याउगु खः ।
स्वास्थ्यकःमिपिन्स मास्क मतेयस्य पिहा मवयेत इनाप याना वयच्वंगु खः । थौकन्ह्य बजारय् मास्कया अभाव जुया हाकु बजाः तक जुयाच्वंगु दु ।
\थ्व हे झ्वलय् यल महानगरपालिका १६ वडाध्यक्ष निर्मलरत्न शाक्यं वडापाखे मास्क इनेगु ज्या याना वयाच्वंगु दु ।
लकडाउनया झ्वलय् सुरक्षाकःपिनिगु अहम भुमिका दइ जुगुलि यल मंगलबजारया प्रहरी प्रभागया इन्चार्ज नाप इन्स्पेक्टर चंञ्चला श्रेष्ठयात मास्क व स्यानिटाइजर लल्हा से उगु ज्या न्ह्याकुगु दु । १६ वडा यकं मास्क इनेगु ज्या न्ह्याकुगु दु ।
अथहे, १६ वडायंक वासः छ्वाकिइगु ज्या न याना वयाच्वंगु दु ।
यल महानगरपालिका वडा १६ या वडाध्यक्ष निर्मलरत्न शाक्यं सामाजिक भूमिका न थःगु थःगु हे म्हसिका दुम्ह खः ।
लकडाउनया झ्वलय् सक्वया फोटो फिचर
लहनान्युज | चौलाथ्व षष्ठी ११४०
देय् यकं लकडाउनया झ्वलय् सक्वय् या फोटो फिचर
किपाः किचः सिं ज्यापु सक्व
